Konyuru Joma Rwenyo Weyo Kweth Nyasaye
Konyuru Joma Rwenyo Weyo Kweth Nyasaye
“Moruru koda, nikech asenwang’o rombona ma nolal.”—LUKA 15:6.
1. Yesu osenyiso nade ni en e jakwath ma jahera?
WUOWI ma miderma Yesu Kristo, wuod Jehova Nyasaye, bende iluongo ni ‘jakwath maduong’ mar rombe.’ (Hib. 13:20) Ndiko nokoro biro mare, kendo nonyiso ni en Jakwath makende ahinya ma nobiro mondo omany “rombe molal” mag Israel. (Math. 2:1-6; 15:24) E wi mano, mana kaka jakwath masie nyalo chiwo ngimane mondo orit rombene, Yesu ne otho tho mar misango mondo ochiw rawar ne joma nigi kido kaka mag rombe, ma ne nyalo keto yie kuom misangone.—Joh. 10:11, 15; 1 Joh. 2:1, 2.
2. Gin gik mage manyalo bedo ni nomiyo Jokristo moko odok chien?
2 Gima lit en ni, jomoko ma ne kinde moko nyiso ni giketo yie kuom misango mar Yesu, mi gichiwore ne Nyasaye, sani koro ok gimakre malong’o gi kanyakla mar Jokristo. Nyalo bedo ni chandruoge mag tuoche, bedo gi chuny mool, kata gik mamoko, osemiyo gidok chien mi giweyo biro e chokruoge koda tiyo tij lendo. Kata kamano, ginyalo yudo kuwe kod mor ma Daudi nowuoyoe e Zaburi 23, mana ka gimakre malong’o gi kweth mar Nyasaye. Kuom ranyisi, Daudi nowero niya: “Jehova e jakwadha. Ok anachand gimoro.” (Zab. 23:1) Jogo manie kweth Nyasaye ok chand gimoro amora madwarore e rito winjruokgi gi Nyasaye, to mano ok e gima timre ne rombe molal. Jo mage manyalo konyogi? Ere kaka inyalo konygi? Kuom adier, gin gik mage minyalo tim mondo okonygi gidwog e kweth?
Jomage Manyalo Konyo?
3. Yesu nonyiso nade gima dwarore otim mondo eka ores rombe molal mag Nyasaye?
3 Kuom adier, kinda dwarore ahinya, mondo eka ores rombe molal mag lege Nyasaye. (Zab. 100:3) Yesu nochiwo ranyisi kuom wachni ka nowacho kama: “Ka ng’at moro ni gi rombe piero apar achiel, kendo achiel kuomgi orwenyo, ok oweyo piero ongachiel gi ongachielgo, to odhi e gode, omanyo mano morwenyo koso? Eka miti koyude, adier awachonu niya, omor kuome moloyo piero ongachiel gi ongachielgo ma ok norwenyo. Kamano bende, ok en dwaro mar Wuonu me polo ni achieI kuom jo matindogi olal.” (Math. 18:12-14) Ng’ano manyalo konyo jogo ma nigi kido kaka mag rombe morwenyo oko mar kweth?
4, 5. Jodongo onego obed gi paro mane kuom kweth Nyasaye?
4 Mondo omi jodong-kanyakla okony rombe moserwenyo, nyaka ging’e ni kweth mar Nyasaye en kanyakla mar jogo mosechiwo ngimagi ne Jehova—ee gin ‘rombe mag lege Nyasaye’ mohero ahinya. (Zab. 79:13) Rombe mohero kaka mago dwarore orit e yo mamuol, kendo mano dwaro ni jokwath nyaka nyisgi hera mowinjore. Limbe ma jokwath timo e yor hera nyalo konyo ahinya. Jip ma jakwath chiwo e yor hera nyalo konyogi ahinya e gero winjruokgi gi Jehova, kendo miyo gibedo gi gombo mar duogo e kweth.—1 Kor. 8:1.
5 Jokwath marito rombe Nyasaye nigi ting’ mar manyo rombe morwenyo, kendo temo konyogi. Jaote Paulo ne oparone jodong-kanyakla mar Jokristo ma ne ni Efeso, wach ting’ ma ne gin-go kaka jokwath, ka nowachonegi kama: ‘Ritreuru uwegi, kendo rituru kweth duto ma roho maler noketoue jokwath, mondo ukwa kanisa mar Nyasaye, ma nong’iewo gi remb Wuode owuon.’ (Tich 20:28) Kamano bende, jaote Petro nohombo jodong-kanyakla niya: ‘Rituru kweth Nyasaye manie lwetu, kurangogi ok kochunu, to gi chuny mohero kaka Nyasaye dwaro, ok nikech ohala makelo wich kuot, to kod chuny mongino; ok kutimoru ruodhi e tich moketue, to kudoko ranyisi ni kweth.’—1 Pet. 5:1-3.
