Kwashai Boba Bapaluka ku Luombe
Kwashai Boba Bapaluka ku Luombe
“Sepelelai nami bidi, mwanda namone mukōko wami wajimine.”—LUKA 15:6.
1. I muswelo’ka wilombwele Yesu bu mukumbi wa buswe?
YESU KIDISHITU, Mwana wa bunka wa Yehova witwanga bu “Mukumbi mukatakata wa mikōko.” (Bah. 13:20) Bisonekwa byālaile kwiya kwandi, ne kulombola amba aye i Mukumbi umo kete wādi na milangwe ya kukimba “mikōko mijimine” ya Bwine Isalela. (Mat. 2:1-6; 15:24) Ne kadi, monka mwikadilanga mukumbi, ukana’nka ne kwela būmi bwandi mwanda wa kulama mikōko yandi, ne Yesu nandi wāfwile bu kitapwa kya kikūlwa pangala pa mikōko yandi amba imwene mu kitapwa kyandi.—Yoa. 10:11, 15; 1 Yoa. 2:1, 2.
2. I bika bikokeja kulengeja Bene Kidishitu bamo baleke kwingila?
2 Ino i kya bulanda, bamo badi na mutyima wa kufwija’ko pangala pa kitapwa kya Yesu ne kwipāna kudi Leza, pano kebakidipo monka pamo na kipwilo kya Bwine Kidishitu. Kutyumukwa mutyima, misongosongo, nansha myanda mikwabo padi byo bibazozeje kebakingilapo. Inoko, kwikala pamo na luombe lwa Leza ko ako kete kwadi kukokeja kwibakwasha kwikala na ndoe ne nsangaji īsambile’po Davida mu Mitōto 23. Kimfwa, wāimbile amba: “Yehova i Mukumbi wami; nkikabulwangapo, mhm.” (Mit. 23:1) Boba badi mu luombe lwa Leza kebadipo na kyobabudilwe ku mushipiditu, ino, mikōko ipaluka ku luombe keidipo na ino nsangaji. Lelo i ani ukebakwasha? Lelo babwanya kukwashibwa muswelo’ka? Na bubine, i bika bine bifwaninwe kulongwa mwa kwibakwashisha bajokele ku luombe?
Le Ukebakwasha I Ani?
3. Lelo Yesu wālombwele amba bifwaninwe kulonga bika pa kupandija mikōko ijimina mu madyo a Leza?
3 Bilomba kulonga bukomo bukatampe pa kupandija mikōko ijimina mu madyo a Leza. (Mit. 100:3) Yesu wālombwele kino mu kyelekejo paānene amba: “Shi muntu udi ne katwa ka mikōko, pamujimina umo, abulwe kushia oa makumi kitema ne dya kitema, kaenda kukakimba mu ngulu owa wapatukamo. I binebine byo nemunena’mba, shi weumone kadi, nankyo ukakila kwiusepelela pakatampe, ne yoya mikwabo ya makumi kitema ne dya kitema yampikwa kujimina, ayo kunyuma. Enka namino ne mwa Shenu udi mūlu kekiswilwe’mba kamo ka totwa tutyetye kakoneke.” (Mat. 18:12-14) Lelo i ani ukakwasha bano bantu badi bwa mikōko bapaluka ku luombe?
4, 5. I ngikadilo’ka ifwaninwe kwikala na bakulumpe ku luombe?
4 Shi bakulumpe Bene Kidishitu basaka kukwasha mikōko ipaluka, bafwaninwe bidi kuvuluka’mba luombe lwa Leza i bantu badi mu kipwilo bepāne kudi Yehova—bine, i ‘mikōko milēme ya mu madyo a Leza.’ (Mit. 79:13) Ino mikōko miswedibwe ifwaninwe kulamwa na kanye, kino kishintulula amba bakumbi ba buswe bafwaninwe kuta umo ne umo mutyima. Kwibakumba bya bulunda mu bupempudi bwa bukumbi kukokeja kwibakwasha bya binebine. Shi mukumbi wibakankamika na buswe, kino kikokeja kwibōbaka ku mushipiditu ne kuningija mutyima wabo wa kusaka kujokela ku luombe.—1 Kod. 8:1.
