Mbaʼe mbaʼépa ñanemboʼe umi kárta ojehaivaʼekue umi Tesalonicayguápe ha Timotéope
Jehová Ñeʼẽ ningo oikove
Mbaʼe mbaʼépa ñanemboʼe umi kárta ojehaivaʼekue umi Tesalonicayguápe ha Timotéope
KONGREGASIÓN Tesalonicaygua ningo oñepyrũ apóstol Pablo ovisitárõ guare pe táva, ha upe guive ojepersegíma chupekuéra. Upévare Timoteo oguerahárõ guare notísia porã Tesalónicagui, Pablo ohai peteĩ kárta oguerohory ha omokyreʼỹ hag̃ua umi ermánope. Upérõ Timoteo oreko 20 áño rupi. Ko kárta hína pe kuatiañeʼẽ Pablo ohaivaʼekue tenondete ha oiméne ojehai áño 50 opakuévo. Upe riremínte Pablo ohaíma ikuatiañeʼẽ mokõiha umi Tesalonicayguápe. Upérõ haʼe okorrehi peteĩ mbaʼe ojavyhápe hikuái ha avei omokyreʼỹ chupekuéra ojepytaso hag̃ua ijeroviáre.
Ohasa rire 10 áño rupi Pablo oĩ Macedóniape ha Timoteo katu Éfesope. Upérõ Pablo ohai Timotéope ha heʼi chupe opyta hag̃ua Éfesope ombohovái hag̃ua umi mboʼehára japu oĩva kongregasiónpe. Upéi áño 64-pe Roma haimete okaipa ha upévare kangue ojepersegi kristianokuérape. Upémarõ Pablo ohai jey peteĩ kárta Timotéope. Kóva hína pe kuatiañeʼẽ ipahaitépe ohaíva. Tuicha ñanepytyvõta koʼág̃a umi konsého oĩva koʼã irundy kuatiañeʼẽme (Heb. 4:12).
“JAPÁY”
Pablo oguerohory umi Tesalonicayguápe ‘heta mbaʼe ojapo haguére, oipytyvõgui hetápe ha ohaʼarõkuaa rupi’. Heʼi avei chupekuéra: ‘Peẽ ore esperánsa, ore vyʼa, ha ore prémio orembovyʼáva’ (1 Tes. 1:3; 2:19, BNP).
Pablo heʼi umi kristiánope oñomokyreʼỹ hag̃ua oñeʼẽvo ñemoingove jeýre. Ipahápe heʼi: ‘Ñandejára ára og̃uahẽta mondaha og̃uahẽramoguáicha pyhare’. Upévare heʼi chupekuéra tekotevẽha iñakãporã ha oñatende oikóvo (1 Tes. 4:16-18; 5:2, 6).
Porandukuéra:
4:15-17, BNP. Mávapa umi ‘ojehupítava arai apytépe ohug̃uaitĩ hag̃ua’ Crístope, ha mbaʼéichapa oiko upéva? Koʼãva hína umi ungido oikovéva oñemeʼẽ rire podér Jesucrístope ogoverna hag̃ua. Haʼekuéra ojotopa Jesúsndi yvágape. Péro upearã omano raẽ vaʼerã ha oñemoingove jey yvágape (Rom. 6:3-5; 1 Cor. 15:35, 44). Cristo ningo ogovernáma koʼág̃a. Upévare umi ungido omanóva upepete voi ‘ojehupi’ térã oñemoingove jey yvágape (1 Cor. 15:51, 52).
5:23. Mbaʼépa heʼiséraʼe Pablo ojerurévo umi ermáno ‘espíritu, hiʼánga ha hetére’? Apóstol Pablo ningo oñeʼẽ entéro kongregasiónre, ijapytépe umi ermáno Tesalonicaygua. Ojerurénte rangue pe kongregasiónre, Pablo ojerure taipotĩ ‘ijespíritu’, térã opensa lája. Ojerure avei ‘hiʼánga’ térã hekovére, ha ‘hetére’, upéva hína umi kristiáno ohótava yvágape (1 Cor. 12:12, 13). Ko ñemboʼe ohechauka mbaʼeichaitépa Pablo ojepyʼapy kongregasiónre.
Mbaʼépa ñanemboʼe:
1:3, 7; 2:13; 4:1-12; 5:15. Ñañemoñeʼẽta jave ñande rapichápe iporã jaguerohory raẽ umi mbaʼe ojapo porãva ha upéi ñamokyreʼỹ ojapo porãve hag̃ua oñekotevẽva.
4:1, 9, 10. Umi oadoráva Jehovápe akóinte oñehaʼãvaʼerã oñemoag̃uive hese.
