Mga Pangunang Punto Gikan sa Sulat Ngadto sa mga Taga-Tesalonica ug Kang Timoteo
Ang Pulong ni Jehova Buhi
Mga Pangunang Punto Gikan sa Sulat Ngadto sa mga Taga-Tesalonica ug Kang Timoteo
ANG bag-ong kongregasyon sa Tesalonica nakasinatig pagsupak sukad nga natukod kini panahon sa pagduaw ni apostol Pablo didto. Busa sa dihang si Timoteo—nga lagmit 20 kapin na ang edad—mibalik gikan didto nga nagdalag maayong taho, si Pablo natukmod sa pagpadalag sulat ngadto sa mga taga-Tesalonica aron sa pagdayeg ug pagdasig kanila. Kini mao ang una sa mga sinulat ni Pablo, nga lagmit iyang gisulat sa hinapos nga bahin sa 50 K.P. Wala madugay human niana, siya mihimo sa iyang ikaduhang sulat ngadto sa mga Kristohanon sa Tesalonica. Niining higayona, iyang gitul-id ang sayop nga pagtuo sa uban ug nagdasig sa mga igsoon nga magpabiling lig-on sa pagtuo.
Mga napulo ka tuig sa ulahi, si Pablo didto sa Macedonia ug si Timoteo didto sa Efeso. Si Pablo misulat kang Timoteo, nga nagdasig kaniya sa pagpabilin sa Efeso ug pagtabang sa mga igsoon nga panguptan pag-ayo ang ilang pagtuo tungod sa impluwensiya sa bakak nga mga magtutudlo sulod sa kongregasyon. Sa dihang gilutos ang mga Kristohanon human sa sunog nga naglaglag sa Roma niadtong 64 K.P., gihimo ni Pablo ang iyang ikaduhang sulat kang Timoteo. Mao kadto ang kataposan sa iyang inspiradong mga sinulat. Kita karon makabenepisyo sa mga pagdasig ug tambag ni Pablo gikan niining upat niya ka sulat.—Heb. 4:12.
“MAGTUKAW”
Gidayeg ni Pablo ang mga taga-Tesalonica tungod sa ‘ilang buhat sa pagtuo, ilang mahigugmaong paghago, ug ilang pag-antos.’ Iya silang giingnan nga sila ang iyang ‘paglaom ug kalipay ug purongpurong sa kasadya.’—1 Tes. 1:3; 2:19.
Human dasiga ang mga Kristohanon sa Tesalonica sa paghupay sa usag usa pinaagi sa paglaom sa pagkabanhaw, si Pablo miingon: “Ang adlaw ni Jehova moabot sama sa kawatan sa kagabhion.” Iya silang gitambagan nga “magtukaw” ug maghupot ug maayong panghunahuna.—1 Tes. 4:16-18; 5:2, 6.
Tubag sa mga Pangutana Bahin sa Kasulatan:
4:15-17—Kinsa ang “pagasakgawon sa mga panganod sa pagsugat sa Ginoo diha sa kahanginan,” ug sa unsang paagi kini mahitabo? Sila ang dinihogang mga Kristohanon nga buhi panahon sa presensiya ni Kristo. Sila moadto sa dili-makitang dapit sa langit sa “pagsugat sa Ginoo” nga si Jesus. Apan, aron mahimo kanang posible, kinahanglan una silang mamatay ug banhawon ingong espiritung mga linalang. (Roma 6:3-5; 1 Cor. 15:35, 44) Ang presensiya ni Kristo nagsugod na, busa ang dinihogang mga Kristohanon nga mamatay karon “pagasakgawon,” o banhawon dayon.—1 Cor. 15:51, 52.
5:23—Unsay gipasabot ni Pablo sa dihang miampo siya nga “ang espiritu ug ang kalag ug ang lawas [sa] mga igsoon pagatipigan”? Si Pablo nagtumong sa espiritu, kalag, ug lawas sa mga membro sa Kristohanong kongregasyon, nga naglakip sa dinihogan-sa-espiritu nga mga Kristohanon sa Tesalonica. Wala lang siya mag-ampo nga tipigan ang kongregasyon, kondili nag-ampo usab siya sa pagtipig sa “espiritu,” o panghunahuna. Siya miampo usab nga tipigan ang “kalag,” ang kinabuhi, o paglungtad niana, ug nga tipigan usab ang “lawas” niana—ang tanang membro sa dinihogang mga Kristohanon. (1 Cor. 12:12, 13) Gipakita sa maong pag-ampo nga nabalaka pag-ayo si Pablo sa kongregasyon.
Mga Leksiyon Alang Kanato:
1:3, 7; 2:13; 4:1-12; 5:15. Ang usa ka epektibong paagi sa paghatag ug tambag mao ang paghatag ug sinserong komendasyon nga magdasig sa usa sa paghimo sa labing maayo nga iyang maarangan.
4:1, 9, 10. Ang mga magsisimba ni Jehova kinahanglang magpadayon sa pag-uswag sa espirituwal.
