Yepi den wan di gowe libi na ipi
Yepi den wan di gowe libi na ipi
„Un prisiri nanga mi, bika mi feni a skapu fu mi di ben lasi.”—LUK. 15:6.
1. Fa Yesus sori taki a ben de wan lobi-ati skapuman?
SOLEKI fa Bijbel e taki, dan Yesus Krestes, a wan-enkri gebore Manpikin fu Yehovah, na „a bigi skapuman fu den skapu” (Hebr. 13:20). Den Buku fu Bijbel ben taki dati a ben o kon. Bijbel ben sori tu taki a ben de wan tumusi bun Skapuman di ben e du muiti fu feni den „lasi skapu” fu Israel (Mat. 2:1-6; 15:24). Wan trutru skapuman son leisi de klariklari fu gi en libi soso fu kibri den skapu fu en. Na so Yesus ben de klariklari tu fu dede leki wan frulusu-ofrandi gi sma di de leki skapu èn di ben o sori warderi gi na ofrandi fu en.—Yoh. 10:11, 15; 1 Yoh. 2:1, 2.
2. Fu san ede son Kresten tapu nanga a diniwroko?
2 Ma sonwan fu den sma di fosi ben abi warderi gi na ofrandi fu Yesus, èn di ben gi densrefi abra na Gado, no abi demakandra moro nanga a Kresten gemeente. A sani disi na wan sari sani. Den sma disi lasi a faya di den ben abi, èn leki bakapisi fu dati, den no e teki prati moro na a diniwroko. Kande a sani disi pasa fu di den lasi-ati, fu di den kon siki, noso fu di den abi tra problema. Ma na soso te den de na ini na ipi fu Gado, den sa man abi wan korostu firi èn den sa man de koloku, soleki fa David ben taki na ini Psalm 23. Fu eksempre, a ben singi: „Yehovah na mi Skapuman. Mi no sa mankeri noti” (Ps. 23:1). Den wan di de na ini na ipi fu Gado abi ala san de fanowdu fu man abi wan bun matifasi nanga Gado. Ma dati no de so nanga den skapu di gowe libi na ipi. Suma kan yepi den? Na sortu fasi den musu kisi yepi? Iya, fa wi kan yepi den fu drai kon baka na a ipi?
Suma kan yepi den?
3. Soleki fa Yesus sori, dan san wi musu du fu tyari den lasi skapu kon baka na a ipi fu Gado?
3 Wi musu meki tranga muiti fu tyari den lasi skapu kon baka na a ipi fu Gado (Ps. 100:3). Nanga yepi fu wan agersitori, Yesus ben tyari disi kon na krin. A ben taki: „Efu wan sma abi wán hondro skapu èn wan fu den lasi, dan a sma dati sa libi den neigitenti na neigi skapu na tapu den bergi fu go suku a lasi skapu, a no so? Fu tru mi e taigi unu taki efu a feni en, dan a o prisiri moro nanga a skapu disi, leki nanga den neigitenti na neigi skapu di no ben lasi. Na so mi Tata na hemel no wani kwetikweti taki wan fu den pikinwan disi musu lasi libi” (Mat. 18:12-14). Suma kan yepi den skapu di gowe libi na ipi?
4, 5. Fa owruman musu handri nanga na ipi fu Gado?
4 Efu Kresten owruman wani yepi den skapu di gowe libi na ipi, dan den musu hori na prakseri taki na ipi fu Yehovah na wan gemeente fu sma di gi densrefi abra na En. Iya, den sma disi na warti ’skapu fu a weigron fu Gado’ (Ps. 79:13). A de prenspari taki owruman e sorgu bun gi den skapu disi di warti srefisrefi. Dati wani taki dati den musu poti prakseri na ibriwan fu den. A kan de wan bigi yepi te owruman e go luku den skapu disi fu si fa a e go nanga den. Te den e gi den skapu disi deki-ati na wan lobi-ati fasi, dan dati kan tranga a bribi fu den èn a kan meki den kisi na angri fu drai kon baka na a ipi.—1 Kor. 8:1.
5 Skapuman fu na ipi fu Gado abi a frantwortu fu suku den skapu di gowe libi na ipi, èn den musu pruberi fu yepi den. Na apostel Paulus ben memre Kresten owruman fu owruten Efeise taki den ben abi a frantwortu fu luku den skapu. A ben taigi den: „Un luku unsrefi bun, èn sosrefi ala den skapu, bika santa yeye poti unu leki opziener fu luku a gemeente fu Gado di a bai nanga a brudu fu en eigi Manpikin” (Tori. 20:28). Na apostel Petrus ben gi den salfu owruman wan srefi sortu rai. A ben taigi den: „Luku den skapu fu Gado di a gi unu fu sorgu, èn no du dati neleki na dwengi wan sma dwengi unu, ma du dati nanga prisiri; no du en tu fu di unu lobi fu kisi wini na wan fasi di no fiti, ma du en fu di unu e angri fu dini trawan; un no musu prei basi tu gi den wan di de wan gudu fu Gado, ma un musu tron eksempre gi den skapu.”—1 Petr. 5:1-3.
