Xatuane Jë La Itre Mamoe Ka Ananyine La Hna Axö Mamoe i Akötresie
Ita Ne Thup göi 11 Januare 2009 e Normandie
Nyima 15 me 05 Qene Drehu
Xatuane Jë La Itre Mamoe Ka Ananyine La Hna Axö Mamoe i Akötresie
“Ce madinejë me ini, ke öhnë hë ni la mamoenge ka pat.”—LUKA 15:6.
1. Hnei Iesu hna anyipicine tune kaa laka, ketre atre thupë mamoe nyidrë ka ihnim?
IESU Keriso, ene lo Nekö i Iehova ka caas, la hna hëne, ka hape, “ate thupë mamoe nge sisitia.” (Heb. 13:20) Hna thingehnaeane hnene la Itre Hna Cinyihan la traqa i nyidrë, me amamane laka nyidrëti hi la Atre Thupë Mamoe ka thele “la nöjei mamoe ka pate” ne la angetre Isaraela. (Mat. 2:1-6; 15:24) Ketre, tune la atre thupë mamoe ka troa nue la mele i nyidrë matre troa thupëne la itre mamoe, hnei Iesu hna meci nyine thupene mel kowe la itre mamoe ka troa öhnyi loi qa ngöne la huuje i nyidrë.—Ioane 10:11, 15; 1 Ioane 2:1, 2.
2. Nemene la ka ananazijëne la itre xaa Keresiano?
2 Ngazo pe, ame lo itre xaa ka kapa madrin la huuje i Iesu me sa xepu koi Akötresie, tre, hna canga nanazije hnei angatr e hnine la ekalesia i Keresiano. Maine jë hnene laka kola kucakuca, maine hna tithe pena hnene la ketre sine mec, maine itre xaa ewekë pena ka traqa kowe la mel, ene pe kolo ha nanazije trootro uti hë la thaa hane xome la huliwa i Akötresie. Ngo ame la itre mamoe i Akötresie, tre, ijije hi tro angatr a mele hnyawa me madrin, ene lo aqane mele hna qaja hnei Davita ngöne la Salamo mekene 23. Drei la ketre ceitun, öni angeic e nyima, ka hape: “Iehova la ate thupë mamoeë ni. Tha tro kö ni a pë ewekë.” (Sal. 23:1) Ame la itre mamoe i Akötresie, tre, ka hetrenyi pala hi angatr la itre ewekë nyine troa acatrene la aqane imelekeu i angatr me Nyidrë, ngo thaa tro pë hë a hane traqa tune kowe la itre mamoe ka nanyi qa ngöne la ekalesia. Drei la ka ijije troa xatua angatr? Tune kaa la aqane troa xatua angatr? Nemene la itre ewekë ka ijij nyine tro sa kuca matre troa xatua angatr troa bëeke hmaca kowe la hna axö mamoe?
Drei La Ka Ijij Troa Hamë Ixatua?
3. Tune kaa la aqane amamane Iesu laka, ka nyipi ewekë troa xatuane la itre mamoe ka iananyi qa ngöne la zi Akötresie?
3 Nyipi ewekë troa catr matre troa xatuane la itre mamoe ka tro menu qa ngöne la zi Akötresie. (Sal. 100:3) Hnei Iesu hna aceitunëne lai ngöne la nyidrëti a qaja, ka hape: “Maine kete ate a hete mamoe ka ca haded, nge tro menu hë la kete e nyuden, hape u, tha tro kö angeic’ a nue pe la ekate nge ekeqaihano, me tro kowe la ite wete troa thele la ka tro menu? Nge maine öhnejë ej, nyipici ini a qaja koi nyipunie, angeic’ a madi nyëne hune la ekate nge ekeqaihano ka tha tro menu. Kete tune tha ajane kö la Tetetro i nyipunie e hnengödrai, laka troa pate la kete ka co celë.” (Mat. 18:12-14) Drei la ka ijij troa xatuane la itre atr hna aceitunëne me itre mamoe, angatr isa ala caas, ka nanyi qa ngöne la hna axö mamoe?
