Tabangan an mga Napapasuway sa Aripompon

“Makigayagaya kamo sa sako, huli ta nanompongan ko an sakong nawarang karnero.”​—LUC. 15:6.

1. Paano pinatunayan ni Jesus na sia sarong mamomoton na pastor?

AN BUGTONG na Aki ni Jehova, si Jesu-Cristo, inaapod na “dakulang pastor kan mga karnero.” (Heb. 13:20) Ihinula kan Kasuratan an saiyang pagdatong asin ipinaheling kaiyan na sia sarong daing kaparehong Pastor na naghingoang hanapon an “nalagalag na mga karnero” nin Israel. (Mat. 2:1-6; 15:24) Dugang pa, kun paanong puedeng itao nin sarong literal na pastor an saiyang buhay tanganing protehiran an saiyang mga karnero, si Jesus nagadan bilang atang na pantubos para sa mga arog-karnero na gustong makinabang sa saiyang atang.​—Juan 10:11, 15; 1 Juan 2:1, 2.

2. Ano an tibaad nagin dahelan na magin inaktibo an nagkapirang Kristiano?

² Makamomondo, an nagkapira na minalataw na nagpahalaga sa atang ni Jesus asin nagdusay sa Dios dai na nakikiasosyar sa Kristianong kongregasyon. An pagkadesganar, mga problema sa salud, o iba pang dahelan tibaad nagpaluya sa saindang kaigotan asin nagin dahelan na sinda magin inaktibo. Minsan siring, makakamtan sana ninda an katrangkilohan asin kaogmahan na nasambitan ni David sa ika-23 na Salmo kun sinda kabtang kan aripompon nin Dios. Halimbawa, sia nag-awit: “Si Jehova an sakuyang Pastor. Dai ako magkukulang nin ano man.” (Sal. 23:1) An mga nasa aripompon nin Dios dai nagkukulang nin ano man sa espirituwal na paagi, alagad bako iyan an kamugtakan nin mga karnero na napapasuway. Siisay an makakatabang sa sainda? Paano ikakatao an tabang? Ano man nanggad an puedeng gibohon tanganing matabangan sinda na magbalik sa aripompon?

Siisay an Makakatabang?

3. Paano ipinaheling ni Jesus kun ano an kaipuhan tanganing tabangan an nalagalag na mga karnero kan pasabsaban nin Dios?

³ Kaipuhan an maigot na paghihingoa tanganing tabangan an nalagalag na mga karnero kan pasabsaban nin Dios. (Sal. 100:3) Iinilustrar ini ni Jesus kan sia magsabi: “Kun an sarong tawo may sanggatos na karnero asin nalagalag an saro, bakong binabayaan nia an nobenta y nuebe sa kabukidan asin hinahanap an nalagalag? Asin kun mangyari na makua nia iyan, talagang sinasabi ko saindo, sia naggagayagaya huli kaiyan nin orog pa kisa sa nobenta y nuebe na dai nagkaralagalag. Siring man bakong kawiliwili para sa sakong Ama na nasa langit na an saro kan saradit na ini mapahamak.” (Mat. 18:12-14) Siisay an makakatabang sa arog-karnerong mga indibiduwal na napapasuway sa aripompon?

4, 5. Ano an dapat na magin saboot nin kamagurangan dapit sa aripompon nin Dios?

 ⁴ Kun an Kristianong kamagurangan matabang sa napapasuway na karnero, dapat nindang girumdomon na an aripompon nin Dios sarong kongregasyon nin mga tawo na nagdusay ki Jehova​—iyo, sarong mahalagang marhay na ‘aripompon kan pasabsaban nin Dios.’ (Sal. 79:13) An siring na namomotan na karnero nangangaipo nin mamomoton na pag-ataman, asin nangangahulogan ini na an mamomoton na mga pastor dapat na magpaheling nin personal na interes sa sainda. An makikatood na mga pagsongko sa pagpastor sa sainda puedeng magin epektibong marhay. An mamomoton na pagparigon sa boot na itinatao sa sainda nin sarong pastor puedeng magpakosog sa sainda sa espirituwal asin magpaorog kan saindang pagmawot na magbalik giraray sa aripompon.​—1 Cor. 8:1.