5:1-3, 8, 20, 21. Samtang nagkaduol ang adlaw ni Jehova, angay nga “maghupot kita ug maayong panghunahuna ug magsul-ob sa panagang sa dughan nga mao ang pagtuo ug gugma ug ingong helmet ang paglaom sa kaluwasan.” Dugang pa, kinahanglang patalinghogan nato pag-ayo ang matagnaong Pulong sa Diyos, ang Bibliya.
“BAROG NGA MALIG-ON”
Pinaagi sa pagtuis sa giingon ni Pablo sa iyang unang sulat, ang pipila diha sa kongregasyon nangangkon nga haduol na ang ‘presensiya sa Ginoo.’ Aron matul-id ang maong pagtuo, gihisgotan ni Pablo kon unsay “moabot una.”—2 Tes. 2:1-3.
Si Pablo nagtambag: “Barog nga malig-on ug magpadayon sa pagpangupot sa mga tradisyon nga gitudlo kaninyo.” Siya nagsugo kanila nga ‘magpahilayo gikan sa tanang igsoon nga nagalakaw nga badlonganon.’—2 Tes. 2:15; 3:6.
Tubag sa mga Pangutana Bahin sa Kasulatan:
2:3, 8—Kinsa ang “tawo sa kalapasan,” ug sa unsang paagi siya pagapatyon? Ang tawo sa kalapasan nagtumong sa klero sa Kakristiyanohan. Ang usa nga may katungod sa pagmantala sa mga paghukom sa Diyos batok sa mga daotan ug magsugo sa pagpatay kanila mao “ang Pulong”—ang Pangunang Tigpamaba sa Diyos, si Jesu-Kristo. (Juan 1:1) Busa, ikaingon nga patyon ni Jesus ang tawo sa kalapasan “pinaagi sa espiritu [gahom] sa iyang baba.”
2:13, 14—Sa unsang paagi ang dinihogang mga Kristohanon ‘gipili sukad sa sinugdan alang sa kaluwasan’? Ang mga dinihogan ingong usa ka grupo gimbut-an na ni Jehova sa dihang gipahibalo niya ang iyang katuyoan nga ang binhi sa babaye magsamad sa ulo ni Satanas. (Gen. 3:15) Gilatid usab ni Jehova ang mga kinahanglanon nga angay nilang kab-oton, ang trabaho nga ilang buhaton, ug ang pagsulay nga ilang sagubangon. Busa, siya nagtawag kanila alang “niini nga dulnganan.”
Mga Leksiyon Alang Kanato:
1:6-9. Pilion lang ni Jehova ang iyang laglagon.
3:8-12. Ang kaduol sa adlaw ni Jehova dili angayng himoong rason nga dili na kita kinahanglang motrabaho aron suportahan ang kaugalingon ug aron adunay magamit diha sa ministeryo. Kini maghimo kanatong tapolan ug maghaylo kanato nga mahimong “hilabtanon sa mga butang sa uban.”—1 Ped. 4:15.
“BANTAYI ANG GIPIYAL KANIMO”
Gidasig ni Pablo si Timoteo nga “magpadayon sa pagpakigsangka sa maayong pakiggubat; nga maghupot sa pagtuo ug usa ka maayong tanlag.” Gilatid sa apostol ang mga kuwalipikasyon alang sa tinudlo nga mga lalaki sa kongregasyon. Gitambagan usab ni Pablo si Timoteo nga “isalikway ang bakak nga mga sugilanon nga nagpasipala sa kon unsay balaan.”—1 Tim. 1:18, 19; 3:1-10, 12, 13; 4:7.
“Ayaw kasab-i ang usa ka tigulang nga lalaki,” misulat si Pablo. Iyang giawhag si Timoteo: “Bantayi ang gipiyal kanimo, nga magpahilayo gikan sa mga sulting walay-pulos nga nagpasipala sa kon unsay balaan ug gikan sa mga pagsumpakiay nianang bakak nga gitawag ug ‘kahibalo.’”—1 Tim. 5:1; 6:20.
Tubag sa mga Pangutana Bahin sa Kasulatan:
1:18; 4:14—Unsang “mga panagna” ang gipamulong bahin kang Timoteo? Lagmit mga panagna kini bahin sa umaabot nga pribilehiyo ni Timoteo diha sa Kristohanong kongregasyon, nga gipamulong ubos sa pagtultol sa Diyos sa dihang si Pablo miduaw sa Listra panahon sa iyang ikaduhang misyonaryong panaw. (Buh. 16:1, 2) Base niini nga “mga panagna,” ang mga ansiyano sa kongregasyon “nagpandong sa ilang mga kamot” diha sa batan-ong si Timoteo, nga naghatag kaniya ug linaing pribilehiyo sa pag-alagad.
2:15—Sa unsang paagi ang usa ka babaye “pagaampingang luwas pinaagi sa pagpanganak”? Ang pagpanganak, pag-atiman sa iyang mga anak, ug pagdumala sa panimalay makatabang kaniya nga ‘maluwas’ o makalikay sa pagkahimong “tabian ug hilabtanon sa mga kalihokan sa ubang mga tawo.”—1 Tim. 5:11-15.