4, 5. Tro la itre qatre thup a ujë tune kaa kowe la itre mamoe i Akötresie?
4 Maine kola ajane hnene la itre qatre thup Keresiano troa xatuane la itre mamoe ka nanyi qa ngöne la hna axö mamoe, haawe, nyipi ewekë tro angatr a lapa mekune hnyawa laka, ame la hna axö mamoe i Akötresie, tre, ketre ekalesia ne la itre atr ka sa xepu hë koi Iehova, celë hi “hnënge mamoe ne la zi Cilie” nge ka sisitria catre itre ej. (Sal. 79:13) Nyipi ewekë troa hane nyihnyawane la itre mamoe cili, me wanga atrune la itre aja i nyudren, nge kolo hi lai a hape, tro la itre qatre thupe ka ihnimi a hane nyipi nyudreni hnyawa isa ala caas. Maine tro sa wange lapaa nyudren, haawe, tro ha hetre thangane ka lolo catre koi nyudren. Maine tro la atre thupë mamoe a hamë ithuecatre cememine la ihnim, tro ha xatua angatr troa eköthe hnyawa hmaca la aqane imelekeu i angatr me Iehova, nge tro ha kökötre fe la aja i angatr troa bëeke hmaca kowe la hna axö mamoe.—1 Kor. 8:1.
5 Hnëqa ne la itre ka thupë mamoe i Akötresie troa thele la itre ka nanyi qa ngöne la hna axö mamoe, me thele fe troa xatua nyudren. Hnei Paulo aposetolo hna amekunëne la itre qatre thup ekö e Efeso laka, hnëqa i angatre la troa thupëne la itre mamoe; öni nyidrëti, ka hape: “Qa ngöne lai, wai nyipunieti kö, memine la hnënge mamoe asë, hnei Uati Hmitöte hna acilë nyipunie nyine itete thup, troa hiane la ekalesia i Akötesie, hnei nyidëti hna itöne thupene la madra i nyidëti kö.” (Ite Hu. 20:28) Ketre, hnei Peteru mina fe hna hamëne la ithuecatre celë kowe la itre qatre thup hna iën, öni angeic, ka hape: “Ithu ane jë la hnënge mamoe i Akötesie thei nyipunie, me thupën, the göi mus, ngo loi e göi aja kö, thenge Akötesie; nge tha göi hete mo, ngo loi pe göi hni ka ajan; kete, the qene joxune kö la ite qâ i nyipunie, ngo loi nyine tulu ne la hnënge mamoe.”—1 Pet. 5:1-3.
6. Pine nemene matre nyipi ewekë enehila tro la itre atre thupë mamoe a thupëne hnyawa la itre mamoe i Akötresie?
6 Nyipi ewekë tro la itretre thupë mamoe Keresiano a nyitipu Iesu, ene lo “ate thupëne aloine la ite mamoe.” (Ioane 10:11) Hnei nyidrëti hna kukehnine la itre mamoe i Akötresie me wanga atrune la enyipiewekëne la troa thupë angatr; celë hi matre nyidrëti a upi Simona Peteru troa ‘thupëne la itre mamoe i Nyidrë.’ (E jë la Ioane 21:15-17.) Ame enehila, tre, nyipi ewekë catr troa thupëne hnyawa la itre mamoe cili, ke, kola nue asë hnei Diabolo la trengecatre i angeice troa thapa la aqane mele nyipici ne la itre hlue i Akötresieti cili. Pine laka itre atr ka ngazo së, haawe, canga atreine hi Satana troa tupathi së, nge angeice fe a xome la itre ewekë ne fen nyine hnö matre troa xölehuje la itre mamoe me uku nyudren troa kuca la ngazo. (1 Ioane 2:15-17; 5:19) Ame la itre xan, tre, canga tro hi a thepe angatr pine laka pëhë trengecatre i angatr, celë hi matre nyipi ewekë catre troa xatua angatr troa trongëne la ihaji celë, ene la troa ‘tro ngöne la Ua.’ (Gal. 5:16-21, 25) Ame la troa xatuane la itre mamoe cili, tre, nyipi ewekë troa mejiune koi Akötresie ngöne la thith, me kowe la ixatua ne la uati hmitrötre i Nyidrë, me atreine huliwane hnyawa fe la Wesi Ula i Nyidrë.—Ite edomë 3:5, 6; Luka 11:13; Heb. 4:12.