6. Fu san ede a de tumusi prenspari taki den skapuman e luku den skapu fu Gado na ini a ten disi?
6 Kresten owruman musu teki na eksempre fu Yesus, „a tumusi bun skapuman” (Yoh. 10:11). Yesus ben e broko en ede trutru nanga den skapu fu Gado. Di a ben taigi Simon Petrus fu ’luku den pikin skapu fu En’, dan na so a sori o prenspari a de fu sorgu gi den skapu dati. (Leisi Yohanes 21:15-17.) Na ini a ten disi, a de tumusi prenspari taki den owruman e luku den skapu, fu di Didibri e du moro muiti now fu meki den wan di gi densrefi abra na Gado, drai baka gi a tru anbegi. Satan sabi san na den swakifasi fu den skapu fu Yehovah, èn a e gebroiki den sani fu grontapu fu kori den skapu disi so taki den e du sondu (1 Yoh. 2:15-17; 5:19). Satan e suku fu kori spesrutu den Kresten di no e teki prati moro na a diniwroko. Fu dati ede, den Kresten disi abi yepi fanowdu fu man gi yesi na a rai di Bijbel e gi fu „waka nanga a yeye” (Gal. 5:16-21, 25). Efu owruman wani yepi den wan disi, dan den musu begi Gado fu yepi den, den musu meki a yeye tiri den, èn den musu gebroiki Gado Wortu na wan koni fasi.—Odo 3:5, 6; Luk. 11:13; Hebr. 4:12.
7. O prenspari a de taki owruman e sorgu gi den skapu?
7 Na ini Israel fu owruten, wan skapuman ben e gebroiki wan langa tiki fu tiri den skapu fu en. Te den skapu ben e go na ini a pen, noso te den ben e komoto na ini a pen, dan a skapuman ben e ’teri den nanga en tiki’ (Lef. 27:32; Mik 2:12; 7:14). Na so a de tu taki wan Kresten owruman musu sabi na ipi fu Gado bun, èn a musu sabi fa a e go nanga ibriwan fu den. (Luku Odo 27:23.) Dati meki, te owruman e kon makandra fu taki fu den afersi fu a gemeente, dan den e si en leki wan prenspari sani fu luku fa a e go nanga den skapu. Den e luku fa den o seti sani fu yepi den wan di gowe libi na ipi. Yehovah srefi taki dati a ben o suku den skapu fu en, èn taki a ben o sorgu gi den (Esek. 34:11). Sobun, Gado lobi te owruman e du a srefi sortu muiti fu yepi den lasi skapu fu drai kon baka na a ipi.
8. Na sortu fasi owruman kan poti prakseri na den skapu?
8 Te wan owruman go luku wan Kresten brada noso sisa di siki, dan dati kan yepi a sma dati fu firi moro bun èn a kan gi en deki-ati. A srefi sani disi kan pasa te den owruman e go luku wan Kresten di no e teki prati moro na a diniwroko. Den owruman kan leisi bijbeltekst gi en, den kan taki fu wan artikel, den kan poti prakseri na den prenspari penti di ben kon na krin na a konmakandra, den kan begi gi a sma, èn so moro fara. Den kan sori a sma taki den brada nanga sisa na ini a gemeente ben o breiti te a ben o kon baka na den gemeente konmakandra (2 Kor. 1:3-7; Yak. 5:13-15). A kan de wan bigi yepi te wan owruman e go luku wan lasi skapu, te a e bel en, noso te a e skrifi wan brifi seni go gi en! Te wan skapuman e yepi wan skapu di gowe libi na ipi, dan a skapuman srefi di e firi gi a sma dati, sa abi moro prisiri.
Wi alamala kan du muiti fu yepi
9, 10. Fu san ede a no owruman wawan musu broko den ede nanga den skapu?
9 Wi e libi na ini muilek ten pe sma abi furu fu du. Dati meki son leisi, wi no e si taki wan Kresten brada noso sisa e drifi gowe fu a gemeente (Hebr. 2:1). Ma den skapu fu Yehovah prenspari srefisrefi gi en. Ibriwan fu den prenspari, neleki fa ibri pisi fu a skin fu wi prenspari. Dati meki, wi alamala musu broko wi ede nanga den brada nanga sisa fu wi, èn wi musu yepi makandra nanga wi heri ati (1 Kor. 12:25). Yu e du dati tu?