5:1-3, 8, 20, 21, ÑÑB. Jehová ára ningo hiʼag̃uimbaitéma ohóvo. Upévare tekotevẽ “ñamonde pe jerovia ha mborayhu añeteguáva, pe soldádo omondeháicha ipytiʼa moʼãha, ha jaiporu pe esperánsa, pe soldádo oiporuháicha iñakã moʼãha”. Avei jajesareko meme vaʼerã Ñandejára Ñeʼẽ heʼívare.
“PEJEPYTASO”
Amalisia kongregasiónpe oĩ oñeʼẽ vaíva Pablo ohaivaʼekuére ikuatiañeʼẽ tenondeguápe, ha heʼi og̃uahẽmaha pe ára Jesús oisãmbyhy hag̃ua. Ohechauka hag̃ua chupekuéra ndaupeichaiha, Pablo omombeʼu mbaʼépa ‘oiko raẽ vaʼerã’ (2 Tes. 2:1-3).
Pablo omokyreʼỹ umi Tesalonicayguápe: ‘Pejepytaso ha ani penderesarái umi mbaʼe ore pomboʼevaʼekuégui’. Heʼi avei chupekuéra ‘ojei hag̃ua opaichagua ermánogui ndoguatáiva Ñandejára rapére’ (2 Tes. 2:15; 3:6, ÑÑB).
Porandukuéra:
2:3, 8, ÑÑB. Mávapa hína pe kuimbaʼe ‘oñemoĩva opaichagua léi rehe’, ha mbaʼéichapa oñehundíta? Ko kuimbaʼe orrepresenta umi omoakãvape rrelihión heʼíva ijehe kristianoha. Jesucristo añoite ningo ikatu oikuaauka Ñandejára ojapótava umi iñañávare. Chupe oñehenói “pe Ñeʼẽ”, oñeʼẽgui Jehová rérape (Juan 1:1). Upévare ikatu jaʼe Jesús heʼitaha oñehundi hag̃ua upe kuimbaʼe ‘oñemoĩvape opaichagua léi rehe’.
2:13, 14, BNP. Mbaʼéichapa ‘ojeporavo iñepyrũmby guive ojesalva hag̃ua’ umi ohótava yvágape? Jehová heʼírõ guare pe kuña ñemoñare ombochipetaha Satanás akã ohechauka avei oiporavotaha peteĩ atýpe oho hag̃ua yvágape (Gén. 3:15). Jehová heʼi avei mbaʼépa ojerure chuguikuéra, mbaʼe tembiapópa ojapóta ha ohasa asytaha hikuái. Opa koʼã mbaʼére ojeʼe Jehová ‘ohenoiha’ chupekuéra.
Mbaʼépa ñanemboʼe:
1:6-9. Jehová ohundi umi iñañávapente.
3:8-12. Kristianokuéra ombaʼapovaʼerã ohupyty hag̃ua hemikotevẽ ha upe aja osegi opredika. Hiʼag̃uíma ningo Jehová ára, péro upéva ndeʼiséi natekotevẽiha ñambaʼapove. Ñanderekoreíramo ikatu oiko ñandehegui tekove ateʼỹ ‘ojasurúva ou ha ohoʼỹvape chupe’ (1 Ped. 4:15, BNP).
‘EÑANGAREKO PORÃKE OJEHEJAVAʼEKUÉRE NDÉVE’
Pablo heʼi Timotéope: ‘Eñorairõ mbarete pe mbaʼe porã rehe, eñangareko porã nde jeroviáre ha tanepyʼapotĩ tapia’. Upéi omombeʼu mbaʼépa ojapovaʼerã kuimbaʼekuéra oreko hag̃ua rresponsavilida kongregasiónpe. Avei heʼi Timotéope: “Ani rehendu vyrorei oñemombeʼúva ko yvy arigua” (1 Tim. 1:18, 19, JMP; 3:1-10, 12, 13; 4:7).
Pablo ohai Timotéope: “Ani ne ñeʼẽ pohýi itujávape”; ha joʼa joʼa heʼi chupe: ‘Eñangareko porãke ojehejavaʼekuére ndéve jeroviápe. Ani rehendu ñeʼẽ rei, ha vyrorei opoíva umi heʼíva ijehe aipo iñaranduha’ (1 Tim. 5:1; 6:20).
Porandukuéra:
1:18; 4:14. Mbaʼépa ‘umi ñeʼẽ [térã profesía] ojeʼevaʼekue’ Timoteo rehe? Umíva oiméne umi mbaʼe Timoteo ojapótava kongregasiónpe, ha ojeʼevaʼekue Pablo ohórõ guare Lístrape, ojapóvo iviáhe mokõiha opredika hag̃ua (Hech. 16:1, 2). Oikuaávo koʼã profesía umi ansiáno kongregasionpegua ‘omoĩ ipo’ Timoteo akã ári, ha péicha oiporavo chupe ojapo hag̃ua peteĩ tembiapo kongregasiónpe.
