Ẹn̄wam Mbon Oro Ẹyode Ẹkpọn̄ Otuerọn̄
Ẹn̄wam Mbon Oro Ẹyode Ẹkpọn̄ Otuerọn̄
“Ẹdara ye ami, koro mmokụt erọn̄ mi emi okosopde.”—LUKE 15:6.
1. Didie ke Jesus owụt ke imọ idi edima ekpemerọn̄?
ẸKOT Jesus Christ emi edide ikpọn̄-ikpọn̄ edibon Eyen Jehovah, “akwa ekpemerọn̄.” (Heb. 13:20) N̄wed Abasi ama ebem iso etịn̄ ke enye eyedi, onyụn̄ owụt ke enye ekedi n̄wọrọnda Ekpemerọn̄ emi okoyomde “mme erọn̄ ufọk Israel emi ẹkesopde usụn̄.” (Matt. 2:1-6; 15:24) Akan oro, kpa nte ata ekpemerọn̄ ekemede ndinyịme n̄kpa man ekpeme mme erọn̄ esie, Jesus ama akpa nte uwa ufak kaban̄a mbon mbieterọn̄ oro ẹdinyịmede uwa esie.—John 10:11, 15; 1 John 2:1, 2.
2. Ekeme ndidi nso ikanam ndusụk mme Christian ẹtre ndinam utom?
2 Mbọm etieti, sia ndusụk owo emi eketiede nte ẹwụt esịtekọm ẹban̄a uwa Jesus ẹnyụn̄ ẹyak idemmọ ẹnọ Abasi, ibuanake aba ye esop Christian. Ekeme ndidi mmemidem, udọn̄ọ, m̀mê mme mfịna en̄wen ama anam ifịk mmọ etehede ube onyụn̄ anam mmọ ẹtre ndinam utom. Nte ededi, ndisịne ke otuerọn̄ Abasi kpọt edinam mmọ ẹnyene ifụre ye inemesịt oro David eketịn̄de aban̄a ke ọyọhọ Psalm 23. Ke uwụtn̄kpọ, enye ọkọkwọ ete: “Jehovah edi andibọk mi, ndinanake n̄kpọ.” (Ps. 23:1) Mbon oro ẹsịnede ke otuerọn̄ Abasi inanake n̄kpọ ndomokiet ke n̄kan̄ eke spirit, edi idịghe ntre ye mme erọn̄ oro ẹyode ẹkpọn̄ usụn̄. Mmanie ẹkeme ndin̄wam mmọ? Didie ke ẹkeme ndin̄wam mmọ? Ke nditịm ntịn̄, nso ke ẹkpenam man ẹn̄wam mmọ ẹfiak ẹdidụk otuerọn̄?
Mmanie Ẹkeme Ndin̄wam?
3. Didie ke Jesus okowụt se ẹkpenamde man ẹnyan̄a mme erọn̄ Abasi oro ẹsopde usụn̄?
3 Oyom ẹnen̄ede ẹsịn ukeme man ẹnyan̄a mme erọn̄ Abasi oro ẹsopde. (Ps. 100:3) Jesus ama anam emi an̄wan̄a ke ini enye ọkọdọhọde ete: “Edieke owo kiet enyenede erọn̄ ikie ndien kiet ke otu mmọ osop usụn̄, nte enye idikpọn̄ke anan̄-ye-efịtenan̄ ke enyọn̄ obot inyụn̄ idaha ikoyom kiet emi osopde usụn̄ do? Ndien edieke enye okụtde, ke akpanikọ ke ndọhọ mbufo nte, enye adara enye akan anan̄-ye-efịtenan̄ emi mîkosopke usụn̄. Kpasụk ntre Ete mi emi odude ke heaven iyomke kiet ke otu n̄kpri owo emi atak.” (Matt. 18:12-14) Mmanie ẹkeme ndin̄wam mbon mbieterọn̄ oro ẹsopde usụn̄ m̀mê oro ẹyode ẹkpọn̄ otuerọn̄?
