Bann pwen enteresan dan let pour bann Tesalonisyen ek Timote
Parol Zeova i vivan
Bann pwen enteresan dan let pour bann Tesalonisyen ek Timote
SA NOUVO kongregasyon dan lavil Tesalonik ti’n eksperyans lopozisyon depi o konmansman kan i ti’n fek ganny formen, ler zapot Pol ti vizit zot. Alors kan Timote, ki petet ti annan ven-t-an ti retournen sorti Tesalonik avek en bon rapor, sa ti pous Pol pour ekrir bann Tesalonisyen en let pour felisit e ankouraz zot. I posib ki sa let ki ti’n ganny ekrir tar dan lannen 50 N.L, ti premye let enspire ki Pol ti ekrir. Pa bokou letan apre i ti ekrir bann Kretyen Tesalonik en dezyenm let. Dan sa let, i ti koriz en fo krwayans ki serten ti annan e i ti ankouraz bann frer pour reste ferm dan lafwa.
Apepre di-z-an pli tar, Pol ti Masedwann e Timote ti Efez. Pol ti ekrir Timote pour ankouraz li pour reste Efez e kontinyen son batay spirityel kont bann ki ti pe ansenny bann fo lansennyman dan kongregasyon. Kan bann Kretyen ti ganny persekite apre ki en dife ti detrir lavil Ronm an 64 N.L, Pol ti ekrir son dezyenm let pour Timote. Sa ti son dernyen let enspire. Nou osi ozordi nou kapab tir byenfe avek sa lankourazman ek konsey ki trouve dan sa kat let ki Pol in ekrir.—Ebr. 4:12.
“RESTE VIZILAN”
Pol ti felisit bann Tesalonisyen pour ‘pratik zot lafwa . . ., travay ki zot in fer avek lanmour e lefet ki zot in reste ferm.’ I ti dir avek zot ki zot son ‘lesperans, lazwa ek kouronn lafyerte.’—1 Tesa. 1:3; 2:19.
Apre ki i ti’n ankouraz bann Kretyen Tesalonik pour konsol kanmarad avek sa lespwar rezireksyon, Pol ti ekrir: “Zour Senyer pou vin konman en voler dan lannwit.” I ti konsey zot pour “reste vizilan” e kontinyen annan bon zizman.—1 Tesa. 4:16-18; 5:2, 6.
Larepons pour bann kestyon lo Labib:
4:15-17—Lekel ki “ganny anleve e rasanble . . . dan nyaz pour rankontre Senyer dan lezer,” e ki mannyer sa i arive? Sa i bann Kretyen swazir ki pe viv pandan prezans Kris ler i pe rennyen dan son Rwayonm. Zot “rankontre Senyer” Zezi dan lesyel. Me pour zot eksperyans sa, zot bezwen mor avan e ganny resisite konman bann kreatir spirityel. (Rom. 6:3-5; 1 Kor. 15:35, 44) Nou deza dan prezans Kris, alors bann Kretyen swazir ki mor dan nou letan pa reste dan lanmor. Zot “ganny anleve” oubyen resisite deswit.—1 Kor. 15:51, 52.
5:23—Ki Pol ti oule dir kan i ti priye ki “lespri, lam ek lekor” bann frer i ganny garde? Pol ti pe refer avek bann manm kongregasyon Kretyen, enkli bann Kretyen swazir ki ti Tesalonik. Olye senpleman priye pour ki sa kongregasyon i ganny proteze, i ti priy pour ki son lespri i ganny prezerve. I ti osi priy pour son “lam” setadir son lavi oubyen legzistans ek son “lekor” ki pe refer avek bann manm Kretyen swazir. (1 Kor. 12:12, 13)Alor sa lapriyer i alor montre sa lentere senser ki Pol ti annan pour sa kongregasyon.
Leson pour nou:
1:3, 7; 2:13; 4:1-12; 5:15. En fason efikas pour donn konsey i par felisit en dimoun senserman e ankouraz li pour fer pli byen.
4:1, 9, 10. Bann serviter Zeova i devret kontinyen progrese spirityelman.
5:1-3, 8, 20, 21. Anmezir ki zour Zeova i aprose, nou devret reste azen [oubyen annan bon zizman] e “abiy nou dan lafwa ek lanmour parey en lenz proteksyon; pour kas proteksyon lo nou latet nou annan lesperans dan delivrans.” Deplis, nou devret port en gran latansyon lo Parol profetik Bondye, dan Labib.
