Ed bann ki’n elwannyen avek kongregasyon
Ed bann ki’n elwannyen avek kongregasyon
“Annou fete, mon’n retrouv mon mouton ki ti’n perdi.”—LIK 15:6.
1. Ki mannyer Zezi ti montre ki i ti en bon berze?
ZEZI sa sel Garson Zeova i ganny apele ‘sa gran berze bann mouton.’ (Ebr. 13:20) Labib ti predir son larive e montre ki i ti en Berze remarkab ki ti rod “bann brebi perdi” Izrael. (Mat. 2:1-6; 15:24) Deplis, parey en berze ti kapab donn son lavi pour protez son mouton, Zezi ti donn son lavi konman en sakrifis pour bann dimoun ki ti pou aksepte sa laranzman.—Zan 10:11, 15; 1 Zan 2:1, 2.
2. Kwa ki’n kapab fer serten Kretyen vin inaktif?
2 Malerezman, serten ki ti paret apresye sakrifis Zezi e ki ti’n dedye zot lavi avek Bondye i nepli asosye avek kongregasyon. Petet zot nepli annan sa devouman e zot in vin inaktif akoz dekourazman, problenm lasante oubyen lezot fakter ankor. Me, zot kapab rezwir sa trankilite ek boner ki David ti koz lo la dan Psonm 23 selman si zot form parti pep Bondye. Par egzanp i ti sante: “Zeova i mon Berze. Mon pa pou mank nanryen.” (Ps. 23:1) Bann dimoun dan troupo Bondye i annan tou sa ki zot bezwen pour gard en relasyon for avek li, me sa i pa leka pour bann ki nepli asosye avek kongregasyon. Lekel ki kapab ed zot? Ki mannyer zot kapab ganny ede? Ki keksoz spesifik ki kapab ganny fer pour ed zot retourn dan troupo?
Lekel ki kapab ede?
3. Konman Zezi ti montre sa ki bezwen ganny fer pour sov bann mouton Bondye?
3 Nou bezwen fer en gran zefor pour sov bann mouton perdi Bondye. (Ps. 100:3) Zezi ti demontre sa ler i ti dir: “Si en dimoun i annan 100 mouton e i perdi enn dan sa san pa i pou les sa 99 manze lo montanny pour al rod sa enn ki’n perdi? E si i arive retrouv li, mon dir zot an verite, i pou annan plis lazwa pour sa enn menm mouton ki pour sa 99 ki pa’n perdi. Dan menm fason, zot Papa ki dan lesyel pa oule ki okenn sa bann pti zanfan perdi.” (Mat. 18:12-14) Lekel ki kapab ed bann frer ek ser ki nepli asosye avek kongregasyon?
4, 5. Ki latitid bann ansyen i bezwen annan anver kongregasyon Bondye?
4 Bann ansyen ki anvi ed bann manm kongregasyon ki’n elwannyen, zot bezwen pa bliye ki mouton Bondye i en group dimoun ki’n dedye zot lavi avek Li e zot en ‘troupo presye dan son zerb.’ (Ps. 79:13) I neseser pour pran swen avek bann mouton avek tandres e sa i vedir ki bann bon berze i bezwen annan en lentere personnel dan zot. Ler bann ansyen i fer bann vizit ankourazan e amikal, sa i kapab vreman efikas. Bann lankourazman ranpli avek lanmour ki en ansyen i donnen i kapab batir zot lafwa e ogmant zot dezir pour retourn dan kongregasyon.—1 Kor. 8:1.
5 Bann ansyen ki pe pran swen avek kongregasyon Bondye i annan sa responsabilite pour rod sa bann ki’n elwannyen e apre pour esey ed zot. Zapot Pol ti rapel bann ansyen Efez konsernan zot responsabilite pour pran swen avek bann manm kongregasyon ler i ti dir: “Vey byen zot lekor e pran swen troupo ki Sent-Espri in konfye zot konman bann gardyen. Pran swen [kongregasyon] ki Bondye in gannyen par disan son prop Garson.” (Akt 20:28) Pareyman, zapot Pyer ti donn bann ansyen ki ti Kretyen swazir sa konsey: “Pran byen swen troupo Bondye ki’n ganny konfye avek zot konman berze; pa fer li kontre-ker me avek bonn volonte, konman Bondye i oule. Pa fer li pour ganny larzan me avek devouman. Pa bezwen domin lo bann ki’n ganny konfye dan zot responsabilite, me zot menm, zot devre vin en model pour troupo.”—1 Pyer 5:1-3.
