Yuda Esnan Ku Dual Bai for di e Tou
Yuda Esnan Ku Dual Bai for di e Tou
“Regosihá huntu ku mi, pasobra mi a haña mi karné ku a pèrdè!”—LUK. 15:6.
1. Kon Hesus a demostrá ku e ta un wardadó amoroso?
BEIBEL ta yama Yehova su Yu unigénito, Hesukristu, “e gran wardadó di e karnénan.” (Heb. 13:20) Ademas, e Skritura a profetisá di su binida i a mustra ku e tabata un Wardadó spesial ku a buska e “karnénan pèrdí” di Israel. (Mat. 2:1-6; 15:24) Es mas, meskos ku un wardadó literal lo por duna su bida pa protehá su karnénan, Hesus a entregá su bida komo un sakrifisio di reskate pa hende semehante di karné ku lo benefisiá di su sakrifisio.—Juan 10:11, 15; 1 Juan 2:1, 2.
2. Kiko por a pone ku algun kristian a bira inaktivo?
2 Lamentablemente, algun hende ku a parse di ta apresiá e sakrifisio di Hesus i ku a dediká nan mes na Dios no ta asosiá mas ku e kongregashon kristian. Podisé, desanimashon, problema ku salú òf otro faktornan a mengua nan zelo i a pone ku nan a bira inaktivo. Pues, nan a stòp di asistí na e reunionnan i di partisipá den sirbishi. Sinembargo, ta solamente ora nan ta forma parti di e tou di Dios, nan por disfrutá di e trankilidat i felisidat ku David a papia di dje den Salmo 23. Por ehèmpel, el a kanta: “[Yehova] ta mi Wardador, lo mi no tin falta di nada.” (Sal. 23:1) Personanan ku ta den e tou di Dios no ta falta nada den sentido spiritual, pasobra nan ta haña tur loke nan tin mester pa mantené un bon relashon ku Dios. Pero esei no ta e kaso ku e karnénan ku a dual. Ken por yuda nan? Kon por yuda nan? Kiko otronan por hasi spesífikamente pa yuda nan bolbe na e tou?
Ken Por Yuda Nan?
3. Kon Hesus a ilustrá loke ta nesesario pa reskatá Dios su karnénan pèrdí?
3 Esfuerso sinsero ta nesesario pa reskatá Dios su karnénan ku ta pèrdí. (Sal. 100:3) Hesus a ilustrá esaki ora el a bisa: “Si un hende tin shen karné, i ún di nan a pèrdè, e no ta laga e nobent’i nuebenan riba e serunan i bai buska esun ku a pèrdè? I si sosodé ku e hañ’é, di bèrdat mi ta bisa boso, e ta regosihá mas pa motibu di esun ei, ku pa motibu di e nobent’i nuebenan ku no a pèrdè. Asina anto, no ta e boluntat di boso Tata ku ta den shelu pa ún di e chikitunan akí peresé.” (Mat. 18:12-14) Ken por yuda personanan semehante di karné ku a dual bai for di e tou?
4, 5. Ku ki aktitut ansianonan mester trata e tou di Dios?
4 Si ansianonan kristian ke yuda karnénan ku a dual, nan tin ku tene na mente ku e tou di Dios ta un kongregashon di hende dediká na Yehova. Sí, e ta un presioso tou di ‘karné ku Dios ta pastoriá.’ (Sal. 79:13) E karnénan stimá ei tin mester di kuido tierno, i esaki ta nifiká ku wardadónan amoroso mester mustra interes personal den nan. Bishitanan di pastoreo plasentero por duna masha bon resultado. Animashon amoroso ku wardadónan ta duna por edifiká e rumannan akí su fe i oumentá nan deseo pa bolbe na e tou.—1 Kor. 8:1.
5 Wardadónan di e tou di Dios tin e responsabilidat di buska e karnénan ku a dual i despues purba yuda nan. Apòstel Pablo a rekordá ansianonan kristian di Efeso di antigwedat riba nan responsabilidat di pastoriá e karnénan ora el a bisa: “Presta atenshon na boso mes i na henter e tou, den kua e spiritu santu a nombra boso komo superintendente, pa pastoriá e kongregashon di Dios, kua el a kumpra ku e sanger di su propio Yu.” (Echo. 20:28, NW) Di mes manera, apòstel Pedro a duna ansianonan ungí e siguiente ekshortashon: “Pastoriá e tou di Dios meimei di boso, hasiendo e trabou di kuidadó, no fòrsá, ma boluntariamente, segun e boluntat di Dios; i no pa ganashi desonesto, sino ku hopi afan; no manera hende ku tin dominio riba esnan ku a wòrdu konfiá na boso, ma siendo ehèmpel pa e tou.”—1 Ped. 5:1-3.
