Bao-y piis nins sẽn menemã
Bao-y piis nins sẽn menemã
“Bɩ y maan sũ-noog ne maam tɩ mam yãa m pesgã sẽn da menemã.”—Luk 15:6.
1. Wãn-wãn la a Zezi wilgẽ t’a yaa pe-kɩɩm sẽn nong a piisi?
BIIBLÃ pʋgẽ, b boonda a Zeova bi-ribl-yend a Zezi Kirist tɩ “piis pe-kɩɩm kãsenga.” (Heb. 13:20) B ra pĩnd n goma a waoongã yelle, la b wilg tɩ yẽ n yɩ pe-kɩɩm ning sẽn maag a yĩng n bao Israɛll buudã sẽn da wẽnd “piis sẽn menemã.” (Mat. 2:1-6; 15:24) Sẽn paase, wa pe-kɩɩm sɩd-sɩd sẽn tõe n sak n ki a piis yĩngã, a Zezi kiime tɩ yɩ maoong sẽn na n naf neb nins fãa sẽn wõnd piisã, rat n yet tɩ neb nins sẽn na n sak-a wã.—Zã 10:11, 15; 1 Zã 2:1, 2.
2. Tõe n yaa bõe n kɩt tɩ kiris-neb kẽer bas tigissã kẽnd la koɛɛgã moonego?
2 Bʋko, neb kẽer bãnga a Zezi maoongã yõod n sak n dɩk b mens n kõ Wẽnnaam, la rũndã-rũndã, b basa tigingã. Tõe n yaa b sẽn koms raoodo, pa rẽ bɩ laafɩ kaalem wall yɛl a taab n boog b yẽesmã, n kɩt tɩ b bas tigissã kẽnd la koe-noogã moonego. Yaool n yaa b sã n be Wẽnnaam bãgrã pʋgẽ bɩ a nin-buiidã sʋk bal la b tõe n tall bas-m-yam la sũ-noog ning yell a Davɩɩd sẽn gom yɩɩl 23 soabẽ wã. Wala makre, a Davɩɩd yeela verse a ye wã pʋgẽ woto: “Zusoabã yaa mam pe-kɩɩma, mam kõn kong bũmb ye.” (Yɩɩl 23:1) Piis nins sẽn be Wẽnnaam bãgrã pʋgẽ wã sɩd paamda bũmb ning fãa sẽn tõe n sõng-b tɩ b paas zood ning b sẽn tar ne-a wã, la sẽn bas-b bãgrã pa paamd rẽ ye. Ãnd dãmb n tõe n sõng nin-kãensã? Wãn-wãn la b tõe n sõng-ba? Bõe la b tõe n maan n sõng-b tɩ b lebg n wa bãgrã pʋgẽ?
Ãnd dãmb n tõe n sõng-ba?
3. Wãn-wãn la a Zezi wilgẽ tɩ Wẽnnaam pesg sẽn menem sõngr baooda modgre?
3 Yɩl n tõog n sõng Wẽnnaam pesg sẽn menem t’a lebg n wa a bãgrã pʋgẽ baooda modgr wʋsgo. (Yɩɩl 100:3) A Zezi ra rɩka makr n wilg rẽ. A yeela woto: “Ned sã n tar piis koabg t’a yembr meneme, a ka na n bas pis-wɛ la a wɛ wã tãens zut n kẽng n bao sẽn menem-a wã sɩda? La yẽ sã n yã-a, mam yeta yãmb sɩd tɩ yẽ na n maana sũ-noog pe-kãng yĩng n yɩɩd pis-wɛ la a wɛ wã sẽn ka menemã. Woto me, yãmb Ba sẽn be [saasẽ wã] ka rat tɩ kom-bõoneg kãens ned a yembr sãam ye.” (Mat. 18:12-14) La ãnd dãmb n tõe n sõng Wẽnnaam piis nins sẽn bas a bãgrã?
4, 5. Kãsem dãmbã segd n ges Wẽnnaam bãgrã yell wãn-wãna?
4 Kãsem dãmbã sã n dat n sõng piis nins sẽn menemã, b segd n tẽegame tɩ yaa Wẽnnaam a Zeova n so bãgrã bɩ tigingã. Bala yaa yẽ la b rɩk b mens n kõ. B yaa a ‘piis sẽn be a wãbneg zĩigẽ’ hal t’a nong-b wʋsgo. (Yɩɩl 79:13) Nin-kãensã ratame tɩ b nong-b wʋsg la b get b yell sõma, tɩ kɩt tɩ kãsem dãmbã segd n sɩd wilg-b tɩ b rata b neere. B sã n tʋgd n kaagd-ba, tõe n sõng-b lame. Kãsem soab sã n sõs ne-b n keng b raoodo, tõe n sõng-b lame tɩ b lebs n maneg b zoodã ne a Zeova la b tʋlg n lebg n wa bãgrã pʋgẽ.—1 Kor. 8:1.