2:15. Mbaʼérepa ojeʼe pe kuña oĩ porãveha imembýramo? Oñatendévo imembýre ha hógare pe kuña oĩ porãve, ndahekoreíri, ndoikói “iñeʼẽ rei ha oike opa mbaʼépe” (1 Tim. 5:11-15).
6:15, 16. Koʼápe piko oñeñeʼẽ Jehováre térã Jesús rehe? Koʼápe ningo oñeñeʼẽ Jesús rehe (1 Tim. 6:14). Jesús ndahaʼéi umi yvypóra ogovernávaicha. Haʼe niko mburuvichakuéra ruvicha ha arakaʼeve nomanomoʼãi (Dan. 7:14; Rom. 6:9). Ojupi guive yvágape ndaipóri yvypóra “ohechavaʼekue” chupe.
Mbaʼépa ñanemboʼe:
4:15. Oiméramo aréma jajevautisa hague térã ramoiténte, ñañehaʼãvaʼerã ñañemoag̃uive Jehováre ára ha ára.
6:2. Oiméramo ñambaʼapo peteĩ ñane ermánope g̃uarã naiporãi jajaprovecha hese. Koʼýte katu ñañehaʼãvaʼerã jajapo porãve ñane rembiapo.
‘EMOMBEʼU JEY JEÝKE ÑANDEJÁRA ÑEʼẼ, ÁRA HA PYHARE’
Ikatu hag̃uáicha Timoteo ogueropuʼaka umi provléma oútava Pablo ohai chupe: ‘Pe espíritu Ñandejára omeʼẽva ñandéve niko ndahaʼéi jakyhyje hag̃ua avavégui, ñande pyʼa ñamombarete hag̃ua katu, japorohayhu ha ñaneakãguapy hag̃ua’. Heʼi avei: “Ñandejára rembiguáiva niko ndoikoivaʼerã ñorairõme, oiko porã vaʼerã katu opavave ndive. Oporomboʼekuaavaʼerã” (2 Tim. 1:7; 2:24).
Pablo omokyreʼỹ Timotéope: “Aníke arakaʼeve rejei umi mbaʼe reikuaáva ha reroviávagui”. Ha umi apóstata oiko hatãgui, Pablo heʼi avei: ‘Emombeʼu jey jeýke Ñandejára Ñeʼẽ, ára ha pyhare; embohovake ha eporohekomboʼe tapia’ (2 Tim. 3:14; 4:2, JMP).
Porandukuéra:
1:13, BNP. Mbaʼépa hína umi ñeʼẽ “hekopetegua”? Umi ñeʼẽ “hekopetegua” niko umi ‘Jesucristo omboʼevaʼekue’ (1 Tim. 6:3). Ha opa mbaʼe Jesús ojapóva ha omboʼéva oĩ porã Ñandejára Ñeʼẽ heʼívare. Upévare ikatu jaʼe opa mbaʼe oĩva la Bíbliape haʼeha ñeʼẽ “hekopetegua”. Koʼãva ningo ohechauka ñandéve mbaʼépa Jehová ojerure ñandehegui. ‘Japyta’ hag̃ua koʼã ñeʼẽme jajapovaʼerã la Biblia heʼíva.
4:13. Mbaʼépa rakaʼe umi pergamíno? Umi pergamíno yma ojeporu ojehai hag̃ua hese ha ojejapo mymba pirekuégui. Oiméne Pablo oipota ojegueraha chupe Evréo Kuatiañeʼẽ ostudia hag̃ua oĩ aja préso Rómape. Oiméne ojeruréraʼe umi ojehaíva papírope, ha avei umi pergamíno.
Mbaʼépa ñanemboʼe:
1:5; 3:15. Timotéope oñemboʼe Ñandejára Ñeʼẽ michĩete guive, upévare ojerovia Jesúsre ha ojapo heta mbaʼe ijerovia rehehápe. Tekotevẽ tuvakuéra ohecha mbaʼéichapa okumplíta pe rresponsavilida orekóva Jehová ha ifamília renondépe.
1:16-18. Ñane ermanokuéra ohasa asy jave, ojepersegi térã ojeraha kárselpe, ñañemboʼevaʼerã hesekuéra ha ñañehaʼãmbaite ñaipytyvõ (Pro. 3:27; 1 Tes. 5:25).
2:22. Jaiko rangue jaiporueterei ñane tiémpo músikape, vyʼarãme, umi depórtepe, viáhepe, umi mbaʼe ñandegustávape, térã ñañemongeta hag̃ua vyroreíre, entéro kristiáno ha koʼýte umi imitãva omotenondevaʼerã Jehová servísio.
[Nóta oĩva taʼanga ndive páhina 31]
Mbaʼe kuatiañeʼẽpa ohaíraʼe Pablo ipahaitépe?