Yuvu Y’atangi

Muna nkand’andi kwa Ayibere, Paulu wa ntumwa wayika e “ngyambik’a moko.” Nga salu kia tumbika akuluntu kayika, ovo diambu diakaka?​—Ayib. 6:2.

Ka dina mfunu ko mu banzikila dina kavova. Kadi e ngyambik’a moko kayika Paulu, i kaulwila tukau twa mwanda.

E ngyambik’a moko keyikanga Nkand’a Nzambi i lau dia salu kia kintinu. Mose ‘wayambika Yosua moko’ vava kansola kimana kavinga va fulu kiandi. (Nsi. 34:⁠9) Muna nkubika a Kikristu, akala azikuka bayambikwa moko vava batumbikwa kinkengi. (Mav. 6:6; 1 Tim. 4:​14) Paulu watumba fu kia yambika muntu ampa moko mu nzaki.​—⁠1 Tim. 5:22.

Kansi, Paulu wawondelela Akristu a esi Ayibere ‘benda yakuna nzikuka,’ ‘bayambula mambu ma lubantiku.’ I bosi wayika ‘mpilukw’a ntima muna mavangu mafwa, yo lukwikilu muna Nzambi, y’elongi dia mvuba, ye ngyambik’a moko.’ (Ayib. 6:​1, 2) Nga tumbikwa kinkengi diambu dia lubantiku dina Akristu bafwete kwendela yakuna nzikuka? Ve. Diamfunu vo mpangi zamakala bazikuka muna mwanda bakala y’etima dia sala se akuluntu muna nkutakani.​—⁠1 Tim. 3:⁠1.

Kansi, e ngyambik’a moko yasadilwanga mpe mu mambu makaka. Muna tandu kiantete, Yave wayambula Isaele ya nitu yalembi kala nkangu andi yo sola Isaele ya mwanda bena vo i nkutakani ya Akristu akusua. (Mat. 21:43; Mav. 15:14; Ngal. 6:​16) E masivi ma tukau twa mwanda, nze vovela mu ndinga zakaka masonganga e ziku kia diambu diadi. (1 Kor. 12:​4-​11) Vava Koneleo yo esi nzo andi bakituka akwikidi, batambula mwand’avelela, “bavovele ndinga zakàka.”​—⁠Mav. 10:​44-46.

Ezak’e ntangwa, masivi ma tukau mavewanga muna ngyambik’a moko. Vava Filipo kasamuna nsangu zambote muna Samaria, ndonga bavubwa. E Buka kia Selo Yambuta batuma Petelo ye Yoane wa ntumwa kuna Samaria. Ekuma? Tutanganga vo: “I bosi [yau ewole] babayambikidi o moko, batambwidi o mwand’avelela.” Ediadi disonganga vo batambula lukau lwa mwanda, wisa kilenda moneka kw’akaka. Tuzeye diambu diadi kadi Simone ona wakala ngang’a mpandu, vava kamona e wisa kia mwand’avelela, wavana nzimbu kimana kakala ye wisa kia yambika akaka moko batambul’o mwand’avelela yo vanga masivi. (Mav. 8:​5-​20) I bosi, wantu 12 bavubwa muna Efeso. Tutanganga vo: “O Paulu, vava kabayambikidi o moko, o mwand’avelela ubaluakìdi; bavovèle muna ndinga zakaka, yo sakula.”​—⁠Mav. 19:​1-7; tezanesa ye 2 Timoteo 1:⁠6.

Muna kuma kiaki, e ngyambik’a moko kayika Paulu muna Ayibere 6:​2, i ntambika wisa kia masivi ma mwanda kw’akwikidi ampa.