6. Akoz bann mouton Bondye i sirtou bezwen led bann berze ozordi?
6 Bann ansyen i bezwen imit sa “bon berze” Zezi. (Zan 10:11) I ti annan en gran lentere dan troupo Bondye e i ti met lanfaz lo lenportans pour pran swen avek zot ler i ti demann Simon Pyer pour ‘pran swen avek Son bann mouton.’ (Lir Zan 21:15-17.) Sirtou ozordi i neseser pour bann mouton ganny en tel swen akoz Dyab in ogmant son zefor pour fer bann ki’n dedye zot lavi avek Bondye kas zot fidelite. Satan i profit lo febles bann mouton Zeova e servi sa lemonn pour esey fer zot komet pese. (1 Zan 2:15-17; 5:19) Vi ki zot san defans bann frer ek ser ki inaktif i bezwen led pour aplik sa konsey pour “les Lespri diriz zot lavi.” (Gal. 5:16-21, 25) Pour kapab ed sa bann mouton i neseser pour demann Bondye son gidans, led son lespri sen e servi byen son Parol Labib.—Prov. 3:5, 6; Lik 11:13; Ebr. 4:12.
7. Akoz i enportan pour bann ansyen pran swen avek bann mouton ki zot in ganny konfye avek?
7 Dan ansyen Izrael en berze ti servi en gran baton pour gid son troupo. Anmezir ki bann mouton i antre oubyen sorti dan berkay, zot ti “pas anba sa baton” e sa berze ti kapab kont zot. (Lev. 27:32; Mik. 2:12; 7:14) Pareyman en berze Kretyen i bezwen konn byen sa troupo Bondye ki i pe pran swen avek e konnen si sak manm i byen. (Konpar Proverb 27:23.) Alors, vizit e pran swen avek bann manm kongregasyon i en size enportan ki konsey ansyen i bezwen diskit lo la. Sa i enkli fer laranzman pour ed bann mouton ki’n elwannyen. Zeova li menm ti dir ki i ti pou rod son bann mouton e donn zot sa swen ki zot bezwen. (Ezek. 34:11) Alors Bondye i kontan ler bann ansyen i azir parey li e fer zefor pour ed bann ki’n elwannyen avek kongregasyon pour retournen.
8. Ki mannyer bann ansyen i kapab ede personnelman?
8 Ler en ansyen i rann vizit en konpanyon Kretyen ki malad fizikman, i kapab donn li lazwa ek lankourazman. En frer ou byen ser ki malad spirityelman i kapab santi parey si en ansyen i pran swen avek li. Bann ansyen i kapab lir Labib, revwar en lartik, diskit bann pwenn enportan ki’n ganny koz lo la pandan renyon e priy avek sa enn ki inaktif. Zot kapab dir li ki tou dimoun dan kongregasyon pou vreman kontan pour vwar li rekonmans asiste bann renyon. (2 Kor. 1: 3-7; Zak 5:13-15) En pti vizit, en koudtelefonn oubyen en pti let i vreman kapab ankourazan! Ler en ansyen i personnelman ed en mouton ki’n kit troupo, sa i kapab donn li plis lazwa.
Nou tou nou kapab fer zefor pour ede
9, 10. Akoz ou kapab dir ki i pa zis responsabilite bann ansyen pour montre lentere pour bann frer ek ser ki’n elwannyen?
9 Nou pe viv dan bann letan difisil kot dimoun i okipe, alors i posib ki nou pa remarke ki en frer oubyen ser pe elwannyen avek kongregasyon. (Ebr. 2:1) Me, pour Zeova son bann mouton i presye. Sakenn ant zot i annan valer, parey sak manm oubyen parti lekor en imen i enportan. Alors, nou tou nou bezwen montre lentere pour nou bann frer ek ser e vreman pran swen avek kanmarad. (1 Kor. 12:25) Eski sanmenm sa kalite latitid ki ou annan?
