Savaatinit qimagussimasut ikiorsigit

„Sava tammaasaraluara nanigakku nuannaaqatigisinga.“ — LUKASI 15:6.

1. Jiisusip qanoq ililluni ersersippaa savanik paarsisuulluni asannittoq?

JEHOVAP ernitua, Jiisusi Kristusi, taaneqartarpoq „savaatit paarsisuunerannik“. (Hebræerit 13:20) Tikiunnissaa Biibilimi siulittuutigineqarpoq, tassanilu ersersinneqarpoq taanna savanik paarsisuusimasoq asseqanngilluinnartoq Israelimi ’savanik tammarsimasunik’ ujaasisoq. (Matthæusi 2:1-6; 15:24) Savanik paarsisuittut savat illersorniarlugit inuunerminik navianartorsiortitsiumasutut Jiisusip inuunini pilliutigaa savat assersuutaasut, pilliutiminik iluaqutiginnikkumaartut, pillugit. — Johannesi 10:11, 15; 1 Johannesi 2:1, 2.

2. Ilaasa unittooqqalersimanerannut suut pissutaappat?

² Ajoraluartumik inoqarpoq Jiisusip pilliutaanik pingaartitsisimannguatsiarlutik Guutimut tunniulluinnarsimasunik, ilagiinnili kristumiuniittunik peqateqartarunnaarsimasunik. Nikallunganeq, peqqiilliorneq allalluunniit aallussilluarpiarunnaassutigisimavaat, tamannalu pissutigalugu unittoorsimapput. Aatsaalli Guutip savaataanut ilaagunik eqqissineq, toqqissisimaneq nalerisimaarnerlu Daavip Tussiaat 23-mi eqqartugaa misigisinnaavaat. Assersuutigalugu Daavi ima oqarpoq: „[Jehova] paarsisigaara, sumik ajorsaateqanngilanga.“ (Tussiaat 23:1) Guutip savaataasa akornanniittut anersaakkut ittut eqqarsaatigalugit peqarluarput, savaatinilli qimagussimasut anersaakkut ittunik pissaalatsipput. Taakku kikkut ikiorsinnaavaat? Qanoq ikiorneqarsinnaappat? Aap, taakku uternissaannut ikiorniarlugit sorpiaat iliuuserineqarsinnaappat?

Kikkut ikiuisinnaappat?

3. Jiisusip qanoq ililluni ersersippaa savat assersuutaasut savaatinit Guutip paarisaanit qimagussimasut annaanniarlugit suut iliuuserineqartariaqarnersut?

³ ’Savaatinit Guutip paarisaanit’ qimagussimasut ikiorniarlugit aalajangersimalluni iliuuseqartoqartariaqarpoq. (Tussiaat 100:3) Jiisusip tamanna assersuusiaraa ima oqarluni: „Inuup 100-nik savaateqartup taakkua ilaat ataaseq tammarpat ilai 99-it qaqqanut qimallugit tammartoq ujariartussannginnerpaa? Naniguniullu, ilumut oqarfigaassi, taanna 99-init tammanngitsunit nuannaarutiginerussavaa. Taamattaaq Ataatassi qilanniittup piumasarinngilaa minninnguit ukua ilaannik ataatsimilluunniit tammartoqassasoq.“ (Matthæusi 18:12-14) Savat assersuutaasut savaatinit qimagussimasut kikkut ikiorsinnaavaat?

4, 5. Utoqqaanertat Guutip savaataanut qanoq isiginnittaaseqartariaqarpat?

⁴ Utoqqaanertat kristumiut savanik tammarsimasunik ikiuiniaraangamik eqqaamasariaqarpaat Guutip savaatai ilagiiusut inunnik Guutimut tunniulluinnarsimasunik ilaasortallit — aap, taakku  ’savaataapput Guutip paarisai’ taassumunnga erlinnangaartut. (Tussiaat 79:13) Savat erlinnangaartut taakku isumassorneqangaartariaqarput. Tassa imaappoq, paarsisut asannittut taakku inuttut soqutigisariaqarpaat. Inussiarnerlutik paarsisutut taakkununnga pulaarnerat sunniuteqangaarsinnaavoq. Paarsisup asannittumik kaammattuinera anersaakkut ineriartuutaasinnaavoq, aamma taakkua savaatinut uterusulissutigisinnaavaat. — 1 Korinthimiut 8:1.

