Bipangujo bya Batangi

Mutumibwa Polo wēsambīle pa “kutentekwa kwa maboko” mu mukanda waātumīne Bahebelu. Lelo wādi unenena pa kutongwa kwa bakulumpe ne bengidi ba mingilo’ni nansha pa kintu kikwabo?—Bah. 6:2.

I bikomo’tu kwitabija amba i amo, inoko mobimwekela Polo wādi wisambila pa kutentekwa kwa maboko kwa kusambulwila bantu byabuntu bya mushipiditu.

Bible wisambilanga ne pa kutentekwa kwa maboko pa kupa bantu biselwa bya kiteokratike. Mosesa pa kutonga Yoshua bu mpingakani wandi, ‘wamutentekele makasa.’ (Kup. 34:9) Mu mpangiko ya Bwine Kidishitu, bana-balume bamobamo babwanye bisakibwa bādi batongwa na kutentekwa maboko. (Bil. 6:6; 1 Tem. 4:14) Polo wāletele kidyumu kya kubulwa kutenteka muntu maboko bukidibukidi.—1 Tem. 5:22.

Inoko, Polo wāsoñenye Bene Kidishitu Bahebelu amba “tutundulukile ku byabukulu” byotwapwa kushia “owa mwanda wa pangalwilo.” Kupwa wātela ‘kwalamuka ku mīngilo mifwe, kwitabija kudi Leza, lufundijo lwa mbatyijo, ne kutentekwa maboko.’ (Bah. 6:1, 2) Lelo kutongwa kwa bakulumpe kukokeja kwikala bu mwanda wa pa ngalwilo wadi ulomba Bene Kidishitu kushia ne kutundulukila ku bya bukulu? Mhm. Kwikala bu mukulumpe pa kipwilo i kitungo kifikilanga’po batutu bapye ne kwikisangela.—1 Tem. 3:1.

Ino kwādi ne muswelo mukwabo wa kutentekwa kwa maboko. Mu myaka katwa kabajinji, Yehova wāpelele Isalela wa ku ngitu bu muzo wandi mutongwe ne kwitabija’ko Isalela wa ku mushipiditu, kipwilo kya Bene Kidishitu bashingwe māni. (Mat. 21:43; Bil. 15:14; Ngat. 6:16) Byabuntu bya mushipiditu bya kulonga bingelengele, kimfwa kwisamba mu ndimi, i bukamoni bwālombwele kuno kushinta. (1 Kod. 12:4-11) Konilusa ne ba mu njibo pobāitabije, abo bakidi bapya, bātambwile mushipiditu sandu, “ke banena ne ndimi īngi.”—Bil. 10:44-46.

Mu byaba bimo, byabuntu bya kulonga bingelengele byādi ke bisambulwilwa bantu na kutentekwa kwa maboko. Fidipa pa kusambakanya myanda miyampe mu Samadia, bavule bābatyijibwe. Kitango kyendeji kyātuma’mo ba mutumibwa Petelo ne mutumibwa Yoano. Mwanda waka? Tutanga amba: “Ebiya [bano babidi] bebatenteka maboko abo [boba badi bakitamba mu kubatyijibwa’ba] batambula Mushipiditu Sandu.” Kino kishintulula amba bātambwile kyabuntu kya mushipiditu, kyebapa bukomo bumweke. Kyetuyukija bino i mwanda Shimona, yewa wādi ulonga bya majende pa kala, pa kumona mwingidila mushipiditu wāikele na lwiso kakimbe kupota kyabuntu kya kutenteka bantu maboko mwanda wa kwibapa mushipiditu sandu wa kulonga bingelengele. (Bil. 8:5-20) Mwenda mafuku, bantu 12 ba mu Efisesa bābatyijibwa. Tutanga amba: “Polo byāpwile kwibatenteka maboko andi Mushipiditu Sandu webafikile, ke banena ne ndimi īngi nayo, ne kufumika ke bafumika myanda.”—Bil. 19:1-7; dingakanya na 2 Tem. 1:6.

Nanshi, mu Bahebelu 6:2, bimweka’mba Polo wādi wisambila pa kutenteka kwa maboko kwa kupa bapya mu lwitabijo byabuntu kya mushipiditu sandu.