6. Ang’o momiyo kindegi dwarore ahinya mondo jokwath orit rombe Nyasaye?
6 Dwarore ni jokwath ma Jokristo oluw ranyisi mar “jakwath maber,” ma en Yesu. (Joh. 10:11) Ne ohero ahinya rombe Nyasaye, kendo nojiwo kaka ritogi en tich madwarore ahinya, kane owachone Simon Petro mondo ‘okwa rombene.’ (Som Johana 21:15-17.) Kindegi ema dwarore ahinya mondo orit rombe kamano, nimar Jachien osemedo kinda kodwaro ketho winjruok ma jogo mosechiwore nigo gi Nyasaye. Satan tiyo gi nyawo mag ringruok, kendo otiyo gi piny mondo owuond rombe Jehova odonji e timbe maricho. (1 Joh. 2:15-17; 5:19) Joma yot ahinya mondo olwar e obadho mag Satan, gin joma osedok chien e winjruokgi gi Nyasaye, omiyo dwarore okonygi mondo omi ‘giwuothi kuom roho.’ (Gal. 5:16-21, 25) Konyo rombe makamago, dwaro ni jodongo okwa Nyasaye kony e lamo, gikwa roho mare mondo otelnegi, kendo giti gi Wachne e yo molony.—Nge. 3:5, 6; Luka 11:13; Hib. 4:12.
7. Ang’o momiyo dwarore ni jodongo orit ahinya rombe moket e lwetgi?
7 E kinde Israel machon, jakwath ne ting’o luth mabor, mondo ota godo kwethne. Sama rombe ne donjo kata wuok e duol, jakwath ne keto ludhno ariwa e dho duol mondo ‘gikadhi e bwo ludhno,’ kendo mano ne miyo onyalo kwanogi. (Lawi 27:32; Mika 2:12; 7:14) Jakwath ma Jakristo bende onego ong’e chal mar kweth Nyasaye momiye mondo oriti. (Pim gi Ngeche 27:23.) Kuom mano, rito rombe en achiel kuom weche madwarore ahinya monego obed ni iwuoyo kuomgi e bura mar jodongo. Mano oriwo timo chenro mondo okony rombe morwenyo. Jehova owuon nowacho ni ne odhi manyo rombe mage kendo ritogi maber. (Eze. 34:11) Omiyo, Nyasaye mor sama jodongo kawo okang’ machalo kamano ka gitemo konyo rombe morwenyo mondo oduog e kweth.
8. Gin yore mage ma jodongo nyalo konyogo rombo molal?
8 Sama Jakristo moro tuwo e ringre, onyalo bedo mamor kendo yudo jip ka jakwadh kanyakla olime. Mano bende e gima nyalo timore ka jaduong’-kanyakla limo kendo jiwo jal ma winjruokne gi Nyasaye odok chien. Jodongo nyalo somo kode ndiko moko, somone weche moko e bugewa, nyise thuond weche mosepuonjruok e chokruok, lamo kanyachiel kode, gi yore mamoko. Ginyalo nyise kaka Jokristo wetene ei kanyakla biro bedo mamor nene kochako biro e chokruoge mag kanyakla. (2 Kor. 1:3-7; Jak. 5:13-15) Dhi lime, goyone simo, kata ndikone barua nyalo jiwe ahinya! Konyo rombo molal modhi oko mar kweth, en gima nyalo kelo mor mogundho ne jakwath machiwo konyno.
Waduto Wanyalo Konyo
9, 10. Ang’o momiyo wanyalo wacho ni konyo rombo morwenyo ok en tij jodongo kende?
9 Wadak e kinde ma ngima tek, kendo ji odich, omiyo seche moko ok wanyal fwenyo ka Jakristo wadwa chako bayo yo. (Hib. 2:1) Kata kamano, Jehova pod ohero rombene ahinya. Ng’ato ka ng’ato kuomgi nengone duong’ e wang’e, mana kaka fuoni duto manie dend dhano. Omiyo, dwarore ni waduto wanyis ni wahero, kendo wadewo owetewa gadier. (1 Kor. 12:25) Be inyiso chuny machalo kamano?