⁵ An mga pastor kan aripompon nin Dios igwa nin paninimbagan na hanapon an mga karnero na napapasuway dangan pagmaigotan na tabangan sinda. Ipinagirumdom ni apostol Pablo sa Kristianong kamagurangan sa suanoy na Efeso an dapit sa saindang mga paninimbagan sa pagpastor kan sia magsabi: “Tawan nindo nin atension an saindong sadiri asin an bilog na aripompon, na sa tahaw kaiyan kamo ninombrahan kan banal na espiritu bilang mga paraataman, na pastoran an kongregasyon nin Dios, na saiyang binakal paagi sa dugo kan saiyang sadiring Aki.” (Gibo 20:28) Kaagid kaiyan, itinao ni apostol Pedro sa linahidan na kamagurangan na lalaki an sadol na ini: “Pastoran nindo an aripompon nin Dios na nasa saindong pangangataman, bakong sa kapiritan, kundi gikan sa boot; ni huli sa pagkamoot sa madayang pakinabang, kundi may pagkagalaga; ni nagpapakangkagurangnan sa mga mana nin Dios, kundi nagigin mga halimbawa sa aripompon.”​—1 Ped. 5:1-3.

6. Taano ta nangorognang kaipuhan kan mga karnero nin Dios an pag-ataman kan mga pastor ngonyan?

⁶ Kaipuhan na arogon nin Kristianong mga pastor “an marahay na pastor,” si Jesus. (Juan 10:11) Sia odok na nagmamakolog sa mga karnero nin Dios asin idinoon nia an kahalagahan nin pag-ataman sa sainda kan sabihon nia ki Simon Pedro na ‘pastoran an Saiyang saradit na karnero.’ (Basahon an Juan 21:15-17.) Nangorognang kaipuhan kan mga karnero an siring na pangangataman ngonyan, huling pinapakosog kan Diablo an saiyang paghihingoa na raoton an integridad kan mga nagdusay sa Dios. Inaaprobetsaran ni Satanas an mga kaluyahan sa laman asin ginagamit nia an kinaban tanganing engganyaron an mga karnero ni Jehova na makikabtang sa makasalan na mga aktibidad. (1 Juan 2:15-17; 5:19) An mga inaktibo an partikularmenteng madaling mabiktima asin kun siring nangangaipo sinda nin tabang tanganing ikaaplikar an sadol na ‘lumakaw segun sa espiritu.’ (Gal. 5:16-21, 25) Sa pagtabang sa siring na mga karnero, kaipuhan an mapagngayongayong pagsarig sa Dios, paggiya kan saiyang espiritu, asin ekspertong paggamit kan saiyang Tataramon.​—Tal. 3:5, 6; Luc. 11:13; Heb. 4:12.

7. Gurano kaimportante para sa kamagurangan na pastoran an mga arog-karnero na nasa pangangataman ninda?

⁷ An sarong pastor kan suanoy na Israel naggagamit nin halabang baston, o sogkod, na nakakurba an poro tanganing giyahan an saiyang aripompon. Mantang an mga karnero minaluwas o minalaog sa toril, an mga ini ‘minaagi sa irarom kan sogkod’ asin sa siring mabibilang kan pastor an mga karnero. (Lev. 27:32; Miq. 2:12; 7:14) Kaagid kaiyan, kaipuhan na midbidon asin bantayan nin Kristianong pastor an aripompon nin Dios na nasa pangangataman nia. (Ikomparar an Talinhaga 27:23.) Kun siring, an pagpastor saro sa mahahalagang bagay na pinag-oolayan kan grupo nin kamagurangan. Kaiba digdi an paggibo nin mga areglo tanganing tabangan an mga karnero na napapasuway. Si Jehova mismo nagsabi na hahanapon nia an saiyang mga karnero asin gigibohon nia sa sainda an pag-ataman na kaipuhan ninda. (Ezeq. 34:11) Kaya naoogma an Dios kun ginigibo nin kamagurangan an kaagid na mga lakdang sa paghihingoa na tabangan na bumalik sa aripompon an mga karnero na napapasuway.