⁵ Guutip savaataanik paarsisut savanik tammarsimasunik ujaasinissartik taakkuninngalu ikiuiniarnissartik akisussaaffigaat. Apustilip Paulusip utoqqaanertat kristumiut Efesosimiittut paarsisutut akisussaaffiannik eqqaasippai ima oqarami: „Immissinnut misissugariniaritsi savaatittaarlu tamaasa misissugaralugit; Anersaammi Illernartup taakkununnga nakkutilliisunngortippaasi Guutip ilagiissai nammineq aamminik pissarsiai [nammineq ernermi aavanik pissarsiai, NV] paareqqullugit.“ (Apustilit Suliaat 20:28) Apustilip Petrusip utoqqaanertat tanitat tamatumunnga assingusumik oqaaqqissaarpai ima allakkami: „Guutip savaataanik ilissinniittunik paarsisuuniaritsi, paarisigit tamatumunnga pinngitsaalisaasutut pinnasi namminerli kajumissutsissinnit, soorlu Guuti taama piumasaqartoq, iluanaarniapilunneq siunertarinagu nuannaarlusili kajumillusilu; akisussaaffigisassinnut naalagaaniassanngilasi, savaatinulli maligassaagitsi.“ — 1 Petrusi 5:1-3.

6. Sooq Guutip savaataasa ingammik ullumikkut paarsisunit isumassorneqarnissartik pisariaqartippaat?

⁶ Paarsisut kristumiut „savanik paarsisoq ajunngitsoq“, Jiisusi, ilaartariaqarpaat. (Johannesi 10:11) Taanna Guutip savaataanik isumassuingaarpoq, aamma taakkuninnga isumassuinissap pingaaruteqassusianik erseqqissaavoq Siimuut Petrusi peqqugamiuk ’savaatiminik paarsisooqqullugu’. (Atuaruk Johannesi 21:15-17.) Savat ingammik ullumikkut taamatut isumassorneqarnissartik pisariaqartippaat, Diaavulumi Guutimut tunniulluinnarsimasunik assuarnaakkunnaarsitsiniarluni tamaviaarpoq. Saatanip Jehovap savaatai ajortuliornissamut nakkaannartinniarlugit uinngup sanngiissusia silarsuarlu manna atornerluppai. (1 Johannesi 2:15-17; 5:19) Unittooqqasut savanit allanit sanngiinnerupput, tamannalu pissutigalugu ’anersaamut naapertuuttumik saqinissamik’ (NV) oqaaqqissaarutip malinnissaanut ikiorneqartariaqarput. (Galatiamiut 5:16-21, 25) Paarsisut taamatut ikiuissagunik Guuti tatigisariaqarpaat, taassuma anersaavanit siulersorneqarnissartik qinnutigisariaqarpaat, aamma taassuma oqaasia atorluartariaqarpaat. — Ussatit 3:5, 6; Lukasi 11:13; Hebræerit 4:12.

7. Utoqqaanertat savanik assersuutaasunik paarisaminnik isumassuinissaat qanoq pingaaruteqartigaa?

⁷ Itsaq Israelimi savanik paarsisoq takisuumik isuatigut najungasumik ungoorissuteqartarsimavoq, imaluunniit ajaappiaqartarsimavoq, savanik siulersuinermut atortakkaminik. Savat ungalusamut iseraangata ungalusamilluunniit anigaangata ajaappiaq atorlugu savanik paarsisumit ’kisinneqartarput’. (3 Mosesi 27:32; Mika 2:12; 7:14) Taamatuttaaq paarsisup kristumiup savaatit isumagisassani ilisarisimasariaqarpai, aamma nalunngittariaqarpaa savaatit tamarmik immikkut qanoq innersut. (Naleqqiuguk Ussatit 27:23.) Taamaattumik paarsisutut kiffartorneq utoqqaanertaqatigiit ataatsimiinnerminni oqaloqatigiissutigisartagaasa pingaarutillit ilagaat. Ilaatigut savat tammarsimasut ikiornissaat pilersaarusiortariaqarpaat. Jehova oqarpoq savaatini nammineq ujassallugit isumassussallugillu. (Ezekieli 34:11) Taamaattumik Guutip nuannaarutigisarpaa utoqqaanertat tamatumunnga assingusumik iliuuseqaraangata savat qimagussimasut savaatinut uternissaannut ikiorniarlugit.