6. Dikon e karnénan di Dios tin mester di kuido di wardadónan spesialmente awendia?
6 Wardadónan kristian mester imitá Hesus, “e bon wardadó.” (Juan 10:11) E tabata masha preokupá pa e karnénan di Dios, i el a enfatisá ku ta importante pa kuida nan ora el a bisa Simon Pedro pa ‘pastoriá Su karnénan.’ (Lesa Juan 21:15-17.) Spesialmente awendia, e karnénan tin mester di e kuido ei, pasobra Diabel a intensifiká su esfuersonan pa kibra integridat di personanan dediká na Dios. Satanas ta probechá di debilidatnan karnal i ta usa atrakshon di su mundu pa enbolbé Yehova su karnénan den kosnan ku ta malu. (1 Juan 2:15-17; 5:19) Personanan inaktivo ta mas vulnerabel, i p’esei nan tin mester di yudansa pa nan por sigui e instrukshon pa “kana segun e spiritu.” (Gal. 5:16-21, 25) Pa nos por yuda personanan asina, nos mester hasi orashon, dependé riba Dios, sigui e guia di su spiritu santu i hasi bon uso di su Palabra.—Pro. 3:5, 6; Luk. 11:13; Heb. 4:12.
7. Pakiko ta importante pa ansianonan pastoriá hende semehante di karné ku ta bou di nan kuido?
7 Un wardadó den Israel di pasado tabata usa un garoti òf un bara largu pa guia su tou. Segun ku e karnénan tabata drenta òf sali for di e kurá, nan tabata ‘pasa bou di e bara’ pa asina e wardadó por a konta nan. (Lev. 27:32; Mik. 2:12; 7:14) Di mes manera, un wardadó kristian mester konosé e karnénan di e tou di Dios ku e tin bou di su kuido i sa tambe kon ta bai ku kada un di nan. (Kompará ku Proverbionan 27:23.) P’esei, e trabou di pastoreo ta un di e tópikonan importante ku kuerponan di ansiano ta konsiderá. Esaki ta enserá ku nan ta plania kon pa yuda karnénan ku a dual. Yehova mes a bisa ku lo el a buska su karnénan i duna nan e kuido ku nan tabatin mester. (Eze. 34:11, BPK) Pues, Dios ta keda kontentu ora ansianonan ta dal pasonan similar pa yuda karnénan ku a dual pa bolbe na e tou.
8. Den ki maneranan e ansianonan por duna atenshon personal na e karnénan?
8 Ora un ruman ta malu físikamente, un bishita di un wardadó di e tou di Dios por ta un fuente di goso i animashon. Esei por ta e kaso tambe ora un karné ku ta malu den sentido spiritual haña atenshon personal. Podisé e ansianonan por, entre otro, lesa tekstonan di Beibel, repasá un artíkulo, konsiderá puntonan importante ku a bini padilanti na e reunionnan i hasi orashon ku e persona inaktivo. Nan por laga e persona inaktivo komprondé ku miembronan di kongregashon lo keda kontentu di mir’é bèk na e reunionnan di kongregashon. (2 Kor. 1:3-7; Sant. 5:13-15) Un bishita, un yamada di telefòn òf un karta por yuda masha hopi mes! Ora un wardadó kristian kompasivo duna yudansa personal na un karné pèrdí, esaki por oumentá goso di e wardadó mes tambe.
Nos Tur Por Koperá
9, 10. Dikon lo bo bisa ku no ta ansianonan so mester mustra interes den un karné ku a dual?
9 Nos ta bibando den un tempu krítiko i ku hopi kos di hasi. Pues, por sosodé ku nos no ta ripará ku un ruman ta drif poko-poko bai for di e kongregashon. (Heb. 2:1, NW) Sinembargo, Yehova su karnénan ta masha presioso p’e. Kada un di nan tin balor, meskos ku kada miembro, òf parti di e kurpa humano. P’esei, nos tur mester mustra interes den nos rumannan i kuida nan bon. (1 Kor. 12:25) Abo tambe ta pensa asina?
