Tulongan Iramay Nisian ed Pulok na Dios
Tulongan Iramay Nisian ed Pulok na Dios
“Miliket kayo ed siak, ta aromog ko so karnerok ya abalang.”—LUC. 15:6.
1. Panon ya apaneknekan nen Jesus a sikatoy maaron managpastol?
SAY bogbogtong ya Anak nen Jehova, si Jesu-Kristo, so atawag a “sankabalgan a pastol na saray karnero.” (Heb. 13:20) Impasakbay la na Kasulatan so isabi to, tan imparungtal na satan a sikatoy nikadkaduman Managpastol lapud anapen to ray “abalang a karnero” na Israel. (Mat. 2:1-6; 15:24) Kaaruman ni, singa ed sakey a literal a managpastol a mangisakripisyo na bilay to pian salimbengan iray karnero to, inatey si Jesus bilang dondon bagat parad saray kinmarneron totoo a malabay a nagunggonaan ed satan a bagat to.—Juan 10:11, 15; 1 Juan 2:1, 2.
2. Antoray posiblin rason no akin a nagmaliw ya inaktibo so arum a Kristiano?
2 Balet makapaermen ta arum ed saray ompatnag a mangaapresya ed bagat nen Jesus tan angidedikay bilay da ed Dios et tinmunda lan milimog ed Kristianon kongregasyon. Say impakadismaya, saray problema ed bunigas, odino arum ni, so rason no akin ya agla ira maseseg tan nagmaliw iran inaktibo. Bangbalet, napanliketan da lambengat so kareenan tan gayagan sinalambit nen David diad koma-23 a libro na Salmo no magmaliw iran kabiangan na pulok na Dios. Singa bilang, inkanta to: “Si Jehova so managpastol ed siak, agak naani onkulang.” (Sal. 23:1) Saramay wala ed pulok na Dios et kompleto ed amin a nakaukolan da pian napansiansia so malet a relasyon ed Dios, balet ta aliwan ontan so kipapasen na saramay nisian a karnero. Siopay nayarin onasisti ed sikara? Panon irayan natulongan? Tan, anto so nepeg a gawaen pian natulongan iran makapawil ed pulok?
Siopay Nayarin Ontulong?
3. Panon ya impanengneng nen Jesus no antoy nakaukolan pian nipawil so abalang a karnero ed pulok na Dios?
3 Kaukolan so masimoon a pansagpot pian nipawil so abalang a karnero ed pulok na Dios. (Sal. 100:3) Inyilustra iya nen Jesus sanen inkuan to: “Siopaman a too a walay sanlasus a karnero to, et abalang so sakey ed sikara, agto ta taynan so saray siamaplo tan siam, tan onla ed saray palandey, tan anapen to so abalang? Et no nagawa a sikatoy naalmo to, tua kuan ko’d sikayo, a sikato so panliketan to a mapalalo nen saray siamaplo tan siam ya ag-ira abalang. Ontan met ya agkaliktan nen Ama yo a wala ed tawen, a sakey ed sarayan angkekelag ya ugugaw et natawtaw.” (Mat. 18:12-14) Siopa so nayarin ontulong ed sarayan kinmarneron totoo a nisian ed pulok?
4, 5. Anto so nepeg a panmoria na saray mamatatken ed pulok na Dios?
4 Pian natulongan iramay nisian a karnero, kaukolan a nonoten na saray Kristianon mamatatken a say pulok na Dios et sakey a kongregasyon na saray totoo a dedikado ed si Jehova. On, sakey a mablin ‘pulok na Dios.’ (Sal. 79:13, NW) Mankaukolan na matamoy a panangasikaso irayan inad-aron karnero, a kabaliksan na saya a saray maaron managpastol et nepeg a nawalaan na personal ya interes ed sikara. Nayarin say maaron ibisita ed sikara et makatulong a maong. Say maaron panamaseseg ya iter na sakey a pastol et nayarin mamabiskeg ed espiritualidad da tan ed pankaliktan dan makapawil ed pulok na Dios.—1 Cor. 8:1.
