Kwashenu Anapwapuki haMukanka waNyikoku yaNzambi

“Tuzañalalenu enu akwetu, mukoku wami wajimbala namuwani dehi.”—LUKA 15:6.

1. Indi Yesu wamwekesha ñahi nawu hikabiña wamuwahi?

 MWANA kaYehova wumu hohu, Yesu Kristu, amutenaña nawu “kabiña kawanyikoku muneni.” (Aheberu 13:20) Nsona yashimweneñahu dehi hakwinza kwindi nawa yashimwini nawu wadiñi Kabiña wambukaku wakeñeleña ‘nyikoku yajimbala’ yaIsarela. (Matewu 2:1-6; 15:24) Hela chochu, neyi chochatela kuhana kambiña wumi windi kulonda kukiña nyikoku yindi, Yesu niyena wafwilili antu adi neyi anyikoku akutwesha kutambwila mulambu windi hamu neyi ifutu danyiloña.—Yowanu 10:11, 15; 1 Yowanu 2:1, 2.

2. Yumanyi yinaleñeli akwaKristu amakwawu kuzeya?

² Chawushona, antu amakwawu amwekeneña neyi alemesha mulambu waYesu nawa adihanini kudi Nzambi hiyadi akola muchipompelu chawakwaKristuku. Kudimbulula, yikatu, hela yuma yikwawu yatela yinaleñeli muzañalu wadiñawu nawu kukehelaku nawa yinayileñeli kwikala azeya. Hela chochu, neyi ekala hamukanka wanyikoku yaNzambi anateli kudiluñisha kuwunda nimuzañalu wateneni Davidi muMasamu 23. Chakutalilahu, wembili nindi: “Yehova diyi kabiña kami; hinukubula chumaku.” (Masamu 23:1) Owu ekala hamukanka wanyikoku yaNzambi akweti yuma yejima yakeñekaña kulonda kutwalekahu kwikala nawubwambu wakola naNzambi, hakwila anyikoku anapwapuki hiyakwetuku. Anyi atela kuyikwasha? Anateli kuyikwasha ñahi? Yumanyi yitwatela kwila kulonda kuyikwasha afunti hamukanka wanyikoku?

Anyi Atela Kuyikwasha?

3. Yesu wamwekesheli ñahi chuma chakeñekaña hakupulwisha anyikoku aNzambi adishañayi?

³ Chinakukeñeka kuzata nañovu kulonda kupulwisha anyikoku ajimbala adishañayi Nzambi. (Masamu 100:3) Yesu waheni ichi chakutalilahu hahosheliyi nindi: “Neyi kudi muntu wukweti nyikoku yindi nkulakaji, neyi hanapwapuki wumu, abuli kushiya makumi atanu nawana natanu nawana, ayi kumapidi nakukeñakeña owu napwapuki, tahindi? Wamba kela wukumuwana, nukuyileja chalala nami, wukuzañalala namukoku owu chakubadika awa makumi atanu nawana natanu nawana abulili kupwapuka. Dichi muchima waTata yenu wudi mwiwulu hanakeñi mwana wanyanya wudi neyi iwu kunoñaku.” (Matewu 18:12-14) Anyi atela kukwasha antu adi neyi anyikoku anapwapuki hamukanka wanyikoku?

4, 5. Aeluda atela kumwekesha muchima wamuchidinyi kudi nyikoku yaNzambi?

⁴ Neyi aeluda akwaKristu anakukeña kukwasha anyikoku anapwapuki, atela kwanukaña nawu mukanka wanyikoku yaNzambi hichipompelu chawantu adihana kudi Yehova, mwalala ‘hinyikoku yaNzambi yadiishañayi’ nawa yalemeshayi. (Masamu 79:13) Nyikoku yayiwahi yeniyi yakeñekaña kuyakamena chikupu, nawa ichi chinakulumbulula nawu atumbiña akweti kukeña atela kuyikeña. Kuyibiñaña munjila yayiwahi kunateli kuyikwasha chikupu. Neyi atumbiña ayikoleshaña chachiwahi chikuhwelelu chawu chinateli kukola nawa chikuyisañumuna kufunta kumukanka wanyikoku.—1 Akorinda 8:1.

