Wase Mba Ve Tsum Ve Undu Ikyumuile I Aôndo la
Wase Mba Ve Tsum Ve Undu Ikyumuile I Aôndo la
“Ember nen a mo imôngo, gadia m zua a iyôngo yam i i saa la ve!”—LUKA 15:6.
1. Yesu tese ér un ngu orkuranilev u lun a dooshima nena?
I YILA Yesu Kristu, wan u Yehova u môm môm la ér “Orkuranilev u tamen.” (Heb. 13:20) Ruamabera yange tsengaôron mve na, shi tese ér ngu Orkuranilev u yange lu a gbashima u keren “iyôngo” i Iserael i i “saa” la yô. (Mat. 2:1-6; 15:24) Kwagh ugen yô, Yesu na nagh ku ipaa sha uma na sha ci u mbaasemaamimi mba vea soo u zuan a iwasen sha nagh nagh la, vough er orkuranilev ka nan na uma u nan sha u kuran iyôngo i nan nahan.—Yoh. 10:11, 15; 1 Yoh. 2:1, 2.
2. Ka akaa a nyi nahan alaghga aa na Mbakristu mbagenev vea undu tiônnongo?
2 Kpa kwagh ka a er i vihi yô, ior mbagenev mba nagh ku Yesu yange ku doo ve ishima shi ve tsegha ayol a ve sha ci u Aôndo la undu tiônnongo u Kristu hegen. Alaghga akaa a nan iyolkpen shin angev gayô akaa agen yange na yô, ve kera lu a ishimatseen ga nahan ve vôr ken jijingi. Nahan kpa, saa vea lu ken ikyumuile i Aôndo ve vea ember mlu u kundu kundu man msaanyol u Davidi a er ken Pasalmi u sha 23 la ye. U tesen ikyav yô, Davidi wa icam ér: “TER ka orkuran mo, kwagh môm banem ga.” (Ps. 23:1) Kwagh u ken jijingi môm ban mba ve lu ken ikyumuile i Aôndo la ga, kpa iyôngo i i tsum la yô, kwagh u i ngu nahan ga. Ka an nana wase ve? Man a wase ve nena? Ka akaa a nyi nahan a er ve a wase ve vea hide ken tiônnongo?
Ka An Nana Wase Ve?
3. Yesu yange tese kwagh u i gbe u a er ve a wase iyôngo i Aôndo a koson i̱, i i saa la nena?
3 Gba u se nôngo kwagh kpoghuloo ve se yima iyôngo i Aôndo a koson i, i i saa la ye. (Ps. 100:3) Yesu ôr injakwagh u tesen mimi u kwagh ne, ér: “Aluer or nana lu a iyôngo akunduataan man u môm ken i ia tsume yô, nana kera undu i akunduanyiingber kar itiankarinyiin la sha iwo, nana yem nana za ker i i tsum la gaa? Man aluer nana zua a i yô, mimi je M ngu kaan ne, m-ember u nana ember sha i la, una hemba u sha i akunduanyiingber kar itiankarinyiin i i tsum ga la. Kape i lu ishima i Ter wen u A lu Sha la, u mbakiriki mban, mô ve nana̱ saa ga la.” (Mat. 18:12-14) Ka an nana wase iyôngo i i tsum i undu ikyumuile laa?
4, 5. Doo u mbatamen vea eren a ikyumuile i Aôndo nena?
4 Aluer mbatamen mba ken Kristu soo ér vea wase iyôngo i i tsum la yô, gba u vea umbur ér ikyumuile i Aôndo ka tiônnongo u ior mba ve tsegh ayol a ve sha ci u Yehova yô—sha kpôô yô, ‘mba iyôngo i Aôndo a kor i’ yô. (Ps. 79:13) Gba u mbakuran mba lun a dooshima vea eren a iyôngo i injaa ne sha ue, vea veren ishima sha i̱ tsembelee. Aluer mbatamen mba teman imôngo a ve yô, kwagh ne una wase ve kpen kpen. Alaghga kwaghwan u orkuran nana wa ve sha dooshima la una maa jighjigh ve, shi una seer taver isharen ve i hiden ken tiônnongo la kpaa.—1 Kor. 8:1.