5 Saray managpastol ed pulok na Dios et walaan na responsabilidad ya anapen iramay nisian a karnero tan panggunaetan iran tulongan. Impanonot nen apostol Pablo ed saray Kristianon mamatatken ed kadaanan ya Efeso so responsabilidad dan pastolan so pulok na Dios, sanen inkuan to: “Alwaran yo so inkasikayon dili, tan say amin a kasimpukokan ya anginan na espiritu santo ed sikayo a managbantay, pian pastolan yo so [kongregasyon] na Dios, a sikato so sinaliw to ed dala ton dili.” (Gawa 20:28) Ontan met, inter nen apostol Pedro iyan panamaseseg ed saray alanaan a mamatatken: “Pastolan yo so saray pulok na Dios a wala ed sikayo, pampagaan yo ra ya ag-iparalan ed kabiskegan, noag dia ed kalakal a mabulos unong ed linaway Dios; aliwa a lapud mabanday a pananubo noag lapud ataryan kalakal. Ni say pakatawan kayo ed nimatalek a nitanda’d sikayo, noag ingen gawaen yoy inkasikayo a pinagkauliran a tumboken na saray pulok.”—1 Ped. 5:1-3.
6. Diad panaon tayo, akin et nagkalalo lan kaukolan na saray karnero na Dios so panangasikaso na saray pastol?
6 Kaukolan ya aligen na saray Kristianon pastol si Jesus, say “maong a pastol.” (Juan 10:11) Sikatoy mapagan maong ed pankaabigan na saray karnero na Dios tan indanet toy kaimportantian na pangasikaso ed sikara sanen inkuan to’d si Simon Pedro a pastolan iray angkekelag a karnero To. (Basaen so Juan 21:15-17.) Nagkalalo lan mankaukolan na ontan a panangasikaso iray karnero natan, lapud say Diablo et mas lalon mamapasya pian buyaken so katooran na saramay dedikado ed Dios. Aanamoten nen Satanas iray kakapuyan tayo ed laman tan uusaren to so impluensya na sayan mundo pian napilanor iray karnero nen Jehova ed saray mauges a kagagawa. (1 Juan 2:15-17; 5:19) Saray inaktibo et mas mainomay ya atakien na kabusol nen say dinanman a kabiangan na pulok, kanian mankaukolan ira na tulong pian niyaplika da so panonot a ‘manakar unong ed espiritu.’ (Gal. 5:16-21, 25) Say panulong ed sarayan karnero et mankaukolan na panagmatalek ed Dios tekep na pikakasi, panangiwanwan na masanton espiritu to, tan say maong a panangusar ed Salita to.—Uli. 3:5, 6; Luc. 11:13; Heb. 4:12.
7. Panon kaimportante parad saray mamatatken a pastolan iray nipiya ed sikara?
7 Say sakey a managpastol ed kadaanan ya Israel et manguusar na tayukor odino baston pian igiya so pulok. Sano ompaway odino onloob iray karnero ed kulongan da, saraya et “onlabas ed silong na tayukor” pian nabilang ira na managpastol. (Lev. 27:32; Miq. 2:12; 7:14) Ontan met so kaukolan a gawaen na Kristianon managpastol, a nepeg a kabkabat to so pulok na Dios a walad panangasikaso to tan amta to no antoy kipapasen na balang sakey ed sikara. (Ikompara so Uliran 27:23.) Kanian say panagpastol et sakey ed saray importantin bengatla a pantotongtongan na saray ulop na mamatatken. Kalaktip na saya so pamplano a manulong ed saray karnero a nisian. Inkuan a mismo nen Jehova a sikato so mananap ed karnero to tan iter ed sikara so nakaukolan dan panangasikaso. (Eze. 34:11) Kanian say Dios et peteg a naliliketan no ontan met so gagawaen na saray mamatatken pian tulongan iramay nisian a karnero a makapawil ed pulok.