⁵ Atubiña amukanka wanyikoku yaNzambi akweti mudimu wakukeña nyikoku yinapwapuki  kulonda kuyikwasha. Kapostolu Pawulu wayanukishili aeluda akwaKristu amuEfwesesa wakushankulu nindi adiña namudimu wakubiña anyikoku nindi: ‘Dihembenu enu aweni, hembenu ninyikoku yejima yanayikunjikuwu kudi spiritu yajila kwikala atubiña, mudiishi chachiwahi chipompelu chaNzambi chalandiliyi namashi indi yomweni.’ (Yililu 20:28) Hohamu, kapostolu Petulu wayikonkomweneni akulumpi awayishewa nindi: “Biñenu mukanka wanyikoku yaNzambi wudi mukachi kenu, nakuyitala; bayi chakukanjikijaku, chiña nakutiya kuwaha mwaya muchima waNzambi; bayi nakulonda kuheta kwatamaku, chiña namuchima wakukeñamu; bayi nakwikala anyanta anawa ayishililuwu kuhembaku, chiña nakwikala akutalilahu anyikoku.”—1 Petulu 5:1-3.

6. Muloñadi anyikoku jaNzambi chiyanakukeñekela kuyakemena kudi atubiña makonu?

⁶ Atubiña akwaKristu atela kwimbujola Yesu, “kabiña walala.” (Yowanu 10:11) Wadiña nakwakamena chikupu nyikoku yaNzambi nawa wakonkomweneni hakulema kwakuyakamena hampinji yamulejeliyi Shimona Petulu ‘kubiña anyikoku Jindi.’ (Tañenu Yowanu 21:15-17.) Makonu anyikoku anakukeñeka kuyakamena chikupu, muloña Diyabolu nemakeni chikupu hakufumpa kashinshi kawantu adihana kudi Nzambi. Satana wazatishaña kuzeya kwakumujimba niyuma yamukaayi kindi kulonda kuleñela antu jaYehova kudiñija muyuma yatama. (1 Yowanu 2:15-17; 5:19) Anyikoku azeya ekala aswayi kuhukula kubadika anyikoku ejima, dichi akeñekaña wukwashu kulonda kuzatisha kusoñamisha ‘kwakwenda chakuyendesha kudi spiritu.’ (Aŋalija 5:16-21, 25) Hakukwasha anyikoku wenawa chakeñekaña kulomba wulomboli waNzambi, nispiritu yindi yajila nikuzatisha chachiwahi Izu dindi.—Yishimu 3:5, 6; Luka 11:13; Aheberu 4:12.

7. Muloñadi chichalemena aeluda kubiña anyikoku ayinkawu kuhemba?

⁷ MuIsarela wakushankulu kabiña wazatishileña nkunyi, hakubiña nachu anyikoku jindi. Anyikoku hakwiñila hela hakwidika mwiyinda ‘aselukileña mwishina dankunyi’ nakuyichinda kudi kabiña. (Alevi  27:32; Mika 2:12; 7:14) Chochimu, kabiña mukwaKristu niyena watela kwiluka chiwahi nyikoku yaNzambi nikwiluka mukoku wudi wejima chinakuhandayi. (Esekejenuku Yishimu 27:23.) Dichi, kubiña hichuma chalema chikupu chahanjekañahu izaza dawaeluda. Chumichi chabombelamu kutoñojoka mwakukwashila anyikoku anapwapuki. Yehova wahosha nindi wakakeñakeña nyikoku yindi nakuyakamena chikupu. (Ezekeli 34:11) Dichi, Nzambi wazañalalaña neyi aeluda niwena azata nañovu kulonda kukwasha anyikoku anapwapuki kufunta kumukanka wanyikoku.

