Tabangi Kadtong Nahimulag sa Panon
Tabangi Kadtong Nahimulag sa Panon
“Magmaya kamo uban kanako, tungod kay nakaplagan ko ang akong karnero nga nawala.”—LUC. 15:6.
1. Sa unsang paagi gipamatud-an ni Jesus nga siya usa ka mahigugmaong magbalantay?
ANG bugtong Anak ni Jehova, si Jesu-Kristo, gitawag nga “dakong magbalantay sa mga karnero.” (Heb. 13:20) Ang Kasulatan nagtagna sa iyang pag-abot ug nagpakita nga siya maoy usa ka talagsaong Magbalantay nga naningkamot sa pagpangita sa “nawalang mga karnero” sa Israel. (Mat. 2:1-6; 15:24) Dugang pa, sama nga ang usa ka magbalantay andam mamatay aron mapanalipdan ang iyang mga karnero, si Jesus namatay ingong halad lukat alang sa mga tawong karnerohon nga magpasundayag ug pagtuo sa iyang halad.—Juan 10:11, 15; 1 Juan 2:1, 2.
2. Nganong nahimo mang di-aktibo ang pipila ka Kristohanon?
2 Ikasubo nga ang pipila nga nagpasundayag kaniadto ug pagtuo sa halad ni Jesus ug nagpahinungod sa Diyos wala na makig-uban sa Kristohanong kongregasyon. Sila lagmit nabugnaw ug nahimong di-aktibo tungod sa kaluya sa buot, dili maayong panglawas, o tungod sa ubang hinungdan. Apan, mapahimuslan lamang nila ang kalinaw ug kalipay nga gihisgotan ni David sa Salmo 23 kon sila makig-uban sa panon sa Diyos. Pananglitan, si David miawit: “Si Jehova mao ang akong Magbalantay. Walay makulang kanako.” (Sal. 23:1) Nabatonan sa panon sa Diyos ang tanan nilang gikinahanglan aron mahuptan ang lig-ong relasyon sa Diyos, apan wala kana mabatoni niadtong nahimulag sa panon. Kinsay makatabang kanila? Sa unsang paagi sila matabangan? Unsang mga lakang ang kinahanglang himoon aron matabangan sila nga makabalik sa panon?
Kinsay Makatabang?
3. Giunsa pagpakita ni Jesus kon unsay gikinahanglan aron maluwas ang mga karnero nga nahimulag sa panon sa Diyos?
3 Gikinahanglan ang pagpanlimbasog aron maluwas ang mga karnero nga nahimulag sa panon sa Diyos. (Sal. 100:3) Giilustrar kini ni Jesus sa dihang siya miingon: “Kon ang usa ka tawo adunay usa ka gatos ka karnero ug ang usa niini mahisalaag, dili ba niya biyaan ang kasiyamag-siyam diha sa kabukiran ug molakaw sa pagpangita sa usa nga nahisalaag? Ug kon makaplagan niya kini, ako tinong magaingon kaninyo, siya labaw nga malipay labot niini kay sa kasiyamag-siyam nga wala mahisalaag. Sa susama dili tilinguhaong butang sa akong Amahan nga anaa sa langit nga malaglag ang usa niining mga gagmay.” (Mat. 18:12-14) Kinsay makatabang sa mga karnero nga nahimulag sa panon?
4, 5. Unsa ang angayng tinamdan sa mga ansiyano ngadto sa panon sa Diyos?
4 Aron matabangan sa mga ansiyano ang nahisalaag nga mga karnero, kinahanglan nilang hinumdoman nga ang panon sa Diyos maoy kongregasyon sa mga tawo nga napahinungod kang Jehova—oo, sila maoy bililhong ‘mga karnero sa sibsibanan sa Diyos.’ (Sal. 79:13) Sila nagkinahanglan ug malumong pag-atiman, ug kini nagpasabot nga ang mahigugmaong mga magbalantay kinahanglang magpakitag interes kanila. Makatabang gayod ang pagduaw kanila sa mga magbalantay. Ang mahigugmaong pagdasig kanila sa mga magbalantay mahimong makapalig-on ug makapalihok kanila nga mobalik sa panon sa Diyos.—1 Cor. 8:1.
5 Responsabilidad sa mga magbalantay sa panon sa Diyos ang pagpangita ug pagtabang sa nahisalaag nga mga karnero. Gipahinumdoman ni apostol Pablo ang mga ansiyano sa karaang Efeso sa ilang responsabilidad ingong magbalantay sa dihang siya miingon: “Tagda ang inyong kaugalingon ug ang tibuok panon, nga niana kamo gitudlo sa balaang espiritu nga mga magtatan-aw, aron magbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.” (Buh. 20:28) Sa samang paagi, si apostol Pedro nag-awhag sa dinihogang mga ansiyano: “Bantayi ninyo ang panon sa Diyos nga ubos sa inyong pag-atiman, dili nga pinugos, kondili kinabubut-on; ni tungod sa gugma sa kinitaan pinaagig limbong, apan maikagon; ni mahariharion ibabaw niadtong panulondon sa Diyos, apan mahimong mga panig-ingnan alang sa panon.”—1 Ped. 5:1-3.
