Jehová Diospa chinkasqa ovejankunata yanapasun

“Q’ochukusunchis, chinkasqa ovejayta tarikampusqaymanta.” (LUC. 15:6.)

1. ¿Imaynatan Jesús rikuchiran michisqan ovejankunata munakusqanta?

DIOSPA phiwi churin Jesucristotan sutichakun “ovejakunaq qollana michiqnin”, nispa (Heb. 13:20). Bibliaq willasqan hina, payqa kay Hallp’amanmi hamuran hinaspa allin michiq kaspa kallpachakuran ‘Israel suyumanta chinkasqa ovejakunata’ maskhananpaq (Mat. 2:1-6; 15:24). Chaymantapas allin sonqoyoq runakunata huchamanta kacharichinanpaqmi payqa wañuran imaynan huk michiqpas ovejankunata amachananpaq wañuytaraq tariq hinata (Juan 10:11, 15; 1 Juan 2:1, 2).

2. ¿Imaraykun wakin cristianokuna Diospa llaqtanmanta karunchakapuranku?

² Askha runakunan Jesuspa sacrificakusqanta chaniyoqpaq qhawarispanku Diosman prometekuranku servinankupaq, kunanmi ichaqa Diospa llaqtanmanta karunchakuspa manaña payta servinkuñachu, chayqa llakikunapaqmi. Yaqapaschá paykunaqa karunchakapuranku pisi kallpayapusqankurayku, onqosqankurayku otaq ima sasachaypipas tarikusqankurayku. Ichaqa Jehová Diospa michisqan t’aqapi kaqkunallan thak kayta kusikuytapas tarinku 23 Salmopi Davidpa takisqan hina: “Señor Diosmi michikuwaqniyqa, manan imapas pisiwanchu” (Sal. 23:1). Arí, Diospa michisqan ovejankunamanqa manan imapas pisinchu Paywan allinpi kanankupaqqa, t’aqakuq ovejakunan ichaqa mana chhaynapichu tarikunku. ¿Pin paykunata yanapanman? ¿Imayna yanapaytan necesitanku? ¿Imakunatan ruwasunman paykunata yanapananchispaq?

¿Pin paykunata yanapanman?

3. ¿Imatan ruwananchis Diospa ovejanmanta t’aqakuqkunata hukmanta t’aqanman kutichimpunapaq, imata willaspan Jesús chayta sut’incharan?

³ Diospa ovejanmanta t’aqakuqkunata hukmanta kutichimpunapaqqa anchatan kallpachakuna (Sal. 100:3). Chaytan Jesús sut’incharan kay rikch’anachiywan: “Pachak ovejayoq runaq huk ovejan chinkaqtinqa, ¿manachu isqon chunka isqonniyoq ovejata orqoman saqeyuspa chay chinkaq oveja maskhaq puririnman? Cheqaqtan niykichis, chay chinkasqa ovejanta tarimuspanmi astawanraq kusikunqa mana chinkasqa isqon  chunka isqonniyoq ovejanmantaqa. Chay hinallataqmi hanaq pachapi kaq Yayaykichispas mana munanchu kay huch’uykunamanta huknillanpas chinkanantaqa”, nispa (Mat. 18:12-14). ¿Pin yanapanman Diospa ovejankunamanta t’aqakuqkunata?

4, 5. ¿Imaynatan umalliqkuna Diospa ovejanta michinanku?

⁴ T’aqakuq ovejakunataqa umalliqkunan yanapananku, chaypaqmi ichaqa yuyarinanku Diospa michisqan ovejankuna kasqankuta (Sal. 79:13). Chay ovejakunataqa munakuywanmi michina, chayraykun michiqkunaqa sumaqta trataspa yanapananku. Chayrayku chinkasqa ovejakunata kallpachanankupaq umalliqkunaq visitasqanqa anchatan iñiyninkuta kallpachanman hukmanta Diospa llaqtanman kutimpunankupaq (1 Cor. 8:1).

⁵ Arí, Diospa ovejanta michiqkunaqa chinkasqa ovejakunata maskhaspan yanapananku. Éfeso t’aqapi kaq umalliqkunatan apóstol Pablo yuyarichiran ovejakunata imayna michinankumanta, kaytan niran: “Cuidakuychis kikiykichista, hinallataq lliw iñiqkunatapas cuidaychis, paykunata cuidaqpaqmi Santo Espíritu churarqasunkichis. Diospa iñiq t’aqanta michiychis, chay iñiq t’aqantan Jesucristoq yawarninwan rantikurqan”, nispa (Hech. 20:28, Edición 1988). Apóstol Pedropas umalliqkunatan niran: ‘Qankunaman hap’ichisqa kashaq Diospa ovejankunata allintapuni michiychis, makilla qhawaspa, ama kamachisqa hinachu, aswanpas sumaq munakuywan, ama qolqeraykuchu, aswanpas tukuy sonqo llank’aychis. Ama michisqaykichista munaychakuq hinachu, aswanpas paykuna yachaqakunankupaq hina kaychis’, nispa (1 Ped. 5:1-3).

