Tropamanta karunchakuqkunata yanapana

“Noqawan kusikuychej, imaraykuchus tarikapuni chinkasqa ovejayta.” (LUC. 15:6.)

1. ¿Imaynamantataq Jesús, munakuyniyuq michiq kasqanta rikuchirqa?

JEHOVAP phiwi churinta, ‘ovejaspa jatun Michiqnin’ nispa sutichakun (Heb. 13:20). Bibliaqa, Jesucristo kay Jallpʼaman jamuspa, Israelmanta ‘chinkasqa ovejasta’ tarinanpaq mayta maskʼasqanta nin, chayrayku aswan sumaq michiq sutikun (Mat. 2:1-6; 15:24). Michiqkunaqa ovejasninkuta jarkʼanankupaq kawsayninkutapis wañuypataman churaq kanku, kikillantataq Jesuspis llampʼu sunquyuq runasrayku kawsayninta wañuyman churarqa, kacharichisqa kanankurayku (Juan 10:11, 15; 1 Juan 2:1, 2).

2. ¿Imaraykutaq wakin hermanos qutuchakuymanta karunchakunku?

² Wakinkunaqa, Jesuspa wañuyninta may allinpaq qhawaspa, kawsayninkuta Diosman qurqanku, chaywanpis kunanqa qutuchakuymanta karunchakapunku. Paykunaqa, ichá unqusqankurayku chayri wak imasrayku, Diosta manaña tukuy sunqu yupaychasqankurayku ima, karunchakunku. Chaywanpis yuyarikunanchik tiyan, pikunachus tropamanta mana karunchakuqkunaqa, sunqu tiyasqas, kusisqastaq kasqankuta, David Salmo 23 takirqa, “tata Diosqa michejniy; ni imata pisichiwanchu”, nispa (Sal. 23:1). Arí pikunachus tropallapipuni kaqkunapaqqa, mana Diosta yupaychanankupaq imapis pisinchu, karunchakuqkunapaqri, llakikunapaqjina mana jinachu. ¿Pitaq paykunata yanapanqa? ¿Ima laya yanapatataq necesitanku? ¿Imatá ruwana kanman tropanman kutimunankupaq?

¿Pitaq yanapanqa?

3. ¿Imataq necesitakun chinkasqa ovejasta kutichimunapaq, ima rikchʼanachiywan Jesús kikincharqa?

³ Chinkasqa ovejasta, Diospa tropanman kutichimuyqa mana atikullanchu, chayrayku mayta kallpakuna tiyan (Sal. 100:3). Jesús juk rikchʼanachinapi jinata nirqa: “Uj runa pachaj ovejasniyoj kashajtin, sichus ujnin ovejan chinkanman chayqa, manachu jisqʼon chunka jisqʼonniyojta orqopi saqespa, chinkasqa kajta maskʼaj rinman? Cheqatapuni niykichej: Chinkasqa ovejanta tarikapuytawan, chay ovejanmanta astawan kusikun jisqʼon chunka jisqʼonniyoj mana chinkajkunamanta nisqaqa. Ajinallatataj, janaj pachapi kashaj Tataykichej mana munanchu ujllapis kay juchʼuykunamanta chinkananta”, nispa (Mat. 18:12-14). ¿Pitaq tropamanta karunchakuqkuna ovejasta yanapanqa?

4, 5. ¿Imaynatataq ancianos Diospa tropanta qhawananku tiyan?

 ⁴ Qutuchakuymanta ancianos, chay chinkasqa ovejasta yanapayta atinku, chaywanpis mana qunqakunankuchu tiyan, tropaqa Jehovaman kawsayninkuta quqkuna, kasqankuta. Arí chay sumaq tropataqa, Dios, michichkan (Sal. 79:13). Chay munasqa ovejasqa, munakuywan qhawanata necesitanku, chayrayku michiqkunaqa munakuywan allinta qhawananku tiyan. Ancianosqa, hermanosta waturikuq rispa, Diospa Palabranwan, kallpachasqanku, qutuchakuyman kutimunanpaq yanapanman (1 Cor. 8:1).

⁵ Diospa tropanta michiqkunaqa, chinkasqa ovejasta, maskʼaq rinanku tiyan yanapanankupaq. Pablo Efesomanta ancianosta ruwanasninkuta juntʼanankupaq yuyarichirqa: “Chayrayku qankuna kikiykichej qhawakuychej, jinallatataj tukuy hermanostapis. Paykunapaj Espiritu Santo churasorqachej qhawajkunata, Diospa Iglesianta michinaykichejpaj, mayqentachus Jesucristo kikin yawarninwan ranterqa, chayta”, nispa (Hech. 20:28). Apóstol Pedropis, Diospa akllasqasnin ancianosta jinata kʼamirirqa: “Diosqa qhawanaykichejpaj makiykichejman churarqa, chay tropata michiychej. Sumaj qhawajkuna kaychej, ama tanqasqa jinallachu, manachayqa tukuy sonqo, Dios imaynatachus munasqanman jina. Amataj qolqeta maskʼaspachu paykunata qhawaychej, manachayqa Señorta sirviyta munasqaykichejrayku. Qhawanaykichejpaj churasqa kashanku, chaykunataqa ama qankunajtapis kankuman jinachu kamachiychej, manachayqa qankuna kʼachata kawsaychej, qankuna jinallataj paykunapis kʼachata kawsanankupaj” (1 Ped. 5:1-3).