5 Bakumbi ba luombe lwa Leza badi na kiselwa kya kukimba mikōko mijimine ne kwiikwasha. Mutumibwa Polo wāvulwije bakulumpe Bene Kidishitu ba mu Efisesa wa kala biselwa bya bu bakumbi byobadi nabyo amba: “Dyumukai bānwe bene, mudyumukile ne luombe lonso monka mwēmulongela Mushipiditu Sandu ke mudi bakulumpe bakilelo kudisha kipwilo kya Leza, kyēpotele ku mashi a [Mwana wa] aye mwine.” (Bil. 20:28) Mu muswelo umo onka, mutumibwa Petelo nandi wēsāshile bana-balume bakulumpe bashingwe māni amba: “Kumbai luombe lwa Leza ludi umbukata mwenu, ne kuyūka bukulumpe bwa kilelo, bwakubulwa kuningilwa, poso ku mityima yenu tō bānwe bene, monka mwikadile Leza; nansha pa mwanda wa bupeta bwa mu byabumvubumvu, poso ne mutyima mutele monka, tō, nansha kwibasomanya bumfumwabo boba bemupelwe buledi, mhm, nanshi mwikale bwa byelekejo bya luombe.”—1 Pet. 5:1-3.
6. I kika kinenenwa amba mikōko ya Leza ilomba kulamwa nakampata dyalelo?
6 Bakumbi Bene Kidishitu bafwaninwe kwiula Yesu, “mukumbi muyampe.” (Yoa. 10:11) Wādi utele mutyima bininge ku mikōko ya Leza ne wālombwele mvubu ya kwiilama pa kunena Petelo amba: “Kakumbe mikōko yami.” (Tanga Yoano 21:15-17.) Buno bo bulami busakibwa nakampata dyalelo, mwanda Dyabola uloñanga bukomo bwandi bonso bwa kutyumuna bululame bwa boba bendelela na kwingidila Leza. Satana utwelelanga pa bukōkekōke bwa ngitu kadi wingidijanga ino ntanda mwanda wa kulongeja mikōko ya Yehova bintu bibi. (1 Yoa. 2:15-17; 5:19) Boba kebakingilapo bo bene bafyutukilanga, o mwanda bafwaninwe nanshi kukwashibwa mwa kulondela madingi ebanena ‘kunangila mu mushipiditu.’ (Ngat. 5:16-21, 25) Pa kukwasha ino mikōko, bilomba kweyamina kudi Leza mu milombelo, kulomba bukwashi bwa mushipiditu, ne kwingidija na bwino Kinenwa kyandi.—Nk. 3:5, 6; Luka 11:13; Bah. 4:12.
7. Mwanda waka i kya mvubu bakulumpe bakumbe bantu badi bwa mikōko bobapelwe kulama?
7 Bakumbi ba mu Isalela wa kala bādi bengidija mukombo mulampe, mwanda wa kwendeja luombe. Shi mikōko keitwela mu kipombo nansha kutamba’mo, yādi ‘ikukuta munshi mwa mukombo’ ne kubalwa na mukumbi. (Levi 27:32; Mika 2:12; 7:14) Mukumbi Mwine Kidishitu nandi mo monka, ufwaninwe kuyuka ne kutala mwendela luombe lwa Leza lwalama. (Dingakanya na Nkindi 27:23.) O mwanda, myanda ya bukumbi isambilwanga’po bininge mu kitango kya bakulumpe. Mu ino myanda, mudi ne wa kukwata mpangiko ya kukimba mikōko yēja. Yehova mwine wānene amba ukakimba mikōko yandi ne kwiilama mobifwaninwe. (Ezek. 34:11) Bine Leza usangalanga palonga bakulumpe bukomo bwa muswelo umo mwanda wa kukwasha mikōko ipaluka ijokele mu kipombo.
