Nkonko ya babadi

Mu mukanda uvua mupostolo Paulo mufundile bena Ebelu, wakakula bua ‘ditentekela bantu bianza.’ Uvuaku wakula bua disungula dia bakulu peshi bua bualu bukuabu anyi?​—Eb. 6:2.

Kakuena bualu bua kujudila milandu to. Paulo uvua mua kuikala wakula bua ditentekela bantu bianza bua kubapesha bipedi bia nyuma muimpe.

Bible udi wakula bua ditentekela bantu bianza bua kubapesha midimu ya Nzambi. Tshilejilu, Mose ‘wakatentekela Yoshua bianza’ pakamusungulabu bua kupingana pa muaba wende. (Dut. 34:9) Mu tshisumbu tshia bena Kristo, bavua basungula bamue bantu bavua bakumbane pavuabu babatentekela bianza. (Bien. 6:6; 1 Tim. 4:14) Paulo wakambila bakulu bua kabatentekedi bantu bianza lubilu.​—1 Tim. 5:22.

Kadi wakabela kabidi bena Kristo bena Ebelu bua ‘baye too ne ku buakane bua tshishiki’ bu mukavuabu balekele ‘diyisha dia malu a ku tshibangidilu.’ Pashishe kuakulaye bua ‘kukudimuna kua mutshima ku midimu mifue, ne bua ditabuja dia kudi Nzambi, ne bua diyisha dia kubatiza, ne bua ditentekela dia bantu bianza.’ (Eb. 6:1, 2) Disungula dia bakulu divua dilongesha dia ku tshibangidilu divua bena Kristo bena Ebelu ne bua kuipatshila anyi? Tòo. Kulua mukulu mu tshisumbu mmudimu udi bana betu ba balume bakadi bashindame mu ditabuja ne bua kuipatshila ne pashishe kuwitaba.​—1 Tim. 3:1.

Bavua batentekelangana kabidi bianza bua bualu bukuabu. Mu bidimu lukama bia kumpala, Yehowa wakabenga tshisamba tshia bena Isalele ne kupingaja tshisumbu tshia bena Kristo bela manyi pa muaba watshi. (Mat. 21:43; Bien. 15:14; Gal. 6:16) Bipedi bia nyuma bu mudi bia kuakula mu miakulu biakaleja dishintuluka edi. (1 Kol. 12:4-11) Pakalua Kônelio ne ba mu nzubu muende bena Kristo, bakapeta nyuma muimpe bualu bakatuadija ‘kuakula mu miakulu mikuabu.’​—Bien. 10:44-46.

Imue misangu, bavua bapesha bantu bipedi bia nyuma muimpe pavuabu babatentekela bianza. Tshilejilu, pavua Filipo muyishe lumu luimpe mu Samalea, bantu ba bungi bakatambula. Kasumbu kaludiki kakatuma mupostolo Petelo ne Yone mu tshimenga atshi. Bua tshinyi? Bible udi wamba ne: ‘Pakatentekela Petelo ne Yone bantu bavua bafume ku ditambula bianza, bakangata nyuma muimpe.’ Bualu ebu buvua buleja ne: bavua mua kuikala bapete bipedi bia nyuma bivua bantu bakuabu mua kumona. Tudi tuamba nanku bualu Simona uvua muena majimbu kumpala, wakamona malu avua bantu bavua ne nyuma benza; ke lukuka kumusaka bua kujinga kusumba bukokeshi bua kutentekela bantu bakuabu bianza bua kubapesha nyuma. (Bien. 8:5-20) Pashishe bantu 12 ba mu Efeso bakatambula. Bible udi wamba ne: ‘Pakabatentekela Paulo bianza pa mitu yabu, nyuma muimpe wakabapuekela; bakabanga kuakula mu miakulu mikuabu, bamba bualu bua Nzambi.’​—Bien. 19:1-7; tangila 2 Timote 1:6.

Nunku bidi bimueneka ne: mu Ebelu 6:2, Paulo uvua wakula bua kutentekela bena Kristo bapiabapia bianza bua kubapesha bipedi bia nyuma.