Ñaipytyvõkena umi oñemomombyrývape kongregasióngui

“Pevyʼajoaitékena chendive, péina niko ajuhu jey pe che ovecha okañyvaʼekue chehegui.” (LUC. 15:​6, JMP.)

1. Mbaʼéichapa Jesús ohechauka ñanderayhuha?

 ÑANDEJÁRA Ñeʼẽ heʼi Jesús haʼeha pe “ovecha rerekua guasu” (Heb. 13:20). Upévare oúrõ guare ko yvy ápe ári oñehaʼãmbaite oñangareko porã umi Israelgua ‘ovecha okañyvaʼekuére’ (Mat. 2:​1-6; 15:24). Umi ovecha rerekua ningo ohayhúgui ijovechakuérape, tekotevẽramo omeʼẽta voi hekove hesehapekuéra. Upeichaite avei Jesús, ñanderayhúgui omeʼẽ hekove ñanderehehápe (Juan 10:​11, 15; 1 Juan 2:​1, 2).

2. Mbaʼérepa heta oĩ oñemomombyrýva Jehovágui?

² Ñambyasýramo jepe heta oĩ oservimavaʼekue Jehovápe, oñemomombyrýva chugui. Ikatu oiko hese upéicha ndovyʼavéi térã hasykatúgui. Péro ñanemanduʼami David heʼivaʼekuére: ‘Ñandejára che Pastór, mbaʼeve naikotevẽichéne’. Upéva ohechauka Jehovápe oservívante ikatuha ipyʼaguapy ha ovyʼa (Sal. 23:​1, S). Upeichaite, Jehová ningo omeʼẽmbaite isiervokuérape oikotevẽmíva guive omombarete hag̃ua ijerovia. Péro umi oñemomombyrývape nomeʼẽi mbaʼeve. Mávapa ikatu oipytyvõ chupekuéra? Mbaʼépa oikotevẽ hikuái? Mbaʼépa ikatu jajapo ou jey hag̃ua kongregasiónpe?

Mávapa ikatu oipytyvõ chupekuéra?

3. Mbaʼépa jajapovaʼerã jagueru jey hag̃ua umi oñemomombyrývape? Mbaʼe rehépa Jesús ombojoja ko tembiapo?

³ Heta ningo ñañehaʼãvaʼerã jagueru jey hag̃ua umi oñemomombyrývape (Sal. 100:3). Jesús ombojoja upe tembiapo ko mbaʼére: ‘Mbaʼépa peẽ peimoʼã ojapoha peteĩ kuimbaʼe oguerekóva cien ovecha, okañýramo chugui peteĩ? Ohejáne ñúme  okaru umi noventa y nueve, ha oho oheka pe okañyvaʼekue. Ha ojuhúvo, ovyʼave ko peteĩ ovecha reheve umi noventa y nueve orekóvagui. Péicha avei pende Ru yvagapegua ndoipotái ni peteĩ jepe oñehundi’ (Mat. 18:​12-14). Mávapa ikatu oipytyvõ umi oñemomombyrývape ou jey hag̃ua?

4, 5. Mbaʼéichapa oñangarekovaʼerã umi ansiáno Jehová ovechakuérare?

⁴ Umi ansiáno ikatu oipytyvõ umi ermáno oñemomombyrývape. Ha imanduʼavaʼerã hikuái oñangarekoha Jehová ovechakuérare (Sal. 79:13). Umi ansiáno ojepyʼapy ha oñeñangarekovaʼerã mborayhúpe hesekuéra. Upearã oho ovisita omokyreʼỹ ha omombarete hag̃ua chupekuéra. Upéicharõ ikatu ou jey hikuái kongregasiónpe (1 Cor. 8:1).

⁵ Jehová voi oipota umi ansiáno oheka umi oñemomobyrývape oipytyvõ hag̃ua chupekuéra. Apóstol Pablo omomanduʼavaʼekue umi ansiáno Efesoyguápe: ‘Peñangareko pendejehe, ha opa ovecha atýre espíritu sánto penemoĩ haguépe herekuáramo. Peñangareko Jesucristo kongregasiónre ojoguavaʼekue huguýre’ (Hech. 20:28). Upéicha avei, apóstol Pedro heʼi umi ansiáno ungídope: ‘Peñangareko umi Ñandejára ovecháre oñemoĩvaʼekue pende poguýpe. Pejapo pyʼaporãme Ñandejára oipotaháicha ha ani jejopýpe térã platapotágui. Ani peñemombaʼe umi peñangarekóvare, peñehaʼã guei tojehecha penderehe iporãva’ (1 Ped. 5:​1-3).