7. Nemene la enyipiewekëne kowe la itre qatre thup troa thupëne hnyawa la itre mamoe?
7 Ame ekö e Isaraela, tre, hna majemine xome la ketre sine tö hnene la atre thupë mamoe matre troa engëne la itre mamoe i nyidrë. Ame ngöne la kola lö maine tro pena hnene la itre mamoe qa hnine la hnahag, tre, tro itre eje a ‘tro fene la tö’ matre ijije troa e itre ej hnene la atre thupë mamoe. (Lev. 27:32; Mika 2:12; 7:14) Ketre tune fe la atre thup Keresiano, laka nyipi ewekë tro angeic a atre hnyawa la itre mamoe i Akötresie memine la hnei angatr hna kuca isa ala caas. (Aceitunëne jë me Ite edomë 27:23.) Haawe, ame la troa thupëne la itre atr, tre, ketre jole lai ka sisitria hna ithanatane hnene la lapa ne la itre qatre thup. Kolo lai a qaja mina fe la itre hna amekötine matre troa xatuane la itre mamoe ka nanyi qa ngöne la hna axö mamoe. Iehova kö la ka sipu qaja, ka hape, tro kö Nyidrëti a tro troa thele la itre mamoe i Nyidrë me thupë nyudreni hnyawa. (Ezek. 34:11) Haawe, Akötresieti a madrin ngöne la kola hane catre hnene la itre qatre thup troa xatuane la itre mamoe ka nanyi qa ngöne la hna axö mamoe troa bëeke hmaca.
8. Nemene la itre götran ka ijije tro la itre qatre thup a xatuane la itre mamoe, angatr isa ala caas?
8 Ame la kola wezipo hnene la ketre sine hmi së, tre, ijije troa thue madrin me ithuecatr koi angeic, hnene la hna wai angeic hnene la ketre atre thupëne la hna axö mamoe i Akötresie. Ketre ceitune mina fe ngöne la kola wezipo ngöne la götrane la ua hnene la ketre trejin ka nanazij, laka nyipi ewekë troa pane wanga atrunyi angeic. Maine jë tro la itre qatre thup a e la itre xötre ne la Tusi Hmitrötr, me wange hmaca la ketre hna cinyihan, maine ce ithanatane pena la itre mekune ka tru ngöne la ketre ijine icasikeu, maine ce thithi pena memine la ka nanazij. Ijije tro fe angatre a qaja kowe la trejine ka nanazij, laka, troa atraqatre la madrine ne la itre atrene la ekalesia troa öhnyi angeic e bëeke hmaca troa hane sine la itre icasikeu ne la ekalesia. (2 Kor. 1:3-7; Iako. 5:13-15) Ketre, ijije fe troa ixatua jëne la hna tro troa hane iwai, me jëne telefon, maine hnene la hna cinyanyi pena! Ame la atre thup Keresiano ka hetre hni ne utipin me hane thele troa xatuane hnyawa la ketre mamoe ka paatre qa ngöne la hna axö mamoe, tre, tro ha kökötre fe la madrine i angeic.
Loi e Tro Sa Catre Ce Huliwa
9, 10. Pine nemene matre ijije tro nyipunieti a qaja, ka hape, ame la troa xatuane la itre mamoe ka tro menu, tre, thaa hnëqane hmekuje kö la itre qatre thup?
9 Ngöne laka easa melëne la itre drai ka jol nge ka ngazo, haawe, maine jë thaa öhne ju kö së la ketre trejine me easë a iananyi trootro qa hnine la ekalesia. (Heb. 2:1) Ngo ame koi Iehova, tre, ka tru alamekene catre la itre mamoe i Nyidrë. Ka sisitria catre angatr isa ala caas, ceitu memine lo itre götrane ne la ngönetrei ne la atr. Haawe, nyipi ewekë tro asë hi së a wanga atrune la itre trejine me easë, nge tro sa itö iwanga atruny. (1 Kor. 12:25) Hane kö së ujë tune lai?