4, 5. Oyom mbiowo ẹnyene nso edu ẹban̄a otuerọn̄ Abasi?
4 Edieke mbiowo ẹyomde ndin̄wam mme erọn̄ oro ẹyode ẹkpọn̄ usụn̄, ana mmọ ẹti ke otuerọn̄ Abasi edi esop mme owo oro ẹyakde idem ẹnọ Jehovah—kpa ọsọn̄urua ‘ufene emi Abasi ọbọkde.’ (Ps. 79:13) Oyom ẹnam n̄kpọ ye mme utọ ndima erọn̄ emi ke ima, ndien emi ọwọrọ ke ana ndima ekpemerọn̄ ẹnyene ọkpọkpọ udọn̄ ke idem mmọ. Ndika n̄kese mmọ nte mme ufan ekeme ndinen̄ede nnyene ufọn. Ekpemerọn̄ ndisịn udọn̄ ke ima ima usụn̄ nnọ mmọ ekeme ndinam mmọ ẹfiak ẹsọn̄ idem ke n̄kan̄ eke spirit onyụn̄ anam mmọ ẹnen̄ede ẹnyene udọn̄ ndifiak ndidụk otuerọn̄.—1 Cor. 8:1.
5 Edi utom mme ekpeme otuerọn̄ Abasi ndiyom mme erọn̄ oro ẹyode ẹkpọn̄ usụn̄ ndien ekem ẹdomo ndin̄wam mmọ. Apostle Paul eketi mbiowo ke Ephesus eset ke mmọ ẹma ẹnyene utom ndibọk erọn̄ ke ini enye ọkọdọhọde mmọ ete: “Ẹnọ ntịn̄enyịn ke idem mbufo ye ke ofụri otuerọn̄, emi edisana spirit ekemekde mbufo ke otu mmọ nte mme esenyịn, ete ẹkpeme esop Abasi, emi enye ekedepde ke iyịp Eyen esie.” (Utom 20:28) Kpasụk ntre, apostle Peter ama ọnọ mbiowo emi ẹyetde aran item emi: “Ẹkpeme otuerọn̄ Abasi emi odude ke idak ukpeme mbufo, idịghe ke edinyenyịk, edi ke unyịmesịt; inyụn̄ idịghe ke edima idiọk udori, edi ye ọkpọsọn̄ udọn̄; idịghe ndibre odudu ye mmọ emi ẹdide udeme Abasi, edi ndikabade ndi uwụtn̄kpọ nnọ otuerọn̄.”—1 Pet. 5:1-3.
6. Ntak emi oyomde mme ekpemerọn̄ ẹnen̄ede ẹse ẹban̄a mme erọn̄ Abasi mfịn?
6 Oyom mme ekpemerọn̄ ẹkpebe Jesus emi edide “eti ekpemerọn̄.” (John 10:11) Enye ama enen̄ede ese aban̄a mme erọn̄ Abasi onyụn̄ ọsọn̄ọ etịn̄ aban̄a ufọn edise mban̄a mmọ ke ini enye ọkọdọhọde Simon Peter ete ‘ọbọk n̄kpri erọn̄ imọ.’ (Kot John 21:15-17.) Oyom ẹnen̄ede ẹse ẹban̄a mme erọn̄ ntre mfịn, koro Devil enen̄ede esịn ukeme ndibiat nsọn̄ọnda mbon oro ẹyakde idem ẹnọ Abasi. Satan ada mmeme obụkidem ye ererimbot esịn ukeme ndinam mme erọn̄ Jehovah ẹnam se idiọkde. (1 John 2:15-17; 5:19) Mbon oro mîwọrọke an̄wautom aba ẹkeme ndisọp nsop usụn̄, ndien ke ntre ẹyom un̄wam man ẹnam item oro ẹdọhọde “ẹsan̄a ke spirit.” (Gal. 5:16-21, 25) Oyom ẹbọn̄ akam, ẹberi edem ke Abasi ye ndausụn̄ spirit esie, ẹnyụn̄ ẹda Ikọ esie ẹnam n̄kpọ ke usọ, man ẹn̄wam mme utọ erọn̄ oro.—N̄ke 3:5, 6; Luke 11:13; Heb. 4:12.