6. Mbaʼérepa koʼág̃a rupi tekotevẽtereive umi ansiáno oñangareko Jehová ovechakuérare?

⁶ Umi ansiáno osegivaʼerã pe “ovecha rerekua guasu” ehémplo (Juan 10:11). Jesús ningo ipyʼaite guive ojepyʼapy Jehová ovechakuérare. Ha oipotágui oñeñangareko porã hesekuéra heʼivaʼekue Pédrope: “Eñangarekóke che ovechakuérare” (jaleemína Juan 21:​15-17). Koʼág̃a rupi tekotevẽtereive oñeñangareko Jehová ovechakuérare, Satanás oñehaʼãmbaite rupi oguenohẽ chupekuéra Jehová rapégui. Oikuaágui ñaneimperfektoha, oiporu ko múndo ñanemoñuhã hag̃ua (1 Juan 2:​15-17; 5:19). Umi oñemomombyrývape koʼýte oñepytyvõvaʼerã oiko hag̃ua Ñandejára espíritu oipotaháicha (Gál. 5:​16-21, 25). Mbaʼépa ojapovaʼerã umi ansiáno oipytyvõ hag̃ua chupekuéra? Ojerurevaʼerã Ñandejárape ijespíritu sánto ha oiporukuaavaʼerã Ñandejára Ñeʼẽ (Pro. 3:​5, 6; Luc. 11:13; Heb. 4:12).

7. Mbaʼépa ojapo umi ansiáno oipytyvõ hag̃ua umi oñemomombyrývape?

⁷ Yma Israélpe umi ovecha rerekua omboguata hag̃ua ijovechakuéra oiporu peteĩ yvyra puku. Ha omoinge hag̃ua ikorápe térã onohẽta jave, ombohasa chupekuéra upe yvyra guy rupi oipapa hag̃ua (Lev. 27:32; Miq. 2:12; 7:14). Upéicha avei umi ansiáno oikuaa porã vaʼerã Ñandejára ovechakuérape ha oikuaavaʼerã avei mbaʼépa oikotevẽ hikuái (ñambojojami Proverbios 27:​23-re). Upévare ningo umi ansiáno oipytyvõ hag̃ua umi oñemomombyrývape oho jepi ovisita chupekuéra. Jehová voi heʼi ohekataha ha oipytyvõtaha ijovechakuérape (Eze. 34:11). Upévare ovyʼa ohechávo ansianokuéra oipytyvõ umi oñemomombyrývape ou jey hag̃ua kongregasiónpe.

8. Mbaʼéichapa umi ansiáno ikatu oñatende umi oñemomombyrývare?

⁸ Peteĩ ermáno hasykatúva ovyʼa ha ikyreʼỹ jeýta ovisitáramo chupe ansianokuéra. Upéicha avei umi oñemomombyrýva oikotevẽ oñeñatende hesekuéra ikyreʼỹ jey hag̃ua. Umi ansiáno ikatu olee chupekuéra la Biblia, rrevísta, térã omombeʼu peteĩ mbaʼe ojeʼevaʼekue rreunionhápe ha oñemboʼe hendivekuéra. Ikatu avei heʼi chupekuéra enterove ovyʼataha oho  jeýramo rreunionhápe (2 Cor. 1:​3-7; Sant. 5:​13-15). Tuichaite ningo omokyreʼỹta umi ermánope, umi ansiáno ohóramo hendapekuéra, ohenóiramo teléfonope térã omondórõ chupekuéra peteĩ kárta jepe. Umi ansiáno ojapóramo upéicha ovyʼáta avei.

Tekotevẽ enterove ñañopytyvõ

9, 10. Mbaʼépa enterove jajapovaʼerã umi oñemomombyrývare?

⁹ Koʼág̃a rupi enterove ñane rembiapoiterei ha ijetuʼu opa mbaʼe. Upévare ikatu ndajahechakuaái peteĩ ermáno oñemomombyrymaha ohóvo kongregasióngui (Heb. 2:1). Péro Jehová ohecha ha ojepyʼapyeterei ijovechakuérare. Haʼe ningo omombaʼe enterove isiervokuérape ñande ñamombaʼeháicha ñande rete, ñane kuãʼíre jepe ñanerakateʼỹ. Upévare enterove jajepyʼapy ha ñañangarekovaʼerã ojuehe (1 Cor. 12:25). Remombaʼépa upéicha ermanokuérape?