8. Diad antoran paraan a naikdan na saray mamatatken na personal ya atension so sakey a karnero?
8 Sano mansasakit so sakey a kapananisiaan, say ibisita na sakey a managpastol ed pulok na Dios et nayarin panlapuan na liket tan panamaseseg. Ontan met so nayarin nagawa no ikdan na personal ya atension so sakey a karneron mansasakit ed espiritual. Nayarin basaen na matatken so kasulatan, manrepaso na sakey ya artikulo, mangonsidera na saray importantin punto ya apantongtongan ed saray miting, manpikasi a kaiba ra, tan arum ni ra. Nayari dan ipaliwawa ed samay inaktibo a saray agagi ed kongregasyon et naliketan no nanengneng dan sikatoy onatendi lamet ed saray pantitipon ed kongregasyon. (2 Cor. 1:3-7; Sant. 5:13-15) Say ibisita, itawag ed telepono, pan-text, odino pansulat et talagan makatulong! Say pangiter na personal a tulong ed sakey a karnero a nisian ed pulok na Dios et mamadaak met ed liket na samay maabagey a Kristianon pastol.
Amin Tayo et Makatulong
9, 10. Akin et nibaga yon say pangipanengneng na interes ed saray karnero a nisian et aliwan parad saray mamatatken labat?
9 Manbibilay itayo ed okupado tan mapeligron panaon, kanian no maminsan et agtayo naiimano a wala la ray kapananisiaan tayo a nikakasipa ed kongregasyon. (Heb. 2:1) Bangbalet, sarayan karnero et pinabpabli nen Jehova. Balang sakey et makana, a singa met ed balang kabiangan odino parte na laman. Kanian, kaukolan ya amin tayo et mangipanengneng na interes ed saray agagi tayo tan sigpot a mangiyansakit ed balang sakey. (1 Cor. 12:25) Kasin walaan kayo na ontan ya ugali?
10 Anggaman manunan responsabilidad na saray mamatatken so pananap tan panulong ed saray nisian a karnero, say pangipanengneng na interes ed sarayan kapananisian et aliwan parad saray Kristianon manangasikaso labat. Sarag met na arum so mikoopera ed sarayan managpastol. Sarag tan nepeg tayon mangiyopresi na panamaseseg tan espiritual a tulong ed saray agagi tayon mankaukolan na tulong pian makapawil ed pulok. Panon tayo iran naasistian?
11, 12. Panon kayon nayarin naikdan na pribilehyo a tulongan so sakey ya inaktibon kapananisiaan?
11 Walaray arum a pankanawnawa ya iyarunsa na saray mamatatken a saray eksperiensyadon manangipalapag na Panarian so mangiyaral na Biblia ed saray inaktibo a mankaliktan na tulong. Say gagala na ontan a kundang et pian liingen lamet so ‘akauna ya aro ra.’ (Apo. 2:1, 4) Napabiskeg so espiritualidad na sarayan kapananisiaan tan napaseseg ira panamegley na pangirepaso ed saray inaral a materyal ya agda nadngelan ta anggapo ra ed kongregasyon.
12 No kinatongtong kayo na saray mamatatken ya iyaralan yoy sakey a kapananisiaan a mankaukolan na espiritual a tulong, ipikasin iwanwan tan tulongan nen Jehova iray sagpot yo. Diad katuaan to, no “imatalek mo so saray kimey mo ed Jehova, et saray kanonotan mo niletneg ira.” (Uli. 16:3) Dalepdepen iray teksto ed Biblia tan makapabiskeg na pananisia iran punto a sarag yon usaren ed panagaral pian pasesegen iramay mankaukolan na espiritual a tulong. Morekdeken pa so alay abig ya ehemplo nen apostol Pablo. (Basaen so Roma 1:11, 12.) Kaliktan a maong nen Pablo a nanengneng iray Kristiano ed Roma pian makapangiter na espiritual a regalon mamabiskeg ed sikara. Tan sikatoy maniilalo ed pakapanpapasesegan da. Agta kaukolan tayo so ontan ya espiritu sano tulongan tayo iramay nisian ed pulok na Dios?