5 Ka tom u mbakuran ikyumuile i Aôndo u keren iyôngo i i tsum la, shi wasen i kpaa. Apostoli Paulu ngise umbur mbatamen mba ken Kristu mba ken Efese u tsuaa la kwagh u tom ve u kuran iyôngo, kaa ér: “Kuran nen ayol a en man ikyumuile i Icighan Jijingi A ver ne mbakuran sha mi cii kpaa, sha u né koso nongo u Kristu u Aôndo, u A yem sha awambe a sha iyol [i Wan] Na la.” (Aer. 20:28) Apostoli Peteru kpa wa mbatamen mbabeenyol mba i shigh ve mkurem mbara kwagh ér: “Kura nen ikyumuile i Aôndo i i lu hen ven la, er ka sha ci u Aôndo nahan, i̱ de lu er i kighir ne a kighir ga, kpa i̱ lu sha asema a en; i̱ de lu sha ci u mtsera u dang ga, kpa i̱ lu sha gbashima je; i̱ de lu er ne mba eren tahav sha kwagh u i we ne sha ikyev ga, kpa lu nen ikyumuile la ikyav.”—1 Pet. 5:1-3.
6. Gba u mbakuran vea hemba veren ishima sha iyôngo i Aôndo nyian cii sha ci u nyi?
6 Gba u mbakuranilev mba ken Kristu vea dondo ikyav i Yesu, “orkuranilev u dedoo” la. (Yoh. 10:11) Yesu yange ver ishima sha iyôngo i Aôndo tsung, sha nahan yô, ôr Shimon Peteru var var er i doo u kuran i yô, a kaa a na ér, “kuran iyôngo Yam.” (Ôr Yohane 21:15-17.) Doo u mbakuran vea hemba veren ishima sha ikyumuile hegen cii, gadia Diabolo ngu hemban gbughur tahav hegen sha er una vihi mtil sha mimi u mba ve tsegh ayol a ve sha ci u Aôndo la yô. Satan ngu kôron ave sha mbamyen asev kua tar ne sha u meen iyôngo i Yehova ér i nyôr iyol ken aeren a hôngorough. (1 Yoh. 2:15-17; 5:19) Ior mba Satan a lu hemban yan mtsera sha ve cii je yô, ka mba ve vôr ken jijingi la. Sha nahan yô, doo u a wase ve sha er vea er sha kwaghwan u i we se ér se ‘zende sha Jijingi’ la yô. (Gal. 5:16-21, 25) Gba u se suur sha Yehova sha msen u eren shi se lumun hemen u jijingi u na shi se eren tom a Mkaanem ma Aôndo tsembelee ve se kôr cio u wasen mba ve tsum ve undu gbenda la ye.—Anz. 3:5, 6; Luka 11:13; Heb. 4:12.
7. Ka a inja u mbatamen vea kura iyôngo i i we ve sha ikyev la nena?
7 Orkuranilev u ken Iserael u sha ashighe a tsuaa la yange nan lu a gbough ku gôgônan nan huren ikyumuile a mi. Iyôngo yange ia nyôron ken ityôr shin ia duen kpa, nan ôron i sha gbough ku nan ‘huren’ i a mi la. (Lev. 27:32; Mika 2:12; 7:14) Orkuranilev u ken Kristu kpaa, gba u nana fa mlu u ikyumuile i Aôndo a we nan sha ikyev la shi nana ver ishima sha mi kpaa. (Nenge Anzaakaa 27:23.) Nahan u zenden sôron anmgbianev sha uyaav vev la ka kwagh u injaa u mbamzough mba mbatamen ka ve lam sha mi yô. Ka ve sôr anmgbianev mba ve hingir u hôron tom mbara kpaa. Yehova iyol na kaa ér una tôv hwange u iyôngo na shi una ver ishima sha i̱ kpaa. (Esek. 34:11) Nahan mbatamen kpa ka vea nôngo vea wase iyôngo i i tsum, i undu ikyumuile la yô, i doo Aôndo kpen kpen.