5 Yaa Wẽnnaam bãgrã pe-kɩɩmb bɩ tigingã kãsem dãmbã n segd n gẽes piis nins sẽn menemã la b bao n sõng-ba. Tʋm-tʋmd a Poll tẽega pĩnd wẽndẽ Efɛɛz tigingã kãsem dãmb tɩ bãmb n segd n ges piisã yelle, n yeel-b woto: ‘Bɩ yãmb mens maan gũusgu, la y gũ Wẽnd bãgr ning a Vʋʋsem Sõngã sẽn gũnug yãmbã. Kɩɩm-y bãgr ning paoong sẽn tũ ne Biigã zɩɩmã raagrã.’ (Tʋʋ. 20:28, Sebr Sõngo.) Tʋm-tʋmd a Pɩɛɛr me ra sagla sẽn da yaa-b kãsem dãmb pipi kiris-nebã sʋkã n yeel-b woto: “Bɩ y rɩlg Wẽnnaam piisã sẽn be yãmb nusẽ wã, ka modgr yĩng ye, la yaa ne yamleoogo, sẽn zems Wẽnnaam yam, ka ligd yĩng ye, la yaa nonglem yĩnga, ka tɩ soog bãmb ne pãng ye, yaa tɩ yɩ mamsg bãmb yĩnga.”—1 Pɩɛ. 5:1-3.
6. Bõe yĩng tɩ yaa rũndã-rũndã la Wẽnnaam piisã rat tɩ b pe-kɩɩmbã ges b yell n yɩɩda?
6 Kiris-neb nins sẽn yaa pe-kɩɩmbã segd n dɩka “pe-kɩɩm-sõng” a Zezi togs-n-taare. (Zã 10:11) Wẽnnaam piisã neer yell sɩd ra paka a Zezi. A sẽn yeel a Sɩmo Pɩɛɛr to-to t’a ‘gʋʋl a piisã’ wilgdame tɩ piisã yell gesg sɩd tara yõod wʋsg a nifẽ. (Karm-y Zã 21:15-17.) La yaa rũndã-rũndã la piisã rat gũub n yɩɩda, bala a Sʋɩtãan maooda a pãng tɛk masã n dat n kɩt tɩ b bas Wẽnnaam sakre. A tũnugda ne ninsaal pãn-komsmã la bũmb nins sẽn be dũniyã pʋgẽ wã n dat n kɩt t’a Zeova piisã maan yel-wẽna. (1 Zã 2:15-17; 5:19) Yaa sẽn bas-b tigingã la a Sʋɩtãan tõe n paam faag-faag n yɩɩda. Woto yĩnga, b segd n sõng-b lame tɩ b mao n tũ saglg ning sẽn yet tɩ d kẽn ne vʋʋsem sõngã. (Gal. 5:16-21, 25) D sã n dat n sõng nin-kãensã, rẽndame tɩ d teeg Wẽnnaam ne d sũur fãa, n kos t’a kõ-d a vʋʋsem sõngã, la a vẽneg-d tɩ d tõog n tall a Gomdã n tʋm sõma.—Yel. 3:5, 6; Luk 11:13; Heb. 4:12.
7. Bõe yĩng tɩ kãsem dãmbã segd n ges piisã b sẽn gũnug-bã yell neere?
7 Pĩnd wẽndẽ wã, Israɛlle, pe-kɩɩm da zãada rasaar a sẽn tar n kokd a rũmsã. A sã n da wa kẽesd a piisã wall a yiisd-ba, a yalsda yãgrã noor n tees a rasaarã, t’a piisã “loogd dasaarã tẽngr” yembr-yembre, t’a tõe n paam n sõd-ba. (Maan. 27:32; Mii. 2:12; 7:14) Wa pe-kɩɩma, kãsem soab me segd n bãnga Wẽnnaam bãgrã piis fãa la b yembr-yembr sõma, n tõog n ges b yell neere. (Ges-y Yelbũna 27:23.) Rẽ n so tɩ tigingã neb yell gesg naag bũmb nins sẽn kɩtd tɩ kãsem dãmbã nong n tigimd taab n sõsdã sʋka. Sasa kãense, b mi n dɩka segls sẽn na yɩl n sõng sẽn bas-b bãgrã. A Zeova ra yeelame t’a na n baoa a piisã a toor la a gʋʋl-ba. (Eze. 34:11) Dẽnd kãsem dãmbã me sã n maood n dat n sõng sẽn bas-b bãgrã tɩ b lebg n wa, nooma a Zeova.
