Sadisa Awana Bavengomoka Mun’ekambi
Sadisa Awana Bavengomoka Mun’ekambi
“Nunkembesa, kadi ememe diame diavila, nsolwele dio.”—LUKA 15:6.
1. Yesu aweyi kasongela vo mvungudi anzodi?
YESU KRISTU wa Mwan’amosi a Yave, oyikilwanga vo “mvungudi anene a mameme.” (Ayib. 13:20) Nkand’a Nzambi wazayisa e ngiz’andi, yo songa vo yandi kaka i Mvungudi ona wasolola “mameme mavila” ma Isaele. (Mat. 2:1-6; 15:24) Vana ntandu, nze una mvungudi kevaninanga moyo andi mu tanina mameme mandi, Yesu wayekola moyo andi se kimenga kia lukulu kimana awana bena nze mameme babak’e nluta mia kimenga kiandi.—Yoa. 10:11, 15; 1 Yoa. 2:1, 2.
2. Ekuma Akristu akaka beyoyelanga muna mwanda?
2 Diankenda kikilu vo, ayingi mun’awana bayangalelanga kimenga kia Yesu yo kiyekola kwa Nzambi, bavengomoka mu nkutakani y’Akristu. Nanga lukendalalu, mayela yovo mambu makaka mabafila mu dimbul’e vuvu yo yoya muna mwanda. Kansi, mun’ekambi dia Nzambi kaka balenda wan’etininu ye kiese kina kayika o Davidi muna Nkunga 23. Wayimbila vo: ‘O Yave i mvungudi ame, kikondwa má ko.’ (Nku. 23:1) Awana bena mun’ekambi dia Nzambi ke bekondwanga má ko muna mwanda. Kansi, ke diau ko dimonekanga kw’awana bena kuna mbazi ekambi. Nani olenda kubasadisa? Aweyi balenda sadisilwa? Adieyi tulenda vanga mu kubasadisa bavutuka mun’ekambi?
Nani Olenda Kubasadisa?
3. Yesu aweyi kasongela dina divavwanga mu vutulwisa ememe diavila muna madilu ma Nzambi?
3 Ngolo divavanga mu vutulwisa ememe diavila muna madilu ma Nzambi. (Nku. 100:3) Yesu wasong’e ziku kia diambu diadi muna kingana kata. Wavova vo: “Ovo se muntu, una ye nkam’a mameme, edimosi diend’atungiana, kalembi sisa luvwa ye vwa, kend’avavi dina diatungiana muna miongo. Ovo osolwele dio, kieleka inusamunwini vo, olutidi dio mwena kiese, ke mu luvwa ye vwa lulembi tungiana ko. Diau adimosi, ke luzolo lu’Es’eno wina kun’ezulu ko, kavil’omosi vana ven’away’andwelo.” (Mat. 18:12-14) Nani olenda sadisa awana bevengomokanga mun’ekambi?
4, 5. Akuluntu aweyi bafwete kadila y’ekambi dia Nzambi?
4 Avo akuluntu Akristu bazolele sadisa mameme mavila, bafwete sungamena vo ekambi dia Nzambi, i buka kia wantu ana bayiyekola kwa Yave, ‘ekambi dia Nzambi’ diantalu. (Nku. 79:13) Mameme mama mafwete songwanga o zola, ediadi divavanga vo avungudi azolwa batokanenanga konso ememe. Kubakingulanga dilenda kubasadisa. E lukasakeso bevewanga kw’avungudi lulenda kubakumika muna mwanda yo wokesa luzolo lwau lwa vutuka mun’ekambi.—1 Kor. 8:1.
5 Avungudi ekambi dia Nzambi bena ye mbebe ya vava mameme mavila yo sia e ngolo za kubasadisa. Paulu wa ntumwa wasungamesa akuluntu Akristu muna Efeso mbebe bakala yau ya vungula mameme. Wavova vo: ‘Nutoma kulunga-lunga kweno, y’ekambi diawonso, dina nwasilw’o ukengi kwa mwand’avelela, nwadikila dibundu dia Nzambi, dina kasumbila muna menga ma Mwan’andi.’ (Mav. 20:28) Diau adimosi, Petelo wa ntumwa wawondelela akuluntu akuswa vo: ‘Nuvungul’ekambi dia Nzambi dina vovo nwina, nukenga dio, ke mu komena ko, kuna zolela kaka, mun’owu wa Nzambi; ke mu ndandu zalembi songa ko, muna mvevo a ntima kaka. Ke mu yala awana bena s’evwa dia Nzambi ko, nukala kak’e mbandu z’ekambi.’—1 Pet. 5:1-3.