13. Anto so nayarin itongtong yo ed sakey ya inaktibo?
13 Nayari yon itepet so onia legan na panagaral yo, “Panon mon naamtaan so katuaan?” Tulongan iran nanonotan lamet so liket a nalilikna ra sanen manlilingkor ni ra ed si Jehova. Pasesegen so inaktibo ya ibalikas iramay makapaliket a naeksperiensya to ed saray miting, diad panagpulong a kimey, tan diad saray kombension. Salambiten iramay makapaliket a pankanawnawa sanen sankaiba kayo diad panaglingkor ed si Jehova. Ibalikas so nalilikna yon liket legan kayon onaapit ed si Jehova. (Sant. 4:8) Ibalikas yoy pisasalamat yo’d pangitatarya nen Jehova na pankaukolan tayo bilang totoo to, nagkalalo la’d pangiiter To na ilalo tan ligliwa diad saray kairapan tayo.—Roma 15:4; 2 Cor. 1:3, 4.
14, 15. Antoran bendisyon a datin walad saray inaktibo so nayarin ipanonot tayo ed sikara?
14 Nayari met a makatulong no ipanonot tayo’d inaktibo so arum a bendisyon a datin panliliketan to bilang resulta na aktibon pililimog to ed kongregasyon. Singa bilang, sakey ed saratan et say idaraak na kakabatan to’d Salita na Dios tan saray gagala To. (Uli. 4:18) Sanen sikato ni manaakar ‘unong ed espiritu,’ seguradon mas mainomay ton naresistian iray tukso a mankasalanan. (Gal. 5:22-26) Bilang resulta, sikatoy awalaan na malinis a konsiensia ya akatulong ed sikaton onasingger ed si Jehova diad pikakasi tan panliketan so ‘deen na Dios, a talonaan ton amin a pakatalos tan bantayan to so kapusoan tan saray nonot tayo.’ (Fil. 4:6, 7) Lawas nonoten irayan punto, mangipanengneng na masimoon ya interes, tan gawaen so anggaay nayarian tayon maaron pasesegen iray agagi tayo ed espiritual ya ompawil ed pulok na Dios.—Basaen so Filipos 2:4.
15 No bilang ta sakey kayon matatken a manggagawa na panagpastol a kimey, nayari yon pasesegen so sanasawan inaktibo a nonoten imay panaon sanen unaan dan akabatan so katuaan manlapud Salita na Dios. Agaylan dakep, makatunongan, makapnek itan a katuaan tan imbulos itayo na satan manlapud saray palson bangat! (Juan 8:32) Talagan agnasabaan na puso ra so pisasalamat ed naaaralan da nipaakar ed si Jehova, say panangaro to, tan saray alay abig a gagala To! (Ikompara so Lucas 24:32.) Ipanonot ed sikara so maapit a relasyon ed si Jehova tan say marakdakep a pribilehyo na pikakasi a walad saray dedikadon Kristiano. Panseetan a pasesegen iray inaktibo ya onkiwas lamet unong ed “ebanghelyo na gloria na [maliket] a Dios,” si Jehova.—1 Tim. 1:11.
Mantultuloy ya Ipatnag ed Sikaray Panangaro
16. Manalambit na sakey ya alimbawa a mamaneknek a talagan epektibo so pangiter na espiritual a tulong.
16 Kasin epektibo iray asalambit a suhestion? On. Singa bilang, sakey a malangwer a manangipalapag na Panarian a ginmapon manserbi sanen sikatoy manedad na 12 so nagmaliw ya inaktibo sanen manedad na 15. Diad saginonor et nagmaliw lamet ya aktibo, tan diad loob la na masulok a 30 taon et sikatoy manlilingkor ed sigpot-panaon a kimey. Say inyabig to ed espiritual et lapud intulong na sakey a Kristianon matatken. Sikatoy talagan misalsalamat ed tulong a naawat to manlapud satan a matatken!