10 Kata obedo ni jodongo ema nigi ting’ mokwongo mar manyo kendo konyo rombe morwenyo, mano ok onyiso ni gin kendgi ema ginyalo konyo. Jomoko bende nyalo riwo lwedo jokwathgi. Wanyalo, kendo onego wachiw jip koda kony ne owete gi nyimine madwarore ni okony, mondo omi giduog e kweth. Ere kaka inyalo chiw kony ma kamano?
11, 12. Ere kaka inyalo chiwo kony ne ng’at modok chien?
11 Nitie kinde moko, ma jodongo nyalo chano mondo jolendo molony otim puonjruok mar Muma gi jal modok chien, to gombo mondo okonye. Tiend timo kinda e yo makamano, en mondo okonygi chiero ‘hera mokwongo’ ma ne gin-go. (Fwe. 2:1, 4) Wanyalo gero Jokristo wetewagi kendo konyogi tego yie margi, ka wanyisogi gik mabeyo ma ne obayogi e kinde ma ne ok gin machiegni gi kanyakla.
12 Kapo ni jodongo okwayi mondo ipuonjri gi Jakristo wadu madwarore ni okony, kwa Jehova e lamo mondo okonyi kendo ogwedh kinda mitimo. Kuom adier, “ket tichni e luet Jehova; mi weche miparo timo notimre.” (Nge. 16:3) Par matut kuom ndiko mag Muma koda puonj manyalo gero yie, minyalo tiyogo e jiwo jogo madwarore ni okony. Par bende kuom ranyisi maber mar jaote Paulo. (Som Jo Rumi 1:11, 12.) Paulo nogombo neno Jokristo ma ne odak Rumi, mondo omi ojiwgi kuom miyogi mich mag chuny mondo gichung’ motegno. Bende ne ogeno ahinya mondo gijiwre e yie, en kaachiel kodgi. Donge mano e chuny monego wabedgo, sama wamanyo konyo rombo morwenyo moweyo kweth Nyasaye?
13. Gin weche mage minyalo wuoyoe gi ng’at modok chien?
13 E kinde ma upuonjoru, inyalo penje niya, “Ne iyudo adiera nade? ” Wuouru kuom mor ma ne uneno kinde machon, kijiwe mondo owuo kuom weche ma ne hinyo more e chokruoge, e tij lendo koda e chokruoge mag distrikt. Wuo kuom gik mabeyo ma kamoro useneno kanyachiel e tij Jehova. Wuo kuom mor ma in-go kuom sudo machiegni gi Jehova. (Jak. 4:8) Nyis kaka in iwuon imor gi yo ma Nyasaye ritowago kaka joge—to ahinya wuon, kaka ohoyowa kendo miyowa geno e masichewa.—Rumi 15:4; 2 Kor. 1:3, 4.
14, 15. Gin gweth mage manyalo bedo maber paro ne Jokristo modok chien?
14 Biro bedo maber paro ne jalendo modok chienno, moko kuom gweth ma ne oyudo chon kane obedo machiegni gi kanyakla. Kuom ranyisi, chon ne oyudo gweth kuom medo ng’eyo Wach Nyasaye koda dwaro mage. (Nge. 4:18) Onge kiawa ni kane ‘owuotho kuom roho,’ ne bedone mayot kwedo tembe mag richo. (Gal. 5:22-26) Mano ne konye bedo gi chuny maler ma ne nyalo miyo owuo ayanga gi Jehova e lamo, kendo konye yudo ‘kuwe mar Nyasaye, modhierore ng’eyo, ma rito chunye gi pache.’ (Fili. 4:6, 7) Ket weche kaka mago e paro, nyise ni idewe gadier, to kanyalore, to jiw owaduno kata nyaminuno mondo ochak oduogi ei kweth.—Som Jo Filipi 2:4.
15 Wawach ni in jaduong-kanyakla matimo limbe kaka jakwath. Inyalo jiwo dichwo gi chiege ma dibed ni osedok chien, mondo gipar kuom kindego ma eka ne gikwongo yudo adiera mowuok e Wach Nyasaye. Mano kaka adiera ne ber, ne en gima owinjore, ka ketogi gibedo thuolo! (Joh. 8:32) To mano kaka chunygi ne opong’ gi mor kuom gik ma ne gipuonjore e wi Jehova, herane, koda dwaro mage mabeyo! (Pim gi Luka 24:32.) Parnegi ni Jokristo mosechiwore ne Nyasaye, bedo gi winjruok machiegni gi Jehova, kendo gibedo thuolo wuoyo kode e lamo. Tem ahinya jiwo Jokristo modok chien, mondo gichak girwak kendo ‘wach maberno man gi duong’ mar Nyasaye [“mamor,” NW ] ,’ ma en Jehova.—1 Tim. 1:11.