¹⁰ Umi ansiáno raẽvete ningo ojepyʼapy ha oipytyvõvaʼerã umi oñemomombyrývape. Péro ndahaʼéi haʼekuérante ojapovaʼerã upéva, enterove ñañopytyvõvaʼerã. Ñamokyreʼỹ ha ñamombaretevaʼerã ñane ermanokuérape ou jey hag̃ua kongregasiónpe. Mbaʼéichapa ikatu jajapo koʼã mbaʼe?

11, 12. Mbaʼépa ikatu heʼi ñandéve ansianokuéra jajapo hag̃ua?

¹¹ Peteĩ ermáno ndohovéiva rreunionhápe ha predikasiónpe ojeruréramo oñepytyvõ hag̃ua chupe, ansianokuéra heʼikuaa peteĩ ermáno ikatupyrývape ostudia hag̃ua hendive. Upéicha ‘ohayhu jeýta Jehovápe yma guaréicha’ (Rev. 2:​1, 4). Ha omombaretéta ijerovia upe ermáno ohesaʼỹijóramo hendive umi informasión oñemeʼẽvaʼekue rreunionhápe iporeʼỹnguépe.

¹² Umi ansiáno heʼíramo ñandéve ñaipytyvõ hag̃ua peteĩ ermánope, jajerurevaʼerã Jehovápe tañanepytyvõ ha tovendesimi jajapótava. La Biblia heʼi: “Emoĩ Ñandejára pópe ne rembiapo, ha opa rejaposéva osẽ porãmbáne ndéve” (Pro. 16:3). Iporã avei jaheka umi téysto térã informasión omombaretétava chupe. Ha jajepyʼamongeta apóstol Pablo ehémplore (jaleemína Romanos 1:​11, 12). Pablo ningo ohose umi ermáno Romaygua rendápe omokyreʼỹ ha omombarete hag̃ua chupekuéra. Haʼe oikuaa upéva omokyreʼỹtaha avei chupe. Upévare ñaipytyvõ jave ñane ermanokuérape ñapensákena Pablo opensa haguéicha.

13. Mbaʼe mbaʼérepa ikatu ñañeʼẽ umi oñemomombyrýva ndive?

 ¹³ Jastudia aja hendive ikatu ñaporandu chupe mbaʼéichapa oikuaarakaʼe Jehovápe. Ñanemanduʼa chupe yma oikovaʼekuére, mbaʼéichapa javyʼámi oñondivepa rreunionhápe, asambleahápe ha predikasiónpe. Ñamombeʼu avei pe ermánope mbaʼeichaitépa ñande javyʼa ñaĩ haguére kongregasiónpe (Sant. 4:8). Jaʼevaʼerã chupe mbaʼeichaitépa jaagradese Jehovápe oñangareko haguére ñanderehe. Ñande ningo ñamombaʼeterei Jehová oprometéva ñandéve ha ñanekonsola haguére jahasa asy jave (Rom. 15:4; 2 Cor. 1:​3, 4).

14, 15. Mbaʼe mbaʼérepa iporã oñemomanduʼa umi oñemomombyrývape?

¹⁴ Iporã avei ñamomanduʼa chupe umi mbaʼe porã ohupytavaʼekuére kongregasiónpe. Pór ehémplo, koʼẽ koʼẽre ontendeve la Biblia ha Ñandejára rembipota (Pro. 4:18). Ha oiko haguére Ñandejára oipotaháicha imbareteve oñemoĩ hag̃ua Satanás rehe (Gál. 5:​22-26). Ikatuvaʼekue avei oñemboʼe ha ‘Ñandejára pyʼaguapy tuichavéva opa mbaʼégui oñangareko ipyʼapýre’ (Fili. 4:​6, 7). Ñanemanduʼákena koʼã mbaʼére pe ermánope ha jahechauka jajepyʼapyha hese. Iñimportantevéva katu ñamokyreʼỹkena chupe ou jey hag̃ua Jehová ovecha atýpe (jaleemína Filipenses 2:4).