8. Wãn-wãn la kãsem dãmbã tõe n sõng piisã?
8 D tẽed-n-taag sã n ka laafɩ, Wẽnnaam piisã pe-kɩɩm ninga sã n tɩ kaag-a, tõe n yɩ-a-la noog la keng a raoodo. Sẽn bẽed-a tẽebã wɛɛngẽ me sã n paam kaagr a woto, na n sõng-a lame. Kãsem dãmbã tõe n karma verse rãmb wall b lebs n karem sõsg d sebr ning pʋgẽ t’a kelge. B tõe n taas-a-la sagls kẽer d sẽn paam tigisg sasa, b tõe n pʋʋsa ne-a me, wall b maan bũmb a taaba. B tõe n wilg-a lame tɩ tigingã neb sũy na n yɩɩ noogo, a sã n lebs n sɩng tigissã waoongo. (2 Kor. 1:3-7; Zak 5:13-15) Ned a woto sã n paam kaagr wall a paam tɩ b sõs ne-a telefõnnẽ, pa rẽ bɩ b gʋls-a lɛtre, tõe n sõng-a-la wʋsgo! Sẽn paase, kãsem soab sã n wa sõngd pesg sẽn bas bãgrã, a me sũ-noogã paasdame.
D fãa tõe n sõng-b lame
9, 10. Bõe yĩng tɩ y tõe n yeel tɩ pa kãsem dãmbã bal n segd n wilg tɩ sẽn bas-b tigingã yell pak-b lame?
9 D sẽn vɩ tood wakat tɩ sẽkã paoong lebg toogã yĩnga, d tẽed-n-taag tõe n wa basda tigingã tɩ d pa miẽ ye. (Heb. 2:1) La a Zeova nonga a piisã wʋsgo. B ned kam fãa tara yõod wa ninsaal yĩngã will fãa sẽn tar yõodã. Rẽ n so tɩ d segd n wilg tɩ d saam-biisã yell pak-d lame, n get taab yell neere. (1 Kor. 12:25) Rẽ yĩnga y maanda woto bɩ?
10 Yaa sɩd tɩ sẽn yɩɩd fãa, yaa kãsem dãmbã n segd n bao neb nins sẽn bas tigingã la b sõng-b tɩ b lebg n wa. La pa kãsem dãmbã bal n segd n wilg tɩ b yell pak-b lame ye. Neb a taabã me tõe n sõnga kãsem dãmbã. D fãa tõeeme la d pʋd n segdame n keng d saam-biis nins sẽn bas tigingã raoodo, la d sõng-b tɩ b lebg n wa d sʋka. Wãn-wãn la d fãa tõe n naag n sõng-ba?
11, 12. Y tõe n paamame tɩ b kɩt tɩ y maan bõe n sõng ned sẽn bas tigingã?
11 Ned sẽn bas tigissã la koɛɛgã mooneg sã n wa wilg t’a rata sõngre, kãsem dãmbã mi n dɩka segls n kɩt tɩ koe-moond sẽn tar minim lebs n zãms Biiblã ne-a. Woto yaa sẽn na yɩl n sõng-a t’a lebs n paam a “pipi nonglmã.” (Wil. 2:1, 4) B sã n naag-a n vaees sõss kẽer a sẽn pa paam n kelg a sẽn ye pa wat tigissã yĩnga, tõe n kenga a raood la paas a tẽebo.