8. Lelo bakulumpe babwanya namani kuta mutyima mukōko ne mukōko pa bula?
8 Shi mwanetu mu lwitabijo wabela, kupempulwa na bakumbi ba luombe lwa Leza kukamusangaja ne kumukankamika. Bidi muswelo umo onka kitatyi kyobata mukōko ubela ku mushipiditu mutyima. Bakulumpe bakokeja padi kutangila kakingilanga’wa bisonekwa, kumupitulukila mu kishinte kampanda, kwisambila nandi pa myanda mikatampe yadi ku kupwila, kulombela nandi pamo, ne bikwabokwabo. Bakokeja kumulombola’mba: Banabenu mu kipwilo bakasangala shi abakumone wiya ku kupwila. (2 Kod. 1:3-7; Yak. 5:13-15) Bine, bupempudi, kwita ku telefone nansha mukanda, byonso bino bikokeja kukwasha! Kukwasha pa bula mukōko ne mukōko ubudilwe mu luombe kukokeja ne kuvudija nsangaji ya bakumbi Bene Kidishitu badi na lusa.
Bukomo bwa Kwingidila Pamo
9, 10. I kika kinenenwa amba kuta mikōko yēja mutyima ke mwandapo utala’nka bakulumpe?
9 Tudi mu bitatyi bya malwa ne biyule mitabakano, o mwanda kyaba kimo tubulwanga kujingulula kwēja kwa mwanetu kampanda wapaluka ku kipwilo. (Bah. 2:1) Inoko, mikōko ya Yehova i milēme ku meso andi. Umo ne umo udi na mvubu, monka mwikadile kipindi ne kipindi kya ku ngitu ya muntu. Nanshi, umo ne umo umbukata mwetu ufwaninwe kuta banababo mutyima ne kwibakambakena. (1 Kod. 12:25) Le ye molongelanga?
10 Nansha shi bakulumpe banenwe kwendeja mikōko yēja, kwiikimba, ne kwiikwasha, ino kuta mutyima banabetu mu lwitabijo ke mwandapo utala enka batadi Bene Kidishitu kete, mhm. Ne bakwabo nabo babwanya kwingidila pamo na bano bakumbi. Tubwanya ne tufwaninwe kukankamika ne kukwasha ku mushipiditu batutu ne bakaka basakilwa bukwashi amba bajokele ku luombe. Lelo buno bukwashi bukokeja kupānwa muswelo’ka?
11, 12. I dyese’ka dyokokeja kwikala nadyo dya kukwasha boba basakilwa bukwashi bwa ku mushipiditu?
11 Byaba bimo, bakulumpe babwanya kukwata’ko mpangiko amba basapudi ba Bulopwe bapye befunde Bible na boba kebakingilangapo shi betabije kukwashibwa. Kitungo i kya kujokeja mobadi ‘buswe bubajinji’ bobadi nabo. (Kus. 2:1, 4) Bano banabetu babwanya kukankamikwa dipya pa kumona bintu byobadi babulwanga pobadi kebakīya ku kipwilo.
12 Shi bakulumpe abakunena kwifunda na mwanetu mu lwitabijo usakilwa bukwashi ku mushipiditu, lombela Yehova akuludike ne kukwesela mu bukomo bolonga. Bine, “tūla mingilo yobe kudi Yehova, nankyo mifwatakanyo yobe ikakomejibwa.” (Nk. 16:3) Langulukila pa bisonekwa ne pa myanda yokengidija mu mīsambo yenu ibwanya kumukankamika mu lwitabijo ne kumukwasha ku mushipiditu. Langulukila pa kimfwa kilumbuluke kishile Polo. (Tanga Loma 1:11, 12.) Polo wādi usaka kwimona na Bene Kidishitu ba mu Loma mwanda wa kwibapa kyabuntu kya ku mushipiditu kibwanya kwibakankamika. Kadi wādi usaka bekale kwikankamika abo bonso ne aye mwine kumo. Mwene uno o mushipiditu otufwaninwe kwikala nao kitatyi kyotukimba kukwasha mikōko ipaluka ku luombe lwa Leza?