10 Ounke ansianonan ta hiba delantera den buska i yuda karnénan ku a dual, no ta superintendentenan kristian so mester ta interesá den e rumannan akí. Otro kristiannan por koperá ku e wardadónan akí. Nos por i mester animá i duna yudansa spiritual na nos rumannan ku tin mester di esei pa bolbe na e tou. Kon nos por duna e yudansa ei?
11, 12. Ki oportunidat spesial lo bo por haña pa yuda un ruman ku tin mester di yudansa spiritual?
11 Den algun kaso, ansianonan kisas ta pidi publikadónan di Reino eksperensiá pa studia Beibel ku rumannan inaktivo ku a pidi yudansa. E propósito di e esfuersonan ei ta pa yuda rumannan asina rebibá nan “promé amor.” (Rev. 2:1, 4) Por edifiká i fortifiká fe di e rumannan akí dor di konsiderá ku nan informashon ku nan a pèrdè debí ku nan no tabata bai e reunionnan.
12 Si e ansianonan pidi bo pa studia ku un ruman ku tin mester di yudansa spiritual, resa pidi Yehova pa e dirigí i bendishoná bo esfuersonan. Sí, “pone tur loke bo hasi den man di SEÑOR, i bo plannan lo realisá.” (Pro. 16:3, BPK) Meditá riba tekstonan bíbliko i puntonan fortalesedor di fe ku bo por usa durante seshonnan di estudio ku rumannan ku tin mester di yudansa spiritual. Meditá riba apòstel Pablo su ekselente ehèmpel. (Lesa Romanonan 1:11 i 12.) Pablo a anhelá di mira e kristiannan na Roma pa e por a kompartí algun don spiritual ku nan pa asina fortifiká nan. Tambe el a spera ansiosamente pa nan ún animá otro. Nos mester tin e mesun aktitut ei ora nos ta hasi esfuerso pa yuda karnénan ku a dual bai for di e tou di Dios.
13. Kiko lo bo por konsiderá ku un ruman inaktivo?
13 Durante e seshonnan di estudio, lo bo por puntr’é: “Kon bo a haña e bèrdat?” Pa yuda e ruman inaktivo rekordá e goso ku e tabatin tempu ku e tabata sirbi Yehova, anim’é pa papia di e bon eksperensianan ku e tabatin na e reunionnan, den e trabou di prediká i na e kongresonan. Komentá kon dushi boso dos kisas a pasa sirbiendo Yehova huntu. Papia tokante e goso ku abo tin debí ku bo ta hala serka Yehova. (Sant. 4:8) Ekspresá bo gratitut pa e manera ku Dios ta perkurá pa nos komo su pueblo—spesialmente p’e manera ku e ta konsolá nos i duna nos speransa den nos aflikshonnan.—Rom. 15:4; 2 Kor. 1:3, 4.
14, 15. Lo ta bon pa rekordá rumannan inaktivo di ki bendishonnan ku nan a yega di disfrutá di dje?
14 Tin hopi chèns ku lo bo logra bon resultado si bo yuda e ruman inaktivo kòrda algun di e bendishonnan ku el a yega di disfrutá di dje debí ku e tabata un miembro aktivo di e kongregashon. Por ehèmpel, el a ser bendishoná ku mas i mas konosementu di Dios su Palabra i Su propósito. (Pro. 4:18) Ora e tabata ‘kana segun e spiritu,’ sin duda tabata mas fásil pa e resistí tentashon pa hasi piká. (Gal. 5:22-26) Komo resultado di esei, un konsenshi limpi a yud’é aserká Yehova den orashon i disfrutá di ‘e pas di Dios ku ta surpasá tur komprondementu i ku ta warda nos kurason i nos mente.’ (Fil. 4:6, 7) Tene e puntonan ei na mente, mustra interes sinsero den bo ruman spiritual i hasi tur esfuerso pa anim’é amorosamente p’e bolbe na e tou.—Lesa Filipensenan 2:4.
15 Suponé ku komo ansiano bo ta hasiendo un bishita di pastoreo. Lo bo por animá un parehá kasá ku ta inaktivo pa pensa riba e tempu ku nan a siña e bèrdat di e Palabra di Dios pa e promé bes. Nan no a haña ku e bèrdat tabata maravioso, rasonabel, satisfasiente i ku el a hasi nan liber? (Juan 8:32) Nan no tabata gradisidu pa loke nan tabata siña tokante di Yehova, su amor i su ekselente propósito? (Kompará ku Lukas 24:32.) Rekordá nan ku kristiannan dediká tin un relashon íntimo ku Yehova i tambe e privilegio maravioso di hasi orashon. Animá rumannan inaktivo sinseramente pa nan reakshoná atrobe riba ‘e evangelio glorioso di e Dios felis,’ Yehova.—1 Tim. 1:11.
