Lipuzo Ze Zwa kwa Babali

Mwa liñolo la hae la na ñolezi Maheberu, muapositola Paulusi na bulezi za “ku beya mazoho.” Kana fo na talusa ku ketiwa kwa maeluda kamba nto ye ñwi fela isili?—Maheb. 6:2.

Ku bonahala kuli mwendi Paulusi na talusa za ku fa limpo za moya ka ku beya mazoho.

Bibele i bulela za ba bañwi ba ne ba filwe buikalabelo mwa sebelezo ya Mulimu ka ku beiwa mazoho. Mushe ‘na beile mazoho fahalimu’ a Joshua ha na mu keta kuli a mu yole. (Deut. 34:9) Mwa puteho ya Sikreste, banna ba ba fitile ku ze konisa ne ba ketiwanga ka ku beiwa mazoho. (Lik. 6:6; 1 Tim. 4:14) Paulusi na elelize za ku sa pakisa ku beya mazoho fahalimu a mutu.—1 Tim. 5:22.

Kono Paulusi na susuelize Bakreste ba Maheberu kuli ba ‘fite ku za ku petahala’ kakuli cwale se ba siile ‘litaba za makalelo.’ Kihona cwale a bulela za “ku baka kwa misebezi ye shwile, ni wa tumelo ku Mulimu; ni wa tuto ya likolobezo, ni wa ku beya mazoho.” (Maheb. 6:1, 2) Kana ku ketiwa ku ba maeluda ki yona nto fela ye ne ka tahisa kuli Bakreste ba kalise ku eza zwelopili? Batili. Ku ba eluda mwa puteho ki sikonkwani se ba swanela ku fita ku sona mizwale ba ba hulile mwa tumelo mi hasamulaho ba swanela ku itebuha tohonolo yeo.—1 Tim. 3:1.

Kono ku beya mazoho ne ku itusiswa ka nzila ye ñwi hape. Mwa linako za baapositola, Jehova na hanile sicaba sa Isilaele ni ku keta Isilaele wa kwa moya, yona puteho ya Bakreste ba ba tozizwe. (Mat. 21:43; Lik. 15:14; Magal. 6:16) Limpo za moya za ku eza limakazo, ze cwale ka ku bulela lipuo li sili, ne li file bupaki bwa kuli Jehova na ketile sicaba si sili. (1 Makor. 12:4-11) Kornele ni lubasi lwa hae ha ne ba bile balumeli, ni bona ne ba amuhezi moya o kenile, mi se ne si bonisa cwalo kikuli ne ba “bulela lipuo li sili.”—Lik. 10:44-46.

Ka linako ze ñwi, limpo za ku eza limakazo ne li fiwanga ka ku beiwa mazoho. Filipi ha na kutalize taba ye nde mwa Samaria, batu ba bañata ne ba kolobelizwe. Sitopa se si etelela ne si lumile kwateñi baapositola ba babeli bo Pitrosi ni Joani. Kabakalañi? Lu bala kuli: “Cwale [bubeli bwa bona] ba beya mazoho fahalimu [a batu ba ba s’a zo kolobezwa], mi ba fiwa Moya o Kenile.” Fo ku swanela ku ba kuli ne ba amuhezi limpo za moya, ili m’ata a na kona ku iponelwa ki ba bañwi. Lwa ziba taba yeo kakuli Simoni, ya na ezanga mabibo pili, na iponezi mo ne u sebeleza moya wo mi ka mukwañuli a lika ku leka m’ata a ku beyanga mazoho a hae fahalimu a ba bañwi kuli a ba fe moya o kenile ilikuli ba kone ku eza limakazo. (Lik. 8:5-20) Hamulaho wa fo, batu ba 12 ba mwa Efese ba kolobezwa. Lu bala kuli: “Paulusi a man’o ba beya mazoho, Moya o Kenile wa taha fahalimu a bona; kiha ba bulela lipuo, mi ba polofita.”—Lik. 19:1-7; mu bapanye 2 Timotea 1:6.

Kacwalo, kwa Maheberu 6:2, ku bonahala kuli Paulusi na talusa ku beya mazoho fahalimu a balumeli ba banca kuli ba fiwe limpo za moya.