10 Aladi Kresten owruwan abi a frantwortu fu suku èn fu yepi den skapu di lasi, toku a no den wawan musu broko den ede nanga den skapu disi. Tra sma kan wroko makandra nanga den skapuman disi. Wi kan gi den brada nanga sisa fu wi deki-ati, èn wi musu yepi den fu drai kon baka na a ipi. Fu taki en leti, wi abi a frantwortu fu du dati. Na sortu fasi wi kan yepi den?
11, 12. Sortu moi okasi yu kan kisi fu yepi wan lasi skapu?
11 Son leisi, den owruman kan aksi Kownukondre preikiman di abi ondrofeni, fu studeri Bijbel nanga sma di no e teki prati moro na a diniwroko èn di e suku yepi. A muiti di den preikiman disi e du, na fu wiki „a lobi di [den lasi skapu disi] ben abi biginbigin” (Openb. 2:1, 4). Den preikiman kan taki tu fu den sani di den lasi skapu no ben yere, fu di den no ben de na den konmakandra. Disi kan gi den skapu disi deki-ati, èn a kan tranga a bribi fu den.
12 Efu den owruman e aksi yu fu studeri nanga wan brada noso wan sisa di abi yepi fanowdu, dan begi Yehovah fu tiri yu èn fu blesi a muiti di yu e du. Iya, „poti yu hebi tapu Yehovah, èn sani sa waka bun gi yu” (Odo 16:3). Denki dipi fu bijbeltekst èn fu tra tori di kan tranga a bribi fu den sma di abi yepi fanowdu. Taki fu den sani disi nanga den. Prakseri a tumusi moi eksempre fu na apostel Paulus. (Leisi Romesma 1:11, 12.) Paulus ben e angri fu si den Kresten na ini Rome, fu di a ben wani gi den wan presenti na yeye fasi, so taki den ben kan tanapu kánkan. A ben angri tu fu miti den so taki den ben kan gi makandra deki-ati. Wi musu abi a srefi denki dati te wi e suku fu yepi den wan di gowe libi na ipi fu Gado, a no so?
13. Fu sortu sani yu kan taki nanga wan sma di no e teki prati moro na a diniwroko?
13 Te yu e taki nanga wan sma di no e teki prati moro na a diniwroko, dan yu ben kan aksi en: „Fa yu kon sabi a waarheid?” Yepi a sma disi fu prakseri baka sortu moi sani a ben ondrofeni na den konmakandra, na ini a preikiwroko, èn na den kongres. Kande yu nanga en ben abi switi ten na ini a diniwroko fu Yehovah. Taki fu den ten dati. Fruteri a sma fa yu breiti taki yu kon moro krosibei na Yehovah (Yak. 4:8). Taigi en o furu warderi yu abi gi a fasi fa Gado e sorgu gi wi leki a pipel fu en, spesrutu fu di a e gi wi trowstu nanga howpu te wi de na ini banawtu.—Rom. 15:4; 2 Kor. 1:3, 4.
14, 15. Na sortu blesi yu kan memre den wan di no e teki prati moro na a diniwroko?
14 Di a Kresten disi ben abi demakandra ete nanga a gemeente, dan a ben e kisi blesi. A no de fu taki dati a ben o bun te yu e memre en na wan tu fu den blesi dati. Fu eksempre, a ben de wan blesi gi en taki a ben e kisi moro sabi fu Gado Wortu èn fu den sani di Gado sa du (Odo 4:18). Di a Kresten disi ben e „waka nanga a yeye”, dan a no de fu taki dati a ben moro makriki gi en fu kakafutu gi den tesi di a ben e kisi fu du sondu (Gal. 5:22-26). Leki bakapisi fu dati, a ben abi krin konsensi di ben e meki en makriki gi en fu begi Yehovah. Boiti dati, a ben abi ’a vrede fu Gado di bigi moro leki san libisma man frustan, èn di e kibri wi ati èn wi frustan’ (Fil. 4:6, 7). Hori den sani disi na prakseri te yu wani yepi a Kresten brada noso sisa disi. Sori en tu taki yu e firi trutru gi en, èn gi en deki-ati na wan lobi-ati fasi fu drai kon baka na a ipi.—Leisi Filipisma 2:4.