13. Lelo i myanda’ka yokokeja kwisamba na muntu kakingilangapo?
13 Kitatyi kyomwisamba, ukokeja padi kumwipangula amba, “Le i kitatyi’ka kyowayukile bubinebine?” Vulukai nsangaji ya kala, ne kukankamika yewa kakingilapo esambile pa myanda yawadi usangelanga ku kupwila, mu busapudi, ne ku bitango. Mwisambilei pa bitatyi bya nsangaji byomwapityije pamo mu kwingidila Yehova. Mulombole nsangaji yotene mu kufwena Yehova. (Yak. 4:8) Lombola mutyima wa kufwija’ko pa muswelo witukwasha Leza batwe bantu bandi—nakampata na kwitusenga ne kwitupa lukulupilo potutanwa mu byamalwa.—Loma 15:4; 2 Kod. 1:3, 4.
14, 15. Lelo i madyese’ka adi na boba kebakingilangapo otufwaninwe kwibavuluja?
14 Mu muswelo umo onka, i biyampe kuvuluja yewa kakingalangapo madyese amoamo awadi umwenanga mu kwikala pamo na kipwilo. Kimfwa, madyese a kutama mu buyuki bwa Kinenwa kya Leza ne mpango yandi. (Nk. 4:18) Kitatyi kyaadi ‘ukinangila mu mushipiditu’ byadi bimupelela kukomena matompo a kulonga bubi. (Ngat. 5:22-26) Ne kadi, mutyima wa mundamunda utōka wadi umukwasha kufwena Yehova mu milombelo ne kusangela ‘ndoe ya Leza, ya kutabuka ñeni yonso, īlama mityima yetu, ne kufwatakanya kwetu kwine kumo.’ (Fid. 4:6, 7) Lama ino myanda mu ñeni, mute mutyima, ne kukwasha tutu nansha kaka obe nandi ajokele ku luombe.—Tanga Fidipai 2:4.
15 Langa’po bidi shi wi mukulumpe wenda mu bupempudi bwa bukumbi. Padi i ba mulume ne mukaji kebakingilangapo bokakankamika amba bavuluke kitatyi kibajinjibajinji kyobayukile bubinebine bwa Kinenwa kya Leza. Bine, bamwene amba bubinebine i kintu kya kutendela, kyendele’mo, kisangaja, ne kileta bwanapabo ku mushipiditu! (Yoa. 8:32) Bine, badi na mutyima wa kufwija’ko pa byonso byobefundile bitala padi Yehova, buswe bwandi, ne mpango yandi ya kutendelwa! (Dingakanya na Luka 24:32.) Wibavuluje madyese a kutendelwa adi na Bene Kidishitu bepāne a kupwana kobapwene na Yehova ne kwisamba nandi mu milombelo. Kankamika na kininga boba kebakingilangapo bashilule monka kusapula “myanda-miyampe ya ntumbo ya Leza wa dyese ne dyesepo.”—1 Tem. 1:11.
Endelela na Kwibaswa
16. Tela’ko kimfwa kimo kilombola’mba buninge bulongwa pa kukwasha muntu ku mushipiditu budi na mvubu binebine?
16 Le madingi otwendelela kupebwa adi bine na bukwashi? Eyo adi nabo. Kimfwa, nkasampe umo waikele ke musapudi wa Bulopwe na myaka 12, walekele’byo kwingila na myaka 15. Inoko mwenda mafuku washilula monka kwingila, ne pano ke mwingile myaka 30 mu mwingilo wa kitatyi kyonso. Kyamukweshe bininge ekale na bukomo ku mushipiditu i bukwashi bwa mukulumpe umo Mwine Kidishitu. Bine, wadi ufwijanga’ko mpata pangala pa buno bukwashi bwa ku mushipiditu!