12 Kãsem dãmbã sã n kos-y tɩ y zãms Biiblã ne saam-biig sẽn dat sõngr bɩ y pʋʋs a Zeova n kos-a t’a ning y modgrã bark la a sõng-yã. Sɩd bas-y ‘yɛlã fãa ne a Zeova t’a na n sõng-y lame tɩ y tõoge.’ (Yel. 16:3) Bʋgs-y yɛl kẽer zugu. Wala makre, verse rãmb la goam sẽn be sebrã pʋgẽ n tõe n keng a raoodo, n tõog n tik rẽ n sõng-a sõma. Bʋgs-y tʋm-tʋmd a Poll mak-sõngã zugu. (Karm-y Rom dãmba 1:11, 12.) A Poll da yãgdame n dat n yã Rom kiris-nebã n paam n kõ-b kũun sẽn na n paas b tẽebã pãng n kɩt tɩ b kɩ yẽga. A leb n da yãgdame n na n ta tɩ b keng taab raoodo. D sã n dat n sõng sẽn bas-b bãgrã tɩ b lebg n wa Wẽnnaam nin-buiidã sʋka, d me segd n talla yam kãngã.
13. Bõe yell la y tõe n sõs ne ned sẽn bas tigissã kẽnd la koe-noogã moonego?
13 Y sã n wa zãmsd Biiblã ned sẽn bas tigissã kẽnd la koe-noogã moonego, y tõe n sok-a-la sẽn sɩng to-to t’a bãng sɩdã. Maan-y yam n kɩt t’a tẽeg sũ-noog ning a sẽn da tar a sẽn wa n maand a Zeova raabã. Kɩt-y t’a wilg tigissã, koe-moonegã la tigis-kãsemsã sẽn da noom-a to-to. Y sã n da vɩɩmda yel-nood ne taab bɩ y tẽeg-a kẽere. Gom-y ne-a y zoodã ne a Zeova wã sẽn kõt-y sũ-noog ningã yelle. (Zak 4:8) Y tõeeme me n wilg-a mi-beoog ning y sẽn tar ne Wẽnnaam a sẽn get d yell to-to wã yĩnga. Sẽn yɩɩd fãa, a sẽn belsd tõnd d toog fãa pʋgẽ la a sõngd-d tɩ d gũud d tẽebã pidsgã.—Rom 15:4; 2 Kor. 1:3, 4.
14, 15. Sẽn na yɩl n sõng kiris-neb nins sẽn bas tigingã, bark bʋs b sẽn da tar yell la d tõe n tẽeg-ba?
14 D sã n tẽeg ned sẽn bas tigingã bark nins a sẽn da paamd a sẽn da wa n ket n kẽnd tigissã la a moond koɛɛgã, rẽ me tõe n sõng-a lame. Wala makre, b sã n tẽeg-a a sẽn da paamd n bãngd Wẽnnaam Gomdã la a raabã n paasdẽ wã. (Yel. 4:18) A kẽnã sẽn da zemsd ne vʋʋsem sõngã me ra kɩtdame t’a tõe n mao ne yel-wẽnã maaneg tʋlsem sõma. (Gal. 5:22-26) Woto ra kɩtame t’a tar sũur kaset sẽn pa ningd-a taale, n tõe n pʋʋs a Zeova n paam a laafɩ wã sẽn yɩɩd nebã bãngr fãa n gũud d sũyã la d tagsgã Kirist Zezi maasem yĩngã. (Fil. 4:6, 7) Ning-y woto fãa y yamẽ la y wilg tɩ y sɩd rata saam-biigã wall saam-bi-poakã neere, n mao n keng a raood t’a lebg n wa a taabã sʋka.—Karm-y Filip dãmba 2:4.
15 D rɩk makr wa y sã n yaa kãsem soab n kẽng n na n tɩ kaag saam-biig ne a pag sẽn bas tigissã kẽnd la koɛɛgã moonego. Y tõe n sagl-b lame tɩ b bʋgs b sẽn da wa n zãms Wẽnnaam Gomdã n bãng sɩdã paalmã zugu. Vẽenega, b pẽga hal wʋsg la b mik tɩ sɩdã yols-b lame. (Zã 8:32) B sẽn bãng a Zeova sẽn yaa a soab n bãng t’a nong-b lame la b bãng a raabã sẽn tar bark wʋsgã, hakɩka b kɩdmame! (Ges-y Luk 24:32.) Tẽeg-y-b zood ning kiris-nebã sẽn tar ne Wẽnnaamã, la b sẽn paam n tõe n pʋʋs-a wã. Modg-y n sõng-y sẽn bas-b tigissã kẽnd la koɛɛgã moonegã tɩ b lebs n sak ‘Wẽnnaam a Zeova sẽn yaa sũ-noog soabã koe-noogo.’—1 Tɩm. 1:11, NW.
