Ñawiriqkunapta tapuynin

Apóstol Pablo Hebreosman qillqasqanpi, ‘makista umaman churaymanta’ parlasqanqa, ¿qutuchakuypi ancianosta sutichanallamantachu parlachkarqa chayri wak ruwaykunamantawanchu? (Heb. 6:1, 2.)

Mana niyta atisunmanchu ancianosta sutichanallamanta parlasqanta, chaywanpis ichá makista umaman churasqankuqa, Diospa espiritunmanta atiykunata japʼinankupaq kanman karqa.

Chaywanpis Bibliaqa rikuchin, wakin kutipi Diospa llaqtanta ñawpaqta apaqkunata, makinkuta umankuman churaspa sutichasqankuta. Moisés, Josuep umanman ‘makisninta churarqa’ Diospa llaqtanta ñawpaqman apananpaq (Deu. 34:9). Chantá ñawpa siglopi qutuchakuykunapi, apóstoles, ancianos ima, wakichisqa hermanosman makisninkuta churaq kanku ancianos kanankupaq (Hech. 6:6; 1 Tim. 4:14). Pablopis Timoteota yuyaycharqa, mana usqhayllata makinta mayqin hermanop umanmanpis churaspa sutichananta (1 Tim. 5:22).

Chantapis, Pabloqa Hebreos cartanpi cristianosta kallpachachkarqa ‘ñawpaqman rinankuta, wiñay tukusqa kanankupaq’, imaraykuchus paykunaqa “Cristomanta qallariy yachachiykunata saqes[qanku]”. Chaymantataq, “wañuyman apaj sajra ruwaykunamanta Diosman kutirina kasqanta, Diospi creena kasqanta, bautizakuna kasqanta, ruwanayoj kanapaj makista umaman churaykuna kasqanta” ima, parlarqa (Heb. 6:1, 2). ¿Ancianos sutichasqa kanankupaq qallariy yachachiykunata saqinankuchu karqa, jinamanta Diospa llaqtanpi wiñay tukusqa kanankupaq? Mana. Qutuchakuymanta anciano kanapaqqa, ñawpaqtaqa Diospa llaqtanpi wiñay tukusqa kana tiyan, chantapis anciano kayta may allinpaqpuni qhawanan tiyan (1 Tim. 3:1).

Chaywanpis Diospa llaqtanpiqa mana makisninkuta umankuman ancianosta sutichanallankupaqchu churaq kanku. Ñawpaq siglopiqa, Jehová Israel llaqtanta qhisacharqa, chay cuentanmantataq juk musuq llaqtata, akllasqa cristianosmanta rikhurichirqa (Mat. 21:43; Hech. 15:13, 14; Gál. 6:16). Chay musuq llaqtataq Diospa espiritunmanta atiyta japʼirqanku —wak qallupi parlasqankupi— chaytaq paykunata Dios akllasqanta rikuchirqa (1 Cor. 12:4-11). Kayta qhawarina, Cornelio, wasinpi kaqkuna ima, creentesman tukurqaku, Diospa espirituntataq japʼirqanku, chaytaq rikukurqa maypachachus “waj parlaykunata parlasqankupi” (Hech. 10:44-46).

Wakin kutiqa apóstoles wakkunap umankuman makinkuta churaq kanku, Diospa espiritunmanta atiyta japʼinankupaq. Felipe Samariapi allin willaykunata willachkaptin achkha bautizakurqanku. Chayrayku, Diospa Llaqtanta Kamachiqkunaqa Pedrota, Juanta ima Samariaman kacharqanku. ¿Imapaq kacharqanku? Biblia jinata nin: “Chaypacha Pedrowan, Juanwan creejkunaj umankuman makisninkuta churaykojtinku, paykunaman Espiritu Santo jamorqa”, nispa. Chayqa ninayan chay cristianos Diospa espiritunmanta atiykunata japʼisqankuta, chaytaq sapa juk imastachus Diospa llaqtanpi ruwasqankupi rikukurqa. Chayta yachanchik imaraykuchus “Simonqa, imaynatachus apostoles creejkunaj umankuman makisninkuta churasqankuta, Espiritu Santo jamusqanta ima rikuspa, apostolesman qolqeta qoyta munarqa, nerqataj: Noqamampis chay atiyta qowaychej, ajinata pimampis makisniyta churajtiy, Espiritu Santo paymampis jamunampaj”, nisqanpi (Hech. 8:5-20). Chaymanta qhipaman Efesopi chunka iskayniyuq discípulos bautizakurqanku. Biblia jinata nin: “Pablo makisninta paykunaman churaykojtintaj, Espiritu Santoqa paykunaman uraykʼamorqa, waj parlaykunapitaj parlarqanku; Diosmanta sutʼincharqankutaj”, nispa (Hech. 19:1-7; kikinchay 2 Timoteo 1:6).

Pablo kay Hebreos 6:1, 2 pʼitikunapi, musuq creentesman makinkuta umaman churaspa Diospa espiritumanta atiykunata japʼikunankumanta parlachkanman karqa.