8. Munjilanyi aeluda muyatela kukwashila chikupu mukoku?

⁸ Neyi mukwetu mukwakwitiya nakati kumujimba, kumuhempula kudi kabiña wanyikoku yaNzambi kunateli kumuzañalesha nikumukolesha chikupu. Chochimu nimukoku wunakati lwakuspiritu nateli kuzañalala nikukoleshewa neyi amwakamenaña. Aeluda anateli kutaña nsona, kuhituluka muchibaaba, kuhosha hayikuma yamaneni yahoshawu hakupompa, kulomba hamu nawunazeyi niyuma yikwawu. Anateli  kumuleja nawu antu amuchipompelu akazañalala chikupu neyi yatachika kupompa. (2 Akorinda 1:3-7; Yakoba 5:13-15) Kumuhempula, kumutumina nshiña hela kumusonekela mukanda kunateli kumukwasha. Kukwasha mukoku wunajimbali hamukanka kwazañaleshaña eluda mukwaKristu wunakumukwasha.

Twatela Kuzatila Hamu

9, 10. Muloñadi wumwatela kuhoshela nenu anyikoku anapwapuki hiyanateli kuyikwasha hohu kudi aeludaku?

⁹ Tunakushakama mukaayi munavuli jakwila nawa munyaka yakala, dichi hitunateli kwiluka netu mukwetu mukwakwitiya nakupwapuka muchipompeluku. (Aheberu 2:1) Ilaña, Yehova walemesha chikupu anyikoku jindi. Mukoku wudi wejima wekala walema, neyi chochalema chidi chamujimba chejima. Dichi, wejima wetu twatela kumwekesha kukeña kudi amana kwetu nikudakamena chikupu wumu namukwawu. (1 Akorinda 12:25) Komana mwatoñojokaña mwenimu?

¹⁰ Hela chakwila aeluda akweti mudimu weneni wakukeña nikukwasha anyikoku anapwapuki, kwakamena antu wenawa himudimu wawankoñi akwaKristu hohuku. Amakwawu niwena atela kuzatila hamu nawatubiña. Ninetu twatela kuyikwasha nikuyikolesha amana kwetu nahela anakukeña wukwashu kulonda kufunta kumukanka wawanyikoku. Tunateli kuyikwasha ñahi?

11, 12. Kukoolekanyi kwatela kuyinkawu kulonda kukwasha mukwenu mukwakwitiya wunazeyi?

¹¹ Mpinji yikwawu, aeluda anateli kuleja mukwakushimwina waWanta washikahu kulonda kutachika kudiza kwaBayibolu namuntu wazeya wunakukeña kumukwasha. Chuma chikuleñela kwila mwenimu chidi chakukwasha antu wenawa kwikala ‘nakukeña [kuyadiña naku] hatachi.’ (Chimwekeshu 2:1, 4) Akwetu akakwitiya wenawa tunateli kuyikolesha nikukolesha chikuhwelelu chawu kuhitila mukuhituluka nawu muyuma yabulili kudizawu hampinji yajiñileñawu kukupompa.

¹² Neyi aeluda ayinka mudimu wakudiza namukwenu mukwakwitiya wunakukeña wukwashu wakuspiritu, mwatela kulomba kudi Yehova kulonda yayilomboli nikukiswila ñovu jenu. Mwalala, “kunjikaku nyidimu yeyi kudi Yehova, niyiwafuukulaña akayikolesha.” (Yishimu 16:3) Toñojokenu chikupu hansona yamuBayibolu niyikuma yinateli kukolesha chikuhwelelu yimwatela kuzatisha hakudiza namuntu wunakukeña wukwashu wakuspiritu. Toñojokenu hachakutalilahu chachiwahi chakapostolu Pawulu. (Tañenu Aroma 1:11, 12.) Pawulu wakeñeleña nankashi kuyimona akwaKristu amuRoma kulonda kuyinka chamukunkulu chakuspiritu nikuyikolesha. Nawa wadiña nakutalila nindi adikoleshi wumu namukwawu. Komana ninetu kwila twikala namuchima wakukeña kukwasha mukoku wunapwapuki hamukanka wanyikoku yaNzambi nehi?