6. ¿Imaraykutaq kay tiempopi ancianos astawan Diospa ovejasninta yanapananku tiyan?

⁶ Ancianosqa, “sumaj michej” Jesusjina ruwananku tiyan (Juan 10:11). Payqa Diospa ovejasninta sunqunmantapacha yanapayata munarqa. Chaytaq Simón Pedroman, “ovejasniyta michipuway”, nisqanpi rikukun (Juan 21:15-17, ñawiriy). Kay tiempopi ovejitasqa astawan qhawanata necesitanku, imaptinchus Supayqa, mana jaykʼaqjina Diosta chiqa sunquwan yupaychaqkunata urmachiyta munachkan. Chantapis payqa, kay saqra pachata apaykachan juchaman urmachinawanchikpaq, sunqunchikpa saqra munayninman urmanapaqtaq tanqawanchik (1 Juan 2:15-17; 5:19). Pikunachus Diosmanta willayman mana riqkunataqa, astawanraq urmachinman; chayrayku paykunaqa ‘espiritumanjina kawsanankupaq’, astawan yuyaychanata necesitanku (Gál. 5:16-21, 25). ¿Imatá ancianos chay hermanosta yanapanankupaq ruwananku tiyan? Diosmanta espíritu santonta mañakunanku tiyan, Bibliatataq allin yuyaywan apaykachananku tiyan (Pro. 3:5, 6; Luc. 11:13; Heb. 4:12).

7. Ancianos, ¿imaynatataq ovejasta michiyta qhawanku?

⁷ Ñawpa tiempo israelitas ovejasta michiqkunaqa, jatun tuqnuwan michiq kanku. Chantá ovejasta corralman qhatiykuchkaspa chayri lluqsichimuchkaspa, chay ‘tuqnuwan’ yupaq kanku, jinamanta tukuyninku kachkasqanta yachanankupaq (Sal. 23:4; Miq. 2:12; 7:14). Kay tiempopi ancianospis ñawpaq tiempopi michiqkunajina, Diospa tropanta yanapanankupaq sumaqta riqsinanku tiyan (Proverbios 27:23, 24, kikinchay). Chayrayku, qutuchakuymanta hermanosta, karunchasqa hermanostapis waturikamunanku tiyan, kallpachanankupaq. Jehovapis chay chinkasqa ovejasta maskʼananta, yanapananta ima, nirqa (Eze. 34:11). Chayrayku payjina, ancianos qutuchakuymanta karunchasqa hermanosta kutimunankupaq yanapaqtinkuqa, mayta kusikun.

8. ¿Imaynasmantataq ancianos, chinkasqa ovejasta yanapayta atinkuman?

⁸ Diospa tropanta michiq, juk unqusqa hermanop wasinman rispaqa, mayta kallpachanman kusichinman ima. Kikillantaq kanman, Diosta yupaychaymanta karunchakuq hermanota waturikuptinku. Chantapis ancianosqa, chay hermanopaq, Bibliamanta, revistasmanta ima, ñawiripunkuman, tantakuypi yachakusqankumantataq willarinkuman, paywan khuskataq Diosmanta mañakunkuman. Chantapis, nillankumantaq tantakuykunaman watiqmanta riptin, hermanos mayta kusikunankuta (2 Cor. 1:3-7; Sant. 5:13-15). Chantá chay hermanota waturikuq risqanku, telefononiqta  wakyarisqanku, juk cartata qillqarisqanku ima, chay hermanota mayta kallpachallanmantaq. Chaywanpis, chinkasqa ovejata yanapariq ancianoqa, pay kikin kusiyta tarinqa.

Tukuy yanapayta atisunman

9, 10. ¿Imaraykutaq mana ancianosllachu karunchasqa ovejasta yanapananku kasqanta niwaq?

⁹ Kay tiempoqa saqra kachkan, may achkha ruwanasniyuqtaq kanchik, chayrayku ichá mana reparasunmanchu juk hermano qutuchakuymanta karunchakuchkasqanta (Heb. 2:1). Jehovaqa, paypaq may valorniyuq kasqanrayku chay ovejanta sumaqta qhawan, imaynatachus cuerponchikmanta tukuy imanchik may valorniyuq ajinata. Chayrayku tukuyninchik sunqumantapacha yanapanakunanchik tiyan (1 Cor. 12:25). ¿Jinatachu qam hermanosniykita qhawanki?