17, 18. Lelo i ngikadilo’ka ikusakilwa pa kukwasha muntu mupaluke ku luombe lwa Leza?
17 Buswe bo butononanga Bene Kidishitu bakwashe boba kebakingilangapo bajokele ku kipwilo. Yesu wānene pa bitala balondi bandi amba: “Mwanda mupya uno o nemulá amba: Mwikale kwisanswa bānwe bene na bene. Po ponka po bakemuyūkila bu-bāna-bami-babwanga ponka pa kwisanswa mo mwikadile bānwe bene.” (Yoa. 13:34, 35) Bine, buswe i kiyukeno kiyukanya Bene Kidishitu ba bine. Lelo tubulwepo kulombola buno buswe ku Bene Kidishitu babatyijibwe baleka’byo kwingila? Bine tufwaninwe kwibaswa! Kupāna bukwashi kulomba kulonga buninge bwa kwikala na ngikadila mishileshile ya Leza.
18 Shi abakunena kukwasha muntu mupaluke ku luombe lwa Leza, le i ngikadilo’ka yofwaninwe kwikala nayo? Kutalula’mo buswe, ufwaninwe kadi kwikala ne na lusa, kanye, kutalala, ne kitūkijetyima. Ne kadi, mungya ngikadilo, bikusakila kwikala na lulekelo. Polo wālembele amba: “Vwalai . . . mutyima wa lusalusa ne kanye, ne bumvu, ne kikōkeji, ne kutūkija mutyima; kadi ne kwifudila bānwe bene na bene, ne kwilekela bitupu bānwe bene, shi umo wapi mambo ku mukwabo; monka mwemulekele aye Mfumwetu ne bānwe nenu mulongele monka. Ebiya pa bino byonso tentekaipo lusa, lo lwakulamankanya lufikijije.”—Kol. 3:12-14.
19. Mwanda waka buninge bulongwa pa kukwasha boba badi bwa mikōko bajokele ku kipombo kya Bwine Kidishitu budi na mvubu?
19 Kishinte kya kwifunda kilonda’ko mu kino Kiteba kya Mulami kikabandaula bubinga bupalukilanga bamo ku luombe lwa Leza. Kadi kikalombola boba bajoka bayuke muswelo obakokeja kutambulwa. Kitatyi kyowifunda kino kishinte ne kulangulukila’po, yuka’mba buninge bonso bolonga mwanda wa kukwasha boba badi bwa mikōko bajokele ku kipombo kya Bwine Kidishitu budi na mvubu. Mu ino ngikadilo ya bintu dyalelo, bantu bavule bajimijanga būmi bwabo bonso mu kukimba bya bupeta, inoko kudi būmi bumo kete budi na mvubu kutabuka lupeto lonso lubwanya kumonwa mu ino ntanda. Yesu wānene ukoma kino mu kyelekejo kya mukōko mujimine. (Mat. 18:12-14) Nobe vuluka kino polonga bukomo na kampeja-bukidi ne kininga bwa kukwasha boba bapaluka badi bwa mikōko miswedibwe ya Yehova bajokele ku luombe.
Usa Kulondolola Namani?
• I kiselwa’ka kidi na bakumbi Bene Kidishitu pa bitala boba badi bwa mikōko bapaluka ku luombe?
• I muswelo’ka obwanya kukwasha boba kebakidipo pamo na kipwilo?
• I ngikadilo’ka ikusakilwa pa kukwasha boba bapaluka ku luombe?
[Bipangujo bya Kifundwa]
[Kifwatulo pa paje 17]
Bakumbi Bene Kidishitu baloñanga buninge bwa kukwasha boba bapaluka ku luombe lwa Leza