Mu Tuse Ba Ba Latehile Kuli Ba Kutele mwa Mutapi
Mu Tuse Ba Ba Latehile Kuli Ba Kutele mwa Mutapi
“Mu tabe ni na, kakuli ni fumani ngu ya ka ye ne latehile.”—LUKA 15:6.
1. Jesu u bonisize cwañi kuli ki mulisana ya lilato?
JESU KRESTE, Mwan’a Jehova wa libanda, u bizwa “Mulisana yo mutuna wa lingu.” (Maheb. 13:20) Mañolo na polofitile za ku taha kwa hae, mi na bonisize kuli ne li yena Mulisana ya ipitezi ya na batile “lingu ze latehile” za Isilaele. (Mat. 2:1-6; 15:24) Hape ka ku swana ni mulisana ya kona ku fa bupilo bwa hae kuli a sileleze lingu za hae, Jesu na fanile bupilo bwa hae sina sitabelo kuli a liulule batu ba ba swana sina lingu ba ne ba ka fumana tuso kwa sitabelo seo.—Joa. 10:11, 15; 1 Joa. 2:1, 2.
2. Ki lika mañi ze tisize kuli Bakreste ba bañwi ba tuhele ku yanga kwa mikopano ni mwa bukombwa?
2 Ka bumai, ba bañwi ba ne ba bonahala ku itebuha sitabelo sa Jesu ili ba ba neezi bupilo bwa bona ku Mulimu ha ba sa swalisana ni puteho ya Sikreste. Mwendi ze tisize kuli ba fokole ni ku tuhela ku yanga kwa mikopano ni mwa bukombwa ki ku zwafa, mapongo, kamba lika ze ñwi cwalo. Kono ba kona fela ku ikola kozo ni tabo ya na bulezi Davida kwa Samu 23, ka ku ba mwa mutapi wa Mulimu. Ka mutala, Davida na opezi kuli: “[Muñ’a] Bupilo ki mulisana wa ka; ha ni na ku tokwa se siñwi.” (Samu 23:1) Ba ba mwa mutapi wa Mulimu ba na ni lika kaufela ze ba tokwa kuli ba tiise bulikani bwa bona ni Mulimu, kono lingu ze latehile zona ha li na lika zeo. Ki bomañi ba ba kona ku ba tusa? Ba kona ku tusiwa cwañi? Ki lika mañi ze kona ku ezwa kuli ba tusiwe ku kutela mwa mutapi?
Ki Bomañi Ba Ba Kona ku Tusa?
3. Jesu na bonisize cwañi ze tokwahala kuli lingu ze latehile za mutapi o liswa ki Mulimu li puluswe?
3 Ku tokwahala buikatazo bo butuna kuli lingu ze latehile za mutapi o liswa ki Mulimu li puluswe. (Samu 100:3) Jesu na bonisize buniti bwa taba yeo mwa nguli ha na ize: “Mutu h’a na ni lingu ze mwanda, mi ku latehe i liñwi ku zona, kana a si ke a tuhela fa malundu ze mwanda fo ku latehile i liñwi, kuli a y’o bata ye latehile? Mi h’a ka i fumana, kaniti na mi bulelela, ni li: U ka i tabela hahulu ku fita lingu ze mwanda fo ku latehile i liñwi. Kamukwaocwalo, hasi tato ya Ndat’a mina ya kwa lihalimu, kuli ku latehe a li muñwi ku ba banyinyani bao.” (Mat. 18:12-14) Ki bomañi ba ba kona ku tusa batu ba ba swana sina lingu ze keluhile mwa mutapi?
4, 5. Maeluda ba tokwa ku nga cwañi mutapi wa Mulimu?
4 Kuli maeluda ba Sikreste ba tuse lingu ze latehile, ba lukela ku hupula kuli mutapi wa Mulimu ki puteho ya batu ba ba ineezi ku Jehova—wona ‘mutapi wa mwa mafulisezo a Mulimu.’ (Samu 79:13) Lingu za butokwa zeo li tokwa pabalelo, mi fo kikuli balisana ba ba lilato ba lukela ku iyakatwa ba ba keluhile mwa mutapi. Mulisana u kona ku tusa hahulu batu ba ba latehile bao ka ku ba potelanga kuli a ba susueze. Ku ba bonisa lilato ka nzila yeo ku kona ku tiisa tumelo ya bona ni ku ekeza kwa takazo ya bona ya ku kutela mwa mutapi.—1 Makor. 8:1.