7. Mbiowo ndika utom ubọkerọn̄ nnọ mbon mbieterọn̄ emi mmọ ẹsede enyịn edi akpan n̄kpọ adan̄a didie?
7 Ekpemerọn̄ ke Israel eset ekesikama anyan nnụk nnụk esan̄ ekpeme otuerọn̄ esie. Nte mme erọn̄ ẹkesidụkde m̀mê ẹwọrọde ke ufọk ufene, mmọ ‘ẹkesisan̄a ke idak esan̄ ẹbe’ ndien ke ntem ekpemerọn̄ ama ekeme ndibat mmọ. (Lev. 27:32; Mic. 2:12; 7:14) Oyom ekpemerọn̄ Christian ọfiọk otuerọn̄ Abasi emi enye esede enyịn kpasụk ntre n̄ko. (Men Mme N̄ke 27:23 domo.) Mmọdo, utom ubọkerọn̄ edi kiet ke otu akpan n̄kpọ oro otu mbiowo ẹsinemede. Emi esịne ndinam ndutịm man ẹn̄wam mme erọn̄ oro ẹyode ẹkpọn̄ usụn̄. Jehovah ke idem esiemmọ ọkọdọhọ ke imọ iyoyom mme erọn̄ imọ inyụn̄ inọ mmọ ntịn̄enyịn oro oyomde. (Ezek. 34:11) Ke ntem, esinem Abasi esịt ke ini mbiowo ẹsịnde ukeme ntre man ẹn̄wam mme erọn̄ oro ẹyode ẹkpọn̄ usụn̄ ẹfiak ẹdidụk otuerọn̄.
8. Didie ke mbiowo ẹkeme ndinọ erọn̄ ọkpọkpọ un̄wam?
8 Ke ini ekpeme otuerọn̄ Abasi akade ekese eyenete oro ọdọn̄ọde, emi ekeme ndinam enye okop idatesịt ye nsịnudọn̄. Kpasụk ntre ke ekeme ndidi edieke ẹnọde erọn̄ emi ọdọn̄ọde ke n̄kan̄ eke spirit ọkpọkpọ ntịn̄enyịn. Mbiowo ẹkeme ndikot mme itie N̄wed Abasi, ẹneme ibuotikọ kiet, ẹneme se ẹkekpepde ke mbono esop, ẹbọn̄ akam ye owo oro mîwọrọke an̄wautom aba do, ye ntre ntre eken. Mmọ ẹkeme ndisian enye ke nditọete ke esop ẹyedat esịt ndikụt enye afiakde ọtọn̄ọ ndidụk mme mbono esop. (2 Cor. 1:3-7; Jas. 5:13-15) Edika n̄kese, ikot urụk ukopikọ, m̀mê leta ekeme ndinen̄ede n̄n̄wam. Ndinọ erọn̄ oro ọwọrọde ọkpọn̄ otuerọn̄ ọkpọkpọ un̄wam ekeme ndinam ekpemerọn̄ ke idem esiemmọ enen̄ede enyene idatesịt ye esịtmbọm.
Ukeme Ofụri Owo
9, 10. Nso ikpanam fi ọdọhọ ke idịghe mbiowo kpọt ẹkpenyene udọn̄ ke idem erọn̄ oro oyode ọkpọn̄ usụn̄?
9 Nnyịn idu uwem ke ndiọkeyo oro mme owo mînyeneke ini, ntre nnyịn imekeme nditre ndikụt ke eyenete ke ọfiọrọ ọkpọn̄ esop. (Heb. 2:1) Edi mme erọn̄ Jehovah ẹnen̄ede ẹsọn̄ urua ke enyịn esie. Owo mmọ kiet kiet enyene ufọn, kpa nte ndido kiet kiet ke idem owo. Ntem, oyom kpukpru nnyịn inyene udọn̄ ke idem nditọete nnyịn inyụn̄ inen̄ede ise iban̄a kiet eken. (1 Cor. 12:25) Ndi afo emenyene orụk edu oro?