6. Ekuma mameme ma Nzambi mavwididi mfunu w’avungudi o unu?
6 Avungudi Akristu bafwete tanginina Yesu wa “mvungudi ambote.” (Yoa. 10:11) Watokananga mu kuma kia mameme ma Nzambi yo songa mfunu wa kubalunga-lunga vava kavovesa Simone Petelo vo ‘kavungula mameme Mandi.’ (Tanga Yoane 21:15-17.) O unu, mameme vungulwa mavwidi o mfunu, kadi Nkadi Ampemba ovavanga fwasa e kwikizi ki’awana bayiyekola kwa Nzambi. Satana osadilanga lutovoko lwa nitu ye nz’andi mu fila mameme ma Yave muna nzila zambi. (1 Yoa. 2:15-17; 5:19) Musungula awana bayoya muna mwanda balenda vukumunwa mu nzaki. Muna kuma kiaki, lusadisu bavwidi o mfunu, kimana balemvokela luludiku lwa ‘kangalela muna mwanda.’ (Ngal. 5:16-21, 25) Muna sadisa mameme mama, divavanga vo twabund’e vuvu muna Nzambi, muna mfil’a mwand’andi yo kala ye umbakuzi wa sadila Diambu diandi.—Nga. 3:5, 6; Luka 11:13; Ayib. 4:12.
7. Ekuma dinina diamfunu kw’akuluntu mu vungula mameme mena kunansi a wisa kiau?
7 O mvungudi muna Isaele yankulu, nkau wandá kasadilanga mu fila ekambi diandi. Vava mameme makotanga yovo vaika muna mpaka, mafwete ‘viokela kunansi a nkau’ kimana matangwa kwa mvungudi. (Fuka 27:32; Mika 2:12; 7:14) Diau adimosi, o mvungudi una vo Nkristu kafwete toma zaya ekambi dia Nzambi dina kunansi a wisa kiandi yo zaya owu wina konso ememe. (Tezanesa ye Ngana 27:23.) Muna kuma kiaki, e salu kia vungula mameme dimosi muna mambu mamfunu mefimpwanga kwa buka ki’akuluntu. Ediadi divavanga vo bazaya una balenda sadisila mameme mavengomoka mun’ekambi. Yave yandi kibeni wavova vo otomba mameme mandi yo kubavana lusadisu bavwidi o mfunu. (Yez. 34:11) I kuma vo, Nzambi otoma yangalalanga vava akuluntu besianga ngolo za sadisa mameme mavila mu vutuka mun’ekambi.
8. Akuluntu aweyi balenda sadisila mameme?
8 Avo mpangi eto oyelele, yo kingulwa kw’avungudi ekambi dia Nzambi dilenda kunkumika yo kumwesa kiese. Diau adimosi divangamanga vava ememe dibakamene kimbevo kia mwanda disongwanga zola. Akuluntu balenda tanga sono ya Nkand’a Nzambi, fimpa elongi dina muna nkanda mieto, ye mokena mambu mamfunu mavovelo muna lukutakanu yovo samba ye ndiona wayoya mu mwanda. Balenda kunzayisa vo ampangi muna nkutakani betoma yangalala vava bekumona diaka muna lukutakanu. (2 Kor. 1:3-7; Yak. 5:13-15) Kunkingula, kumbokela mu telefone yovo kunsonekena nkanda dilenda kunsadisa. O sadisa ememe diavengomoka mun’ekambi dilenda mwesa mpe kiese kwa nkuluntu a Nkristu ona unsadisi.
Yeto Awonso Tulenda Sadisa
9, 10. Ekuma tulenda vovela vo ke akuluntu kaka ko bafwete sadisa mameme mavila?
9 Wau vo mu ntangw’ampasi tuzingilanga, ezak’e ntangwa ke tuzayanga ko vava mpangi kevengomokanga mu nkutakani. (Ayib. 2:1) Kansi, mameme ma Yave mantalu vana meso mandi. Konso ememe mfunu dina, nze una wina konso yikwa kia nitu a muntu. Muna kuma kiaki, yeto awonso tufwete songanga zola muna mpangi zeto yo sadisa muntu yo nkw’andi. (1 Kor. 12:25) Nga i wau ovanganga?