8. Sa anong mga paagi puedeng magtao an kamagurangan nin personal na atension sa mga karnero?

⁸ Kun an sarong kapagtubod may helang sa pisikal, an pagbisita nin sarong pastor kan aripompon nin Dios puedeng magin gikanan nin kagayagayahan asin pagparigon sa boot. Totoo man iyan kun tinatawan nin personal na atension an sarong karnero na may helang sa espirituwal. An kamagurangan puedeng bumasa nin mga teksto, magrepaso nin sarong artikulo, ipakipag-olay an tampok na mga kabtang nin pagtiripon, mamibi kaiba an sarong inaktibo, asin iba pa. Puede nindang sambiton sa sarong inaktibo na an mga miembro kan kongregasyon maoogmang marhay na maheling siang mag-atender giraray sa mga pagtiripon kan kongregasyon. (2 Cor. 1:3-7; Sant. 5:13-15) An pagbisita, pag-apod sa telepono, o pagsurat puedeng makatabang nanggad! An  personal na pagtabang sa sarong karnero na napapasuway sa aripompon puede man na magtao nin orog na kagayagayahan sa mapagmalasakit na Kristianong pastor.

May Kooperasyon na Paghihingoa

9, 10. Taano ta masasabi nindo na bako sanang kamagurangan an maninigong magmakolog sa sarong karnero na napapasuway?

⁹ Nabubuhay kita sa sibot asin delikadong mga panahon, kaya posible na dai niato mariparo na an sarong kapagtubod napaparayo na sa kongregasyon. (Heb. 2:1) Pero, mahalagang marhay ki Jehova an saiyang mga karnero. Mahalaga an lambang saro sa sainda, kun paanong mahalaga an lambang kabtang kan hawak nin tawo. Huli kaini, kita gabos kaipuhan na magpaheling nin interes sa satong mga tugang asin tunay na magmakolog sa lambang saro. (1 Cor. 12:25) Kamo daw igwa kan siring na saboot?

¹⁰ Minsan ngani an kamagurangan an nangengenot sa paghanap asin pagtabang sa mga karnero na napapasuway, bako sanang Kristianong mga paraataman an maninigong magmakolog sa nawawarang mga kapagtubod. An iba puedeng makikooperar sa mga pastor na ini. Kita puede asin maninigo na magtao nin pagparigon sa boot saka espirituwal na tabang sa mga tugang niato na nangangaipo nin tabang tanganing magbalik sa aripompon. Paano puedeng itao an siring na tabang?

11, 12. Ano an puedeng magin pribilehio nindo sa pagtao nin espirituwal na tabang sa saro na nangangaipo kaiyan?

¹¹ Sa nagkapirang kamugtakan, puedeng iareglo nin kamagurangan na an eksperyensiadong mga parahayag kan Kahadean personal na magkondukta nin pag-adal sa Biblia sa mga inaktibo na nagmamawot na tabangan. An katuyohan kan siring na mga paghihingoa iyo na palaadon liwat sa sainda ‘an pagkamoot ninda kan enot.’ (Kap. 2:1, 4) An mga kapagtubod na ini puedeng parigonon asin pakosogon sa espirituwal paagi sa pagrepaso sa sainda kan mga impormasyon na dai ninda nadangog kan mga panahon na mayo sinda sa kongregasyon.

¹² Kun pakiolayan kamo kan kamagurangan na adalan nindo sa Biblia an sarong kapagtubod na nangangaipo nin espirituwal na tabang, ipamibi nindo ki Jehova na logod giyahan asin bendisyonan an saindong mga paghihingoa. Iyo, “ipamahala mo ki Jehova an saimong mga gibo asin an saimong mga plano mapaparigon.” (Tal. 16:3) Horophoropon an mga teksto sa Biblia asin an nakakapakosog sa pagtubod na mga punto na puede nindong gamiton sa pakikipag-olay sa mga nangangaipo nin espirituwal na tabang. Horophoropon an marahayon na halimbawa ni apostol Pablo. (Basahon an Roma 1:11, 12.) Minawot ni Pablo na maheling an mga Kristiano sa Roma sa katuyohan na magtao sa sainda nin espirituwal na balaog tanganing sinda maparigon. Inantisipar man nia an pagparinigonan nin boot. Bako daw na maninigo kitang magkaigwa kan saboot na iyan kun pinagmamaigotan niatong tabangan an mga karnero na napapasuway sa aripompon nin Dios?