10 Okposụkedi emi mbiowo ẹdade usụn̄ ke ndiyom nnyụn̄ n̄n̄wam mme erọn̄ oro ẹyode ẹkpọn̄ usụn̄, idịghe mmọ kpọt ẹkpenyene udọn̄ ke idem mbon emi. Mbon eken ẹkeme ndidiana kiet ye mme ekpemerọn̄ emi. Nnyịn imekeme ikponyụn̄ inyene ndisịn udọn̄ nnọ nditọete nnyịn nnyụn̄ n̄n̄wam mmọ ke n̄kan̄ eke spirit ẹfiak ẹdidụk otuerọn̄. Didie ke ẹkeme ndinọ utọ un̄wam oro?
11, 12. Nso akwa ifet ke ẹkeme ndinọ fi ẹte an̄wam owo oro oyomde un̄wam ke n̄kan̄ eke spirit?
11 Ke ndusụk idaha, mbiowo ẹkeme ndidọhọ mme asuanetop Obio Ubọn̄ emi ẹnyenede mbufiọk ẹnịm ukpepn̄kpọ Bible ye mbon oro mîwọrọke an̄wautom aba emi ẹyomde ẹn̄wam mmimọ. Ẹsịn mme utọ ukeme oro man ẹn̄wam mmọ ẹfiak ẹnyene ‘ima emi mmọ ẹkenyenede ke akpa.’ (Edi. 2:1, 4) Ẹkeme ndisịn udọn̄ nnọ nditọete emi ẹnyụn̄ ẹnam mmọ ẹsọn̄ idem ke n̄kan̄ eke spirit ebe ke ndineme mme n̄kpọ oro mmọ ẹketabade ke ntak emi mîkodụhe ye esop ini oro.
12 Edieke mbiowo ẹdọhọde fi ekpep n̄kpọ ye eyenete oro oyomde un̄wam eke spirit, bọn̄ akam nọ Jehovah ada fi usụn̄ onyụn̄ ọdiọn̄ ukeme fo. Ke nditịm ntịn̄, “kan̄a utom fo nọ Jehovah, ndien uduak fo ọyọsọn̄ọ ada.” (N̄ke 16:3) Tie kere mme ufan̄ikọ Bible ye mme n̄kpọ oro ẹkemede ndisọn̄ọ mbuọtidem, emi afo ekemede ndineme ye mbon oro ẹyomde un̄wam eke spirit. Kere ban̄a eti uwụtn̄kpọ apostle Paul. (Kot Rome 1:11, 12.) Ama ọdọn̄ Paul ndikụt nditọete ke Rome man ọnọ mmọ ndusụk enọ eke spirit man mmọ ẹsọn̄ọ ẹda. Enye n̄ko ama odori enyịn ndibọ nsịnudọn̄ nto mmọ. Ndi nnyịn ikpenyeneke ukem edu oro ke ini iyomde ndin̄wam mme erọn̄ oro ẹyode ẹkpọn̄ otuerọn̄ Abasi?
13. Nso ke afo ekeme ndineme ye owo oro mîwọrọke an̄wautom aba?
13 Ke ini ekpepde n̄kpọ, afo emekeme ndibụp ete, “Afo akasan̄a didie ọbọ akpanikọ?” Nam enye eti idatesịt emi enye ekesinyenede, sịn udọn̄ nọ enye etịn̄ n̄kpọ oro ẹkesinemde enye ke mme mbono esop, utom ukwọrọikọ, ye ikpọ mbono. Edieke edide mbufo ẹma ẹsinam utom Jehovah ọtọkiet, tịn̄ nte mbufo ẹkesikopde inem utom emi. Tịn̄ nte afo okopde idatesịt ndisan̄a n̄kpere Jehovah. (Jas. 4:8) Wụt esịtekọm ban̄a nte Abasi ọnọde nnyịn emi idide ikọt esie se iyomde—akpan akpan ndinọ nnyịn ndọn̄esịt ye idotenyịn ke ukụt nnyịn.—Rome 15:4; 2 Cor. 1:3, 4.
