Tepetepet na Saray Manbabasa

Diad sulat nen apostol Pablo ed saray Hebreo, walay asalambit ton “panangitapew ed saray lima.” Kasin say tutukoyen to et say panuro ed saray mamatatken odino sananey ni?​—Heb. 6:2.

Nayarin say tutukoyen nen Pablo et samay panangitapew ed saray lima pian mangiter na saray langkap na espiritu.

Tua a diad Biblia et walaray alimbawa ya uusaren so panangitapew ed saray lima pian turoen so sakey parad pribilehyon misiglaotan ed panaglingkor ed si Jehova. Alimbawa, ‘intapew nen Moises so lima to’ ed si Josue pian turoen ton onsalat ed sikato. (Deu. 34:9) Diad Kristianon kongregasyon, saray arum a kualipikadon lalaki et tinuro panamegley na panangitapew ed saray lima. (Gawa 6:6; 1 Tim. 4:14) Insan si Pablo et insimbawa ton nepeg ya agbastabasta mangitatapew na saray lima ed sakey a too.​—1 Tim. 5:22.

Anggaman ontan, pinaseseg nen Pablo iray Hebreon Kristiano ya ‘ontuloy ira ed inkayadyari [odino, onaligwas ira ed inkatatken]’ natan ta tinaynan da lay “unonan bangat.” Insan to sinalambit so “panagbabawi ed saray gawa ya inatey, tan say pananisia ed Dios, say bangat ed binyag tan say panangitapew ed saray lima.” (Heb. 6:1, 2) Nibaga tayo kasin say panuro ed saray elder et sakey ed saray unonan bengatla a parad saray Kristianon manpapatatken ni labat ed espiritual? Andi. Say pagmaliw ya elder ed kongregasyon et sakey a kalat a dadampoten tan sano adampot la et nepeg a pablien na saray agagin lalaki a matatken la’d espiritual.​—1 Tim. 3:1.

Balet wala ni arum a kabaliksan na panangitapew ed saray lima. Nen inmunan siglo, impulisay nen Jehova so nasyon na Israel, insan to inter so panangabobon to ed espiritual ya Israel, salanti, say kongregasyon na alanaan iran Kristiano. (Mat. 21:43; Gawa 15:14; Gal. 6:16) Saray mamilagron langkap na espiritu, a singa say pansalita na sankaili iran lenguahe, so mamaneknek ed satan a pananguman. (1 Cor. 12:4-11) Nen nagmaliw a mananisia si Cornelio tan say sankaabungan to, akaawat ira na masanton espiritu lapud ‘akapansalita ira na sankaili a salita.’​—Gawa 10:44-46.

No maminsan, saray mamilagron langkap et iiter panamegley na panangitapew ed saray lima. Sanen nampulong si Felipe na maong a balita diad Samaria, dakel so abautismoan. Saray apostoles a di Pedro tan Juan et imbaki ditan na mananguley ya ulop. Akin? Oniay nabasa tayo: “Diad saman, inyan [na sarayan duaran lalaki] so kalimaan da ed tapew [na saramay kapkapanbautismon totoo], et inako ra so espiritu santo.” Nayarin say kabaliksan na satan et akaawat irayan totoo na saray langkap na espiritu, salanti, saray abilidad a sankanengneng. Nibaga tayo itan lapud ta si Simon, a datin managmahiko et anengneng toy nagawaan na sayan espiritu, kanian siaagum ton sinali a saliwen so pakayarin mangitapew na lima ed arum pian ninabang so masanton espiritu, diad ontan et makapanggawa iraya na milagro. (Gawa 8:5-20) Diad saginonor, 12 totoo so abautismoan ed Efeso. Oniay nabasa tayo: “Sanen intapew to nen Pablo so saray lima to ed sikara, linma ed sikara so espiritu santo; et nansalita ra na nagsisananey a salita, et nampropeta ra.”​—Gawa 19:1-7; ikompara so 2 Timoteo 1:6.

Sirin, mapatnag a say tutukoyen nen Pablo diad Hebreos 6:2 et samay panangitapew ed saray lima pian mangiter na saray langkap na espiritu ed saray balon mananisia.