13. Ano an puede nindong ipakipag-olay sa sarong inaktibo?

¹³ Sa saindong pag-oolay, puede kamong maghapot, “Paano nindo nanodan an katotoohan?” Ipagirumdom sa sainda an manongod sa nakaaging mga kagayagayahan, na dinadagka an inaktibo na sabihon an nakakaogmang marhay na mga eksperyensia nia kaidto sa mga pagtiripon, sa paghuhulit, asin sa mga kombension. Sambiton an maogmang mga panahon  na tibaad magkaibanan nindong naeksperyensiahan sa paglilingkod ki Jehova. Sambiton an saindong kagayagayahan sa pagkaigwa nin dayupot na relasyon ki Jehova. (Sant. 4:8) Sambiton an saindong pagpasalamat huli sa pag-asikaso nin Dios sa sato bilang saiyang banwaan​—nangorogna paagi sa pagtao sa sato nin karangahan asin paglaom sa panahon kan mga kahorasaan niato.​—Roma 15:4; 2 Cor. 1:3, 4.

14, 15. Tibaad makatabang sa mga inaktibo na ipagirumdom sa sainda an anong mga bendisyon na nakamtan ninda kaidto?

¹⁴ Posibleng marhay na magigin kapakipakinabang na ipagirumdom sa inaktibo an nagkapira sa mga bendisyon na inako nia kan sia dayupot pang nakikiasosyar sa kongregasyon. Halimbawa, yaon kaidto an bendisyon na tumalubo sa kaaraman manongod sa Tataramon asin mga katuyohan nin Dios. (Tal. 4:18) Kan sia ‘naglalakaw segun sa espiritu,’ daing duwa-duwa na mas pasil para sa saiya kaidto na labanan an mga sugot na magkasala. (Gal. 5:22-26) Dangan, huling may malinig na konsensia, sia nakakadolok kaidto ki Jehova sa pamibi asin igwa kan ‘katoninongan nin Dios na minalampas sa gabos na kaisipan asin nag-iingat kan satong puso asin mga pag-isip.’ (Fil. 4:6, 7) Girumdomon an siring na mga punto, magpaheling nin sinserong interes, asin mamomoton nanggad na dagkahon an saindong espirituwal na tugang na magbalik sa aripompon.​—Basahon an Filipos 2:4.

¹⁵ Ipamugtak na, bilang sarong magurang sa kongregasyon, nagsosongko ka tanganing magpastor. Puede mong dagkahon an sarong inaktibong mag-agom na horophoropon an panahon na enot nindang nanodan an katotoohan sa Tataramon nin Dios. Para sa sainda kaidto, kanigoan karahay, karasonable, kanakakakontento, asin kanakakapatalingkas sa espirituwal kan katotoohan! (Juan 8:32) Nagpasalamat nanggad sinda huli sa nanonodan ninda kaidto manongod ki Jehova, sa pagkamoot nia, asin sa marahayon na mga katuyohan nia! (Ikomparar an Lucas 24:32.) Ipagirumdom sa sainda an dapit sa dayupot na relasyon ki Jehova asin an marahayon na pribilehio nin pamibi na nakakamtan nin nagdusay na mga Kristiano. Maigot na dagkahon an mga inaktibo na maghimate giraray sa “mamuraway na maogmang bareta kan maogmang Dios,” si Jehova.​—1 Tim. 1:11.

Padagos na Magpaheling sa Sainda nin Pagkamoot

16. Magsambit nin halimbawa na nagpapaheling na talagang epektibo an mga paghihingoa na magtao nin espirituwal na tabang.

¹⁶ Talaga daw na epektibo an mga suhestion na nasambitan sa enotan? Iyo. Halimbawa, sarong hoben na nagpoon bilang parahayag kan Kahadean kan sia 12 anyos an nagin inaktibo sa edad na 15. Minsan siring, kan huri sia nagin aktibo giraray, asin sia labi nang 30 taon sa bilog na panahon na paglilingkod. An pangenot na dahelan na sia naomayan sa espirituwal iyo an tabang na itinao sa saiya nin sarong Kristianong magurang sa kongregasyon. Pinahalagahan nanggad nia an espirituwal na tabang na iyan!