6. ¿Imaraykun kunan Diospa ovejankuna astawanraq necesitanku michiqkunaq yanapayninta?

⁶ Diospa llaqtanta michiq cristianokunaqa ‘allin michiq’ Jesucristoq ruwasqanta hinan ruwananku (Juan 10:11). Payqa anchatan interesakuran Diospa ovejankunapi. Chaymi Simón Pedrota niran: “Ovejaykunata michipuway”, nispa, chaywanmi rikuchisharan ovejankunaqa cuidana kasqanta (leeychis Juan 21:15-17). Diospa ovejachankunaqa astawanraqmi kunan tiempopi cuidanata necesitanku, ¿imarayku? Saqran astawanraq kallpachakushan hunt’aq sonqowan Dios serviyninkuta waqllichinanpaq. Huchayoq runa kasqankuraykun kay pachapi mana allin ruwaykunawan huchallichiyta munan (1 Juan 2:15-17; 5:19). Diospa llaqtanmanta karunchakapuq cristianokunatan astawanqa waqllichinman, chayraykun paykunaqa yanapanata necesitanku ‘espirituq pusasqanman hina’ kawsanankupaq (Gál. 5:16-21, 25). ¿Imatan ruwananku umalliqkuna paykunata yanapanankupaq? Diospa santo espirituntan mañakunanku, kallpachakunankutaq Bibliawan sonqonkuman chayanankupaq (Pro. 3:5, 6; Luc. 11:13; Heb. 4:12).

7. ¿Imaynatan umalliqkuna rikuchinku Diospa ovejankunapi interesakusqankuta?

⁷ Ñawpaq Israel llaqtapi oveja michiqkunaqa tawnankuwanmi ovejankuta qatiqku. Ovejankuta kanchamanta qarqospa otaq qatiyanpuspapas ‘tawnankuq’ pachantan sapanka ovejata pasaykachiqku, chhaynatan yupaqku mana hukpas faltasqanta yachanankupaq (Lev. 27:32; Miq. 2:12; 7:14). Umalliqkunapas chay michiqkuna hinan michisqanku ovejakunataqa allinta reqsinanku, yachanankutaq imaynapi tarikusqankutapas (tupanachiy Proverbios 27:23). Chayraykun umalliqkunaqa anchata kallpachakunku llapa cristianokunata watukunankupaq, Diospa llaqtanmanta karunchakapuqkunata yanapanankupaqpas. Jehová Diosmi niran: “Ñoqa kikiymi ovejaykunata maskhaspa michikapusaq”, nispa (Eze. 34:11). Chayraykun payqa anchata kusikun umalliqkuna chinkasqa ovejakunata yanapaspa pay hina t’aqanman kutichimpuqtinku.

8. ¿Imakunata ruwaspan umalliqkuna yanapankuman iñiyninkupi chiriyapuq iñiqmasinchiskunata?

⁸ Huk iñiqmasinchis onqoqtinqa Diospa  ovejanta michiqpa watukusqanmi paytaqa kusirichinman kallpachanmanpas. Chhaynallatataqmi sientekunkuman iñiyninkupi chiriyapuq iñiqmasinchiskunapas huk umalliq paykunata watukuqtinqa. Watukuspankuqa leenkumanmi Bibliamanta wakin versiculokunata, revistamantapas allin kallpachaq temakunata t’aqwirinkuman otaq huñunakuypi yachamusqankumantapas willarinkuman, paywan kuskataq Diosmanta mañakunkuman. Ninkumantaq: “Iñiqmasinchiskunaqa anchatan kusikunqaku hukmanta huñunakuykunaman hamuqtiykiqa”, nispa (2 Cor. 1:3-7; Sant. 5:13-15). Sichus umalliqkuna kay wayqe pananchiskunata watukunqaku, telefonopi waqyanqaku, otaq cartata paykunaman qelqanqaku chayqa, anchatan kallpachanqaku. Umalliqkunapas anchatan kusikunqaku paykunata yanapaspa.

Llapallanchismi yanapasunman

9, 10. ¿Imaraykun mana umalliqkunallachu t’aqakuq ovejakunamanta llakikunanku?