¹⁵ Peteĩ ansiáno ohóramo ovisita peteĩ família oñemomombyrývape, ikatu omomanduʼa chupekuéra mbaʼeichaitépa ovyʼavaʼekue oikuaárõ guare Jehovápe. Ha mbaʼeichaitépa igustovaʼekue chupekuéra ontendérõ guare la Biblia omboʼéva (Juan 8:32). Oiméne oagradesetéraʼe Jehovápe hikuái oikuaa haguére chupe ha imbaʼeporãitereígui hendivekuéra (ñambojojami Lucas 24:​32-re). Pe ansiáno heʼivaʼerã chupekuéra umi oñehaʼãva oservi Ñandejárape añoite oĩ porãha hendive ha ikatuha oñemboʼe chupe. Omokyreʼỹvaʼerã chupekuéra iñeʼẽrendu jey hag̃ua ‘Ñandejára marandu porãme’ (1 Tim. 1:11).

Jahechaukákena jahayhuha chupekuéra

16. Emombeʼumi peteĩ ehémplo ohechaukáva ikatuha ñaipytyvõ umi oñemomombyrývape.

¹⁶ Péro ñaipytyvõta piko chupekuéra péicha? Jajapóramo jahecha haguéicha katuete ñaipytyvõta. Pór ehémplo peteĩ mitãrusu oñepyrũ opredika 12 áñope, péro orekópe 15 áño oñemomombyry. Upe rire oñemboja jey kongregasiónpe ha ojapo iprekursorádo. Ha treinta áño rasa haʼe ojapo iprekursorádo. Peteĩ ansiáno tuicha oipytyvõ chupe ha upévare oñemboja jey kongregasiónpe. Haʼe ningo ovyʼaiterei upévare!

17, 18. Mbaʼe mbaʼépa ikatu jajapo ñanembaʼeporã hag̃ua umi oñemomombyrýva ndive?

¹⁷ Jesús heʼivaʼekue hemimboʼekuérape: ‘Pejoayhúkena, che pohayhu haguéicha. Péicha opavave ohechakuaáta peẽ haʼeha che remimboʼe’. Upévare jahayhúramo umi oñemomombyrývape ñaipytyvõñaína chupekuéra (Juan 13:​34, 35). Jesús heʼi haguéicha ñande kristianokuéra jajoayhuvaʼerã. Upéva heʼise jahayhuvaʼerãha avei umi oñemomombyrývape. Péro ndahaʼéi upévante jajapovaʼerã, oĩ  heta mbaʼe ikatúva jajapo ñanembaʼeporã hag̃ua hendivekuéra.

¹⁸ Pór ehémplo, ñanepasiénsia, ñanembaʼeporã ha jaiporiahuverekovaʼerã chupekuéra. Ha sapyʼánte tekotevẽta avei ñaperdona ñane ermánope. Upévare, Pablo heʼi: “Peñemonde poriahuverekópe, pyʼaporãme, jejapoʼỹme, tekopochyʼỹ, ha ñehaʼãrokuaápe. Pejogueropuʼaka ha peheja rei ojupe oimérõ máva ipochýva ambuére. Ñandejára oheja rei haguéicha peẽme, peheja rei avei peẽ. Tenondete, peñemonde mborayhúpe, mbaʼe oporombojoaju porãva” (Col. 3:​12-14).

19. Mbaʼérepa iporã ñañehaʼã ñaipytyvõ umi oñemomombyrývape?

¹⁹ Pe artíkulo oúvape jahecháta mbaʼérepa heta ermáno oñemomombyry kongregasióngui. Ha mbaʼérepa ikatu ojerovia hikuái vyʼápe jarresivitaha chupekuéra. Koʼã artíkulo rupive jahechakuaa iporãha ñañehaʼã ñaipytyvõ umi oñemomombyrývape. Ha Jesús oñeʼẽrõ guare pe ovecha okañyvaʼekuére ñanemboʼe iporãveha ñaipytyvõ ñande rapichápe ou jey hag̃ua kongregasiónpe, jaikorangue pláta rapykuéri (Mat. 18:​12-14). Upévare ñañehaʼãkena ñaipytyvõ koʼág̃ama voi ñane ermanokuéra oñemomombyrývape.

Mbaʼépa ñambohováita?

• Mbaʼépa ojapovaʼerã umi ansiáno oĩramo oñemomombyrýva?

• Mbaʼéichapa entéro ikatu ñaipytyvõ umi oñemomombyrývape?

• Mbaʼe mbaʼépa ikatu jajapo ñanembaʼeporã hag̃ua umi oñemomombyrýva ndive?

[Porandu ñahesaʼỹijóva]

[Nóta oĩva taʼanga ndive páhina 10]

Umi ansiáno oñehaʼã mborayhúpe oipytyvõ umi oñemomombyrývape