17, 18. Anong mga kualidad an makakatabang sa saindo na tabangan an saro na napapasuway sa aripompon nin Dios?

¹⁷ Pagkamoot an nagmomotibar sa mga Kristiano na tabangan an mga inaktibo na magbalik sa kongregasyon. Mapadapit sa saiyang mga parasunod, si Jesus nagsabi: “Tinatawan ko kamo nin bagong togon, na kamo magkaminorootmootan; siring kan pagkamoot ko sa saindo, na kamo man magkaminorootmootan. Paagi kaini an gabos makakaaram na kamo an sakong mga disipulo, kun kamo nagkakaminorootmootan.” (Juan 13:34, 35) Iyo, an pagkamoot sarong nagpapamidbid na tanda nin tunay na mga Kristiano. Bako daw na maninigong ipaheling an pagkamoot na iyan sa bautisadong mga Kristiano na tibaad nagin inaktibo? Tunay nanggad na maninigo iyan! Alagad an pagtao nin kinakaipuhan na tabang puedeng mangaipo nin pagpaheling nin manlaenlaen na diosnon na kualidad.

¹⁸ Kun kamo matabang sa saro na napapasuway sa aripompon nin Dios, anong mga kualidad an tibaad kaipuhan nindong ipaheling? Apuera sa pagkamoot, tibaad kaipuhan nindong magpaheling nin pagmalasakit, kabootan, asin pakatios. Depende sa mga kamugtakan, tibaad kaipuhan man nindong magin  mapagpatawad. Si Pablo nagsurat: “Isulog nindo an mamomoton na mga pagmate nin pagmalasakit, kabootan, kababaan nin isip, kahoyoan, asin pakatios. Padagos kamong magpatiriostios asin lubos na magpatarawadtawadan kun an siisay man igwa nin dahelan na magreklamo tumang sa saro. Kun paanong kamo lubos na pinatawad ni Jehova, siring man an gibohon nindo. Alagad, laen pa sa gabos na bagay na ini, isulog nindo an pagkamoot, huli ta iyan sangkap na bogkos nin pagkasararo.”​—Col. 3:12-14.

19. Taano ta kapakipakinabang na maghingoang tabangan an mga arog-karnero na magbalik sa Kristianong aripompon?

¹⁹ Totokaron sa sunod na artikulong pag-aadalan sa isyung ini an mga dahelan kun taano ta an nagkapira napapasuway sa aripompon nin Dios. Ipapaheling man kaiyan kun taano ta makakaasa an mga nagbabalik na sinda aakoon. Mantang pinag-aadalan nindo an artikulong iyan asin hinohorophorop an artikulong ini, makakasierto kamo na kapakipakinabang an ano man na paghihingoa nindo na tabangan an mga arog-karnero na magbalik sa Kristianong aripompon. Sa presenteng sistema nin mga bagay, dakol na tawo an naggagamit kan bilog nindang buhay tanganing magtipon nin kayamanan, alagad an buhay nin saro tunay na mas mahalaga pa ngani kisa sa gabos na kuarta sa kinaban. Idinoon ini ni Jesus sa saiyang ilustrasyon dapit sa nawarang karnero. (Mat. 18:12-14) Logod na pirme nindong girumdomon an puntong iyan mantang maigot asin apretado kamong naghihingoa na tabangan na magbalik sa aripompon an namomotan ni Jehova na mga arog-karnero na napapasuway.

Ano an Isisimbag Nindo?

• Ano an paninimbagan nin Kristianong mga pastor mapadapit sa mga arog-karnero na napapasuway sa aripompon?

• Paano nindo matatabangan an mga dai na nakikiasosyar ngonyan sa kongregasyon?

• Anong mga kualidad an makakatabang sa saindo na tabangan an mga napapasuway sa aripompon?

[Mga Hapot Para sa Pag-adal]

[Ritrato sa pahina 10]

An Kristianong mga pastor mamomoton na naghihingoa na tabangan an mga napapasuway sa aripompon nin Dios