13. Yumanyi yimwatela kuhanjeka namuntu wazeya?

¹³ Hampinji yimunakudiza, munateli kumwihula nenu, “Wadizili ñahi chalala?” Yikwashenuku kulonda kwanuka yakuhumañana yayiwahi yadiluñishileñawu hampinji yamuzatilileñawu Yehova, yikoleshenu anazeyi kuhosha hayakuhumañana yayiwahi yadiziluwu hakupompa, yahumañenuwu mumudimu wakushimwina, nihakupompa kwankambi. Hoshenu hayakuhumañana yayiwahi hadaha yimwadiluñishili hamu mumudimu waYehova. Hoshenu hamuzañalu wumukweti hakukundama kwakwihi naYehova. (Yakoba 4:8) Hamekenu hanochu Nzambi chatwakamenañayi hamu neyi antu jindi, sweje-e chatukundejañayi nikutukolesha neyi tudi mukukala.—Aroma 15:4; 2 Akorinda 1:3, 4.

14, 15. Yumanyi yayiwahi yadiluñishileñawu azeya yimwatela kuyanukisha?

¹⁴ Hadaha, chikuwaha kumwanukisha wazeya nkisu yadiluñishileñayi hampinji yadiñayi wakola muchipompelu. Chakutalilahu, wadiñi nakukooleka  kwakwilukilaku Izu daNzambi nikufuukula kwindi. (Yishimu 4:18) Hampinji ‘yendeleñayi chakumwendesha kudi spiritu,’ chadiña chaswayi kukaana kweseka kwakuvulumuna. (Aŋalija 5:22-26) Hamuloña wakwikala nachinleji chachiwahi chamuleñeleleña kulomba kudi Yehova nikudiluñisha ‘kuwunda kwaNzambi kwabadika maana ejima kwahembaña nyichima yetu niyitoñojoka.’ (Afwilipi 4:6; 7) Toñojokenuña haniyi yikuma, mwekeshenu kukeña chikupu, nawa fwilenu kukolesha mana kwenu hela muhela mukwaKristu kulonda kufunta kumukanka wawanyikoku.—Tañenu Afwilipi 2:4.

¹⁵ Indi neyi chakwila wudi eluda wunakuya nakubiña? Watela kukolesha adisumbula azeya kutoñojoka chikupu hampinji yadiziluwu chalala katachi kufuma Mwiizu daNzambi. Ichi chalala chadiña chachiwahi, chakuzañalesha nawa chayikuulili muwunduñu wakuspiritu. (Yowanu 8:32) Azañaleli chikupu kutalisha hayuma yadizileñawu hadi Yehova, hakukeña kwindi, nihayuma yayiwahi yafuukulayi. (Esekejenuku Luka 24:32.) Yanukishenu nenu akwaKristu adihana ekala nawubwambu wakola naYehova nawa ekala nakukooleka kwakulomba. Yikoleshenu chikupu azeya kutiyilila “kunsañu yayiwahi yakulema kwaNzambi wankisu [wamuzañalu]” Yehova.—1 Timotewu 1:11.

Twalekenuhu Kuyikeña

16. Hanenu chakutalilahu chinakumwekesha nawu kukwasha azeya kuspiritu kwakwashanaña chikupu.

¹⁶ Komana iyi yikuma yinashimunuwu hewulu yazatikaña chikupu? Eña. Chakutalilahu, kansi wumu wekalili mukwakushimwina waWanta henohu wudi nayaaka 12 wazeyeli chashikijiliyi yaaka yakusemuka 15. Hela chochu, nkumininaku wakoleli, nawa chayinu mpinji nazati mumudimu wampinji yejima kubadika hadi yaaka 30. Chuma chamuleñeleli yekali wakola cheñi muchipompelu muloña amukwashili kudi eluda mukwaKristu. Wahamekeli nankashi hawukwashu wamukwashiliwu kudi eluda!