⁹ Kay tiempoqa sinchi sasan, llapallanchistaq imaymana ruwanayoq kanchis, chayrayku mana cuentatapas qokusunmanchu mayqen iñiqmasinchispas Diospa llaqtanmanta karunchakapushasqanta (Heb. 2:1). Jehová Diosmi ichaqa makilla ovejankunata qhawamushan cuidananpaq. Payqa anchatan sapanka ovejankunata valoran imaynan ñoqanchispas cuerponchispa sapanka miembronkunata valoranchis hinata. Chayraykun llapallanchis iñiqmasinchiskunapiqa interesakunanchis sumaqtataq qhawarinakunanchispas (1 Cor. 12:25). Qanrí, ¿valorashankichu iñiqmasiykikunata?

¹⁰ Umalliqkunaña chinkasqa ovejakunata maskhaspa yanapanku chaypas manan paykunallachu chay ovejakunamantaqa llakikunanku. Llapallanchismi umalliqkunataqa yanapasunman chiriyapuq iñiqmasinchiskunata kallpachaspa, chhaynapi hukmanta Diospa llaqtanman kutimpunankupaq. ¿Imaynatan chayta ruwasunman?

11, 12. Chiriyapuq iñiqmasinchis yanapanata munaqtin, ¿imatan umalliqkuna ruwankuman?

¹¹ Sichus chiriyapuq iñiqmasinchis munanman yanapanata chayqa, umalliqkunan allin experienciayoq cristianota ninkuman paywan huk qelqata estudiananpaq. Hukmanta estudiaspaqa ‘ñawpaqpi hinan’ Diosta munakunqa (Apo. 2:1, 4). Chay iñiqmasinchistaqa anchatan kallpachanman karunchakusqan tiempopi mana uyarisqan yachachikuykunamanta yachay.

¹² Sichus umalliqkuna nisunkiman chiriyapuq iñiqmasinchista yanapanaykipaq chayqa, Jehová Diosmanta mañakuy yanapanasuykipaq kallpachakusqaykita saminchananpaqpas. “Lliw ruwanaykikunata Señor Diosman hap’iykachiy, hinan  yuyaykusqaykikuna hunt’akunqa.” (Pro. 16:3.) Bibliapi allin textokunata maskhay chaywan iñiyninpi kallpachanaykipaq. Chaymantapas yuyaymanay apóstol Pabloq ruwasqanpi (leeychis Romanos 1:11, 12). Payqa maytapunin Roma llaqtapi tiyaq cristianokunawan tupayta munaran iñiyninkupi kallpachananpaq. Paypas munaranmi kallpachanankuta. Ñoqanchispas, ¿manachu apóstol Pablo hina yuyaykusunman chiriyapuq iñiqmasinchiskunata yanapaspa?

13. ¿Imakunamantan rimawaq chiriyapuq iñiqmasinchiswan?

¹³ Chay iñiqmasinchiswan estudiashaspaqa tapuwaqmi imaynatan Biblia estudiayta qallariran chayta. Yuyarichiy ñawpaq tiempopi imaynatachus kusisqa Diosta servisqaykichismanta, huñunakuykunapi, hatun huñunakuykunapi, predicacionpipas kusisqa kasqanmanta. Nillaytaq Diospa llaqtanpi ancha kusisqa kasqaykimanta (Sant. 4:8). Chaymantapas nillawaqtaqmi: “Anchatan Diosta agradecekuni imaymanata llaqtanman qosqanmanta, astawanqa hamuq tiempopaq sumaq suyakuy qowasqanchismanta sasachakuykunapi tarikuqtinchispas kallpachawasqanchismanta”, nispa (Rom. 15:4; 2 Cor. 1:3, 4).

14, 15. ¿Imakunamantan yuyarichisunman chiriyapuq iñiqmasinchiskunaman?

¹⁴ Chaymantapas yuyarichiwaqmi manaraq Diospa llaqtanmanta karunchakushaqtin sumaq bendicionkuna chaskisqanmanta. Chaykunan karan: Bibliamanta, Diospa munayninmantapas aswan allinta yachay (Pro. 4:18). Ñawpaqpi Diospa santo espiritunwan yanapachikuspaqa manachá wateqaykunaman urmaykuqchu (Gál. 5:22-26). Chayraykun payqa ch’uya concienciawan Diosmanta mañakuq “Hinan Diosqa [...] runakunaq mana aypay atisqan thak-kayta” qoq chay hinapin sonqontapas yuyaynintapas Diosqa waqaychaq (Fili. 4:6, 7). Chiriyapuq iñiqmasinchiswan rimaspaqa chaykunapi yuyaykuy, sonqomanta paypi interesakuy, astawanqa munakuywan kallpachay Diospa ovejankunaman kutimpunanpaq (leeychis Filipenses 2:4).