10 Ngacama hnëqa ne la itre qatre thup troa thele me xatuane la itre mamoe ka tro nanazij, ngo ame la troa wanga atrune la itre trejine me easë ka iananyi hë qa hnine la hna axö mamoe, tre, qa së asë hi. Ijije hi tro la itre xan a ce huliwa memine lai itretre thupë mamoe cili. Ijije hi nge nyipi ewekë tro sa hamë ithuecatr me xatuane ngöne la götrane la ua la itre trejine me easë, trahmanyi me föe, ka aja ixatua matre bëeke hmaca kowe la hna axö mamoe. Tune kaa la aqane troa hamëne la ixatua celë?
11, 12. Nemene la madrine ka eje the së, e hne së hna xatuane la itre trejine ka aja ixatua ngöne la götrane la ua?
11 Ame ngöne la itre xaa götran, tre, maine jë tro la itre qatre thup a sipone kowe la itre trejine ka maca ngöne la götrane la ua troa xomiujine la ketre ini Tusi Hmitrötr memine la itre ka nanazij ka sipo ixatua. Ame la sipu kepine matre kola catre kuca la itre ewekë celë, tre, göne matre troa akökötrene e kuhu hni angatr “la aja i [angatr] hnapan.” (Hna ama. 2:1, 4) Ijije hi troa akökötrene me acatrene hnene la itre sine hmi së cili la lapaune i angatre hnene la hna wanga atrune hnyawa la itre mekune hnei angatre hna thaa hane dreng, ke, paatre kö angatr ngöne la ekalesia.
12 Maine kola sipo nyipunie hnene la itre qatre thup troa ini tus memine la ketre trejin ka aja ixatua ngöne la götrane la ua, haawe, thithi jë matre tro Iehova a eatrongë nyipunie me amanathithine la itre trenge catre i nyipunie. Ketre, “nuepi la nöjei huliwa i ’ö koi Iehova; nge troa acatene la nöjei mekune i ’ö.” (Ite edomë 16:3) Sine thele jë la itre xötr ne la Tusi Hmitrötr, memine la itre mekune ka lolo hnei epuni hna xome matre troa ce ithanatane memine la itre ka aja ixatua ngöne la götrane la ua. Mekune hnyawa ju lo tulu ka sisitria hna amë pe hnei Paulo aposetolo. (E jë la Roma 1:11, 12.) Atraqatr la aja i Paulo troa iöhnyi memine la itre Keresiano ne Roma, matre troa hamë angatr la ketre ahnahna ngöne la götrane la ua nge ka troa aijijë angatre troa cile hut. Angeice mina fe a pi iöhnyi me angatre matre troa ithuecatrekeu. Hapeu, hane kö së ujë tune lai ngöne la easa thele troa xatuane la itre mamoe ka iananyi qa ngöne la hna axö mamoe i Akötresie?
13. Nemene la nyine tro nyipunieti a ithanatane memine la ketre trejine ka nanazij?
13 Ame ngöne la itre ijine nyipunieti a ce porotrik memine la ketre trejine ka nanazij, maine jë ijije tro nyipunieti a hnying, ka hape, “Hnei ’ö hna atre tune kaa la nyipici?” Amekunë angeice hmaca jë lo madrine ka eje ekö ngöne lo angeic a nyi hlue i Iehova; upi angeice jë troa pane qaja la itre manathithi hnei angeic hna kapa ngöne la itre hna icasikeu, me ngöne la huliwa ne cainöj, me ngöne fe la itre asabele. Qaja jë fe la itre ijine ce kuca nyipunie la huliwa i Iehova cememine la madrin. Qaja jë la madrine i epun, qa ngöne laka epuni a easenyi koi Iehova. (Iako. 4:8) Amamane jë fe la hni ne ole i nyipunie kowe la aqane xatuane Akötresieti la itre hlue i Nyidrë; kola mama hnyawa lai ngöne la Nyidrëti a akeukawane la itre hni së me hamë mejiune ngöne la itre ijine easa akötr.—Rom. 15:4; 2 Kor. 1:3, 4.