“RESTE FERM”
Serten dan kongregasyon ti pe detourn sa ki Pol ti’n dir dan son premye let. Zot ti pe aparaman argimante ki ‘retour Senyer Zezi-Kri’ ti pros pour arive. Pour koriz sa pwennvi, Pol ti dir zot kwa ki ti bezwen ‘arive avan.’—2 Tesa. 2:1-3.
Pol ti sipliy zot: “Reste ferm e gard byen bann lansennyman ki nou’n transmet zot.” I ti donn zot sa lord pour ‘evite asosye avek bann frer ki annan en move konportman.’—2 Tesa. 2:15; 3:6
Larepons pour bann kestyon lo Labib:
2:3, 8—Lekel “sa Gran Rebel” e ki mannyer i pou ganny detrir? Sa “Gran Rebel” i reprezant bann sef relizye dan larelizyon Kretyen. Sa enn ki’n ganny lotorite pour deklar zizman Bondye kont bann move dimoun e donn lord pour egzekit zot i “Laparol” setadir Portparol prensipal, Zezi Kri. (Zan 1:1) Alors, nou kapab dir ki Zezi pou detri sa gran rebel par son lespri oubyen lafors aktif “ki sorti dan son labous.”
2:13, 14 (NW)—Ki mannyer bann Kretyen swazir in ganny ‘swazir o konmansman pour ganny sove’? Kan Zeova ti deside ki desandans sa madanm ti pou kraz latet Satan, i ti swazir davans en pti group dimoun. (Zen. 3:15) Zeova ti osi dir ki kondisyon ki zot pou bezwen ranpli, sa travay ki zot pou fer e sa leprev ki zot pou pas ladan. Zot in ganny apele pour ‘sa rezon.’
Leson pour nou
1:6-9. Zeova i egzekit son zizman dan en fason selektif.
3:8-12. Vi ki zour Zeova i pros, nou pa devret servi sa konman en leskiz pour nou pa travay pour soutenir nou dan lavi tou le zour e dan sa travay predikasyon. Ler nou nanryen fer i kapab fer nou pares e fer nou vin en dimoun ki“mel dan zafer lezot.”—1 Pyer 4:15.
“GARD BYEN SA KI OU’N GANNY KONFYE”
Pol ti enstrir Timote pour kontinyen “fer en bon konba, an gardan lafwa e en bon konsyans.” Sa zapot ti fer resorti bann kalite ki bann zonm i devret annan pour zot ganny apwente dan kongregasyon. Pol ti osi enstrir Timote pour “rezet bann fab bet ki kontrer avek lafwa.”—1 Tim. 1:18, 19; 3:1-10, 12, 13; 4:7.
Pol ti ekrir: “Pa bezwen koz dir avek en vyeyar.” Pol ti ankouraz Timote: ‘Gard byen sa ki ou’n ganny konfye. Evit bann konversasyon vid ki kontrer avek lafwa ek bann fo largiman ki zot apel konnesans.’—1 Tim. 5:1; 6:20.
Larepons pour bann kestyon lo Labib:
1:18; 4:14—Ki “bann profesi” ki ti ganny predir konsernan Timote? I kapab ki sa ti serten profesi konsernan rol ki Timote ti pou annan dan kongregasyon dan lavenir, ki ti ganny predir anba lenspirasyon, kan Pol ti vizit Lis pandan son dezyenm vwayaz misyonner. (Akt 16:1, 2) Baze lo sa “bann profesi” bann ansyen dan kongregasyon ti “poz lanmen” lo Timote e swazir li pour fer en servis spesifik.
2:15 (NW)—Ki mannyer en fanm i “ganny prezerve an donnan nesans”? Donn nesans, pran swen avek bann zanfan e okip lakour i kapab fer en madanm ganny “prezerve” par evite vin en dimoun nanryen fer oubyen dezevre, ki fer ‘bavardaz . . . e endiskre.’—1 Tim. 5:11-15.
3:16—Ki sa ‘sekre’ an rapor avek latasman avek Bondye? Pour en bon pe letan sa kestyon konsernan si i posib pour bann imen annan en lobeisans konplet anver souvrennte Zeova pa ti ankor ganny reponn. Sa kestyon ti ganny reponn kan Zezi ti reste fidel anver Bondye ziska son lanmor.