10 Kana una vo akuluntu bevitang’o ntu mu tomba yo sadisa mameme mavila, ke yau kaka ko bena ye mbebe ya sadisa ampangi ana bavengomoka. Akaka mpe balenda vana akuluntu e moko. Tufwete kasakesa yo sadisa mpangi zeto zamakala ye zamakento ana bazolele vutuka mun’ekambi. Aweyi tulenda kubasadisila?
11, 12. Nki’elau olenda vewa mu sadisa muntu ovwidi lusadisu lwa mwanda o mfunu?
11 Ezak’e ntangwa, akuluntu balenda lomba kw’ateleki azikuka a Kintinu mu longoka Nkand’a Nzambi ye mpangi zayoya muna mwanda, bena ye luzolo lwa sadiswa. Ekani di’elongi diadi i kubasadisa bavutukila e ‘nzol’au antete.’ (Lus. 2:1, 4) E mpangi zazi zilenda vangameswa yo kumikwa muna mwanda muna fimpanga yau mambu malongwa muna tukutakanu ekolo bavengomoka muna nkutakani.
12 Avo akuluntu balombele vo walongoka ye mpangi ovwidi lusadisu lwa mwanda o mfunu, samba kwa Yave kimana kasambula e ngolo zaku. Elo, “yekeka mavangu maku kwa Yave, o makani maku masikila.” (Nga. 16:3) Badika e sono ya Nkand’a Nzambi ye mambu ma lukasakeso lenda sadila vava longoka y’awana bavwidi lusadisu lwa mwanda o mfunu. Tanginina e mbandu a Paulu wa ntumwa. (Tanga Roma 1:11, 12.) Paulu wakala ye luzolo lwa kingula Akristu kuna Roma mu kubakaulwila lukau lwa kimwanda kimana basikila. Yandi mpe fiaulwiswa kavavanga. Nga ke lwau ko i luzolo tufwete kala lwau vava tusadisanga mameme mavengomoka mun’ekambi dia Nzambi?
13. Nkia mambu olenda vova ekolo olongoka yo nteleki wayoya muna mwanda?
13 Vava nulongoka, lenda kunyuvula: “Aweyi wazayila e ludi?” Unsadisa kasungamena e kiese kamwenenge ekolo kasadilanga Yave. Kasakesa nteleki wayoya muna mwanda kavova e kiese kamwenenge muna tukutakanu ye mu salu kia umbangi ye muna tukutakanu twampwena. Yika e ntangw’a kiese nwakala vamosi muna salu kia Yave. Yika kiese omonanga muna finama Yave. (Yak. 4:8) Unsonga kiese kiaku muna mpila ina Nzambi kesadisilanga nkangu andi muna kutufiaulwisa yo kutuvan’e vuvu muna ntangw’ampasi.—Roma 15:4; 2 Kor. 1:3, 4.
14, 15. Nkia nsambu tulenda sungamesa awana bayoya muna mwanda?
14 Dilenda kala diambote mu sungamesa e nsambu kakala zau e nteleki wayoya vava kakala muna nkutakani. Kasikil’owu, kiese kamona mu nungunuka muna ludi kia Diambu dia Nzambi ye makani mandi. (Nga. 4:18) Vava ‘kakangalelanga muna mwanda’ ke diakala diampasi ko mu zizidila ntota za kuyisia mu mavangu m’esumu. (Ngal. 5:22-26) Ediadi diansadisa mu kala ye ntona zambote yo finama Yave muna sambu yo kala ye ‘luvuvamu lwa Nzambi luna luviokele nyindu mieto yo yingila ntima mieto ye makani meto.’ (Fili. 4:6, 7) Sungamena mambu mama, songa zola kwa mpangi zaku zamakala ye zamakento yo kubakasakesa bavutuka mun’ekambi.—Tanga Filipi 2:4.
15 Yindula vo u nkuluntu una muna salu kia kingula ampangi. Olenda kasakesa akazi ana bayoya mu mwanda mu sungamena e ntangwa ina bazaya e ludi kia Diambu dia Nzambi. Nkia mpila kiese bamona muna longoka e ludi ye mpila kiabavevolwela! (Yoa. 8:32) E ntima miau miayangalala mu mana balongoka mu kuma kia Yave, mu kuma kia zola ye makani mandi. (Tezanesa ye Luka 24:32.) Ubasungamesa vo Akristu ana bayiyekola, kikundi kiambote bekalanga kiau yo Yave yo vw’elau dia samba kwa yandi. Kasakesa ana bayambula samuna nsangu zambote bavutukila samuna ‘nsangu zambote za nkembo a Yave wa Nzambi a kiese.’—1 Tim. 1:11.