5 Balisana ba mutapi wa Mulimu ba na ni buikalabelo bwa ku bata lingu ze latehile ni ku ikataza ku li tusa. Muapositola Paulusi na hupulisize maeluda ba Sikreste ba kwa Efese wa ikale ka za buikalabelo bwa bona bwa ku lisa lingu ha na ize: “Mu itibelele, mi mu lise mutapi kaufela o mu beilwe balibeleli ba ona ki Moya o Kenile, ku uta Keleke ya Mulimu ye a itekezi ka mali a [Mwan’a, NW] hae luli.” (Lik. 20:28) Muapositola Pitrosi ni yena na susuelize banna-bahulu ba ba tozizwe kuli: “Mu lise mutapi wa Mulimu o ku mina, isi ka ku hapelezwa, kono ibe ka ku lata ku ezeza Mulimu; isi kabakala bufumu bo bu maswe, kono ibe ka pilu ye lata; isi ka ku busa mitapi ya mina ka tata, kono ka ku ezeza mutapi mutala.”—1 Pit. 5:1-3.
6. Ki kabakalañi lingu za Mulimu ha li tokwa hahulu pabalelo ya balisana kacenu?
6 Balisana ba Sikreste ba tokwa ku likanyisa “mulisana yo munde,” yena Jesu. (Joa. 10:11) Na iyakatitwe lingu za Mulimu mi na bonisize butokwa bwa ku li babalela ha na bulelezi Simoni Pitrosi kuli a ‘lise lingu za hae.’ (Mu bale Joani 21:15-17.) Kacenu lingu li tokwa hahulu pabalelo ye cwalo kakuli Diabulosi u ikataza hahulu ku lwanisa ba ba ineezi ku Mulimu kuli ba si ke ba sepahala ku Yena. Satani u itusisa mifokolo ya nama ni lifasi ilikuli a susueze lingu za Jehova ku eza lika ze maswe. (1 Joa. 2:15-17; 5:19) Sihulu ba ba fokozi ki bona ba ba kona ku komiwa ka bunolo mi kacwalo ba tokwa tuso kuli ba mamele kelezo ya kuli ‘ba zamaye ka moya.’ (Magal. 5:16-21, 25) Kuli lu kone ku tusa lingu ze cwalo, lu tokwa ku kupa Mulimu kuli a lu zamaise ni ku lu fa moya wa hae, mi lu tokwa ku itusisa Linzwi la hae ka bukwala.—Liprov. 3:5, 6; Luka 11:13; Maheb. 4:12.
7. Ki kabakalañi ha ku li kwa butokwa kuli maeluda ba lise batu ba ba swana sina lingu be ba filwe ku babalela?
7 Mwa miteñi ya Isilaele, mulisana na zamaisanga mutapi wa hae ka ku itusisa lusata kamba mulamu. Lingu ha ne li kena kamba ku zwa mwa sakana, ne li “fita mwatas’a mulamu wa mulisana” kuli a li bale. (Liv. 27:32; Mika 2:12; 7:14) Ka ku swana, mulisana wa Sikreste u tokwa ku ziba hande mutapi wa Mulimu wa filwe ku babalela. (Mu bapanye Liproverbia 27:23.) Kacwalo, musebezi wa bulisana ki o muñwi wa litaba za butokwa ze si ambolanga sitopa sa maeluda. Bulisana bu kopanyeleza ku eza litukiso za ku tusa lingu ze latehile. Jehova ka sibili na ize u ka batisisa lingu za hae ni ku li babalela ka mo li tokwela. (Ezek. 34:11) Kacwalo Mulimu wa tabelanga muta maeluda ni bona ba ikataza ku tusa lingu ze latehile kuli li kutele mwa mutapi.