15 Kande yu na wan owruman di e go luku wan trowpaar di no e teki prati moro na a diniwroko. Yu kan taki fu a ten di den kon sabi den tru tori fu Gado Wortu fu a fosi leisi. A no de fu taki dati den leri disi ben naki den ati, den ben makriki fu frustan, den ben gi den wan korostu firi, èn den ben meki den kon fri! (Yoh. 8:32) Di den kon sabi Yehovah, a lobi fu en, èn sosrefi den tumusi moi sani di a abi na prakseri fu du, dan a ben musu de so taki den ati ben furu nanga warderi! (Luku Lukas 24:32.) Memre a trowpaar disi na a bun matifasi di den ben abi nanga Yehovah. Memre den tu taki Kresten di gi densrefi abra na Gado, abi a tumusi moi grani fu taki nanga En na ini begi. Du ala muiti fu gi den lasi skapu disi deki-ati fu gi yesi baka na „a kefalek moi bun nyunsu fu a koloku Gado”, Yehovah.—1 Tim. 1:11.
Tan sori lobi gi den
16. Gi wan eksempre fu sori taki a bun te wi e meki muiti fu yepi lasi skapu.
16 Yu sa abi bun bakapisi te yu e du den sani disi? Iya. Luku na eksempre disi: Wan yongusma di ben tron Kownukondre preikiman di a ben abi 12 yari, gowe libi na ipi di a ben abi 15 yari. Ma bakaten, a bigin teki prati baka na a diniwroko, èn a de na ini a furuten diniwroko moro leki 30 yari langa kaba. A sani di yepi en fu teki prati baka na a diniwroko, na a yepi di a kisi fu wan Kresten owruman. A ben breiti srefisrefi nanga a yepi di a ben kisi!
17, 18. Sortu fasi yu musu abi fu man yepi wan sma di gowe libi na ipi fu Gado?
17 Na a lobi di wan Kresten abi, e meki taki a e yepi wan lasi skapu fu drai kon baka na a gemeente. Yesus ben taki fu den bakaman fu en: „Mi e gi unu wan nyun komando, taki un musu lobi makandra; neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra” (Yoh. 13:34, 35). Iya, tru Kresten na sma di abi lobi gi trawan. A ben o bun te den e sori a lobi dati gi dopu Kresten di no e teki prati moro na a diniwroko, a no so? Ma fu man yepi den Kresten disi, dan a kan de fanowdu taki wi e sori wan tu fu den fasi fu Gado.
18 Efu yu wani yepi wan sma di gowe libi na ipi fu Gado, dan sortu fasi yu musu abi? Boiti taki yu musu sori lobi, a kan de fanowdu tu taki yu e sori sari-ati, switifasi, safri-ati fasi, nanga langa pasensi. Son leisi a de fanowdu tu fu gi a sma pardon. Paulus ben skrifi: „Un musu abi trutru sari-ati, bun-ati, sakafasi, safri-ati, nanga langa pasensi, èn den fasi disi musu de leki wan krosi na un skin. Tan frudrage makandra èn gi makandra pardon nanga un heri ati te wan sma feni taki wan trawan du en wan ogri. Soleki fa Yehovah e gi unu pardon nanga en heri ati, na so unu musu du tu. Ma boiti den sani disi, un musu abi lobi, èn a musu de leki wan krosi na un skin, bika lobi na wan volmaakti banti di e meki sma kon de wán.”—Kol. 3:12-14.
19. Fu san ede wi musu du muiti fu yepi lasi skapu fu drai kon baka na a Kresten gemeente?
19 Na ini a tra studie-artikel fu a Waktitoren disi, wi sa luku sortu sani e meki taki son sma e gowe libi na ipi fu Gado. Na artikel dati sa sori wi tu fa a gemeente sa feni en te den Kresten disi e drai kon baka na a ipi. Te yu e studeri na artikel dati, èn te yu e prakseri a wan disi, dan yu kan abi a dyaranti taki ala muiti di yu e meki fu yepi lasi skapu fu drai kon baka na a Kresten gemeente, no sa de fu soso. Na ini a sistema disi, furu sma e gebroiki den heri libi fu tyari gudu kon na wán, ma a libi fu wan-enkri sma nomo warti moro leki ala moni na heri grontapu. Yesus ben tyari disi kon na krin na ini na agersitori fu a lasi skapu (Mat. 18:12-14). Hori a sani dati na prakseri te yu e meki tranga muiti fu yepi lasi skapu di warti srefisrefi gi Yehovah, fu drai kon baka na a ipi.
San yu ben sa piki?
• Sortu frantwortu Kresten owruman abi te wan Kresten gowe libi na ipi?
• Fa yu kan yepi den sma di no abi demakandra moro nanga a gemeente?
• Sortu fasi yu musu abi fu man yepi den wan di gowe libi na ipi?
[Aksi fu a tori disi]
[Prenki na tapu bladzijde 10]
Na wan lobi-ati fasi, Kresten owruman e pruberi fu yepi den wan di gowe libi na ipi fu Gado