Au Uianga a te Aronga Tatau

I roto i tana reta ki to Epera, kua tuatua te apotetoro ko Paulo no “te tuku anga rima.” Te tou ra ainei aia ki te akamana anga i te aronga pakari me ki tetai apinga ke atu?​—Ebe. 6:2.

Kare e tumuanga tau kia taumaro, inara kare e kore e te tou ra a Paulo ki te tuku anga rima i te oronga anga i te au mea i orongaia mai e te vaerua.

Te tuatua ra te Pipiria no te tuku anga rima te piri atura ki te au akamanaanga taoonga a te Atua. “Kua tuku oki a Mose i tona rima ki runga” ia Iosua i te akamana anga iaia ei mono nona. (Deu. 34:9) I roto i te akanoonooanga Kerititiano, kua akamanaia tetai au tangata tau na roto i te tuku anga rima. (Anga. 6:6; 1 Timo. 4:14) Kua ako mai a Paulo e eiaa e rapurapu i te tuku i te rima ki rungao i tetai tangata.​—1 Timo. 5:22.

Inara, kua raurau atu a Paulo i te au Kerititiano Epera kia ‘aere rai ratou ki mua i te pakari mou’ i na e kua akaruke ratou i “te tuatua mua.” I reira kua akakite atu aia “i te tataraara i te angaanga mate, e te akarongo i te Atua ra, E te tuatua o te au bapetizoanga, e te tuku anga rima ra.” (Ebe. 6:1, 2) Ko te akamana anga ainei i te aronga pakari te apinga mua ta te au Kerititiano ka aruaru atu kia aere ki mua ma te pakari mou? Kare. Te riro anga ei tangata pakari no te putuputuanga, e akakoroanga te reira ka tau te au taeake pakari i te pae vaerua kia inangaro e kia ariki rekareka i muringao.​—1 Timo. 3:1.

Inara e tumu ke mai rai tetai no te tuku anga rima. I te anere mataiti mua, kua kopae a Iehova i te Iseraela tumu tikai ei iti tangata nona e kua ariki i te Iseraela pae vaerua, koia oki te putuputuanga o te au Kerititiano akatainuia. (Mata. 21:43; Anga. 15:14; Gala. 6:16) Kua riro te au mea temeio i orongaia mai e te vaerua, mei te tuatua anga i te tuatua ke, ei akapapuanga no taua tauianga ra. (1 Kori. 12:4-11) Te riro mai anga a Korenelio e tona ngutuare tangata ei aronga irinaki, kua rauka i teia aronga ou nei te vaerua tapu, mei tei akaariia mai i to ratou “tuatua anga i te tuatua ke.”​—Anga. 10:44-46.

I tetai au taime e orongaia ana te au mea temeio i orongaia mai e te vaerua na roto i te tuku anga rima. I te tutu aere anga a Philipa i te tuatua meitaki i Samaria, e manganui ua atu tei papetitoia. Kua tono atu te pupu akaaere i te nga apotetoro ia Petero raua ko Ioane ki reira. No teaa ra? Ka tatau tatou e: ‘Kua tuku atura raua i to raua rima ki rungao [i te au tangata tei papetitoia akenei], rauka iora te vaerua tapu ia ratou.’ Ko tera i reira te aiteanga kua rauka ia ratou te au mea i orongaia mai e te vaerua, te au tu ka kitenaia atu e etai ke. Kua kite tatou i teia no te mea ko Simona, tei rave ana i te au angaanga purepure i mua ana, kua kite aia i te angaanga a te vaerua e no te noinoi kua titau aia i te oko i taua tu kite ra kia tuku i te rima ki rungao i etai ke i te oronga anga i te vaerua tapu kia rauka ia ratou te mana i te rave i te au temeio. (Anga. 8:5-20) I muri mai, kua papetitoia e 12 tangata i Ephesia. Ka tatau tatou e: ‘Kua tuku aturā Paulo i tona rima ki rungao ia ratou ra, e kua aere maira te vaerua tapu ki rungao ia ratou; e kua tuatua iora ratou i te tuatua ke.’​—Anga. 19:1-7; e akaaite ia 2 Timoteo 1:6.

No reira, i roto ia Ebera 6:2, te tou tikai ra a Paulo ki te tuku anga rima i te oronga anga i te au mea temeio i orongaia mai e te vaerua ki te aronga ou tei irinaki.