Karemdbã sogsgo

Lɛtr ning a Poll sẽn gʋls n tool kiris-neb nins sẽn yaa hebre dãmbã pʋgẽ, a goma “nus tikr” yelle. Rẽ yĩnga a ra gomda kãsem dãmbã yãkr yell bɩ, bɩ yaa bũmb a to yelle?—Heb. 6:2.

D tõe n yeelame tɩ wõnda a Poll ra gomda b sẽn da tikd nebã ne nus tɩ b paamd vʋʋsem sõngã n tõe n maan yel-soalmã yelle.

Biiblã sɩd gomda neb b sẽn tik ne nus n wilg tɩ b yãk-b lame n bobl tʋʋmd b sẽn na n tʋm Wẽnnaam yʋʋr yĩng yelle. A Moiiz sẽn wa n na n yãk a Zozue t’a ledg-a wã, a “tik-a-la ne a nusi.” (Tõo. 34:9) Pipi kiris-nebã wakatẽ me, b tika rap kẽer tẽeb sẽn bɩ ne nus n wilg tɩ b yãk-b lame n bobl-b tʋʋmde. (Tʋʋ. 6:6; 1 Tɩm. 4:14) A Poll me saglame tɩ b pa segd n yãg n tik rao ne b nus ye.—1 Tɩm. 5:22.

La a Poll sagla kiris-neb nins sẽn yaa hebre dãmbã tɩ b ‘loog Kirist koɛɛgã b sẽn sɩng n zãms pĩndã.’ Rẽ poore, a sõdga “zãmsg sẽn yaa sugr kosg yel-wẽnã yĩnga, la tẽeb ne Wẽnnaam, la lisgu, la nus tikri.” (Heb. 6:1, 2) Rẽ yĩnga kãsem dãmbã yãkr me ra naaga pipi bũmb nins kiris-nebã sẽn da segd n loog bɩ n gãng n kẽng taoorã bɩ? Ayo. Kiris-neb nins sẽn bɩ wã segd n bao n yɩɩ kãsem dãmba, la b kell n modg n tʋm b tʋʋmdã sõma.—1 Tɩm. 3:1.

Nusã tikr talla võor a to me. Pipi kiris-nebã wakatẽ, a Zeova basa Israɛll nebã la a ning kiris-neb nins sẽn paam vʋʋsem sõngã zaeebã barka. (Mat. 21:43; Tʋʋ. 15:14; Gal. 6:16) Vʋʋsem sõngã da sõngda kiris-nebã tɩ b maand yel-soalem la b gomd gom-zẽnã, tɩ wilgd vẽeneg tɩ Wẽnnaam bee ne bãmba. (1 Kor. 12:4-11) A Korney ne a zakã rãmb sẽn wa n lebg tẽedbã, b ‘goma gom-zẽnã,’ tɩ wilgdẽ tɩ bãmb me paama vʋʋsem sõngã.—Tʋʋ. 10:44-46.

Wakat ning me, b ra tikda neb ne nus sẽn na yɩl tɩ b paam vʋʋsem sõngã n tõe n maan yel-soalma. A Filip sẽn tɩ moon koe-noogã Samari wã, neb wʋsg sak n deega lisgu. Siglgã taoor lʋɩtb sull tʋma tʋm-tʋmd a Pɩɛɛr ne a Zã Samari. B tʋm-b-la bõe yĩnga? Biiblã yeta woto: “Dẽ, a Pɩɛɛr ne a Zã tika [neb nins sẽn deeg lisg paalmã] ne b nusi, la bãmb deega Sɩɩg Sõngo.” Dẽnd woto rat n wilgame tɩ b paama vʋʋsem sõngã n tõe n maan yel-soalem tɩ nebã yã. D mii rẽ vẽenega, bala a Sɩmo sẽn da yaa bag-bʋgdã yãa vʋʋsem sõngã sẽn sõngd kiris-nebã tɩ b maand yel-soalmã, tɩ kɩt t’a mak n na n da tõog-kãng n paam n tikd neb a taabã ne a nus tɩ b paam vʋʋsem sõngã n maand yel-soalmã. (Tʋʋ. 8:5-20) Kaoosg poore, neb 12 reega lisg Efɛɛze. Biiblã yeta woto: “La a Poll sẽn tik bãmb ne a nusi, Sɩɩg Sõng siga bãmb zut tɩ bãmb gom gom-zẽna, n togs bãngr-goama.”—Tʋʋ. 19:1-7; ges-y 2 Tɩmote 1:6.

Dẽnd Hebre dãmb 6:2 wã pʋgẽ, wõnda a Poll ra gomda b sẽn da tikd neb nins sẽn nan lebg tẽedbã ne nus tɩ b paamd vʋʋsem sõngã n tõe n maan yel-soalmã yelle.