¹⁵ Sichus umalliq kaspa watukuwaq chiriyapuq casado warmi qharita chayqa, kallpachawaqmi chayllaraq Bibliamanta yachashaspanku imayna sientekusqankuta yuyarichispa. ¡May sumaqmi yachasqankuqa karan! Manañan pantasqa yachachikuykunapichu kawsaranku (Juan 8:32). Anchatachá agradecekuranku Diosmanta, munakuyninmanta, hamuq tiempopaq sumaq kawsaymantapas yachashaspankuqa (tupanachiy Lucas 24:32). Yuyarichiy: Diosta serviq cristianokuna Dioswan hukllachasqa kasqankuta ch’uya concienciawan mañakusqankutapas. Kallpachay hukmanta “kusisqa Diospa ancha allin willakuyninkunaman hina” kawsanankupaq (1 Tim. 1:11, NM).

Munakusqaykita rikuchiy

16. Chiriyapuq iñiqmasinchiskunaqa kallpachakunkun yanapaqtinchisqa, chaymanta huk ejemplota willay.

¹⁶ ¿Yanapanmanchu chay yuyaychaykuna chiriyapuq iñiqmasinchiskunata? Arí, yanapanmanmi. Huk waynachan 12 watanpi kashaspa predicayta qallariran ichaqa 15 watanpin Diospa llaqtanmanta karunchakapuran. Payqa tiempowanmi huk umalliq yanapasqanrayku kutimpuran, hinaspa kinsa chunka wata masña tukuy tiemponwan Diosta servishan.  Payqa, ¡anchatan chay umalliq yanapasqanmanta agradecekun!

17, 18. ¿Imaynatan tratananchis Diospa ovejanmanta t’aqakuqkunata yanapananchispaq?

¹⁷ Chay iñiqmasikunataqa munakusqanchisraykun yanapanchis kutimpunankupaq. Jesusmi qatikuqninkunata niran: “Mosoq kamachikuytan churapuykichis: Qankunapura munanakuychis. Imaynan ñoqapas munakuykichis, ahinata qankunapas munanakuychis. Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:34, 35). Arí, cheqaq cristianokunaqa munakuq kasqanchiswanmi reqsichikunchis. Chayraykun chiriyapuq iñiqmasinchiskunamanqa munakuyninchista rikuchinanchis. Ichaqa paykunata yanapanapaqqa manan munakunallanchischu, ¿imakunatawanraqmi ruwananchis?

¹⁸ Paykunataqa khuyapayaspan sumaq sonqowan tratananchis ancha pacienciayoqtaq kananchispas. Mayninpiqa pampachananchispaschá kanqa. Apóstol Pablon qelqaran: “P’achawan hina p’achakuychis khuyapayakuq-kaywan, sumaq sonqo-kaywan, huch’uyyaykukuywan, llamp’u sonqo-kaywan, pacienciawan ima. Qankunapura paciencianakuychis, pipas hukpa contranpi imatapas riman chayqa, pampachaykunakuychis. Imaynan [...] [Jehová Diospas, NM] pampacharqasunkichis, chay hinallataq qankunapas pampachaychis. Chaykunamanta astawanqa munakuq sonqo kaychis, munakuymi tukuy imatapas sumaqta hukllaman tukuchin”, nispa (Col. 3:12-14).

19. ¿Imaraykun kallpachakunanchis Diospa chinkasqa ovejachankunata yanapananchispaq?

¹⁹ Qatimuq estudiopin yachasunchis imarayku wakin iñiqmasinchiskuna karunchakapuranku chaymanta, yachallasuntaq hukmanta Diospa llaqtanman kutimpuqkuna allin chaskisqa kanankumanta. Kay estudiopipas qatimuq estudiopipas yachasqanchismi kallpachawasun chiriyapuq iñiqmasinchiskunata yanapananchispaq, ¡may allinpunin paykunata yanapayqa! Kay pacha runakunaqa tukuy kawsasqanku tiempon kallpachakunku qhapaq kayta maskhanankupaq, ichaqa pachantinpi qhapaq kaykunamantapas huk runaq kawsayninmi aswan valorniyoqqa. Chaytan Jesús rikuchiran chinkasqa ovejamanta rikch’anachiypi (Mat. 18:12-14). Ama hayk’aqpas chaytaqa qonqaychu, chayrayku kallpachakushallay Diospa chinkasqa ovejachankunata yanapanaykipaq.

¿Imanispan kutichiwaq?

• ¿Imatan michiq cristianokuna ruwananku Diospa ovejanmanta mayqenpas t’aqakuqtin?

• ¿Imaynatan llapallanchis yanapasunman Diospa llaqtanmanta karunchakapuq iñiqmasikunata?

• ¿Imaynatan tratananchis chiriyapuq iñiqmasinchiskunata Diospa llaqtanman kutimpunankupaq?

[Tapuykuna]

[13 paginapi foto]

Diospa llaqtanta michiq cristianokunaqa kallpachakunkun munakuywan Diospa chinkasqa ovejankunata yanapanankupaq