Ket-y n wilgd-y tɩ y nong-b lame
16. Togs-y kibar sẽn wilgd tɩ b sã n sõng ned sẽn dat sõngr tẽebã wɛɛngẽ, sɩd womda biisi.
16 Rẽ yĩnga sagls nins fãa d sẽn wʋmã sɩd tõe n sõnga ned bɩ? Hakɩka, b tõeeme. Makre, bi-bɩɩg a ye sẽn lebg koe-moond a yʋʋm 12 n wa n bas tigingã a yʋʋm 15 sasa. Kaoosg zugẽ, a lebg n waame, n yaa so-pakd hal sẽn yɩɩd yʋʋm 30 masã. La sẽn sõng-a n yɩɩd yaa kãsem soab a ye sagls la a sõngre. A sũur sɩd yɩɩ noog wʋsg ne sõngr ning a sẽn paamã!
17, 18. Zʋg-sõma bʋs n na n kɩt tɩ y tõog n sõng ned sẽn bas tigingã?
17 Yaa kiris-nebã sẽn nong sẽn bas-b tigingã yĩng n kɩt tɩ b sõngd-b n dat tɩ b lebg n wa b sʋkã. A Zezi ra yeela a karen-biisã woto: “Mam kõta yãmb tõog paalga. Bɩ yãmb nong taaba. Bɩ y nong taab wa mam sẽn nong yãmbã. Yãmb sã n nong taaba, nebã fãa na n bãngame tɩ yãmb yaa mam karen-biisi.” (Zã 13:34, 35) Sẽn yaa kiris-nebã sẽn nong taabã yĩng n kɩt tɩ b mi-b n bakã, pa segd tɩ d wilg sẽn bas-b tigingã tɩ d nong-b lame sɩda? Yaa vẽeneg tɩ segdame. La d sã n na n sõng nin-kãensã, rẽndame tɩ d tall zʋg-sõma a taab me.
18 Y sã n dat n sõng ned sẽn bas tigingã, zʋg-sõma bʋs me la y segd n talle? Nonglmã toor sẽn ka be, y segd n yɩɩ nimbãan-zoɛta, wʋmda, sũ-mar soab la maag-m-meng soaba. Tõe n mi n baoodame me tɩ y yɩ sugr soaba. Tʋm-tʋmd a Poll yeela woto: “Bɩ y paas nimbãan-zoeer wʋsgo, la neerlem ne sik-m-menga la sũ-bʋgsem ne sũ-mare. Bɩ y maan sũ-mar ne taaba, la y kõ taab sugri, ned sã n tar yell ne a to, a wa [a Zeova, NW ] sẽn kõ yãmb sugrã, bɩ yãmb me kõ taab sugr woto. La sẽn paas bõn-kãens fãa, bɩ y maan nonglem sẽn yaa bũmb fãa loɛtg sɩd-sɩdã.”—Kol. 3:12-14.
19. Bõe yĩng tɩ tar yõod tɩ d mao n sõng kiris-neb nins sẽn bas tigingã tɩ b lebg n wa?
19 Sõsg ning sẽn pʋgdã na n wilga bʋʋm nins sẽn kɩtd tɩ kiris-nebã sãnda basd tigingã, la d sẽn tog n deeg sẽn lebgd-b n wat d sʋkã to-to wã me yelle. Y sã n wa tũud sõs-kãngã la sẽn pʋgd-a wã sagls n baood y sẽn tõe n maaneg n sõng ned sẽn bas tigingã, bɩ y bãng tɩ y modgrã tara yõod wʋsgo. Dũni kãngã pʋgẽ, wʋsg sakd n dɩka b vɩɩmã tõr n bao arzɛka, la ned vɩɩm yõod yɩɩda dũniyã arzɛk fãa gilli. A Zezi sɩd wilga rẽ a kibar ning pʋgẽ a sẽn gomd pe-kɩɩm pesg sẽn menem yellã. (Mat. 18:12-14) Woto yĩng bɩ y mao n ket n ningd rẽ y yamẽ, la y kell n wɩng ne a Zeova piis nins sẽn bas bãgrã baoobo.
Wãn to la y na n leoke?
• Bõe la kãsem dãmbã segd n maan n sõng kiris-neb nins sẽn bas tigingã?
• Bõe la y tõe n maan n sõng kiris-ned sẽn bas tigingã?
• Zʋg-sõma bʋs n na n kɩt tɩ y tõog n sõng sẽn bas-b tigingã?
[Zãmsgã sogsgã]
[Foto, seb-neng 17]
Kãsem dãmbã maood n sõngda neb nins sẽn bas tigingã sẽn na yɩl tɩ b lebg n wa