8. Maeluda ba kona ku tusa cwañi ngu ye fokozi?
8 Mulisana wa mutapi wa Mulimu ha potela mulumeli yo muñwi ya kula, mulumeli yo u kona ku ba ni tabo ni ku tiiswa pilu. Ngu ye kula kwa moya ni yona i kona ku ikutwa cwalo haiba i isezwa pilu. Maeluda ba kona ku bala mañolo, ku lundulula taba ye ñwi, ku buhisana lisupo ze tuna ze nyakisisizwe kwa mikopano, ku lapela hamoho ni mutu ya fokozi, ni cwalo-cwalo. Ba kona ku mu taluseza kuli mizwale ni likaizeli mwa puteho ba ka tabela hahulu ku mu bona a kalisa ku fumanehanga kwa mikopano ya puteho. (2 Makor. 1:3-7; Jak. 5:13-15) Ku mu potela, ku mu lizeza luwaile, kamba ku mu ñolela liñolo kwa kona ku mu tusa luli! Hape ku tusa ngu ye tondahalile mwa mutapi ku kona ku ekeza kwa tabo ya mulisana wa Sikreste ya tusa mutu ya fokozi.
Kaufela Luna Lwa Kona ku Tusa
9, 10. Ki kabakalañi ha mu kona ku bulela kuli maeluda hasi bona fela ba ba swanela ku iseza pilu lingu ze latehile?
9 Linako ze lu pila ku zona ki za mipateho mi ki ze t’ata, kacwalo ku bunolo hahulu ku sa lemuha kuli mulumeli yo muñwi u sweli wa yenduka mwa puteho. (Maheb. 2:1) Nihakulicwalo, lingu za Jehova ki za butokwa ku yena. Ngu ni ngu ki ya butokwa sina silama ni silama sa mubili ha si li sa butokwa. Kacwalo, kaufela luna lu tokwa ku iseza pilu mizwale ba luna ni ku babalelana. (1 Makor. 12:25) Kana ni mina mu na ni moya o cwalo?
10 Nihaike kuli maeluda ki bona ba ba etelela mwa ku batisisa ni ku tusa lingu ze latehile, haki bona fela ba ba swanela ku iseza pilu lingu zeo. Ba bañwi ba kona ku sebelisana ni balisana bao. Lwa kona ku eza cwalo mi lu lukela ku susueza ni ku tusa mizwale ni likaizeli ba luna ba ba tokwa tuso kuli ba kutele mwa mutapi. Tuso yeo i kona ku fiwa cwañi?
11, 12. Mu kona ku fiwa kolo mañi ye ipitezi ya ku tusa mulumeli yo muñwi ya fokozi?
11 Fokuñwi maeluda ba kona ku lukisa kuli bahasanyi ba Mubuso ba ba yeziseli ba itute Bibele ni ba ba fokozi ba ba bata ku tusiwa. Mulelo wa ku eza cwalo ki ku tusa ba ba fokozi bao kuli ba be ni “lilato la [bona] la pili.” (Sin. 2:1, 4) Balumeli bao ba kona ku yahiswa ni ku tiiswa kwa moya ka ku nyakisisa litaba ze ba yawile ka nako ye ne ba sa fumanehi kwa puteho.
12 Haiba maeluda ba mi kupa kuli mu itute ni mulumeli yo muñwi ya tokwa ku tusiwa kwa moya, mu lapele kuli Jehova a mi zamaise ni ku fuyola buikatazo bwa mina. Kacwalo, ‘mu bihe misebezi ya mina ku Muñ’a Bupilo; mi milelo ya mina i ka tiya.’ (Liprov. 16:3) Mu kengeyele litimana za Bibele ni lisupo ze tiisa tumelo ze mu kona ku itusisa ha mu ituta ni ba ba tokwa tuso ya kwa moya. Mu nahanisise mutala o munde wa muapositola Paulusi. (Mu bale Maroma 1:11, 12.) Paulusi na shukezwi ku bona Bakreste ba kwa Roma kuli a ba fe mpo ye ñwi ku za moya, ilikuli ba fumane ku tiiswa. Hape na shukezwi ku yo kutazana kamba ku susuezana ni bona. Kana ni luna ha lu swaneli ku ba ni moya o cwalo muta lu ikataza ku tusa lingu ze keluhile mwa mutapi wa Mulimu?