17, 18. Antoran kalidad so ontulong ed sikayon asistian so sakey a nisian ed pulok na Dios?
17 Say aro so mamapakiwas ed saray Kristiano ya asistian iray inaktibo a makapawil ed kongregasyon. Onia so imbaga nen Jesus nipaakar ed saray papatumbok to: “Sakey a balon ganggan so iter ko ed sikayo, a manaaroan so sakey tan sakey ed sikayo; salanti unong na impangarok ed sikayo, pian manaaroan met so sakey tan sakey ed sikayo. Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.” (Juan 13:34, 35) Tuan peteg a say aro et pakabidbiran na saray tuan Kristiano. Agta satan a panangaro et kaukolan ya ipanengneng ed saray bautismadon Kristiano a nagmaliw ya inaktibo? Talagan nepeg tayon ipatnag itan! Balet legan tayon tutulongan irayan inaktibo, kaukolan tayon ipatnag iray maridios a kalidad.
18 No ontulong kayo ed sakey a nisian manlapud pulok na Dios, antoran kalidad so kaukolan yon ipatnag? Nilikud ed aro, kaukolan yo met ya ipatnag so panangabagey, panangasi, kauyamoan, tan panagsungdo. Depende ed saray kipapasen, ompan kaukolan met ya akaparaan kayon mamerdona. Insulat nen Pablo: “Mampales kayo la sirin, a singa saray pinili Dios, sasanto tan inararo, sakey a puso a maabagey, maong a linawa, kauyamoan, kareenan, kasungdoan; mantetepelan so sakey tan sakey, tan manpeperdonaan so balang sakey, no say siopaman a too wala so pangidaleman to ed siopaman; unong ed impamerdona na Katawan ed sikayo, ontan met so gawaen yo: Tan lalo la ed saraya ya amin a bengatla ikawes yo so aro, a sikato so singer yo ed inkayadyari.”—Col. 3:12-14.
19. Akin a makanakana iray sagpot a panulong ed saray kinmarneron totoo a makapawil ed pulok na Dios?
19 Say ontumbok ya artikulo ed sayan isyu so mangonsidera ed saray rason no akin a nisian so arum manlapud pulok na Dios. Ipanengneng met na satan no antoy nailaloan dan pangawat ed sikara no bilang ta ompawil la ra ed kongregasyon. Legan yon aaralen tan dadalepdepen itan ya artikulo, napaseguroan kayon walay gunggona na antokaman a sagpot yo pian natulongan so sakey a karnero a makapawil ed pulok na Dios. Diad sayan peles a sistema na bengabengatla, dakel a totoo so manguusar ed interon bilay da pian mantipon na kayamanan, balet say bilay na sakey et mas mabli nen say balor na amin a kuwarta ed mundo. Indanet iya nen Jesus ed samay ilustrasyon to nipaakar ed abalang a karnero. (Mat. 18:12-14) Lawas yo komon a nonoten itan legan a maseet tan maganat yon pansasagpotan a tulongan iramay pinablin kinmarneron totoo nen Jehova a makapawil ed pulok na Dios.
Panon Mon Ebatan?
• Anto so responsabilidad na saray Kristianon managpastol ed saray karnero a nisian ed pulok na Dios?
• Panon yon nayarin natulongan iramay agla mililimog ed kongregasyon?
• Antoran kalidad so ontulong ed sikayon asistian iramay nisian ed pulok na Dios?
[Tepetepet Parad Panagaral]
[Litrato ed pahina 10]
Saray Kristianon managpastol et maseeseet tan maaron ontutulong ed saramay nisian ed pulok na Dios