3:16—Unsa ang sagradong tinago sa diyosnong pagkamahinalaron? Sa dugay nang panahon wala mahibaloi kon posible ba nga ang tawo makapasundayag ug hingpit nga pagkamasinugtanon sa pagkasoberano ni Jehova o dili. Gihatag ni Jesus ang tubag pinaagi sa paghupot ug hingpit nga integridad sa Diyos hangtod sa iyang kamatayon.
6:15, 16—Kini bang mga pulonga mapadapat kang Jehova nga Diyos o kang Jesu-Kristo? Kining mga pulonga mapadapat kang Jesu-Kristo kansang pagpadayag tukmang gihubit niini. (1 Tim. 6:14) Kon itandi sa mga tawo nga nagmando ingong mga hari ug ingong mga ginoo, si Jesus lamang ang “bugtong Magmamando,” ug siya lamang ang nagbaton sa pagkawalay-kamatayon. (Dan. 7:14; Roma 6:9) Human siya mosaka sa langit, wala nay tawong “makakita” kaniya pinaagi sa ilang literal nga mga mata.
Mga Leksiyon Alang Kanato:
4:15. Kita man bag-o pa o dugay nang Kristohanon, kita kinahanglang maningkamot nga mahimong hamtong sa espirituwal.
6:2. Kon kita naghatag sa atong kinamaayohan diha sa trabaho bisan pag dili Saksi ang atong amo, labaw pa natong himoon kana kon ang atong amo igsoon sa pagtuo. Dili nato siya pahimuslan tungod lang kay ato siyang igsoon.
“IWALI ANG PULONG, MAGMADALI DIHA NIINI”
Aron maandam si Timoteo sa mga problema sa umaabot, si Pablo misulat: “Kita wala hatagi sa Diyos ug espiritu sa katalaw, kondili sa gahom ug sa gugma ug sa maayong panghunahuna.” Gitambagan si Timoteo: “Ang ulipon sa Ginoo dili kinahanglang makig-away, kondili kinahanglang magmalumo sa tanan, may katakos sa pagpanudlo.”—2 Tim. 1:7; 2:24.
“Magpadayon ka sa mga butang nga imong nakat-onan ug nakakombinsir kanimo sa pagtuo,” tambag ni Pablo kang Timoteo. Mikaylap ang apostatang mga pagtulon-an, mao nga gitambagan sa apostol ang batan-ong magtatan-aw: “Iwali ang pulong, magmadali diha niini . . . , pamadlong, pagsaway, panambag.”—2 Tim. 3:14; 4:2.
Tubag sa mga Pangutana Bahin sa Kasulatan:
1:13—Unsa ang “sumbanan sa makapahimsog nga mga pulong”? Ang “makapahimsog nga mga pulong” maoy “mga pulong sa atong Ginoong Jesu-Kristo”—ang tinuod nga Kristohanong mga pagtulon-an. (1 Tim. 6:3) Ang gitudlo ug gibuhat ni Jesus nahiuyon sa Pulong sa Diyos, busa ang ekspresyong “makapahimsog nga mga pulong” mahimong magtumong usab sa tanang pagtulon-an sa Bibliya. Kini nga mga pagtulon-an makatabang kanato nga masabtan kon unsay gikinahanglan ni Jehova kanato. Padayon natong mahuptan kini nga sumbanan pinaagi sa pagpadapat sa atong nakat-onan sa Bibliya.
4:13—Unsa ang “mga pergamino”? Ang “mga pergamino” nagtumong sa panit sa hayop nga gihimong mga sulatanan. Lagmit si Pablo nangayo ug pipila sa maong mga linukot nga basahon sa Hebreohanong Kasulatan aron iya kining matun-an panahon sa iyang pagkabilanggo sa Roma. Ang pipila sa mga linukot nga basahon lagmit hinimo sa papiro apan ang uban hinimo sa pergamino.
Mga Leksiyon Alang Kanato:
1:5; 3:15. Tungod kay si Timoteo gitudloan sa balaang mga sinulat sukad pa sa iyang pagkamasuso, siya nakabaton ug pagtuo kang Kristo Jesus, nga maoy nag-impluwensiya sa tanan niyang gibuhat. Hinungdanon gayod nga ang mga membro sa pamilya magtagad pag-ayo kon giunsa nila pagtuman ang ilang tulubagon sa Diyos ug sa ilang mga anak!
1:16-18. Sa dihang ang atong mga isigka-magtutuo makaagom ug mga pagsulay, makaatubang ug paglutos, o mabilanggo, mag-ampo kita alang kanila ug buhaton nato ang atong maarangan sa pagtabang kanila.—Prov. 3:27; 1 Tes. 5:25.
2:22. Ang mga Kristohanon, ilabina ang mga batan-on, dili angay nga mapuliki pag-ayo sa pagbarbel o pagpanindot sa lawas, esports, pagpaminaw ug musika, paglingawlingaw, pasatiempo, pagbakasyon, way-pulos nga mga panag-estoryahay, ug uban pa nga sama niana, nga tungod niini, sila wala na kaayoy panahon sa Kristohanong mga kalihokan.
[Hulagway sa panid 31]
Unsang inspiradong sinulat ni apostol Pablo ang ulahi niyang gisulat?