14, 15. Nso ke ọkpọfọn ẹti mbon oro mîwọrọke an̄wautom aba ẹban̄a?
14 Enen̄ede etie nte ọyọfọn ẹti owo oro mîwọrọke an̄wautom aba mme edidiọn̄ oro enye ekenyenede ini kiet ko ke ntak emi ekesinen̄erede abuana ye esop. Ke uwụtn̄kpọ, enye ama esinen̄ede ọfiọk Ikọ ye uduak Abasi. (N̄ke 4:18) Ke ini enye ‘akasan̄ade ke spirit,’ eyịghe idụhe ke ama esimem enye utom ndikan idomo ndinam idiọk. (Gal. 5:22-26) Ndien emi ama anam enye enyene esịt eke mîbiomke enye, emi akanamde enye ekeme ndisibọn̄ akam nnọ Jehovah nnyụn̄ nnyene ‘emem Abasi emi akande kpukpru ekikere onyụn̄ ekpemede esịt ye ukeme ukeren̄kpọ nnyịn.’ (Phil. 4:6, 7) Ti mme n̄kpọ emi, nyene ata udọn̄ ke idem esie, nyụn̄ da ofụri ukeme sịn udọn̄ ke ima nọ eyenete fo afiak edidụk otuerọn̄.—Kot Philippi 2:4.
15 Yak idọhọ ke afo edi ebiowo ndien ke aka utom ubọkerọn̄. Emekeme ndisịn udọn̄ nnọ ebe ye n̄wan oro mîwọrọke an̄wautom aba ete ẹkere akpa ini oro mmọ ẹkebọde akpanikọ Ikọ Abasi. Akpanikọ ekedi utịbe, owụt eti ibuot, ọnọ owo inemesịt, onyụn̄ osio owo ke ufụn ke n̄kan̄ eke spirit! (John 8:32) Mmọ ẹkewụt esịtekọm didie ntem ẹban̄a se mmọ ẹkekpepde ẹban̄a Jehovah, ima esie, ye utịbe utịbe uduak esie! (Men Luke 24:32 domo.) Ti mmọ ban̄a n̄kpet n̄kpet itie ebuana oro mme Christian oro ẹyakde idem ẹnọ ẹnyenede ye Jehovah ye utịbe utịbe ifet oro mmọ ẹnyenede ndisibọn̄ akam nnọ enye. Sịn udọn̄ ke ofụri esịt nọ mbon oro mîwọrọke an̄wautom aba ẹfiak ẹnyịme “ubọn̄ ubọn̄ eti mbụk Abasi inemesịt,” kpa Jehovah.—1 Tim. 1:11.
Ka Iso Ma Mmọ
16. Nọ uwụtn̄kpọ ndiwụt ke ukeme oro esịnde ndin̄wam owo ke n̄kan̄ eke spirit enen̄ede enyene ufọn.
16 Ndi mme ekikere oro ẹnọde mi ẹnen̄ede ẹnyene ufọn? Etieti. Ke uwụtn̄kpọ, uyen kiet emi ekedide asuanetop Obio Ubọn̄ ke ini ekedide isua 12 ama etre ndiwọrọ an̄wautom ke ini ekedide isua 15. Nte ededi, nte ini akakade, enye ama afiak ọtọn̄ọ ndiwọrọ an̄wautom, ndien anam utom uyọhọ ini idahaemi ke isua 30. Ebiowo ekenen̄ede anam enye afiak ọsọn̄ idem ke n̄kan̄ eke spirit. Enye ama enen̄ede owụt esịtekọm aban̄a un̄wam eke spirit oro!
17, 18. Mme edu ewe ẹdin̄wam fi an̄wam owo oro oyode ọkpọn̄ otuerọn̄ Abasi?