10 Menm si sa responsabilite i konsern bann ansyen an premye, pa zis zot ki bezwen montre lentere pour rod e ed bann mouton ki’n elwannyen avek kongregasyon. Lezot osi i kapab korpere avek zot. Nou kapab e devret ofer nou led lo kote spirityel e ankouraz nou bann frer ek ser ki bezwen led pour retourn dan kongregasyon. Konman nou kapab donn en tel led?
11, 12. Ki led ou kapab ganny demande pour donn en konpanyon Kretyen ki’n vin inaktif?
11 Dan serten ka, bann ansyen i kapab fer laranzman pour ki bann proklanmater eksperyanse i kondwir en letid personnel avek bann inaktif ki eksprim sa dezir pour ganny led. Bi sa letid i pour ed bann ki inaktif renouvle zot “premye lanmour.” (Rev. 2:1, 4) Sa bann frer ek ser i kapab reganny lafors spirityel e ranforsi zot lafwa par revwar bann lenformasyon ki zot pa’n tande akoz zot pa ti pe asiste renyon.
12 Si en ansyen i demann ou pour etidye avek en konpanyon Kretyen ki bezwen serten led spirityel, priye ki Zeova i gid e beni ou zefor. “Met ou travay dan lanmen Zeova li menm e ou bann plan pou ganny solidman etabli.” (Prov. 16:3) Medit lo bann verse Labib e bann pwen ki ou kapab diskit lo la pandan letid pour ranforsi lafwa sa bann ki bezwen sa led. Reflesir konsernan sa bon legzanp zapot Pol. (Lir Romen 1:11, 12.) Pol ti annan en gran dezir pour vwar bann Kretyen Ronm, pour partaz avek zot bann kado spirityel pour fer zot kapab vin for. I ti vreman anvi ki zot benefisye avek lankourazman kanmarad. Pa nou devret annan sa menm leta lespri ler nou pe ed bann frer ek ser ki’n elwannyen avek kongregasyon Bondye?
13. Ki ou kapab diskit lo la avek en dimoun ki’n vin inaktif?
13 Dan ou konversasyon pandan letid, ou kapab demann sa frer oubyen ser: “Ki mannyer ou ti konn laverite? Ankouraz sa proklanmater inaktif pour rapel bann bon moman ki i’n eksperyanse dan lepase, bann leksperyans agreab dan bann renyon, dan predikasyon e dan lasanble. Fer resorti bann bon moman ki petet zot in pase ansanm dan servis Zeova. Koz konsernan lazwa ki ou’n gannyen lefet ki ou’n vin pros avek Zeova. (Zak 4:8) Eksprim ou lapresyasyon pour lafason ki Bondye i pran swen avek nou konman son pep, espesyalman par donn nou rekonfor ek lespwar dan nou soufrans.—Rom. 15:4; 2 Kor. 1:3, 4.
14, 15. Ki benediksyon bann ki’n vin inaktif ti eksperyanse dan lepase, ki ti a byen fer zot mazin lo la?
14 I ti pou fer dibyen sa proklanmater ki’n vin inaktif pour mazin serten benediksyon ki i ti gannyen ler i ti pe regilyerman asosye avek kongregasyon. Par egzanp, i ti en benediksyon pour ganny plis konnesans lo Parol Bondye ek son plan. (Prov. 4:18) Ler i ti “les Lespri kontrol [son] lavi,” i ti san okenn dout pli fasil pour li reziste bann tantasyon pour pa fer pese. (Gal. 5:22-26) An retour, sa ti fer li annan en konsyans kler ki ti permet li apros Zeova dan lapriyer e rezwir ‘lape Bondye ki depas tou konpreansyon imen ki gard zot leker ek zot lespri.’ (Fili. 4:6, 7) Pa bliye pour diskit sa bann pwen, montre ki ou annan en lentere senser e sirtou avek lanmour ankouraz sa frer oubyen ser pour retourn dan kongregasyon.—Lir Filipyen 2:4.