14, 15. Hapeu, ixatua kö la troa amekunëne la trejine ka nanazij la itre manathith hnei angeice hna kapa ekö?
14 Ka hetre thangane catre mina fe, troa amekunëne la trejine ka nanazij la itre xaa manathithi hnei angeice hna kapa ekö ngöne lo angeic a ce huliwa memine la ekalesia. Drei la ketre ceitun, nyimutre la itre manathithi hnei angeic hna kapa, jëne la hna akökötrene la atrehmekune i angeic ngöne la Wesi Ula me itre aja i Akötresie. (Ite edomë 4:18) Ame ngöne lo angeice a “tro ngöne la Ua,” tre, thaa luelu kö së laka, hmaloi ekö koi angeic troa cile catr matre thaa tro kö a kei kowe la ngazo. (Gal. 5:22-26) Ketre, hnene laka wië la mekuthethewe i angeic, ene pe hna aijijë angeice troa easenyi koi Iehova jëne la thith, me hane ‘kapa la tingetinge i Akötresie ka sisitria hune la nöjei mekun’asë, nge ka troa thupëne la itre hni së me itre mekune së.’ (Fil. 4:6, 7) Loi e tro pala hi sa lapa fë hnyawa la itre mekune celë, me wanga atrune la itre trejine me easë, me catre mina fe troa ithuecatre koi angatre cememine la ihnim troa bëeke hmaca kowe la hna axö mamoe.—E jë la Filipi 2:4.
15 Pane mekune jë nyipunie laka, ketre qatre thupe epun ka troa iwai. Maine jë tro nyipunieti a ithuecatre kowe la lue trefëne ka nanazij troa mekune hmaca lo itre ijine nyidroti a nyiqaane atre la nyipici qa hnine la Wesi Ula i Akötresie. Drei kö la emingömingön, me elolon, me aqane inuamacanyin la nyipici! (Ioane 8:32) Drei kö la kola kökötre la hni ne ole i nyidro ngöne lo nyidroti a inine la pengö i Iehova, me ihnimi Nyidrë, memine la itre aja i Nyidrë ka mingöming! (Aceitunëne jë me Luka 24:32.) Amekunë nyidroti jë laka, ame la itre Keresiano ka sa xepu hë koi Akötresie, tre, ijiji angatre hi troa acatrene hnyawa la aqane imelekeu i angatr me Iehova, nge ketre madrine ka tru koi angatr troa hane thithi koi Nyidrë. Loi e tro nyipunieti a ithuecatre hnyawa kowe la itre ka nanazije matre tro hmaca angatr a hane kapa “la evangelia ka lolo i Akötesie tene manathith,” ene Iehova.—1 Tim. 1:11.
Catre Pi Së Troa Amamane La Ihnimi Së Koi Angatr
16. Qaja jë la ketre ceitun ka amamane laka, ame la itre trengecatre hna kuca matre troa hamë ixatua ngöne la götrane la ua, tre, ka hetre thangane catr.
16 Hapeu, ka hetre thangane kö la itre mekune nyine ixatua celë? Eje hi. Drei la ketre ceitun, hnene la ketre thöth hna nyiqaane cainöj ngöne lo angeic a 12 lao macatre, ngo ame ju hi la kola 15 lao macatre i angeic, tre, nanazije ju hi. Ngo hnei angeice hmaca hna catr e thupen, ene pe 30 hë lao macatre ne cainöje angeice ngöne la drai ka pexej. Kola mama hnyawa laka, angeice a catre hmaca, ke, hna xatua angeice hnyawa hnene la ketre qatre thup Keresiano. Drei la eloine la ixatua cili!