6. Nganong ilabinang gikinahanglan karon sa mga karnero sa Diyos ang pag-atiman sa mga magbalantay?
6 Kinahanglang sundogon sa Kristohanong mga magbalantay “ang maayong magbalantay,” si Jesus. (Juan 10:11) Siya nahangawa pag-ayo sa mga karnero sa Diyos, ug iyang gipasiugda ang kahinungdanon sa pag-atiman kanila sa dihang iyang giingnan si Simon Pedro nga ‘bantayan ang Iyang gagmayng mga karnero.’ (Basaha ang Juan 21:15-17.) Ilabinang gikinahanglan karon sa mga karnero ang maong pag-atiman tungod kay ginahimo sa Yawa ang iyang maarangan sa pagbungkag sa integridad sa dedikadong mga alagad sa Diyos. Si Satanas nagpahimulos sa kahuyangan sa mga karnero sa Diyos ug naggamit sa kalibotan sa pagdaldal kanila sa pagpakasala. (1 Juan 2:15-17; 5:19) Mas huyang ang mga di-aktibo mao nga sila nanginahanglag tabang sa pagpadapat sa tambag nga ‘molakaw pinaagi sa espiritu.’ (Gal. 5:16-21, 25) Aron matabangan ang maong mga karnero, gikinahanglan ang hugot nga pagsalig sa Diyos, giya sa iyang espiritu, ug ang hanas nga paggamit sa iyang Pulong.—Prov. 3:5, 6; Luc. 11:13; Heb. 4:12.
7. Nganong hinungdanon kaayo nga ang mga ansiyano mohimog mga pagduaw isip magbalantay?
7 Ang usa ka magbalantay sa karaang Israel mogamit ug usa ka taas, nagkurba nga sungkod, o baston, sa paggiya sa iyang panon. Sa dihang ang mga karnero mosulod o mogawas sa toril, sila “moagi ilalom sa baston” mao nga maihap sila sa magbalantay. (Lev. 27:32; Miq. 2:12; 7:14) Kinahanglang mahibaloan usab sa usa ka Kristohanong magbalantay ang kahimtang sa panon sa Diyos. (Itandi ang Proverbio 27:23.) Busa, ang pagduaw isip magbalantay maoy usa sa labing hinungdanong butang nga hisgotan sa lawas sa mga ansiyano. Kini naglakip sa paghimog mga kahikayan sa pagtabang sa nahisalaag nga mga karnero. Si Jehova mismo ang miingon nga iyang pangitaon ug atimanon ang iyang mga karnero. (Ezeq. 34:11) Busa ang Diyos malipay gayod sa dihang ang mga ansiyano moduaw ug motabang sa mga karnero nga nahimulag sa panon.
8. Sa unsang mga paagi nga ang mga ansiyano makahatag ug personal nga tabang sa usa ka karnero nga nahisalaag?
8 Malipay ug mapalig-on gayod ang usa ka igsoon nga masakiton sa pisikal kon siya duawon sa mga magbalantay. Sa samang paagi, malipay ug madasig usab ang usa ka igsoon nga masakiton sa espirituwal kon siya duawon sa mga magbalantay. Ang mga ansiyano mahimong magbasa ug mga teksto, magrepaso ug usa ka artikulo, maghisgot ug mga punto gikan sa tigom, mag-ampo uban sa di-aktibo, ug uban pa. Mahimo nilang isulti kaniya nga malipay gayod ang mga igsoon sa kongregasyon kon motambong siya pag-usab sa mga tigom. (2 Cor. 1:3-7; Sant. 5:13-15) Makatabang gayod ang pagduaw, pagtawag sa telepono, o pagpadalag sulat! Madugangan usab ang kalipay sa usa ka mabination nga Kristohanong magbalantay kon siya personal nga motabang sa usa ka karnero nga nahisalaag.
Pagtinabangay
9, 10. Nganong makaingon man kita nga dili lamang mga ansiyano ang angayng magpakitag kahangawa sa mga karnero nga nahisalaag?
9 Sanglit kita nagkinabuhi sa puliki ug malisod nga panahon, posible nga dili nato mamatikdan nga ang usa ka igsoon hinayhinay nang nahilayo sa kongregasyon. (Heb. 2:1) Apan, bililhon alang kang Jehova ang iyang mga karnero. Ang matag usa kanila mahinungdanon, sama nga mahinungdanon ang matag sangkap, o bahin, sa lawas sa tawo. Busa, kitang tanan angayng magpakitag tiunay nga kahangawa sa usag usa. (1 Cor. 12:25) Ikaw ba nahangawa kanila?