8. Mbatamen vea fatyô u wasen iyôngo i i tsum la sha nyi igbenda?
8 Zum u anmgbian ka nana gba angev man mbakuran ikyumuile i Aôndo vea sôr nan yô, i saan nan iyol shi ve taver nan ishima kpaa. Angev mbu ken jijingi kpaa, kape iyôngo ka ia gba man mbatamen vea sôr i̱ ve i saan i̱ iyol shi ve taver i̱ ishima je la. Mbatamen vea fatyô u timen ken ruamabera vea nan shi ôron nan ma kwaghngeren u ken Iyoukura shi ôron nan atôakaa a vesen a i er ken mkombo shi eren msen shin akaa agen vea nan kpaa. Shi vea fatyô u pasen nan kpaa ér aluer nan hide nan ngu zan mbamkombo mba tiônnongo yô, a doo tiônnongo u ngohol nan kpishi. (2 Kor. 1:3-7; Yak. 5:13-15) Aluer ka sôron ve shin gbidyen ve waya gayô ngeren ve washika yô, kwagh ne una wase ve kpen kpen! Mbakuran mba ken Kristu mba zungwen mhôônom ka vea wase iyôngo i i tsum, i undu ikyumuile la yô, i saan ve iyol tsung.
Se Cii Se Fatyô u Wasen
9, 10. Er nan ve i lu mbatamen tseegh i gbe u vea wase iyôngo i i tsum la ga?
9 Se mba ken ashighe a ican man a ior ve we akaa a eren ave kpishi yô. Nahan alaghga a taver se u fan anmgbianev mba ve lu kuwan karen ihyongo la. (Heb. 2:1) Nahan kpa, iyôngo i Aôndo doo un ishima tsung. Hanma iyôngo yô, ngi a inja vough er alegh a iyol i orumace nahan. Sha nahan yô, doo u se cii se waan anmgbianev ikyo shi se eren a ve doo doo kpaa. (1 Kor. 12:25) U ngu a imba ieren ne kpa?
10 Ka tom u mbatamen u keren iyôngo i i tsum la shi wasen i kpaa, nahan kpa ka tom u Mbakuran mba ken Kristu tseegh ga. Gba u mbagenev kpa vea wasen mbakuran. Se fatyô u taver anmgbianev mba nomso man mbakasev mba i gbe u a wase ve vea va kohol ikyumuile la asema shi wasen ve kpaa. A wase ve nena?
11, 12. Ka ian i injaa i nyi nahan se lu a mi i wasen anmgbianev mba ve hingir u hôron tom laa?
11 Aluer ma anmgbian u nan tsum soo ér i wase nan yô, mbatamen vea fatyô u ôron anmgbian u nan tse ken tom u pasen kwagh u Tartor ér nana hen Bibilo a nan. Awashima u kwaghhenen la yô, ka u wasen mba ve undu tiônnongo la sha er vea hide vea lu a “dooshima [ve] u hiihii” la her yô. (Mpa. 2:1, 4) A fatyô u maan anmgbianev mban shi taver ve asema sha u ôron ve akaa a yange ve lu ga ve i hen ken tiônnongo la.
12 Aluer mbatamen kaa ér we u hen Bibilo a ma anmgbian u i gbe u a wase nan ken jijingi yô, sôn Yehova a hemen we shi a ver iniôngon you la doo doo. “Wa TER aeren a ou cii sha ikyev, yô, mbaawashima ou kpaa vea kure sha mi vough.” (Anz. 16:3) Gbidye kwar sha avur a Bibilo man atôakaa a taver ishima, a u lam sha mi vea anmgbian u i gbe u u wase nan la. Hen sha ikyav i dedoo i apostoli Paulu a ver se la. (Ôr Mbaromanu 1:11, 12.) Yange hange Paulu u zuan ishigh a Mbakristu mba ken Roma sha er una na ve iwua i sha mrumun u sha mhôôn, vea tile dông yô. Shi yange sar un u taver ve asema kpaa. Doo u se lu a imba ieren la zum u i gbe u se wase iyôngo i i tsum i undu ikyumuile i Aôndo la ga he?
