Amubagwasye Ibazanduka Kubutanga
Amubagwasye Ibazanduka Kubutanga
“Amubotelwe amebo nkaambo ndiibona mbelele yangu iyali kusweekede.”—LK. 15:6.
1. Ino mbuti Jesu mbwaakatondezya kuti mmweembezi siluyando?
MWANA wa Jehova simuzyalwa alikke, Jesu Kristo, wiitwa kuti “mweembezi mupati wambelele.” (Heb. 13:20) Magwalo akasinsima kujatikizya kuboola kwakwe alimwi akatondezya kuti wakali Mweembezi uulibedelede walo iwakali kuyandaula “mbelele zisweekede” zya Israyeli. (Mt. 2:1-6; 15:24) Kuyungizya waawo, mbubwenya mbuli mweembezi wini mbwanga walyaaba kutegwa akwabilile mbelele zyakwe, Jesu wakafwa kutegwa anunune bantu bali mbuli mbelele aabo ibakali kuyoocizumina cipaizyo cakwe.—Joh. 10:11, 15; 1 Joh. 2:1, 2.
2. Ino ncinzi cilangilwa kuti ncicakapa Banakristo bamwi kuti baleke kusungwaala?
2 Cilausisya kujana kuti, ibamwi bakali kulibonya kuti balalumba akaambo kacipaizyo ca Jesu alimwi ibakalyaaba kuli Leza, tabacisungweede mumbungano ya Bunakristo. Kutyompwa, kuciswa-ciswa, naa twaambo tumwi buyo tulakonzya kuti ntotwakapa kuti busungu mbobakajisi buye aansi alimwi akubapa kuti baleke kusungwaala. Nokuba boobo, ccita kuti kabali mubutanga bwa Leza nobakonzya kuliiba alimwi akujana lukkomano oolo Davida ndwaakaamba ku Intembauzyo 23. Mucikonzyanyo, wakaimba kuti: “Jehova ngumweembeli wangu, nsikabuli cintu.” (Int. 23:1) Aabo bali mubutanga bwa Leza tababuli cintu niciba comwe icikonzya kuyumya cilongwe cabo a Leza, pele oobu tabusyi mbocibede kumbelele zyakazanduka. Ino nguni uukonzya kuzigwasya? Ino mbuti mbozikonzya kugwasyigwa? Ee, ino ncinzi cikonzya kucitwa kutegwa muzigwasye kupilukila kubutanga?
Ino Nguni Uukonzya Kuzigwasya?
3. Ino mbuti Jesu mbwaakatondezya cintu ciyandika kutegwa mupilusye mbelele zisweekede zyamubutanga bwa Leza?
3 Kuyandika kusolekesya kutegwa muzipilusye mbelele zisweekede mubutanga bwa Leza. (Int. 100:3) Jesu wakabelesya cikozyanyo mumakani aaya naakati: “Kuti muntu kajisi imbelele zili mwaanda, nkabela imwi akati kazyo yapambuka, sa tasii zili makumi aali musanu aane aali amusanu azine kuti aye azilundu, ayandaule eyo iipambukide. Nkabela aijana, ndamwaambila ncobeni kuti ulakondelwa njiyo kwiinda ezyo zili makumi aali musanu aane aali amusanu azine izyatakapambuka. Mbuboobo Usowanu uuli kujulu tayandi kuti afwidilile naba umwi akati kabaniini aba.” (Mt. 18:12-14) Ino nguni uukonzya kubagwasya bantu bali mbuli mbelele aabo bakaleya kuzwa kubutanga?
4, 5. Ino baalu beelede kulimvwa buti kubutanga bwa Leza?
