Кӕсджыты фарстытӕ

Йӕ фыстӕджы дзуттӕгтӕм апостол Павел загъта «къухтӕ ӕвӕрыны тыххӕй». Цӕй кой кодта: хистӕр нӕлгоймӕгты нысан кӕныны кой ӕви ӕндӕр истӕй кой? (Дзут. 6:2).

Кӕд афтӕ фидарӕй зӕгъӕн нӕй, уӕддӕр Павелы, ӕвӕццӕгӕн, зӕгъын фӕндыд, ӕмӕ-иу къухтӕ кӕуыл ӕвӕрдтой, уыдон-иу схайджын сты, сыгъдӕг уды фӕрцы цы курдиӕттӕ лӕвӕрд цӕуы, уыдонӕй.

Библийы дзырдӕуы, къухтӕ-иу кӕй ӕрӕвӕрдтой, Хуыцауы хъуыддӕгтӕй-иу исты ӕххӕст кӕнын кӕй бӕрны кодтой, ууыл. Зӕгъӕм, Моисей Йесо Навиныл «йӕ къухтӕ ӕрӕвӕрдта», йӕхи бӕсты йӕ адӕмы разамонӕгӕй куы нысан кодта, уӕд (Дык. з. 34:9). Чырыстон ӕмбырды дӕр нӕлгоймӕгтӕй иуӕй-иутӕ нысангонд ӕрцыдысты, къухтӕ сыл ӕрӕвӕрдтой, афтӕмӕй (Ап. хъ. 6:6; 1 Тим. 4:14). Павел дӕр Тимофейы куы фӕдзӕхста, цӕмӕй «искӕуыл йӕ къухтӕ ӕрӕвӕрынмӕ тагъд ма кодтаид», уӕд уый дӕр дзырдта ацы хъуыддагыл (1 Тим. 5:22).

Фӕлӕ дзуттӕгтӕй чырыстон чи сси, уыдонӕн Павел дзырдта, зӕгъгӕ, «иугӕр Чырыстийы тыххӕй сӕйраг ахуырӕдтӕ фӕстейӕ ныууагътой», уӕд сӕ ныр кӕй хъӕуы «ӕппӕт хъарутӕй тырнын фӕлтӕрддзинадмӕ». Уый фӕстӕ ранымадта, уыцы ахуырӕдтӕм цы хауы, уый: «мард хъуыддӕгтыл ӕрфӕсмон кӕнын, Хуыцауыл баууӕндын, алыхуызон аргъуыдтӕ, къухтӕ ӕвӕрын» (Дзут. 6:1, 2). Цымӕ уӕд хистӕр нӕлгоймӕгты нысан кӕнын дӕр «Чырыстийы тыххӕй сӕйраг ахуырӕдтӕм» хауы, ома чырыстон хъуамӕ фыццаг уыцы къахдзӕф скӕна ӕмӕ уый фӕстӕ тырна фӕлтӕрддзинадмӕ? Нӕ. Хистӕр нӕлгоймагӕй лӕггад кӕнынмӕ фӕтырнынц, ӕрмӕст сӕйраг ахуырӕдтӕ чи зоны, уыдон нӕ, фӕлӕ фӕлтӕрд ӕфсымӕртӕ (1 Тим. 3:1).

Фӕлӕ ма адӕймагыл къухтӕ ӕндӕр цӕйдӕр тыххӕй дӕр ӕвӕрдтой. Фыццаг ӕнусы Йегъовӕ израилӕгты йӕ адӕмыл нал нымадта ӕмӕ сӕ бӕсты равзӕрста уӕларвон Израил, сӕрст чырыстӕтты ӕмбырд (Матф. 21:43; Ап. хъ. 15:14; Гал. 6:16). Уый рабӕрӕг, Хуыцау сын йӕ сыгъдӕг уды фӕрцы диссаджы курдиӕттӕ кӕй лӕвӕрдта, уымӕй, зӕгъӕм, ӕвзӕгтыл дзурыны курдиат (1 Кор. 12:4–11). Корнили ӕмӕ йӕ бинонтӕ чырыстӕттӕ куы систы, уӕд сыгъдӕг удӕй схайджын сты – уый та уымӕй бӕрӕг уыд, ӕмӕ ӕндӕр ӕвзӕгтыл сдзырдтой (Ап. хъ. 10:44–46).

Хатт-иу ахӕм диссаджы курдиӕттӕй адӕймаг схайджын, къухтӕ-иу ыл куы сӕвӕрдтой, уӕд. Филипп Самарийы хорз хабар куы хъусын кодта, уӕд дзы бирӕтӕ донаргъуыд райстой. Разамонӕг совет уырдӕм арвыста апостол Петр ӕмӕ Иоанны. Цӕмӕн? Библийы кӕсӕм: «Гъемӕ-иу сыл [ӕрӕджы донаргъуыд чи райста, уыдоныл] Петр ӕмӕ Иоанн сӕ къухтӕ ӕрӕвӕрдтой, ӕмӕ-иу сыгъдӕг удӕй схайджын сты». Уый дзурӕг уыд, кӕй-иу схайджын сты, сыгъдӕг уды фӕрцы лӕвӕрд цы курдиӕттӕ цӕуы, уыдонӕй – иннӕтӕ кӕй уыдтой, ахӕм курдиӕттӕй. Мах уый зонӕм, раздӕр кӕлӕнгӕнӕг чи уыд, уыцы Симоны хабарӕй. Симон куы федта сыгъдӕг уд куыд архайы, уый, уӕд ӕй йӕ фырзыдӕй бафӕндыд уыцы курдиат балхӕнын, цӕмӕй-иу уый дӕр йӕ къухтӕ кӕуыл сӕвӕрдтаид, уыдон-иу сыгъдӕг удӕй схайджын уыдаиккой ӕмӕ диссӕгтӕ арӕзтаиккой (Ап. хъ. 8:5–20). Фӕстӕдӕр Ефесы 12 адӕймаджы донаргъуыд райстой. Мах кӕсӕм: «Ӕмӕ сыл Павел йӕ къухтӕ куы ӕрӕвӕрдта, уӕд сыгъдӕг удӕй схайджын сты ӕмӕ райдыдтой ӕндӕр ӕвзӕгтыл дзурын ӕмӕ пехуымпар-ныхас кӕнын» (Ап. хъ. 19:1–7; 2 Тим. 1:6).

Уӕдӕ Дзуттӕгтӕм 6:2 Павелы, ӕвӕццӕгӕн, уый зӕгъын фӕндыд, ӕмӕ-иу къухтӕ ӕвӕрдтой Чырыстийы ног ахуыргӕнинӕгтыл, цӕмӕй-иу схайджын уыдаиккой, сыгъдӕг уды фӕрцы цы курдиӕттӕ лӕвӕрд цӕуы, уыдонӕй.