8. Utoqqaanertat qanoq ilillutik ersersissinnaavaat savat tamaasa immikkut soqutigalugit?

⁸ Uppeqat timikkut napparsimappat, paarsisumit ilagiinneersumit pulaarneqarneq taassumunnga nuannaarutaangaarsinnaallunilu qiimmassaataasinnaavoq. Anersaakkut napparsimasoq inuttut soqutigineqaruni, tamanna taamatulli taassumunnga sunniuteqassaaq. Utoqqaanertat taamatut pulaarnerminni allassimaffinnik atuarsinnaapput, allaaserisamik sammisaqarsinnaapput, ataatsimiinnerni saqqummiunneqartut pingaarutillit eqqaasinnaavaat, unittooqqasoq qinoqatigisinnaavaat, ilaallu ilanngullugit. Aamma eqqaasinnaavaat taanna ataatsimiigiaqqittalerpat, tamanna ilagiinniittut nuannaarutigissagaluaraat. (2 Korinthimiut 1:3-7; Jaaku 5:13-15) Pulaarneqarnertik, sianerfigineqarnertik allaffigineqarnertilluunniit iluaqutigingaarsinnaavaat. Aamma savamik savaatit akornanni amigaataasumik ikiuineq  paarsisumut kristumiumut namminermut nuannaarutaangaassaaq.

Tamatta ikiuiniarluta iliuuseqarsinnaavugut

9, 10. Sooq savamik qimagussimasumik ikiuisussat utoqqaanertaannaanngillat?

⁹ Ulluni ulapiffiullutillu ernumanartorsiorfiusuni inuuvugut, taamaattumillu uppeqatitta ilagiinnit qimagukkiartulernera maluginngitsoorsinnaavarput. (Hebræerit 2:1) Jehovalli savaatini erlinnangaartutut isigai. Ilagiinni ilaasortaasut tamarluinnarmik pingaaruteqarput, soorluttaaq inuup timaani avatit tamarluinnarmik pingaaruteqartut. Taamaattumik qatanngutivut tamatta soqutigisariaqarpavut isumassoqatigiittariaqarlutalu. (1 Korinthimiut 12:25) Illit taamatut isiginnittaaseqarpit?

¹⁰ Soorunami pingaarnerpaamik utoqqaanertat savanik savaatinit qimagussimasunik ujaasillunilu ikiuinissaq akisussaaffigaat, nakkutilliisulli kristumiut kisimik isumassuisussaanngillat. Allat taakkununnga suleqataasinnaapput. Tamatta qatanngutivut ilagiinnut uternissaminnut ikiorneqartariaqartut kaammattorsinnaallugillu kaammattortariaqarpavut aamma anersaakkut ikiorsinnaallugillu ikiortariaqarpavut. Qanoq ililluta taamaaliorsinnaavugut?

11, 12. Suna immaqa illit immikkut pisinnaatitaaffigilersinnaaviuk?

¹¹ Utoqqaanertat ilaatigut oqaluussisartut misilittagaqarluartut unittooqqasunik Biibilimik atuaqqissaaqateqarnissaannik isumaqatigiissuteqarfigisinnaavaat, taakku ikiorneqarusunnerminnik ersersitsippata. Taamatut atuaqqissaaqatigiinnermut siunertaasoq tassaavoq taakkua sallusuissummut ’asanninnermissut siullertut’ asannileqqinnissaat. (Saqqummersitat 2:1, 4) Taakku anersaakkut ineriartortinneqarsinnaallutillu nakussatsinneqarsinnaapput allaaserisanik ilagiinnit qimagusimanerminni samminngitsoorsimasaannik misissueqatigalugit.

¹² Utoqqaanertat qinnuigippatsit anersaakkut ikiorneqarnissaminik pisariaqartitsisumik atuaqqissaaqateqaqqullutit, Jehova qinnuigiuk siulersoqqullutit suliniarninnillu pilluaqquseqqullugu. Aap, „suliarisassatit [Jehovap] assaanut tunniutikkit, taava pilersaarutitit piviusunngorumaarput“. (Ussatit 16:3) Ikiorneqarnissaminik pisariaqartitsisumik oqaloqateqarninni allassimaffiit paasissutissallu uppernikkut nakussatsinnartut suut atorsinnaanerlugit eqqarsaatigiuk. Aamma apustilip Paulusip maligassiaa eqqarsaatigiuk. (Atuaruk Romamiut 1:11, 12.) Paulusip kristumiut Romamiittut takoqqikkunigit tunissummik anersaakkut ittumik ilangiisinnissaat qilanaaraa nakussatsinneqarsinnaaniassammata. Aamma upperisaqaqatigiinnermikkut kajumissaaqatigiinnissartik qilanaaraa. Guutip savaataanit qimagussimasut ikiorniaraangatsigit uaguttaaq taamatut isiginnittaaseqartariaqarpugut, ilaa?