17, 18. Yililwinyi yatela kuyikwasha kulonda kukwasha muntu wunapwapuki hamukanka wanyikoku yaNzambi?

¹⁷ Kukeña dikwaleñelaña akwaKristu kukwasha azeya kulonda kufunta kuchipompelu. Hakuhosha nawatumbanji twindi, Yesu wayilejeli nindi: “Tiyenu, nukuyileja lushimbi lwalwiha nami, Mukeñañani. Chinayikeñami, ninenu nawa keñañanenu. Neyi mukukeñañana, dihu hakayilukilawu antu ejima nawu mudi atumbanji twami.” (Yowanu 13:34, 35) Mwalala, kukeña dichinjikijilu chakwilukilaku akwaKristu alala. Komana iku kukeña hiyatela kukumwekesha kudi akwaKristu apapatishewa anazeyi nehi? Atela kukumwekesha! Neyi tunakukwasha antu azeya chakeñekaña kumwekesha yililu yawakwaKristu yashiyashana.

¹⁸ Neyi munakukeña kukwasha muntu wunapwapuki hamukanka wanyikoku yaNzambi, yililwinyi yimwatela kumwekesha? Chatela kumwekesha hohu kukeña, mwatela kumwekesha cheñi wushona, luwi, kuwunda nikukaba kabe-e. Kwesekeja nachidi yuma, cheñi mwatela kwikala namuchima wakwanakena. Pawulu wasonekeli nindi: “Vwalenu muchima wawushona, niluwi, nikudizoza, nikwovwaha, nikudiwunjika; nakudovwahila nikudanakena muntu namukwawu. Neyi kudi muntu wukweti muloña namukwawu amwanakeni; chayanakenenuwu enu kudi Mwanta, ninenu nawa ilenu chochimu. Hayuma yejimiyi alunjikuhu kukeña, diyi mpanda yasweja kunuña antu hamu.”—Akolose 3:12-14.

19. Muloñadi chichalemena kufwila chikupu kukwasha antu adi neyi anyikoku kufunta kwiyinda dawakwaKristu?

¹⁹ Chibaaba chinalondeluhu chakudiza mukanu kaposhi chikuhosha hamuloña waleñelaña antu amakwawu kupwapuka hamukanka wanyikoku yaNzambi. Cheñi chikamwekesha ochu antu anakufunta chatela kuyitambwilawu. Chimwakadizaña chibaaba chinalondeluhu nikutoñojoka hachinu chibaaba, mwatela kwiluka nenu chimukuzataña nañovu nakufwila kukwasha antu adi neyi anyikoku kulonda kufunta kwiyinda dawakwaKristu kwekala kwalema. Mukanu kaayi kamakonu, antu amavulu anakuzatisha wumi wawu kulonda kukeña maheta akumujimba, ilaña wumi wamuntu walema chikupu kubadi mali ejima amukaayi. Yesu wakonkomweneni hanichi chikuma muchishimu chindi chamukoku wajimbeli. (Matewu 18:12-14) Mpinji yejima mwanukeña ichi chikuma hampinji yimunakufwila nikunyakashana kukwasha antu jaYehova akeñayi adi neyi anyikoku anapwapuki kulonda kufunta kumukanka wanyikoku.

Mukwakula Nenudi?

• Mudimwinyi wukwetuwu atubiña akwaKristu hadi antu adi neyi anyikoku anapwapuki hamukanka wanyikoku?

• Munjilanyi mumwatela kuyikwashila antu anazeyi muchipompelu?

• Yililwinyi yinateli kuyileñela kukwasha antu anapwapuki hamukanka wanyikoku?

[Malwihu aKuzatisha haKudiza]

[Mwevulu wudi hefu 17]

Atubiña akwaKristu afwilaña chikupu kukwasha antu anapwapuki hanyikoku yaNzambi