Kwamanana Kubasonga Zola
16. Yika nona kisonganga e nluta mia sadisa awana bayoya muna mwanda.
16 O sadila mambu tuyikidi nga dilenda sadisa? Elo. Kasikil’owu, nleke mosi wayantika samun’e nsangu zambote za Kintinu vava kakala ye kimbuta kia mvu 12, wayoya vava kalungisa mvu 15. Ke kolo ko, wavutukila diaka samun’e nsangu zambote. Wau, mvu 30 se kena muna salu kia ntangwa ke ntangwa. Lusadisu luna kavewa kwa nkuluntu a Nkristu, lwansadisa mu vutukila etima diandi muna salu ya mwanda. Watoma yangalela kikilu lusadisu kavewa kwa nkuluntu ndiona.
17, 18. Nkia fu ofwete songa muna sadisa muntu wavengomoka mun’ekambi dia Nzambi?
17 Zola kufilanga Akristu mu sadisa awana bavengomoka mu vutuka mu nkutakani. Yesu wavova mu kuma ki’alongoki andi vo: “Nkanikinu ampa ikunusia, nuzolaziana; e nzola inuzolele, i nuzolaziananga. Muna wau i bezayil’o wantu awonso vo nu alongoki ame, ovo nzolani nuna yau.” (Yoa. 13:34, 35) Elo, zola i sinsu kiswaswanesanga Akristu akieleka. Nga ke zola kwaku ko tufwete songa kw’Akristu avubwa ana bayoya muna mwanda? I wau kikilu tufwete vanga. Kansi, o sadisa muntu muna mwanda, divavanga vo twasonga fu yayingi ya Kikristu.
18 Nkia fu ofwete songa muna sadisa muntu wavengomoka mun’ekambi dia Nzambi? Vana ntandu a zola, ofwete kala ye nkenda, walakazi, lulembamu ye luzindalalu. Ezak’e ntangwa dilenda vava vo wayambulwila ndiona osadisanga. Paulu wasoneka vo: ‘Nuvwata ntim’a nkenda, walakazi, lusakalalu lua ntima, lembama, nlandu a lutantu; nuvezananga mambu yo yambuziana, ovo muntu obakidi nkw’andi diambu; wauna kanuyambulwila o Mfumu, i una mpe nuyambulwila: vana ntandu a mambu mama mawonso, nuvwata zola, kwina vo i kangwa kia zikuka.’—Kol. 3:12-14.
19. Ekuma zinina zamfunu e ngolo za sadisa muntu kavutuka muna nkutakani y’Akristu?
19 Elongi dilanda disonga e kuma akaka bevengomokenanga mun’ekambi dia Nzambi. Disonga mpe una betambulwilwa awana bevutuka muna nkutakani. Vava olongoka elongi dilanda yo yindula oma m’elongi diadi, kala ye ziku vo e ngolo ovanga muna sadisa mpangi kavutuka muna nkutakani y’Akristu, ke zankatu ko. Omu nza yayi, wantu ayingi befwasanga zingu kiau kiawonso mu vava kala ye mavwa mayingi, kansi, o moyo a muntu usundidi e nzimbu zawonso za nza yayi. Yesu wasonga mfunu a moyo a muntu muna kingana ki’ememe diavila. (Mat. 18:12-14) Yambula wasungamenanga diambu diadi ekolo siang’e ngolo za sadisa mameme ma Yave mana mavengomoka, mavutuka mun’ekambi.
Nkia Mvutu Ovana?
• Nkia mbebe bena yau avungudi Akristu mu kuma ki’awana bavengomoka mun’ekambi?
• Aweyi olenda sadisila awana bayambula e nkutakani?
• Nkia fu ofwete songa muna sadisa awana bavengomoka mun’ekambi?
[Yuvu ya Longoka]
[Foto ina muna lukaya lwa 10]
Avungudi Akristu besianga ngolo za sadisa awana bavengomoka mun’ekambi dia Nzambi