Pamangkot sang Amon mga Bumalasa

Sa iya sulat sa mga Hebreo, naghambal si apostol Pablo tuhoy sa “pagtungtong sang mga kamot.” Ang iya bala ginpatuhuyan amo ang pagtangdo sa mga gulang ukon may iban pa sia nga ginpatuhuyan?​—Heb. 6:2.

Mahimo ang ginpatuhuyan ni Pablo sa pagtungtong sang mga kamot amo ang pagpaambit sang dulot sang espiritu.

Matuod nga nagasiling man ang Biblia tuhoy sa pagtungtong sang mga kamot kon magtangdo sing responsibilidad gikan sa Dios. Halimbawa, si Moises “nagtakdong sang iya mga kamut” kay Josue sang gintangduan niya sia nga mangin tal-us nga lider. (Deut. 34:9) Sa Cristianong kongregasyon, ang mga kalipikado nga mga lalaki ginatangduan man paagi sa pagtungtong sang mga kamot. (Binu. 6:6; 1 Tim. 4:14) Naglaygay man si Pablo tuhoy sa indi pagdalidali nga pagtungtong sang mga kamot kay bisan sin-o nga tawo.​—1 Tim. 5:22.

Apang, sa sini nga teksto, ginpalig-on ni Pablo ang Hebreong mga Cristiano nga ‘magpanikasog padulong sa pagkahamtong’ karon nga ginbiyaan na nila “ang panguna nga doktrina.” Ginhinambitan niya dayon ang “paghinulsol gikan sa patay nga mga buhat, kag ang pagtuo sa Dios, ang panudlo tuhoy sa mga bawtismo kag ang pagtungtong sang mga kamot.” (Heb. 6:1, 2) Ang pagtangdo bala sa isa ka Cristiano nga mangin gulang isa ka panguna ukon sadsaran nga butang sang pagpanikasog sa pag-uswag agod mangin hamtong? Indi. Bangod ang pag-alagad subong gulang sa kongregasyon, isa ka tulumuron nga ginapanikasugan kag ginapabaloran sang hamtong na nga mga utod nga lalaki.​—1 Tim. 3:1.

Apang, may iban pa nga katuyuan ang pagtungtong sang mga kamot. Sang una nga siglo, ginsikway ni Jehova ang undanon nga Israel subong iya katawhan kag ginhatag ang iya pagpakamaayo sa espirituwal nga Israel, ang kongregasyon sang hinaplas nga mga Cristiano. (Mat. 21:43; Binu. 15:14; Gal. 6:16) Ang milagruso nga dulot sang espiritu, kaangay sang paghambal sing lain-lain nga hambal nagapamatuod sina nga pagbag-o. (1 Cor. 12:4-11) Sang nangin tumuluo si Cornelio kag ang iya panimalay, nakabaton sila sing balaan nga espiritu bangod “nagahambal sila sang lainlain nga hambal.”​—Binu. 10:44-46.

Kon kaisa, ang milagruso nga dulot ginapaambit paagi sa pagtungtong sang mga kamot. Sang ginbantala ni Felipe ang maayong balita sa Samaria, madamo ang ginbawtismuhan. Ginpadala didto sang nagadumala nga hubon sanday apostol Pedro kag apostol Juan. Ngaa? Aton mabasa: “Nian gintungtong nila [sining duha] ang ila mga kamot sa ila [bag-o lang nabawtismuhan] kag nakabaton sila sang balaan nga espiritu.” Mahimo nagakahulugan ini nga nakabaton sila sang dulot nga espiritu, kag makahimo sing gamhanan nga mga buhat nga makita sang iban. Ang isa nga nakakita sa sini amo si Simon nga nagahimo anay sing madyik. Makagod niya nga gintinguhaan nga baklon ang ikasarang nga magpaambit sa iban sang balaan nga espiritu paagi sa pagtungtong sang mga kamot agod makahimo sila sing mga milagro. (Binu. 8:5-20) Sang ulihi, 12 ka tawo ang nabawtismuhan sa Efeso. Aton mabasa: “Sang gintungtong ni Pablo ang iya mga kamot sa ila, ang balaan nga espiritu nagkunsad sa ila, kag naghambal sila sang lainlain nga hambal kag nagpanagna.”​—Binu. 19:1-7; ipaanggid ang 2 Timoteo 1:6.

Gani, mahimo nga ang ginpatuhuyan ni Pablo sa Hebreo 6:2 amo ang pagtungtong sang mga kamot agod ipaambit ang dulot sang espiritu sa bag-o nga mga tumuluo.