13. Soorlu suut oqaloqatigiissutigisinnaavisigit?

¹³ Atuaqqissaaqatigiinnissinni ima aperisinnaavutit: „Illit sallusuissut qanoq ilillutit paasiviuk?“ Jehovamut kiffartornermini nuannaarutigisimasaanik eqqaasaqarnissaanut ikioruk, ataatsimiinnerni, oqaluussinermi ataatsimeersuarnernilu misigisimasaanik nuannersunik oqaluttuartillugu. Oqaluussinermi immaqa ilissi marluullusi nuannisaaqatigiittarsimanisi eqqartorsigik. Jehovamut  qanittumik attaveqarninnik illit nammineq sooq nuannaarutiginninnerit oqaluttuariuk. (Jaaku 4:8) Jehovap innuttaminik — ingammik annikilliornitsinni tuppallersaallunilu neriuutissiisarnermigut — isumassueriaasianik qujamasuutiginninnerit oqaluttuariuk. — Romamiut 15:4; 2 Korinthimiut 1:3, 4.

14, 15. Unittooqqasut pilluaqqussutisiarisimasaat suut pillugit eqqaasinneqarsinnaappat?

¹⁴ Unittooqqasumik ilagiinnut attaveqarluarnermigut pilluaqqussutisiarisimasaasa ilaat pillugit eqqaasitsineq qularnanngitsumik iluaqutaassaaq. Assersuutigalugu Guuti taassumalu siunertai pillugit ilisimasaqarnerulerneq nuannaarnarlunilu nalerisimaarnarpoq. (Ussatit 4:18) Taassuma ’anersaamut naapertuuttumik saqigallarami’ (NV) qularnanngitsumik ajortuliornissamut ussernartut akioruminartinneruai. (Galatiamiut 5:22-26) Tamatuma kingunerisaanik ilerasuuteqannginnini pissutigalugu Jehovamut qinunikkut palligussinnaavoq ’eqqissinerlu Guutimit pisoq siuneqassusernit tamanit annerungaartoq uummatinillu eqqarsaatinillu serniginnittartoq’ misigisinnaallugu. (Filippimiut 4:6, 7) Siunnersuutit tamakku eqqumaffigikkit, ilumoorlutit soqutiginnigit, anersaakkullu qatanngutit sapinngisat tamaat asannittumik kajumissaaruk savaatinut uteqqullugu. — Atuaruk Filippimiut 2:4.

¹⁵ Oqariarta utoqqaanertaasutit aappariinnut paarsisutut pulaartoq. Taakku unittooqqapput, maannalu illit taakku kaammattorniarpatit. Kajumissaakkit piffissaq sallusuissummik Guutip oqaasianeersumik paasinneqqaarfitsik eqqarsaatigeqqullugu. Taamanikkut qanoq misigippat? Ilimanarluinnarpoq sallusuissut nuanningaartutut, inornanngitsutut, nalerisimaarnartutut anersaakkullu oqiliallaataasutut isigigaat. (Johannesi 8:32) Jehova, taassuma asanninnera siunertaalu nuanningaartut pillugit paasisaminnik qujamasuutiginningaarput! (Naleqqiuguk Lukasi 24:32.) Jehovamut qanittumik attaveqalernerat pillugu aamma ilerasuuteqarnani qinunerup, kristumiut tunniulluinnarsimasut nuannaarutigisinnaasaata, immikkut pisinnaatitaaffiunera pillugu eqqaasikkit. Aamma qamannga pisumik kajumissaakkit ’nutaarsiassamik nuannersumik alutornartumillu Guutimit pilluartumeersumik’ eqqarsaatiginneqqeqqullugit taannalu malillugu inuuleqqeqqullugit. — 1 Timotheusi 1:11, NV.