¹⁰ Yachanchik ancianos ñawpaqtaqa, qutuchakuymanta karuchakuqkunata maskʼamunanku kasqanta, chaywanpis mana paykunallachu chayta ruwananku tiyan. Ñuqanchikpis ancianoswan khuska chay hermanosta, tropaman kutimunankupaq, sunquchaspa, kallpachaspa ima, yanapallasunmantaq. ¿Imaynatá chayta ruwasunman?

11, 12. ¿Imaynasmantataq manaña willayman riq hermanota, qutuchakuyman kutimunanpaq yanapasunman?

¹¹ Diosmanta manaña willaq hermano, yanaparinankuta niptin, ancianosqa, ichapis juk wakichisqa publicadorta ninkuman, chay hermanota wasinpi, juk publicacionmanta yacharichimunanta. Jinamanta, chay hermano imaynatachus ‘ñawpaqta’ Diosta munakusqanta juktawan munakunanpaq, yanapankuman (Apo. 2:1, 4). Chantapis chay hermanotaqa, tantakuyman mana jamusqan tiempopi, imastachus qutuchakuypi yachachikusqanmanta parlariy, kallpachanman.

¹² Ancianos chay hermanota waturikuq rinaykita nisunku chayqa, atisqaykita ruway, chay hermanota yanapanaykipaq Jehovap yanapaynintataq mañakuy. Chantapis, “ruwasqasniykitaqa Tata Diospa makinman saqey, imatachus ruwanaykipaj wakichisqasniykitaj juntʼakonqa” (Pro. 16:3). Bibliamanta ima pʼitikunachus chay hermanota kallpachananpaqjina kasqanpi tʼukuriy, apóstol Pablop ruwasqanpi ima (Romanos 1:11, 12, ñawiriy). Payqa Romamanta hermanoswan, mayta tinkuyta munarqa, paykunata yanapananpaq. Chantapis paykunapura kallpachanakunankupi atienekurqa. ¿Manachu ñuqanchikpis kikillantataq yuyasunman tropamanta karunchakuqkunata yanapachkaspa?

13. ¿Imasmantataq, Diosmanta manaña willaq hermanoman parlariwaq?

¹³ Yachachichkaspa, chay hermanota tapuriwaq, imaynamantachus Bibliamanta yachakusqanta. Parlarillaytaq ñawpaqta imaynatachus khuska Diosta yupaychaypi sumaqta ruwasqaykichikmanta, tantakuykunapi, jatun tantakuykunapi, runaman willaypi ima, may kusiyta tarisqaykichikmanta. Nillaytaq Jehovap qayllanpi kaspa kusisqa sientekusqaykita  (Sant. 4:8). Jehová llaqtanman suyakuyta, chʼampaykunata atipanapaq sunquchayta ima, quchkasqanmanta, may agradecesqa kachkasqaykita nillawaqtaq (Rom. 15:4; 2 Cor. 1:3, 4).

14, 15. ¿Ima tʼinkasmantataq yuyarichisunman, manaña Diosmanta willaqkunata?

¹⁴ Chay hermano manaraq qutuchakuymanta karunchakuchkaspa, tʼinkasta japʼisqanmanta yuyarichiy. Chaykunamanta wakinqa, Diospa Palabranta, munayninta ima, sapa pʼunchay astawan riqsisqan karqa (Pro. 4:18). Chantapis Jehovap espiritunwan pusachikusqanraykuqa, mana ima juchamanpis urmallarqachu (Gál. 5:22-26). Diosmantataq llimphu sunquwan mañakuyta atirqa, Diostaq ‘chay mana unanchay atina sunqu tiyaykuyninta sunqunman churarqa, chaytaq sunqunta, yuyayninta ima, waqaycharqa’ (Fili. 4:6, 7). Chay hermanowan kay yuyaychaykunamanta parlariwaq, chantá chiqamanta payta allinpaq qhawasqaykita rikuchiy, munakuywantaq kallpachariy, tropaman kutimunanpaq (Filipenses 2:4, ñawiriy).

¹⁵ Qam anciano kasqaykita yuyay, juk qhariwarmitataq unayña Diosmanta mana willamusqankurayku waturikuchkanki. Ichapis, allin kanman imaynatachus Diospa Palabranta riqsichkaspa sientekusqankumanta yuyarichinayki. Chay ¡chiqa kaqta yachakuyqa may sumaq, karqa! Jinallataq ¡sunqu juntʼasqa, llulla yachachiymantataq kacharichisqa kasqankupis! (Juan 8:32.) Chantapis maytachá Jehovap, munakuyninta, imatachus ruwanankuta yachaspa, kusirikurqanku (Lucas 24:32, kikinchay). Yuyarichiytaq Diosman kawsayninkuta quqkuna, payman astawan kʼaskayta, mañakuyta ima atisqankuta. Chantá, ‘kusisqa [Jehová] Dios, may sumaq, willaykunasninmanjina’ juktawan ruwanankuta minkʼarillawaqtaq (1 Tim. 1:11, NM).

