Malwihu Kufuma Kudi Antañi

Mumukanda wasonekeleliyi Aheberu, kapostolu Pawulu wahosheli ‘hakunañika makasa.’ Komana wadiña nakuhosha hakutonda aeluda ntahindi wateneneña chuma chacheñi?—Aheberu 6:2.

Hitwatela kukakela hayitoñojoka yetuku, ilaña Pawulu watela wahosheleña hakunañika makasa kulonda kuhana yamukunkulu yaspiritu.

Bayibolu yahosha hakunañika makasa kwesekeja nakutonda kwateokalatiki. Mosi ‘wanañikili makasindi’ hadi Yoshuwa hampinji yamutondeluwu kwikala nswana. (Kuhituluka 34:9) Muchipompelu chawakwaKristu, amayala ashikahu ayitondeleña kuhitila mukuyinañika makasa. (Yililu 6:6; 1 Timotewu 4:14) Pawulu wasoñamishili nindi bayi munyakala kunañika muntu makasaku.—1 Timotewu 5:22.

Hela chochu, Pawulu wayikolesheli akwaKristu Aheberu ‘kukula nakupama’ chelili analeki dehi ‘kuhosha nsañu jatachi.’ Kuhiñahu wateneni ‘hakubalumuka mumuchima nakuleka nyidimu yafwa, nichakumwitiya Nzambi, nichakuleja nsañu [jachipapatishu] nijakunañika makasa.’ (Aheberu 6:1, 2) Komana kutondewa kwikala aeluda dichuma chacheni akwaKristu chiyatela kufwila hakwila nawu apami? Inehi. Kwikala eluda muchipompelu bayi neyi hichikonkwanyi chatela kufwilañawu amana kwetu ejimaku, ilaña amana kwetu atondañawu hamu neyi aeluda apama dehi.—1 Timotewu 3:1.

Hela chochu, kunañika makasa akwizatishileña munjila yikwawu. Muyaaka nkulakaji yatachi, Yehova wayikaanini aIsarela ilaña wakiswilili chipompelu chawakwaKristu awayishewa. (Matewu 21:43; Yililu 15:14; Aŋalija 6:16) Yamukunkulu yaspiritu yachihayamisha, yidi neyi kuhoshela mumadimi, diyamwekesheli nawu aIsarela ayikanini. (1 Akorinda 12:4-11) Chetiyiliyi Konelisu hamu nichisaka chindi, niwena atambwilili spiritu yajila, neyi chiyamwekesheli kuhitila ‘mukuhoshela mumadimi.’—Yililu 10:44-46.

Mpinji yikwawu, yamukunkulu yachihayamisha ayihanineña kuhitila mukunañika makasa. Fwilipi chashimwininiyi nsañu yayiwahi muSamariya, antu amavulu ayipapatishili. Izaza dalombolaña datemesheli kapostolu Petulu niYowanu kuya kuSamariya. Muloñadi? Twatañaña nawu: ‘[Antu amaha apapatishiluwu] hiyakuyinañika makasa [kudi awa ayedi], atambula nispiritu yajila.’ Chatalishili mukwila nawu atambwilili chamukunkulu chaspiritu, ñovu yatwesheli kumonawu antu amakwawu. Tweluka mwenimu muloña Shimona, wadiña mukwakuhoña, chamweniyi iyi ñovu yaspiritu nawa mulwisu wakeñeli nindi yayilandi kulonda yanañikeña makasindi hadi antu yayinkeña spiritu yajila, yikuyinkaña ñovu yakwila yihayamisha. (Yililu 8:5-20) Chimwahitili mpinji, antu 12 ayipapatishili muEfwesesa. Twatañaña nawu: ‘Pawulu chanayinañikiyi makasindi, spiritu yajila hiyikwinza hadi wena; hiyakuhosha madimi acheñi nakuprofweta.’—Yililu 19:1-7; esekejenu 2 Timotewu 1:6.

Dichi, hamukanda waAheberu 6:2, Pawulu watela wadiña nakuhosha hakunañika makasa kulonda kuhana yamukunkulu yaspiritu kudi akwakwitiya amaha.