4 Ikuti baalu Banakristo kabayanda kugwasya mbelele izyakazanduka, beelede kwiibaluka kuti butanga bwa Leza nimbungano yabantu balyaabide kuli Jehova—‘imbelele ziyandika kapati zyameembelelo aa Leza.’ (Int. 79:13) Eezyi mbelele ziyandika kulanganyizyigwa kabotu, alimwi eeci caamba kuti beembezi basiluyando beelede kwiilanganya aimwi kwiigama. Kucita nyendo zyabweembezi munzila yabulongwe kubantu aaba cilakonzya kugwasya kapati. Kukulwaizya kucitwa caluyando mweembezi nkwacita kulimbabo kulakonzya kubayumya kumuuya alimwi akubapa kuti bayandisisye kupilukila kubutanga.—1 Kor. 8:1.
5 Beembezi babutanga bwa Leza balijisi mukuli wakuyandaula mbelele zyakasweeka alimwi akusoleka canguzu kuzigwasya. Mwaapostolo Paulo wakayeezya baalu Banakristo baku Efeso yansiku mikuli yabo yabweembezi naakati: “Amujatisye, lwanu nobeni, abutanga boonse mbuumubika Muuya Uusalala kuti mube balinguzi bambubo, mulele mbungano ya-Mwami njakaula abulowa bwakwe mwini.” (Inc. 20:28) Mbubwenya buyo, mwaapostolo Petro wakabalailila boobu baalu bananike: “Amweembele butanga bwa-Leza buli akati kanu, alimwi kutabi kwakusinikizigwa, pe, akube camoyo omwe. Kutabi kwakuunya kulubono lwaansi, pele kwamoyo uutuba. Mutabaciti kamikami abeembelwa ndinywe, pele amubabede citondezyo cakutobela.”—1 Pet. 5:1-3.
6. Ino nkaambo nzi mbelele zya Leza ncoziyandika kulanganyizyigwa kabotu abeembezi mazuba aano?
6 Beembezi Banakristo beelede kwiiya Jesu, “sikweembela mubotu.” (Joh. 10:11) Wakali kuzibikkila kapati maano mbelele zya Leza alimwi wakakankaizya mbociyandika kuzilanganya iciindi naakaambila Simoni Petro kuti ‘ayembele mbelele zyakwe.’ (Amubale Johane 21:15-17.) Ikwaambisya mazuba aano mbelele ziyandika kulanganyizyigwa kabotu, nkaambo Diabolosi ulasoleka canguzu ikulesya baabo balyaabide kuli Leza kuti kabasyomeka. Saatani ubelesya kukompama kwakumubili alimwi azyintu zyamunyika zyoongelezya nasola kuyunga mbelele kuti zitalike kucita micito mibyaabi. (1 Joh. 2:15-17; 5:19) Ibatacisungweede tabakwabilidwe pe, aboobo bayandika kugwasya kutegwa balubelesye lulayo ‘lwakweendela munzila yamuuya.’ (Gal. 5:16-21, 25) Ikutegwa tucikonzye kugwasya mbelele eezyi, kuyandika kusyoma Leza alimwi amuuya wakwe uusalala kuti utusololele alimwi akubelesya Jwi lyakwe cabusongo.—Tus. 3:5, 6; Lk. 11:13; Heb. 4:12.
7. Ino ciyandika buti kuti baalu kabeembela bantu mbobalanganya ibali mbuli mbelele?
7 Mweembezi mu Israyeli yansiku wakali kubelesya musako mulamfwu uujisi ngobyo kutegwa asololele butanga bwakwe. Mbelele nozyakali kunjila naa kuzwa mucaanda, zyakali ‘kwiinda kunsi aamusako wamweembezi,’ aboobo mweembezi wakali kukonzya kuzibala. (Lev. 27:32; Mik. 2:12; 7:14) Awalo mweembezi Munakristo weelede kubuzyiba kabotu butanga bwa Leza alimwi akuzyiba aimwi mboipona. (Amweezyanisye a Tusimpi 27:23.) Aboobo, mulimo wabweembezi nkekaambo kamwi kapati kabandikwa atubunga twabaalu. Eeci cibikkilizya kubikka bubambe bwakugwasya mbelele zyakazanduka. Jehova lwakwe wakaamba kuti uyooziyandaula mbelele zyakwe alimwi akuzilanganya mboziyandika. (Ezk. 34:11) Aboobo Leza ulakkomana ibaalu abalo nobabweza ntaamu yakugwasya mbelele zyakasweeka kutegwa zipilukile kubutanga.