Munakusqaykita rikuchillaypuni

16. Diosmanta manaña willaqkunata yanapariy may allin kasqanta rikuchinaykipaq, juk hermanomanta parlariy

¹⁶ ¿Chiqamanta kay yuyaychaykuna yanapanmanchu? ¡Arí! Juk waynuchu 12 watayuq Diosmanta willayta qallarirqa, 15 watasninpitaq, manaña willayman rirqachu. Chaymanta tiemponmantaq, qutuchakuyman kutimurqa, kunantaq, kimsa chunka wata kuraqtaña, tiempo juntʼasqata Diospaq llamkʼachkan. Jinata kutimuspa Diospaq llamkʼananpaqqa, juk superintendente sumaqta yanaparirqa. ¡Chay hermanoqa jinata yanapasqanmanta mayta agradecekun!

17, 18. ¿Ima kʼacha kaykunayuqtaq kananchik tiyan, karunchakuqkunata yanapanapaq?

¹⁷ Chay hermanosta qutuchakuyman kutimunankupaq yanapananchikpaqqa, munakuy tanqawanchik. Jesús discipulosninman jinata nirqa: “Uj mosoj kamachisqata qoykichej: Purajmanta munanakuychej. Imaynatachus noqa munakorqaykichej, ajinallatataj qankunapis purajmanta munanakuychej. Qankunachus munanakunkichej chayqa, tukuy runas yachanqanku yachachisqasniy kasqaykichejta”, nispa (Juan 13:34, 35). Arí munakuy, chiqa cristianos kasqanchiktaqa rikuchin. Chayrayku, ¿manachu, chay munakuyta Diosmanta manaña willaq hermanosman rikuchisunman? Arí, ¡rikuchinanchik tiyan! Chaywanpis, wak kʼacha kaykunatawan rikuchinallataq tiyan yanapanapaqqa.

¹⁸ ¿Ima kʼacha kaykunamantataq parlachkanchik? Mana munakuyllamantachu, manaqa khuyakuyniyuq, kʼacha kayniyuq, llampʼu sunquyuq, pacienciakuyniyuq ima, kanamantawan. Wakin kutipitaq perdonana tiyan. Pablo qillqarqa: “Chayraycu pʼachallicuychej sonkomanta qhuyacuywan, cʼacha caywan, llampʼu sonko caywan, cʼacha yuyaywan, pacienciawan.  Chay pacienciawan kancuna purajmanta pantaskasniyquichejta muchunacuychej. Sichus imamantapis phiñanacuwajchej chayka, perdonanacuychej. Imaynatachus Señorninchej kancunata perdonasorkachej, ajinallatataj kancunapis perdonanayquichej. Chay tucuymanta astawanka munacuywan pʼachallicuychej. Munacuywanka tucuyniyquichej uj sonkolla mosoj causaypi wiñanquichej” (Col. 3:12-14, Dios Parlapawanchej).

19. ¿Imaraykutaq may allin, juk chinkasqa ovejata maskʼay, tropaman kutichimunapaq?

¹⁹ Qhipan yachaqanapi, imaraykchus wakinkuna karunchakusqankuta, kutimuptinku imaynatachus paykunata japʼinanchikmanta ima, qhawarisunchik. Kay yachaqanapi qhipan yachaqanapi ima, chay chinkasqa ovejasta yanapanapaq kallpachakuyqa, may allin kasqanta rikuchiwasun. Kay tiempopi runasqa, tukuy kawsayninkupi qhapaqyayllata maskʼanku, chaywanpis juk runapta kawsayninqa, kay pachapi tukuy ima kaqmantapis, aswan valorniyuq. Ajinata Jesús, chinkasqa ovejamanta parlasqanpi rikuchirqa (Mat. 18:12-14). Kaytaqa ni jaykʼaq qunqakuychu, manaqa kallpakullaypuni Jehovap chinkasqa ovejitasninta yanapanaykipaq.

¿Imatá kutichiwaq?

• ¿Imatataq ancianos, ovejas karunchakuptinku ruwananku tiyan?

• ¿Imaynatataq tukuypis, Diosmanta manaña willaq riqkunata yanapayta atisunman?

• ¿Ima kʼacha kaykunataq yanapawasun, karunchasqa kaqkunata yanapanapaq?

[Tapuykuna]

[10 paginapi dibujo/foto]

Ancianosqa, Diospa tropanmanta ovejas karunchakuqkunata yanapanankupaq, mayta kallpakunku