Mbampin mba Mbaôron Takerada Ne Ve Pin La

Apostoli Paulu yange ôr kwagh u “ave a pendan” ken washika u nger Mbaheberu la. Nahan lu kwagh u tsuan mbatamen lu ôron shin lu kwagh ugene?—Heb. 6:2.

Mlumun u sha mpin ne ngu môm tseegh ga, nahan kpa alaghga Paulu lu ôron kwagh u ave a pendan sha u nan mbagenev uiyua mba sha jijingi.

Kpa Bibilo shi ôr kwagh u pendan ior ave sha ityou sha u tsuan ve ér ve er tom u Aôndo. Shighe u Mose tsua Yosua ér a tile sha ityough nagh la, yange ‘penda un ave sha ityou.’ (Dut. 34:9) Yange í tsua nomso mba vian ken jijingi ken tiônnongo u Mbakristu sha u pendan ve ave sha ityou. (Aer. 6:6; 1 Tim. 4:14) Paulu yange wa kwagh ér i de torough a torough u pendan or ave sha ityou ga.—1 Tim. 5:22.

Nahan kpa, Paulu wa Mbakristu mba ve lu Mbaheberu mbara kwagh ér, hegen u ve ‘de kwaghôron u hiihii’ la yô, ve ‘za . . . hemen sha mlu u vian la.’ Paulu we ve kwagh been yô, a ôr kwagh u ‘mgemshima u sha aeren a a lu kpenegh la man kwagh u nan Aôndo jighjigh man ityesen sha kwagh u batisema kua ave a pendan.’ (Heb. 6:1, 2) Ka u lun ortamen tseegh i lu ityôkyaa i vesen i Mbakristu vea za hemen sha mlu u vian la shinii? Ei. Doo u anmgbianev mba ve vie ken jijingi vea nôngo vea hingir mbatamen shi vea ver ishima sha tom ve kpaa.—1 Tim. 3:1.

Kwagh ugen kpa ngu u yange na ve i pendan mbagenev ave sha ityou yô. Ken derianyom u hiihii la, Yehova venda ikyurior i Iserael i sha marami la gema tsua Iserael u ken jijingi, ka tiônnongo u Mbakristu mba i shigh ve mkurem je la. (Mat. 21:43; Aer. 15:14; Gal. 6:16) Kwagh u yange tese ér Aôndo tsua ikyurior i Iserael i ken jijingi ne yô, lu iyua i icighan jijingi i i na ve sha ivande, ve hingir u lamen ken ijô kposo kposo la. (1 Kor. 12:4-11) Shighe u Korneliu man tsombor na hingir mbananjighjigh la, ve kpa ve ngohol icighan jijingi, tsô ve hingir u “lamen ijô kposo kposo.”—Aer. 10:44-46.

Ashighe agen yange i na ior iyua i sha ivande ne sha u pendan ve ave sha ityou. Shighe u Filibu lu pasen loho u dedoo ken Samaria la, ior kpishi er batisema. Mbahemenev mba shin tine yange ve tindi apostoli Peteru man Yohane ker. Sha ci u nyi? I kaa ér: “Tsô [iorov uhar mban] penda ave sha [mba ve sember eren batisema la], nahan ve ngohol Icighan Jijingi.” Kwagh ne tese ér yange ve ngohol iyua i jijingi, man iyua ne lu tahav mbu i nengen a mi yô. Se fa kwagh ne sha ci u Shimon u yange eren ahir la nenge a tahav mbu jijingi ne nahan soo ér una yam mbu una pendan ior ave sha ityou una naan ve icighan jijingi ve eren uivande. (Aer. 8:5-20) Ken masejime yô, iorov 12 ken Efese er batisema. I ôr kwagh ve ér: “Tsô er Paulu penda ve ave yô, Icighan Jijingi haa sha a ve, ve gba ôron kwagh ken ijô igen, ve ôr kwaghôron u profeti.”—Aer. 19:1-7; nenge 2 Timoteu 1:6.

Nahan a shi nan kpa, ave a pendan mbagenev sha ityou a Paulu a er ken Mbaheberu 6:2 la ka sha u nan mbahenev mba hev jijingi.