13. Ka akaa a nyi nahan u fatyô u lamen shami vea ma anmgbian u nan hingir u hôron tom laa?
13 Shighe u ú lu henen kwagh vea ma anmgbian u nan hingir u hôron tom yô, u fatyô u pinen nan wer, “Yange u fa mimi nena?” Wase nan nana umbur ashighe a yange nan lu civir Yehova ve saan nan iyol la, shi taver nan ishima nana ôr akaa a doon a yange nan zua a mi ken mbamkombo mba tiônnongo man ken tom u pasen kwagh man sha mbamkohol mba vesen la. Ôr nan er yange ne lu imôngo ne civir Yehova saan saan yô. Shi ôr nan er u lu kporom hen Yehova ve i saan we iyol yô. (Yak. 4:8) Wuese er Aôndo a lu kuren mbamgbe mba ior nav, hemban je yô, a lu surun se asema shi a lu wasen se u lun a ishimaverenkeghen ken atsan a ase yô.—Rom. 15:4; 2 Kor. 1:3, 4.
14, 15. Ka averen a nyi i doo u a umbur anmgbianev mba ve hingir u hôron tom laa?
14 Doo u or u nan lu lamen a anmgbian u nan hingir u hôron tom la nana umbur nan averen a yange nan lu vea tiônnongo ve nan zua a mi la. U tesen ikyav yô, se fatyô u ôron nan er yange nan seer zuan a mfe u Mkaanem ma Aôndo man awashima na yô. (Anz. 4:18) Shi se fatyô u ôron nan ser zum u nan lu ‘zenden sha Jijingi’ la, taver nan u hemban ameen man isholibo ga. (Gal. 5:22-26) Kwagh ugen yô, imoshima i wang i yange nan lu a mi la wase nan u kporom hen Yehova ken msen shi ember ‘bem u Aôndo u a gande hanma mfe wase cii u a kor asema a ase man mbamhen asev’ la. (Fil. 4:6, 7) Kôr atôakyaa a injaa a se tim sha mi ne lu a mi ken ishima, nahan er a anmgbian u nomso shin u kwase u nan undu tiônnongo la doo doo shi taver nan ishima nana̱ hide nana va kohol ikyumuile.—Ôr Mbafilipi 2:4.
15 Tôô ase wer, u ngu ortamen, u ngu sôron anmgbianev sha uyaav vev. U fatyô u taver anmgbianev mba ve vese ayol a ve, mba ve undu tiônnongo la asema wer ve hen er yange i lu ve ken ishima shighe u ve hii henen mimi u Mkaanem ma Aôndo la. Yange ve fa mimi nahan doo ve kpen kpen! (Yoh. 8:32) Akaa a yange ve lu henen sha kwagh u Yehova man dooshima na man mbaawashima nav la na yô, saan ve iyol tsung! (Nenge Luka 24:32.) Ôr ve er Mbakristu mba ve tsegh ayol a ve sha ci u Yehova la ve lu a ian i injaa i eren msen hen a na yô. Taver ve asema sha gbashima wer ve er kwagh sha “loho u Dedoo u iengem i [Yehova] Aôndo u sar sar” la.—1 Tim. 1:11.
Tesen Ve Dooshima
16. Ôr ikyav i i tese ér iniôngon i wasen anmgbianev mba ve hingir u hôron tom shi ve de u pasen kwagh la i saan ashe ga la.