15 Fer konmsi ou en ansyen ki pe fer en vizit kot en fanmir. Ou kapab ankouraz en koup marye ki’n vin inaktif rapel sa moman kot zot ti’n fek aprann konsernan laverite lo Parol Bondye. Pa i ti gou pour konn laverite! Zot ti satisfe akoz sa lansennyman ti fer sans e fer zot lib dan en sans spirityel. (Zan 8:32) Pa zot leker ti ranpli avek rekonnesans pour sa ki zot ti pe aprann konsernan Zeova, son lanmour e son bann plan merveye! (Konpar Lik 24:32.) Fer zot rapel ki bann Kretyen ki’n dedye zot lavi avek Bondye i annan en relasyon pros avek li e sa privilez pour priy li. Fer bokou zefor pour ankouraz bann ki’n vin inaktif pour reazir dan en bon fason anver sa ‘bon nouvel merveye Bondye ere,’ Zeova.—1 Tim. 1:11.
Kontinyen montre ki ou kontan zot
16. Donn en legzanp pour montre ki zefor ki nou fer pour ed en dimoun inaktif i vreman vo lapenn.
16 Eski sa bann sizesyon ki’n ganny site i vreman efikas? Wi. Par egzanp, en zenn ki ti proklanmater ler i ti annan 12-z-an ti vin inaktif ler i ti annan 15-z-an. Me pli tar i ti revin aktif e i dan servis aplentan pour plis ki 30-t-an. Sa led ki i ti gannyen avek en ansyen ti fer li revin aktif ankor. I ti vreman apresye led spirityel ki sa ansyen ti donn li!
17, 18. Ki kalite ou bezwen annan pour ed en dimoun ki’n elwannyen avek kongregasyon Bondye?
17 Se lanmour ki pous bann Kretyen pour ed bann ki inaktif retourn dan kongregasyon. Ler i ti pe koz avek son bann disip Zezi ti dir: “La mon donn zot en konmannman nouvo: kontan kanmarad. Zot devre kontan kanmarad parey mwan mon’n kontan zot. Dimoun pou war ki zot mon bann disip si zot kontan kanmarad.” (Zan 13:34, 35) Wi lanmour i en mark ki idantifye bann vre Kretyen. Pa nou devret demontre sa kalite lanmour anver bann Kretyen ki’n vin inaktif? Definitivman sa i devret leka! Ler nou pe ed bann frer ek ser ki inaktif nou bezwen demontre bann bon kalite Kretyen.
18 Si ou anvi ed en dimoun ki’n elwannyen avek kongregasyon Bondye, ki bann kalite ou bezwen demontre? Apard lanmour, petet ou pour bezwen demontre konpasyon, labonte, ladouser ek pasyans. Dan serten ka, ou pou bezwen pare pour pardonnen. Pol ti ekrir: “Zot devre ranpli avek konpasyon, labonte, limilite, ladouser ek pasyans. Siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad. E par lao tousala, annan lanmour ki soud tou keksoz parfetman ansanm dan larmoni.”—Kol. 3:12-14.
19. Akoz i vo lapenn pour fer zefor pour ed bann mouton pour retourn dan troupo?
19 Dan sa lot lartik nou pou egzaminen akoz serten in elwannyen avek kongregasyon. I pou osi montre konman sa bann ki retournen i ekspekte ganny akeyir. Ler ou pe etidye sa lartik reflesir lo sa pwen. Reste asire ki tou zefor ki ou fer avek bi pour ed bann mouton retourn dan berkay i vo lapenn. Dan sa lemonn, en kantite dimoun i pas tou zot lavi pour esey akimil larises, me lavi en dimoun i annan plis valer ki tou sa larzan ki egziste dan sa lemonn. Zezi ti met lanfaz lo sa pwen dan son legzanp konsernan sa mouton perdi. (Mat. 18:12-14) Fotespere ou touzour gard antet sa pwen anmezir ki ou fer bokou zefor konmela menm pour ed bann mouton Zeova ki’n elwannyen avek troupo.
Ki ou pou reponn?
• Ki responsabilite bann ansyen i annan anver bann frer ek ser ki’n elwannyen avek kongregasyon?
• Ki mannyer ou kapab ed bann ki pa pe asosye avek kongregasyon?
• Ki kalite ou bezwen annan pour ed bann ki’n elwannyen avek kongregasyon?
[Kestyon]
[Portre lo paz 17]
Bann ansyen ki ranpli avek lanmour i fer bokou zefor pour ed bann ki’n elwannyen avek troupo Bondye