Sigui Stima Nan
16. Menshoná un ehèmpel ku ta mustra kon esfuersonan pa yuda rumannan inaktivo por duna bon resultado.
16 E sugerensianan akí ta funshoná realmente? Sí. Por ehèmpel, un hóben ku a bira publikadó di Reino ora e tabatin 12 aña a bira inaktivo na edat di 15 aña. Sinembargo, despues el a bolbe bira aktivo i awor e tin mas ku 30 aña den e sirbishi di tempu kompletu. E echo ku el a bolbe bira un miembro aktivo di e kongregashon pa gran parti ta debí na e yudansa ku el a risibí di un ansiano kristian. El a apresiá e yudansa spiritual ei mashá!
17, 18. Ki kualidatnan lo bo tin ku desplegá pa yuda un ruman ku a dual bai for di e tou di Dios?
17 Ta amor ta motivá kristiannan pa yuda personanan inaktivo bolbe na e kongregashon. Relashoná ku su siguidónan, Hesus a bisa: “Un mandamentu nobo mi ta duna boso, pa boso stima otro, i meskos ku ami a stima boso, pa boso tambe stima otro. Na esaki tur hende lo sa ku boso ta mi disipel, si boso tin amor un pa otro.” (Juan 13:34, 35) Sí, amor ta un marka ku ta identifiká kristiannan berdadero. Nos no mester mustra e amor ei tambe na kristiannan batisá ku a bira inaktivo? Sigur ku sí! Pero pa nos por duna e yudansa nesesario, kisas nos tin ku desplegá vários kualidat kristian.
18 Ki kualidatnan lo bo tin ku desplegá pa yuda un ruman ku a dual bai for di e tou di Dios? Fuera di amor, lo bo tin ku desplegá kompashon, bondat, suavedat i pasenshi. Dependiendo di e sirkunstansianan, kisas bo mester ta un pordonadó tambe. Pablo a skirbi: “Bisti un kurason di kompashon, kariño, humildat, mansedumbre i pasenshi. I boso soportá otro i pordoná otro, si un di boso tin un keho kontra un otro; meskos ku Señor [Yehova] a pordoná boso, asina boso tambe mester hasi. I ademas di tur e kosnan akí bisti amor, kual ta e laso perfekto di unidat.”—Kol. 3:12-14.
19. Dikon ta bale la pena pa hasi esfuerso pa yuda hende semehante di karné bolbe na e tou di Dios?
19 E siguiente artíkulo den e edishon akí lo konsiderá motibunan pakiko algun ruman ta dual bai for di e tou di Dios. Ademas, lo e mustra ki resepshon esnan ku bolbe por ferwagt. Segun ku bo ta studia e artíkulo ei i ta reflekshoná riba esun akí, sea sigur ku kualke esfuerso ku bo hasi ku e speransa di yuda hende semehante di karné bolbe den e kongregashon kristian ta bale la pena. Den e sistema aktual di kosnan, hopi hende ta dediká henter nan bida na akumulashon di rikesa, pero bida di ún hende so ta bal muchu mas ku tur plaka na mundu. Hesus a enfatisá esaki den su ilustrashon di e karné pèrdí. (Mat. 18:12-14) Ohalá ku semper bo tene esaki na mente segun ku bo ta hasi esfuerso sinsero ku un sentido di urgensia pa yuda Yehova su sirbidónan stimá semehante di karné ku a dual bolbe na e tou.
Kon Lo Bo Kontestá?
• Ki responsabilidat wardadónan kristian tin pa ku hende semehante di karné ku a dual bai for di e tou?
• Kon abo lo por yuda rumannan ku aktualmente no ta asosiá ku e kongregashon?
• Ki kualidatnan bo mester tin pa yuda rumannan ku a dual bai for di e tou?
[Preguntanan di Estudio]
[Plachi na página 12]
Na un manera amoroso, wardadónan kristian ta hasi esfuerso pa yuda rumannan ku a dual bai for di e tou di Dios