17, 18. Nemene la itre thiina nyine tro nyipunieti a eën matre troa xatuane la ketre atr matre tro angeic a bëeke hmaca kowe la hna axö mamoe i Akötresie?
17 Ihnimi la ka upe la itre Keresiano troa xatuane la itre ka nanazije troa bëeke hmaca kowe la ekalesia. Hnei Iesu hna qaja kowe la itretre drei nyidrëti, ka hape: “Ini a hamë nyipunie la wathebo ka hnyipixe, laka tro nyipunieti a ihnimikeun; tro nyipunie a ihnimikeune tune la hnenge hna hnimi nyipunie. Celë hi mate tro nöjei ate asëjëihë a wangate hmekune laka itete dei ni nyipunie, e tro nyipunie a ihnimikeu.” (Ioane 13:34, 35) Nyipici, ihnimi la hatren la itre nyipi Keresiano. Hapeu, tro kö sa amamane la ihnimi së kowe la itre Keresiano ka xome hë la bapataiso nge ka nanazij? Eje hi! Ngo ame la troa xatuane la itre atr cili, tre, nyipi ewekë troa eëne la itre thiina ne Keresiano.
18 Maine easa ajane troa xatuane la ketre atr ka iananyi qa ngöne la hna axö mamoe i Akötresie, tre, nemene la itre thiina nyine tro sa eënyin? E trön la ihnim, nyipi ewekë mina fe tro sa eënyine la utipin, me thiina ka lolo, me hni ka menyik, memine la xomihni ahoeany. Nyipi ewekë mina fe troa atreine nue la itre ngazo, pine laka isapengöne la itre aqane mele së. Hnei Paulo hna cinyihan, ka hape: “Xetëneju nyipunie la ihnimi ka tru, me utipin, me thina ka loi, me hni ka ipië, me thina ka menyik, me xomi hni ahoeany [ . . . ]. Loi e ixomi hnikeune me inuekeune nyipunie, maine hete gele i kete koi kete; hna nue nyipunie hnei [Iehova], kete tro nyipunie a tun. Nge ihnimi e hune la nöjei ewekë celë asë, celë hi otene ka nyipi loi.”—Kol. 3:12-14.
19. Pine nemene matre nyipi ewekë troa catre xatuane la itre mamoe matre tro nyudreni a bëeke hmaca kowe la lapa ne la itre Keresiano?
19 Tro pë hë la hna cinyihane ka troa xulu a ithanatane la köni kepine matre kola iananyi la itre xaa mamoe qa ngöne la hna axö mamoe i Akötresie. Tro mina fe ej a amamane la aqane troa kepe angatre hmaca hnine la ekalesia. Ame ngöne la nyipunieti a inine la hna cinyihane cili me mekune thele la hna cinyihane celë, tre, loi e troa xecie e kuhu hni nyipunie laka, ame la itre trengecatre hnei nyipunieti hna kuca memine la mejiune troa xatuane la itre mamoe troa bëeke hmaca kowe la lapa ne la itre Keresiano, tre, ka sisitria catr. Ame ngöne la fene celë ka ngazo, tre, nyimutre la itre atr ka nue asë la mele angatr troa thele mo, ngo caasi hi la mele ka sisitria catre hune la nöjei mo ne fen. Hnei Iesu hna amamane hnyawa lai ngöne la ceitun ne la mamoe ka paatr. (Mat. 18:12-14) Epi tro pala hi nyipunieti a lapa mekune la götrane celë, matre troa catre xatuane la itre mamoe i Iehova ka tru alameken ka iananyi qa ngöne la hna axö mamoe.
Tro Nyipunieti a Sa Tune Kaa?
• Nemene la hnëqa hna troa kuca cememine la metrötr hnene la itre atre thupë mamoe Keresiano kowe la itre mamoe ka iananyi qa ngöne la hna axö mamoe?
• Troa xatuane tune kaa la itre ka nanazije enehila?
• Nemene la itre thiina nyine tro nyipunieti a eën matre troa xatua nyipunie troa xatuane la itre mamoe ka iananyi qa ngöne la hna axö mamoe?
[Thying]