13. Mu kona ku nyakisisa lika mañi ni mutu ya fokozi?
13 Ha mu nze mu ituta ni ya fokozi, mwa kona ku mu buza kuli, “Ne mu itutile cwañi niti?” Mu mu tuse ku hupula linako ze tabisa za na banga ni zona mwa sebelezo ya Jehova, ili ku mu susueza ku bulela ze nde za na ikolanga kwa mikopano ya puteho, mwa musebezi wa ku kutaza, ni kwa mikopano ya likiliti. Mu taluse linako ze tabisa ze mu kile mwa ba ni zona hamoho ni yena mwa sebelezo ya Jehova. Mu taluse tabo ye mu fumani ka ku sutelela ku Jehova. (Jak. 4:8) Mu itebuhe mo Mulimu a lu babalelela sina batu ba hae—sihulu ka ku lu tiisa pilu ni ku lu fa sepo mwa liñalelwa za luna.—Maro. 15:4; 2 Makor. 1:3, 4.
14, 15. Lu kona ku tusa ba ba fokozi ka ku ba hupulisa matohonolo mañi a ne ba na ni ona?
14 Fokuñwi kwa kona ku tusa ku hupulisa ya fokozi ka za matohonolo a n’a na ni ona kabakala ku sebelisana hahulu ni puteho. Ka mutala, na bile ni tohonolo ya ku hula mwa zibo ya Linzwi la Mulimu ni milelo ya hae. (Liprov. 4:18) Ha na ‘zamaya ka moya,’ ne ku mu belanga hahulu bunolo ku hanyeza miliko ya sibi. (Magal. 5:22-26) Kabakaleo, a ba ni lizwalo le li kenile, le ne li mu konisize ku atumelanga Jehova ka tapelo ni ku ikola ‘kozo ya Mulimu ye fita kutwisiso kaufela, ye buluka lipilu za luna ni mihupulo ya luna.’ (Mafil. 4:6, 7) Mu hupule lisupo zeo, mu bonise kuli mwa mu iseza pilu luli, mi ka lilato mu ikataze hahulu ku susueza muzwale kamba kaizel’a mina wa Sikreste kuli a kutele mwa mutapi.—Mu bale Mafilipi 2:4.
15 Ku cwañi haiba mu maeluda mi mu bata ku potela batu ba ba nyalani ili ba ba fokozi? Mu kona ku ba susueza cwañi? Mu kona ku ba susueza ku nahana ka za nako ye ne ba itutile niti ye mwa Linzwi la Mulimu lwa pili. Kaniti ne ba tabezi hahulu mi ne ba ikozi ku ziba niti ye lukulula! (Joa. 8:32) Ne ba itebuhile hahulu litaba ze ne ba ituta ka za Jehova, lilato la hae, ni milelo ya hae ye makalisa! (Mu bapanye Luka 24:32.) Mu ba hupulise kuli Bakreste ba ba inezi ku Mulimu ba na ni bulikani bo bu tiile ni Jehova ni tohonolo ya ku lapela ka lizwalo le li kenile. Mu susueze ba ba fokozi kuli ba amuhele hape “Evangeli ya kanya ya Mulimu Ya lumbekwa,” Jehova.—1 Tim. 1:11.
Mu Zwelepili ku Ba Bonisa Lilato
16. Mu fe mutala o bonisa ze nde ze zwa mwa ku ikataza ku tusa ba ba fokozi kwa moya.
16 Kana liakalezo ze lu nyakisisize ze, za tusa? Eni za tusa. Ka mutala, mukulwani yo muñwi ya na bile muhasanyi wa Mubuso inge a na ni lilimo ze 12 na fokozi ha na kwanisize lilimo ze 15. Kono hasamulaho, a tiya kwa moya mi u tandile lilimo ze fitelela 30 mwa sebelezo ya nako kaufela. Se ne si mu tusize ku tiya kwa moya ne li tuso ya na filwe ki eluda yo muñwi wa Sikreste. Na itebuhile hahulu tuso ya kwa moya ya na filwe yeo!