Dhiuru Nyime Nyisogi Hera
16. Chiw ane ranyisi manyiso kaka kinda mar konyo ng’at modok chien en gima nigi nyak.
16 Be paro mochiw malo kanyogo konyo gadier? Ee, gikonyo. Kuom ranyisi, rawera moro ma ne obedo jalendo ka en jahigini 12, ne odok chien moweyo tij lendo kane en jahigini 15. Kata kamano, bang’e nochako obedo jalendo motegno, kendo osebedo kotiyo ne Nyasaye kaka jatich mochiwore gi thuolone duto, kuom higini mokalo 30. Kony ma ne omiye gi jaduong’-kanyakla ema ne ojiwe ahinya mochako obedo jalendo motegno. Mano kaka nomor gi kony ma nomiyeno!
17, 18. Gin kido mage mabiro konyi sama ikonyo ng’at morwenyo moweyo kweth Nyasaye?
17 Hera ema miyo Jokristo chuny mar konyo joma osedok chien, mondo giduog ei kanyakla. Kowuoyo kuom jolupne, Yesu nowacho kama: “Chik manyien amiyou, mondo uherru ng’ato gi ng’ato; mana kaka yandi aherou, mondo un bende uherru kamano. Ma eri e ma nomi ji duto ong’e ni un jopuonjrena, ka un uheroru ng’ato gi ng’ato.” (Joh. 13:34, 35) Ee, hera e kido mifwenyogo Jokristo madier. Donge mano e hera monego wanyis Jokristo mosebatisi to nyalo bedo ni osedok chien? Kuom adier, onego watim kamano! Kata kamano, chiwo kony nyalo dwaro ni wanyis kido mopogore opogore kaka Jokristo.
18 Mondo omi ikony ng’at morwenyo moweyo kweth Nyasaye, gin kido mage manyalo dwarore inyis? Kaachiel gi nyiso hera, nyalo dwarore ni inyis kido kaka miwafu, ng’wono, muolo, kod horruok mos. Kaluwore gi chal mar ng’atno, nyalo dwarore bende ni iwene richone. Paulo ne ondiko kama: “Beduru gi miwafu, ng’wono, paro mamuol, muolo, kod horuok. Ng’wonreuru, kendo weyoreuru richo ng’ato gi ng’ato, ka ng’ato ni gi wach kod wadgi. Kaka Ruoth noweyonu richou, un bende onego utim kamano. To moloyo magi duto, beduru gi hera; en e ratego ma tueyo kendo chopo wechego duto.”—Kol. 3:12-14.
19. Ang’o momiyo en gima ber timo kinda mar konyo joma nigi kido kaka mag rombe mondo giduog e kweth mar Jokristo?
19 Sula mar puonjruok maluwo mae, biro konyowa ng’eyo gik mamiyo jomoko rwenyo ka weyo kweth mar Nyasaye. Sulano bende biro nyiso kaka kanyakla biro rwako joma ikonyogo. Sama ibiro puonjori sulano ka bende pod iparo weche manie sulani, bed gadier ni kinda moro amora mitimo ka igeno konyo joma nigi kido mag rombe mondo oduogi e kweth mar Jokristo, en gima ber. E piny masani, ji mathoth tiyo gi ngimagi duto e temo choko mwandu, to kata kamano, ngima ng’at achiel, nengone duong’ maloyo pesa duto manie piny. Yesu nojiwo wachni e ranyisi ma nochiwo mar rombo molal. (Math. 18:12-14) Mad puonjni siki e pachi, sama imedo timo kinda mar konyo rombe ma Jehova ohero ahinya to orwenyo, mondo giduog e kweth.
Inyalo Dwoko Nade?
• En ting’ mane ma jokwath ma Jokristo nigo kuom joma nyiso kido kaka mag rombe, to orwenyo moweyo kweth?
• Inyalo konyo nade joma gie sani ok makre malong’o gi kanyakla?
• Gin kido mage manyalo konyi mondo ikony jogo morwenyo moweyo kweth?
[Penjo mag Puonjruok]
[Picha manie ite 17]
Jokwath ma Jokristo timo kinda mar konyo jogo morwenyo moweyo kweth mar Nyasaye