Duahia Taudia Edia Henanadai

Aposetolo Paulo be Baibel bukana Heberu lalonai “imana kwarana dekenai atoa” karana ia gwauraia. Ia be elda taudia abia hidi karana ia herevalaia o gau ma ta ia herevalaia?​​—Heb. 6:2.

Unai ita diba namonamo lasi, to reana Paulo be “imana kwarana dekenai atoa” karana ia herevalaia neganai, ia be lauma helaga ena harihari gaudia henia karana ia herevalaia.

To, Baibel be Dirava ena orea idia naria taudia abia hidi karana ia herevalaia neganai, “imana kwarana dekenai atoa” karana ia herevalaia danu. Hegeregere, Iosua ese Mose ena gabuna ia abia totona, Baibel ia gwau Mose ena “imana be [Iosua] kwarana ai ia atoa.” (Deu. 34:​9, BHğ) Aposetolo taudia ese Keristani kongrigeisen naria taudia haida idia abia hidi gwauraia neganai, Baibel ia gwau edia imana be unai tatau edia kwarana latanai idia atoa. (Kara 6:6; 1 Tim. 4:​14) Paulo be Timoteo ia hamaoroa, ena imana be tau ta ena kwarana ai do ia atoa kau haraga lasi.​​—1 Tim. 5:​22, BHğ.

To, Paulo be Heberu Keristani taudia ia hagoadaia ‘hereva badadia do idia tahua’ badina idia be “diba hamatamaia gaudia” idia diba vadaeni. Bena inai gaudia ia gwauraia: “Kara dika dekena amo lalona giroa, bona Dirava abidadama henia, . . . bapatiso, imana kwarana dekenai atoa” karadia ia herevalaia. (Heb. 6:​1, 2) Elda taudia abia hidi karana be diba hamatamaia gauna ta, bona tadikaka ese do ia tahua be namo, a? Lasi. Bema kongrigeisen lalonai lo tadikaka ta be elda hesiai dagina ia tahua, unai be gau namona, bona unai hesiai gaukarana ia laloa bada be namo.​​—1 Tim. 3:1.

To, imana kwarana dekenai atoa karana be badina ma ta totona idia gaukaralaia danu. Aposetolo edia negai, Iehova be Israela taudia korikoridia ia dadaraia bona horoa Keristani taudia ia abia dae. (Mat. 21:43; Kara 15:14; Gal. 6:​16) Unai be momokani badina horoa Keristani taudia be lauma helaga ena harihari gaudia idia abia, hegeregere gado idauidau ai idia hereva. (1 Kor. 12:​4-​11) Korenelio bona ena ruma bese be Keristani taudia ai idia lao neganai, idia be lauma helaga idia abia, badina “gado idauidau dekenai idia hereva” diba.​​—Kara 10:​44-​46.

Nega haida aposetolo taudia ese edia imana be taunimanima edia kwarana dekenai idia atoa, unai amo lauma helaga ena harihari gaudia idia henia. Filipo be Samaria dekenai sivarai namona ia harorolaia neganai, taunimanima momo be bapatiso idia abia. Hakaua oreana ese Petero bona Ioane be Samaria dekenai idia siaia lao. Dahaka dainai? Baibel ia gwau: “Idia ruaosi edia imana idia atoa idia [bapatiso matamata taudia] edia latanai, bona Lauma Helaga idia abia.” Reana unai ena anina be lauma helaga ena harihari gaudia​​—ma haida ese idia itaia diba karadia​​—idia abia. Unai be momokani badina Simona, guna meamea karadia ia karaia tauna, be lauma helaga ena gaukara siahuna ia itaia neganai, ia ura dikadika aposetolo taudia amo unai siahu ia hoia. Badina ia gwau, “Inai siahu umui henia lau dekenai, bona lauegu imana ia dekenai lau atoa tauna be Lauma Helaga do ia abia.” (Kara 8:​5-​20) Gabeai, Efeso ai taunimanima 12 be bapatiso idia abia. Baibel ia gwau: “Paulo ese iena imana idia edia latanai ia atoa neganai, Lauma Helaga idia dekenai ia diho vadaeni. Bona idia be gado idauidau dekenai idia hereva, bona peroveta hereva idia gwauraia.”​​—Kara 19:​1-7; 2 Timoteo 1:6 hahegeregerea.

Ita gwau diba, aposetolo Paulo be Heberu 6:2 lalonai imana kwarana dekenai atoa karana ia herevalaia neganai, ia be lauma helaga ena harihari gaudia henia karana ia herevalaia.