6:15, 16 (NW)—Eski sa bann parol i aplik pour Zeova oubyen Zezi Kri? Sa bann parol i aplik pour sa enn ki zot ti kapab vwar e dekrir, Zezi Kri. (1 Tim. 6:14, NW) Tou lekontrer avek bann imen ki dirize konman bann lerwa e konman dirizan, Zezi i sa “sel Lerwa,” ki imortel. (Dan. 7:14; Rom. 6:9) Depi ki i ti mont dan lesyel, personn lo later pa “kapab war” li avek zot lizye fizik.
Leson pour nou:
4:15. Menm si i fer en pe letan ki nou’n vin en Kretyen oubyen nou fek vin en Kretyen, nou devret kontinyen fer bokou zefor pour progrese spirityelman e amelyor nou relasyon avek Zeova.
6:2. Si nou anplwayer i enn nou frer oubyen ser Kretyen, olye ki nou profit lo zot dan okenn fason, sa i devret pous nou pour fer sa travay pli byen ankor, ki si nou ti anploye avek en dimoun an deor kongregasyon.
“ANONS LAPAROL, ENSISTE DAN TOU LOKAZYON”
Pour prepar Timote pour bann moman difisil ki ti kapab arive dan lavenir, Pol ti ekrir: “Bondye pa’n donn ou en lespri timidite, me okontrer, en lespri ki ranpli nou avek lafors, lanmour ek moderasyon.” I ti konsey Timote: “Ki serviter Senyer pa devret en dimoun ki fer kerel. Okontrer, i devre byen avek tou dimoun, kapab ansennyen.”—2 Tim. 1:7; 2:24.
Pol ti ankouraz Timote: “Reste ferm dan sa ki ou’n aprann, e dan sa ki ou’n vreman krwar.” Bann aposta ti pe propaz zot lansennyman, alor sa zapot ti konsey sa zenn sirveyan: “Anons Laparol, ensiste dan tou lokazyon ki prezante. . . , konvenk dimoun, reprimande, ankouraze.”—2 Tim. 3:14; 4:2.
Larepons pour bann kestyon lo Labib:
1:13—Ki si sa sa ‘model parol laverite’? Sa “parol laverite” i “bann veritab parol nou Senyer Zezi-Kri” setadir bann lansennyman Kretyen. (1 Tim. 6:3) Sa ki Zezi ti ansennyen e fer ti an armoni avek Parol Bondye, alors sa lekspresyon “parol laverite” dan en pli gran laplikasyon i kapab osi pe refer avek tou bann lansennyman ki trouve dan Labib. Model sa parol pe refer avek tou bann lansennyman dan Lekritir ki kapab ed nou pour vwar sa ki Zeova i ekspekte nou fer. Nou tenir byen for sa model kan nou met an pratik sa ki nou aprann dan Labib.
4:13 (NW)—Ki si sa sa bann “parchments”? Sa bann “parchments” pe refer avek bann materyo ki ti ganny fer avek lapo zanimo pour ekrir lo la. I posib ki Pol ti pe demann serten parti dan Lekritir Ebre pour li etidye pandan ki i ti dan prizon Ronm. I kapab serten sa bann roulo ti ganny fer avek en kalite plant ki apel papiris me lezot i kapab ti ganny fer avek lapo zannimo.
Leson pour nou:
1:5; 3:15. Sa rezon prensipal akoz Timote ti annan lafwa dan Zezi Kri, setadir lafwa ki ti enfliyans tou sa ki i ti fer, ti sa lansennyman ki i ti’n gannyen lo Lekritir sakre depi son lanfans kot lakour. Pa i vreman enportan pour bann paran mazin seryezman konsernan si zot pe byen desarz zot responsabilite anver Bondye ek zot bann zanfan!
1:16-18. Kan nou bann konpanyon Kretyen i pas atraver bann leprev, fer fas avek persekisyon oubyen ganny met dan prizon, annou priy pour zot e fer tou sa ki nou kapab pour ed zot.—Prov. 3:27; 1 Tesa. 5:25.
2:22. Bann Kretyen, espesyalman bann zenn, pa devret sitan preokip zot avek bann sport, lanmizik, divertisman, pastan, vwayaz, bann konversasyon ki napa valer ek lezot aktivite parey, ki kapab fer zot napa bokou letan pour fer bann aktivite ki fer plezir Bondye.
[Portre lo paz 31]
Ki dernyen let enspire ki zapot Pol ti ekrir?