17 Ima esinam mme Christian ẹn̄wam mbon oro mîwọrọke an̄wautom aba ẹfiak ẹnyọn̄ ẹdi esop. Jesus eketịn̄ ntem aban̄a mme anditiene enye: “Ami mmọnọ mbufo obufa ibet, nte mbufo ẹma kiet eken; kpa nte n̄kamade mbufo, nte mbufo n̄ko ẹma kiet eken. Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:34, 35) Ih, ima ke ẹda ẹfiọk ata mme Christian. Ndi owo ikpamaha mme Christian oro ẹma ẹkena baptism oro mîwọrọke an̄wautom aba, utọ ima oro? Ke akpanikọ, ẹkpenyene ndima! Edi ndinọ un̄wam oro odotde ekeme ndiyom ẹnyene ediwak nti edu.
18 Mme edu ewe ke ekeme ndiyom enyene edieke oyomde ndin̄wam mbon oro ẹyode ẹkpọn̄ otuerọn̄ Abasi? Ke ẹsiode ima ẹfep, ekeme ndiyom fi enyene esịtmbọm, mfọnido, ifụre ifụre ido, ye anyanime. Etienede idaha owo, ekeme ndiyom ama ndidahado nnọ. Paul ekewet ete: “Ẹsịne esịt ima emi asan̄ade ye mbọm, mfọnido, nsụhọdeidem, ifụre ifụre ido, ye anyanime. Ẹka iso ẹyọ kiet eken ẹnyụn̄ ẹfen kiet eken ke ofụri esịt edieke owo ekededi enyenede ntak nditọhọ ye kiet eken. Kpa nte Jehovah ekefende mbufo ke ofụri esịt, ẹfen kpasụk ntre n̄ko. Edi, ke ẹsiode kpukpru n̄kpọ emi ẹfep, ẹsịne ima, koro enye edi mfọnmma mbọbọ edidianakiet.”—Col. 3:12-14.
19. Ntak emi odotde ndisịn ukeme n̄n̄wam mbon mbieterọn̄ ẹfiak ẹdidụk otuerọn̄ Christian?
19 Udiana ibuotikọ ukpepn̄kpọ eyeneme mme ntak emi ndusụk owo ẹyode ẹkpọn̄ otuerọn̄ Abasi. Eyeneme n̄ko nte mbon oro ẹfiakde ẹdidụk otuerọn̄ ẹkemede ndidori enyịn nte ẹdidarade mmimọ. Nte afo ekpepde ibuotikọ oro onyụn̄ ekerede aban̄a enye emi, nyene mbuọtidem ke ukeme ekededi oro esịnde man an̄wam mbon mbieterọn̄ ẹfiak ẹdidụk otuerọn̄ enen̄ede odot. Ediwak owo ẹda ofụri eyouwem mmọ ẹdomo ndikọ inyene ke editịm n̄kpọ emi, edi uwem owo kiet kpọt akan ofụri okụk ke ererimbot emi. Jesus ama ọsọn̄ọ etịn̄ emi ke uwụtn̄kpọ oro enye ọkọnọde aban̄a erọn̄ emi okosopde. (Matt. 18:12-14) Afo akpakam eti n̄kpọ emi nte enen̄ede esịn ukeme man ọsọp an̄wam ndima mbon mbieterọn̄ Jehovah oro ẹkesopde usụn̄ man ẹfiak ẹdidụk otuerọn̄!
Didie ke Afo Ọkpọbọrọ?
• Nso ke mme ekpemerọn̄ ẹnyene ndinam mban̄a mbon mbieterọn̄ oro ẹyode ẹkpọn̄ otuerọn̄?
• Didie ke afo ekeme ndin̄wam mbon oro mîbuanake aba ye esop?
• Mme edu ewe ẹkeme ndin̄wam fi an̄wam mbon oro ẹyode ẹkpọn̄ otuerọn̄ Abasi?
[Mme Mbụme Ukpepn̄kpọ]
[Ndise ke page 10]
Mme ekpemerọn̄ ẹsidomo ndida ima n̄n̄wam mbon oro ẹyode ẹkpọn̄ otuerọn̄ Abasi