Asannittuliorfigiuakkit

16. Unittooqqasunik ikiuinerup imminut akilersinnaaneranik ersersitsisumik assersuuteqarit.

¹⁶ Siunnersuutit eqqartoriikkavut atorsinnaappat? Aap. Assersuutigalugu nukappiaraq aqqaneq-marlunnik ukioqarluni oqaluussisartunngortoq 15-inik ukioqarluni unittoorpoq. Kingusinnerusukkulli kiffartornermi suliniuteqaqqilerpoq maannalu ukiut 30-t sinnerlugit piffissaq tamaat kiffartortuusimalluni. Aallarteqqinneranut pissutaanerpaasoq tassaavoq utoqqaanertap kristumiup ikiuinera. Anersaakkut ikiorneqarnini qujamasuutigeqaa!

17, 18. Guutip savaataanut uternissamut ikiugaqassaguit qanoq pissuseqartariaqassavit?

¹⁷ Kristumiut unittooqqasunik ilagiinnut takkuttaleqqinnissaannut ikiuinissaminnut asanninneq kajumississutigisarpaat. Jiisusip ajoqersukkani ima oqarfigai: „Inassummik nutaamik tunivassi: Asaqatigiissaasi. Soorlu uanga asagissi, taamattaaq ilissi asaqatigiissaasi. Asaqatigiikkussi tamatumuuna tamarmik paasissavaat ajoqersugarigissi.“ (Johannesi 13:34, 35) Aap, asanninneq pissusiuvoq kristumiut ilumoortut ilisarnaatigisaat. Kristumiut kuisimasut unittooqqasut asannittuliorfigissannginnerpavut? Soorunami asannittuliorfigissavavut! Unittooqqasunilli ikiuissagaanni aamma allanik ajunngitsunik pissuseqarnissaq pisariaqarpoq.

¹⁸ Guutip savaataanit qimagussimasumik ikiuissaguit qanoq pissuseqartariaqarpit? Asanninnerup saniatigut misiginneqataasariaqarputit, inussiarnersuusariaqarputit, saamasuusariaqarputit kamaginnittuusariaqarlutillu. Pissutsit qanoq innerat apeqqutaalluni, immaqa aamma isumakkeerfiginnittariaqarsinnaavutit. Paulusi ima allappoq: „Atiniarsigit nallittuingaarneq, ajunngissuseq, nikanartinneq, qanilaarneq naammagittassuserlu.  Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi. Soorlu [Jehovap] isumakkeerfigigaasi taamatuttaaq ilissi iliussaasi. Tamakkuali tamarmik qaavatigut atiniarsiuk asanninneq, tassaammat naammalluinnassutsip qilerutaa [tassaammat ataasiussutsip qilerutaa naammalluinnartoq, NV].“ — Kolossemiut 3:12-14.

19. Sava tammarsimasoq ungalusamut uternissaanut ikiorniarlugu suliniuteqarneq sooq imminut akilersinnaava?

¹⁹ Allaaserisami tulliuttumi ilaasa savaatinit qimagussimanerannut pissutaasinnaasut sammissavavut. Allaaserisami aamma sammineqassaaq savaatinut utertut qanoq ilassineqarnissartik ilimagisinnaaneraat. Allaaserisaq maanna atuaqqissaariigarput eqqarsaatigiitigalugu allaaserisaq tulliuttoq atuaqqissaarukku, qularutiginngilluinnarsinnaavat sava assersuutaasoq ungalusamut uternissaanut ikiorniarlugu ilungersuutitit imminut akilersinnaasut. Pissutsit aaqqissuussaaneranni maanna atuuttumi inuppassuit inuunertik tamaat pisuussutinik katersuinermut atortarpaat, inuulli ataasiinnaalluunniit inuunera silarsuarmi tamarmi pisuussutinit naleqarneruvoq. Jiisusip savamik tammarsimasumik assersuusiamini tamanna erseqqissarpaa. (Matthæusi 18:12-14) Qanortoq Jehovap savaataasa erlinnangaartut ilaat ungalusamut uternissaanut ikiorniarlugu ilumoorlutit suliniuteqarninni tamanna eqqaamajuariuk!

Qanoq akissavit?

• Paarsisut kristumiut savanut assersuutaasunut savaatinit qimagussimasunut sumik akisussaaffeqarpat?

• Maanna ilagiinni unittooqqasut illit qanoq ikiorsinnaavigit?

• Savaatinit qimagussimasunik ikiuissagaanni qanoq pissuseqartariaqarpa?

[Atuaqqissaarnermi apeqqutit]

[Qupp. 12-mi assiliartaq]

Paarsisut kristumiut Guutip savaataanit qimagussimasunik asannittumik ikiuinissartik ilungersuutigaat