10 Bisan tuod ang mga ansiyano maoy manguna sa pagpangita ug pagtabang sa mga karnero nga nahisalaag, dili lamang sila ang angayng magpakitag kahangawa sa maong mga igsoon. Ang ubang mga igsoon mahimong makigkooperar sa mga magbalantay. Angay natong dasigon ug tabangan ang atong mga igsoon nga nanginahanglag tabang aron sila makabalik sa panon. Sa unsang paagi kana himoon?
11, 12. Sa unsang paagi ikaw makapribilehiyo sa pagtabang sa mga igsoon nga nanginahanglag espirituwal nga tabang?
11 May mga panahon nga ang mga ansiyano mag-asayn ug mga magmamantala aron dumalahag pagtuon sa Bibliya ang mga di-aktibo nga gustong magpatabang. Ang katuyoan niana mao ang pagtabang kanila nga mahaling ang “gugma nga [ilang] nabatonan sa sinugdan.” (Pin. 2:1, 4) Sila mahimong dasigon ug palig-onon pinaagi sa pagpaambit kanila sa mga punto nga gihisgotan sa tigom sa panahon nga wala sila makatambong.
12 Kon hangyoon ka sa mga ansiyano sa pagdumala ug pagtuon uban sa usa ka igsoon nga nanginahanglag espirituwal nga tabang, pangayoa ang giya ug panalangin ni Jehova. Oo, “itugyan ang imong mga buhat kang Jehova ug ang imong mga plano mahimong lig-on.” (Prov. 16:3) Palandonga ang mga teksto sa Bibliya ug ang makapadasig nga mga punto nga imong magamit sa pagtuon uban sa mga igsoon nga nanginahanglag espirituwal nga tabang. Palandonga ang maayong panig-ingnan ni apostol Pablo. (Basaha ang Roma 1:11, 12.) Si Pablo nangandoy nga makigkita sa mga Kristohanon sa Roma aron palig-onon sila pinaagi sa pagpaambit kanilag pipila ka espirituwal nga gasa. Buot usab niya nga magkadinasigay sila. Dili ba angay usab nga mao kanay atong tinamdan sa dihang kita motabang sa mga karnero nga nahimulag sa panon sa Diyos?
13. Unsay mahimo nimong hisgotan uban sa usa ka di-aktibo?
13 Sa inyong panaghisgot, ikaw mahimong mangutana, “Sa unsang paagi imong nakat-onan ang kamatuoran?” Ipahinumdom kaniya ang kalipay nga iyang nasinati kaniadto, ug awhaga siya sa pag-asoy sa makapalig-on niyang mga eksperyensiya panahon sa mga tigom, sa pagsangyaw, ug sa mga kombensiyon. Hisgoti ang inyong makapadasig nga mga kasinatian diha sa pag-alagad. Isulti ang imong kalipay sa pagkahimong suod kang Jehova. (Sant. 4:8) Ipahayag ang imong pagkamapasalamaton sa Diyos tungod sa iyang pagtagana sa atong mga panginahanglan ingong iyang katawhan—ilabina tungod sa iyang paghupay ug paghatag kanatog paglaom sa atong mga kasakit.—Roma 15:4; 2 Cor. 1:3, 4.
14, 15. Unsang mga panalangin ang mahimong ipahinumdom ngadto sa mga di-aktibo?
14 Maayo gayod nga pahinumdoman ang usa ka di-aktibo sa mga panalangin nga iyang napahimuslan kaniadto tungod sa iyang pagpakigsuod sa kongregasyon. Pananglitan, anaa ang kaayohan nga iyang napahimuslan tungod sa pag-uswag sa iyang kahibalo bahin sa Pulong ug katuyoan sa Diyos. (Prov. 4:18) Sa dihang siya ‘milakaw pinaagi sa espiritu,’ lagmit wala siya maglisod sa pagsukol sa mga tentasyon. (Gal. 5:22-26) Tungod kay hinlo ang iyang konsensiya, siya nakahimo sa pagduol kang Jehova pinaagi sa pag-ampo ug sa pagpahimulos sa ‘kalinaw sa Diyos nga labaw sa tanang panghunahuna ug nagabantay sa atong mga kasingkasing ug gahom sa pangisip.’ (Filip. 4:6, 7) Hinumdomi kanunay kanang mga puntoha, ipakita ang tiunay nga interes, ug dasiga gayod ang imong igsoon nga mobalik sa panon sa Diyos.—Basaha ang Filipos 2:4.
