Penjo Moa Kuom Josombwa

E barupe ne Jo Hibrania, jaote Paulo nowuoyo kuom wach “yieyo lwedo.” Be ne owuoyo kuom wach keto ji obed jodongo e kanyakla, koso nowuoyo kuom wach moro mopogore?​—Hibr. 6:2.

Ok wanyal wacho gadier chuth gima Paulo ne wuoyoe, to kata kamano nenore ni ne owuoyo kuom yieyo lwedo kichiwo mich mag roho.

Muma wuoyo kuom wach yieyo lwedo kiketo ji e migepe mag tij Nyasaye. Musa ‘noyieyo lwete kuom’ Joshua kane okete kaka jal makawo loye. (Rapar 34:9) E kanyakla mar Jokristo, ne iketo chwo moko obed jodongo, kiyieyo lwedo kuomgi. (Tich 6:6; 1 Tim. 4:14) Paulo ne okwero wach rikni yieyo lwedo kuom ng’ato.​—1 Tim. 5:22.

Kata kamano, Paulo nojiwo Jokristo ma Jo-Hibrania mondo ‘gidhi nyime gi puonj motegno,’ nikech koro ne giseweyo puonj ‘michakogo.’ Bang’e ne owuoyo kuom wach “lokruok a e timbe motho kod mar yie kuom Nyasaye, kod puonj mar lwokruokgo, [koda wach] yieyo lwedo.” (Hibr. 6:1, 2) Be keto ji obed jodongo ne en mana puonj michakogo, ma Jokristo ne onego odhi godo nyime? Ooyo. Migawo mar bedo jaduong’ en tich ma owete duto motegno e yie, onego ogomb chopoe kendo bang’e gibed ma morgo.—1 Tim. 3:1.

Kata kamano, wach yieyo lwedo ne itiyogo e yo moro machielo. E kinde Jokristo mokwongo, Jehova ne otamore Israel mar ringruok, ma oyiero Israel mar roho ema obed joge, tiende ni kanyakla mar Jokristo mowal kuom roho. (Math. 21:43; Tich 15:14; Gal. 6:16) Mich mag roho, kaka dhum e dhok mayoreyore, ne onyiso lokruokno. (1 Kor. 12:4-11) Kane Kornelio kaachiel gi joode obedo Jokristo, ne giyudo roho maler, mana kaka ne onenore kane “giwuoyo gi dhok mayore”​—Tich 10:44-46.

Ne nitie kinde moko ma ne iyieyo lwedo kuom ji mondo gibed gi mich mag roho. Kane Filipo lando wach maber e Samaria, ji mang’eny ne obatisi. Bura maduong’ ne ooro joote Petro kod Johana kuno. Nikech ang’o? Wasomo kama: ‘Eka ne joote ariyogi oyieyo luetegi kuom jogo ma nyocha oa batisi, mi jogo nonwang’o roho maler.’ Nyaka bed ni mano ne onyiso ni ne ginwang’o mich mag roho, tiende ni ne gibedo gi nyalo moko ma ne inyalo ne ayanga kuomgi. Wang’eyo mano nikech Simon, ma chon ne timo timbe juok, noneno kaka roho ne tiyo, mi tim wuoro nomiyo otemo chiwo pesa ne joote mondo en bende oyud teko mar yieyo lwedo kuom jomoko mondo omigi roho, mamiyo gitimo honini. (Tich 8:5-20) Bang’e, ne obatis ji 12 e Efeso. Wasomo kama: “Ka Paulo noyieyo luetene kuomgi, roho maler nobiro kuomgi; mi ne giwuoyo gi dhok mayore, kendo ne gikoro wacho.”—Tich 19:1-7; pim gi 2 Timotheo 1:6.

Kuom mano, e Jo Hibrania 6:2, nenore ni Paulo ne wuoyo kuom wach yieyo lwedo kimiyo joma yande eka obedo Jokristo, mich mag roho.