17, 18. Ki tulemeno tufi to tu mu swanela ku ba ni tona kuli mu tuse mutu yo muñwi ya keluhile mwa mutapi wa Mulimu?
17 Lilato ki lona le li tisanga kuli Bakreste ba tuse ba ba fokozi kuli ba kutele mwa puteho. Jesu na bulelezi balateleli ba hae kuli: “Ni mi fa mulao o munca, kikuli mu latane; sina mo ni mi latezi, ni mina mu latane cwalo. Se ba ka ziba batu kaufela kuli mu balutiwa ba ka ka sona, ki ha mu latana.” (Joa. 13:34, 35) Kaniti lilato ki lona le li zibahaza Bakreste ba niti. Kana ha lu swaneli ku bonisa lilato leo kwa Bakreste ba ba kolobelizwe ili ba ba fokozi kwa moya? Lu swanela ku eza cwalo luli! Kono kuli mu tuse ba ba fokozi, mu tokwa ku ba ni tulemeno twa Sikreste to tu shutana-shutana.
18 Ki tulemeno tufi to mu tokwa ku ba ni tona kuli mu tuse mutu yo muñwi ya keluhile mwa mutapi wa Mulimu? Kwand’a lilato, mu tokwa ku ba ni mufelañeke, musa, bunolo, ni pilu-telele. Ku likana ni miinelo, lu kana lwa tokwa ku swalela. Paulusi na ñozi kuli: “Mu apale maikuto a na ni makeke, ni musa, ni buikokobezo, ni bunolo, ni pilu-telele. Mu ezane hande, mi mutu h’a na ni s’a tongoka yo muñwi, mu swalelane; sina Kreste h’a mi swalezi, mu eze cwalo ni mina. Mi fahalimw’a zeo kaufela, mu apale lilato, kakuli ki tamo ye lu fa bupetehi.”—Makolo. 3:12-14.
19. Ki kabakalañi ha ku li kwa butokwa ku ikataza ku tusa batu ba ba swana sina lingu kuli ba kutele mwa mutapi wa Bakreste?
19 Taba ye tatama mwa magazini ye i ka mi bonisa mabaka ba bañwi ha ba keluhanga mwa mutapi wa Mulimu. Hape i ka mi bonisa mo ba kona ku amuhelelwa ba ba kutela mwa mutapi. Ha mu nze mu ituta taba yeo ni ku nahanisisa ze mu itutile mwa taba ye, mu kolwe kuli buikatazo bwa mina kaufela bwa ku tusa batu ba ba swana sina lingu ku kutela mwa mutapi wa Bakreste hasi bwa mbango. Mwa lifasi le, batu ba bañata ba likanga ku ikubukanyeza sifumu mwa bupilo bwa bona kaufela, kono bupilo bwa mutu a li muñwi fela ki bwa butokwa hahulu ku fita masheleñi kaufela a mwa lifasi. Jesu na talusize hande taba yeo mwa nguli ya hae ya ngu ye latehile. (Mat. 18:12-14) Mu hupulange taba yeo ha mu nze mu ikataza ku tusa batu ba Jehova ba ba butokwa ili ba ba swana sina lingu ze latehile kuli ba kutele mwa mutapi.
Mu Kona ku Alaba Cwañi?
• Balisana ba Sikreste ba na ni buikalabelo mañi ka za batu ba ba swana sina lingu ba ba keluhile mwa mutapi?
• Mu kona ku tusa cwañi batu ba ba tuhezi ku swalisana ni puteho?
• Ki tulemeno tufi to mu swanela ku ba ni tona kuli mu tuse ba ba keluhile mwa mutapi?
[Lipuzo za Tuto]
[Siswaniso se si fa likepe 10]
Balisana ba Sikreste ba ba lilato ba ikataza ku tusa ba ba keluhile mwa mutapi wa Mulimu