15 Ibutang ta nga ikaw usa ka ansiyano nga naghimog pagduaw isip magbalantay. Mahimo nimong dasigon ang usa ka di-aktibong magtiayon sa pagpamalandong sa panahon nga una nilang nakat-onan ang kamatuoran gikan sa Pulong sa Diyos. Ang kamatuoran maayo kaayo, makapatagbaw, ug nakahatag kanilag kagawasan! (Juan 8:32) Sila mapasalamaton gayod kaniadto tungod kay sila nakakat-on bahin kang Jehova, sa iyang gugma, ug sa iyang kahibulongang katuyoan! (Itandi ang Lucas 24:32.) Ipahinumdom kanila nga napahimuslan sa dedikadong mga Kristohanon ang suod nga relasyon uban kang Jehova ug ang talagsaong pribilehiyo sa pag-ampo. Dasiga gayod ang mga di-aktibo nga mosanong pag-usab “sa mahimayaong maayong balita sa malipayong Diyos,” si Jehova.—1 Tim. 1:11.
Padayon sa Pagpakitag Gugma Kanila
16. Paghatag ug pananglitan nga nagpakita nga epektibo gayod ang paghatag ug espirituwal nga tabang sa uban.
16 Epektibo kaha kining maong mga sugyot? Oo. Pananglitan, usa ka batan-on nga nahimong magmamantala sa edad nga 12 anyos ang nahimong di-aktibo sa dihang nagpangedaron siyag 15 anyos. Hinunoa, siya nahimong aktibo pag-usab, ug siya kapin na sa 30 ka tuig diha sa bug-os-panahong pag-alagad. Ang ilabinang nakatabang kaniya mao ang pagdasig kaniya sa usa ka ansiyano. Siya mapasalamaton gayod sa maong ansiyano!
17, 18. Unsang mga hiyasa ang makatabang kanimo sa pagtabang niadtong nahimulag sa panon?
17 Ang gugma maoy magpalihok sa mga Kristohanon sa pagtabang sa mga di-aktibo nga mobalik sa kongregasyon. Bahin sa iyang mga sumusunod, si Jesus miingon: “Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:34, 35) Oo, ang gugma maoy timailhan sa matuod nga mga Kristohanon. Dili ba angay natong ipakita kanang maong gugma ngadto sa bawtismadong mga Kristohanon nga nahimong di-aktibo? Siyempre! Apan aron ato silang matabangan, kinahanglang magpasundayag kita ug pipila ka Kristohanong mga hiyas.
18 Aron imong matabangan ang usa ka di-aktibo, unsang mga hiyasa ang kinahanglan nimong ipasundayag? Gawas sa gugma, lagmit ikaw kinahanglang magpasundayag usab ug pagkamabination, kalulot, kalumo, ug hataas-nga-pailob. Depende sa kahimtang, kinahanglang andam ka usab tingali sa pagpasaylo. Si Pablo misulat: “Isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob. Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon. Apan, gawas pa niining tanang butanga, isul-ob ninyo ang gugma, kay kini maoy usa ka hingpit nga bugkos sa panaghiusa.”—Col. 3:12-14.
19. Nganong dili makawang ang atong paningkamot sa pagtabang sa mga karnero nga nahimulag sa panon?
19 Ang sunod nga artikulo niining gulaa maghisgot sa mga hinungdan kon nganong ang pipila nahimulag sa panon sa Diyos. Kini maghisgot usab kon unsa ang madahom niadtong mobalik sa panon sa Diyos. Samtang imong tun-an ang sunod nga artikulo ug pamalandongon kining artikuloha, makasalig ka nga dili gayod makawang ang imong paningkamot sa pagtabang sa mga karnero nga nahimulag sa panon. Niini nga sistema sa mga butang, daghang tawo ang nangamas sa tibuok nilang kinabuhi aron makatigom ug bahandi, apan ang usa ka kinabuhi mas bililhon pa kay sa tanang bahandi sa kalibotan. Gipasiugda kini ni Jesus diha sa iyang ilustrasyon bahin sa nawala nga karnero. (Mat. 18:12-14) Hinaot nga imo kanang hinumdoman samtang ikaw maningkamot pag-ayo ug dili maglangan sa pagtabang sa bililhong mga karnero ni Jehova nga nahimulag sa panon.
Unsay Imong Tubag?
• Unsay responsabilidad sa Kristohanong mga magbalantay ngadto sa mga karnero nga nahimulag sa panon?
• Sa unsang paagi imong matabangan kadtong wala na makig-uban sa kongregasyon?
• Unsang mga hiyasa ang imong gikinahanglan sa pagtabang niadtong nahimulag sa panon?
[Mga Pangutana sa Pagtuon]
[Hulagway sa panid 10]
Ang Kristohanong mga magbalantay mahigugmaong naningkamot sa pagtabang niadtong nahimulag sa panon