Swivutiso Swa Vahlayi

Eka papila ra yena leri yaka eka Vaheveru muapostola Pawulo u vulavule hi “ku tlhandleka mavoko.” Xana a a vulavula hi ku vekiwa ka vakulu kumbe a a vulavula hi swin’wana?—Hev. 6:2.

A swi lavi hi kala hi mbambela, kambe swi nga ha endleka leswaku Pawulo a a vulavula hi ku tlhandlekiwa mavoko leswaku ku hundziseriwa tinyiko ta moya.

Bibele ya vulavula hi ku tlhandleka mavoko loku fambisanaka ni ku hlawuleriwa ku endla ntirho wa Xikwembu. Muxe u “tlhandleke voko rakwe ehenhla ka” Yoxuwa loko a n’wi veka ku va mutlhandlami wa yena. (Det. 34:9) Evandlheni ra Vukreste, vavanuna van’wana lava fanelekaka va hlawuriwe hi ku tlhandlekiwa mavoko. (Mint. 6:6; 1 Tim. 4:14) Pawulo u lemukise malunghana ni ku hatlisela ku tlhandleka munhu mavoko.—1 Tim. 5:22.

Hambiswiritano, Pawulo u khutaze Vakreste va Vaheveru leswaku va ‘chivirikela eku wupfeni’ leswi se a va tshike “dyondzo ya masungulo.” Kutani u xaxamete “ku hundzuka emintirhweni leyi feke, ni ripfumelo eka Xikwembu, ku dyondzisa hi ta minkhuvulo ni ku tlhandleka mavoko.” (Hev. 6:1, 2) Xana ku vekiwa ka vakulu evandlheni a ku fanele ku va nchumu wa nkoka lowu Vakreste va faneleke va wu chivirikela? Doo! Ku va nkulu evandlheni i pakani leyi vamakwerhu va xinuna lava wupfeke va faneleke va lwela ku yi fikelela kutani endzhaku ka sweswo va yi teka yi ri ya nkoka.—1 Tim. 3:1.

Kambe ku tlhandleka mavoko a ku tirhiseriwa ni swin’wana. Eka lembe-xidzana ro sungula Yehovha u fularhele Vaisrayele va nyama leswaku va nga ha vi vanhu va yena kutani a katekisa Israyele wa moya, vandlha ra Vakreste lava totiweke. (Mat. 21:43; Mint. 15:14; Gal. 6:16) Tinyiko ta masingita ta moya to tanihi ku vulavula hi tindzimi ti nyikele vumbhoni bya ku cinca koloko. (1 Kor. 12:4-11) Loko Korneliyo ni va yindlu yakwe va ve vapfumeri, va amukele moya lowo kwetsima hilaha swi kombisiweke hakona hi ku va va “vulavula hi tindzimi.”—Mint. 10:44-46.

Minkarhi yin’wana, tinyiko ta masingita a ti hundziseriwa hi ku tlhandlekiwa mavoko. Loko Filipi a chumayele mahungu lamanene eSamariya vo tala va khuvuriwile. Huvo leyi fumaka yi rhumele muapostola Petro na muapostola Yohane eSamariya. Ha yini? Ha hlaya: “Hiloko [lavambirhi] va va tlhandleka mavoko [lava va ha ku khuvuriwaka], kutani va kuma moya lowo kwetsima.” Sweswo swi nga ha va swi vule leswaku va kume tinyiko ta moya, vuswikoti lebyi xiyiweke hi van’wana. Leswi hi swi tiva hikwalaho ka leswi Simoni loyi a a endla masalamusi, loko a vone mintirho ya moya hi makwanga u ringete ku xava vuswikoti byo tlhandleka van’wana mavoko leswaku va kuma moya lowo kwetsima kutani va endla masingita. (Mint. 8:5-20) Endzhakunyana vanhu va 12 va khuvuriwile aEfesa. Ha hlaya: “Kuteloko Pawulo a va tlhandleke mavoko, moya lowo kwetsima wu ta ehenhla ka vona, kutani va sungula ku vulavula hi tindzimi ni ku profeta.”—Mint. 19:1-7; ringanisa na 2 Timotiya 1:6.

Hikwalaho, loko Pawulo a vulavula hi ku tlhandleka mavoko eka Vaheveru 6:2 entiyisweni a a vulavula hi ku hundziseriwa ka tinyiko ta moya eka vapfumeri lavantshwa.