Aksi fu leisiman

Na ini a brifi di na apostel Paulus ben skrifi gi den Hebrewsma, a ben taki fu „a poti di sma e poti anu na tapu trawan”. A ben e taki fu a poti di brada ben e poti trawan leki owruman, noso a ben e taki fu wan tra sani?—Hebr. 6:2.

We, a kan taki Paulus ben e taki fu a poti di sma ben e poti anu na tapu trawan, so taki den ben kan kisi presenti fu a yeye.

A tru taki Bijbel e taki dati sma ben e poti den anu na tapu trawan, so taki den ben kan kisi frantwortu na ini na anbegi fu Gado. Moses ben „poti en anu na tapu” Yosua di a poti en leki a sma di ben o tron fesiman fu Israel baka en (Deut. 34:9). Na ini a Kresten gemeente, son lepi man ben e kisi frantwortu, baka di trawan poti den anu na den tapu (Tori. 6:6; 1 Tim. 4:14). Paulus ben gi den brada a rai fu no de gaw fu poti den anu na tapu wan sma.—1 Tim. 5:22.

Ma Paulus ben gi Hebrew Kresten deki-ati fu „du muiti fu tron lepi sma”, now di den ben „leri den fosi sani” kaba. Baka dati, a kari tra fondamenti leri soleki ’a berow di sma musu abi fu den wroko di abi dede leki bakapisi, a bribi di sma musu abi na ini Gado, a leri fu den difrenti sortu dopu, èn a poti di sma e poti den anu na tapu trawan’ (Hebr. 6:1, 2). A de so taki a poti di den brada ben e poti trawan leki owruman, ben de wán fu den fosi sani? A de so taki den wan di ben kisi a grani disi ben musu du muiti fu tron lepisma? Nôno. Den owruman na ini a gemeente na lepi brada kaba, èn den musu tan warderi a grani di den kisi.—1 Tim. 3:1.

Ma ete wan reide ben de fu san ede Kresten ben e poti anu na tapu trawan. Na ini a fosi yarihondro, Yehovah no ben feni den Israelsma bun moro fu de a pipel fu en. Sobun, a teki na agersi Israel, noso a gemeente fu salfu Kresten, na ini a presi fu den (Mat. 21:43; Tori. 15:14; Gal. 6:16). Fu di den Kresten ben kisi a presenti fu a yeye, meki den ben man du wondru. Wan fu den wondru dati, na taki den ben man taki na ini difrenti tongo. Disi ben de wan buweisi taki Gado ben teki den leki a pipel fu en (1 Kor. 12:4-11). Di Kornelius nanga en osofamiri tron bribiman, dan den kisi santa yeye, èn leki bakapisi fu dati den ben man „taki difrenti tongo”.—Tori. 10:44-46.

Son leisi, sma ben man du wondru, baka te den brada ben poti anu na den tapu. Di Filipus ben e preiki a bun nyunsu na ini Samaria, dan furu sma teki dopu. A tiri skin seni den apostel Petrus nanga Yohanes go drape. Fu san ede? Bijbel e taki: ’Ne den tu apostel disi poti den anu na tapu den nyun sma disi di ben teki dopu, èn den sma kisi santa yeye.’ A no de fu taki dati den sma disi ben kisi a presenti fu a yeye, èn tra sma ben man si dati. A sani disi tru, fu di Simon, di ben e du bonuwroko fosi, ben si fa santa yeye ben e gi den Kresten a krakti fu du wondru. Fu di a man disi ben gridi fu kisi santa yeye, meki a ben wani pai den apostel fu gi en a grani dati tu. Na so ensrefi ben o man poti anu na tapu trawan fu gi den santa yeye, so taki den ben kan du wondru (Tori. 8:5-20). Bakaten, 12 sma na ini Efeise teki dopu. Bijbel e taki: „Baka dati Paulus poti en anu na den tapu, èn di a santa yeye kon na den tapu, dan den bigin taki difrenti tongo, èn den bigin taki profeititori tu.”—Tori. 19:1-7; luku 2 Timoteyus 1:6.

Soleki fa den tori disi e sori, dan na ini Hebrewsma 6:2, Paulus ben e taki fu a poti di sma ben e poti anu na tapu nyun bribiman fu gi den a presenti fu a yeye.