16 Akaa a se tim sha mi ne nga wasen mba ve de u zan mbamkombo shi duen kwaghpasen la mimi kpa? Nga wasen ve yum. U tesen ikyav yô, gumor ugen yange hii u pasen loho u Tartor shighe u lu anyom 12 la, kpa va de u pasen kwagh shighe u nyôr anyom 15 la. Nahan kpa shighe kar yô, va hingir u pasen kwagh kpoghuloo, a er tom u pasen kwagh hanma shighe hemba anyom 30 hegen. Anmgbian ne yange hide taver ken jijingi sha ci u iwasen i Orkristu ugen u lu ortamen na un la. Yange wuese iwasen i ortamen la na un la kpen kpen!
17, 18. Ka aeren a nyi nahan aa wase u, u wasen or u nan undu ikyumuile i Aôndo?
17 Ka dooshima ka a mgbegha Orkristu ve nan wase mba ve undu tiônnongo shi ve de u pasen kwagh la ve hide ken tiônnongo ye. Yesu yange kaa a mbadondon un ér: “M ngu nan ne tindi u he sha u doo nen ayol a en yô; er ne doom ishima nahan, kape ne kpaa, doo nen ayol a en vough la. Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yoh. 13:34, 35) Sha kpôô yô, dooshima ka ikyav i i fe Mbakristu mba mimi sha mi yô. Se nenge ser doo u se tese Mbakristu mba ve er batisema, mba ve hingir u hôron tom u pasen kwagh la dooshima gaa? Doo u se tese ve yum! Kpa shighe u se lu wasen ve yô, doo u se tese ve aeren a Orkristu kposo kposo.
18 Aluer u soo wer u wase or u nan tsum nan undu ikyumuile i Aôndo yô, ka aeren a nyi nahan u fatyô u eren a nanaa? Dugh dooshima kera yô, se fatyô u zungwen nan mhôônom shi eren a nan doo doo man sha ishima i legh legh shi wan ishima a nan kpaa. Shi se zungwe nan mhôônom kpaa, kpa cii man se zungwe nan mhôônom yô, doo u se fa mlu u nan. Paulu nger ér: “Haa nen mhôônom ma kôron tsung iyol, man shi ieren i dedoo man iyol i gengese ga, man ishima i legh legh man ishima i wan er uicuwan mba Aôndo mba ve lu uicighanmbaiorov mba doon ishima nahan. Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la. Kwagh u a hembe cii yô, haa nen dooshima iyol, ka kwagh u maghen mlu u vough je la.”—Kol. 3:12-14.
19. Iniôngon i wasen mbaasemaamimi sha u ve hide ken tiônnongo u Kristu la i saan ashe ga sha ci u nyi?
19 Kwaghhenen u a dondo la una time sha atôakaa a a ne ve mbagenev ka ve undu ikyumuile i Aôndo yô. Shi una tese se er se ngohol mba i sar ve u hiden va kohol tiônnongo la yô. Er u time sha kwaghhenen la shi u gbidye kwar sha kwaghhenen ne yô, fa dedoo wer, iniôngon you i wasen mbaasemaamimi wer ve hide ken tiônnongo u Kristu la ia saa ishe ga. Ior kpishi ka ve na uma ve jimin cii sha u ombon uyôughyôughmbaakaav, kpa uma u or môm tseegh hemba inyaregh ki ior ve lu a mi shin tar jimin cii. Yesu yange ôr kwagh var var sha kwagh ne ken injakwagh i iyôngo i i saa la. (Mat. 18:12-14) Nahan lu a injakwagh i Yesu yange ôr la ken ishima er u nôngo kpoghuloo u wasen iyôngo i i doo Yehova ishima la wer i hide i va kohol ikyumuile yô.
Ú Na Mlumun Wer Nyi?
• Ka tom u nyi Mbakuran mba ken Kristu ve lu a mi u eren sha u wasen iyôngo i i tsum i undu ikyumuile laa?
• Ú wase mba ve undu tiônnongo la nena?
• Ka aeren a nyi aa wase u ve u wase mba ve undu ikyumuile laa?
[Study Questions]
[Picture on page 10]
Mbakuran mba ken Kristu mba wasen mba ve undu ikyumuile i Aôndo la sha dooshima