8. Ino munzila nzi baalu mobakonzya kwiigwasya mbelele aimwi?
8 Ciindi musyomima nacisidwe kumubili, kuswaya kwamweembezi wabutanga bwa Leza kulakonzya kumuletela lukkomano mulwazi alimwi akumukulwaizya. Ncimwi buyo akuti naa mbelele iiciswa kumuuya yabikkilwa maano. Baalu balakonzya kubala magwalo, kulanga-langa cibalo, kubandika twaambo tupati-pati twakabandikwa kumuswaangano, kupaila antoomwe amuntu uutacisungweede, alimwi azimwi buyo. Balakonzya kupandulula kumuntu uutacisungweede kuti bantu boonse bamumbungano inga baakukkomana kapati kumubona kumiswaangano yambungano. (2 Kor. 1:3-7; Jak. 5:13-15) Kuswaya, kutuma luwaile, naa kulemba lugwalo kulakonzya kugwasya kapati. Kugwasya mbelele aimwi yakazanduka kubutanga akwalo kulakonzya kumuletela lukkomano lupati mweembezi Munakristo siluyando.
Toonse Tulakonzya Kusoleka Kugwasya
9, 10. Nkaambo nzi ncomukonzya kwaamba kuti kubikkila maano kumbelele zyakasweeka takweelede kucitwa buyo abaalu?
9 Tupona kuciindi bantu nobajisi bubi alimwi icikatazya, aboobo inga tiitwakonzya kubona kuti musyomima uyaabuzanduka kumbungano. (Heb. 2:1) Pele, mbelele zya Jehova zilayandika kapati kulinguwe. Aimwi kwiigama ilayandika mbubwenya cizyo camubili wamuntu acimwi mbociyandika. Aboobo, toonse tweelede kubikkila maano kubakwesu alimwi akugwasyanya. (1 Kor. 12:25) Sena mbomulimvwa oobu?
10 Nokuba kuti baalu mbabajisi mukuli mupati wakuyandaula alimwi akugwasya mbelele zyakazanduka, ikubikkila maano kubasyomima bakasweeka takweelede kucitwa buyo abalangizi Banakristo balikke pe. Bamwi balakonzya kubelekela antoomwe abeembezi aaba. Tulazumizyigwa alimwi tweelede kubakulwaizya akubagwasya bakwesu alimwi abacizyi ibayanda kugwasyigwa kutegwa bapilukile kubutanga. Ino mbuti lugwasyo oolu mbolukonzya kupegwa?
11, 12. Ino mbuti mbomukonzya kupegwa coolwe cakugwasya muntu uuyandika lugwasyo lwakumuuya?
11 Ziindi zimwi, baalu inga balomba sikumwaya wa Bwami uusimide kuti keendelezya ciiyo ca Bbaibbele kumuntu uutacisungweede walo uuyandika kugwasyigwa. Makanze aabubambe oobu ngakugwasya bantu aaba kubukulusya “luyando [lwabo] lwakusaanguna.” (Ciy. 2:1, 4) Basyomima aaba balakonzya kukulwaizyigwa akuyumizyigwa kumuuya kwiinda mukulanga-langa twaambo ntobakaindwa nobatakali kujanika kumbungano.
12 Ikuti baalu bamulomba kuti kamwiiya amusyomima uuyandika kugwasyigwa kumuuya, amupailile kuti Jehova amusololele alimwi akukulongezya kusoleka kwanu. Masimpe, ‘amuleke milimo yanu mumaanza aa Jehova, nkabela uyoozuzikizya makanze aamumoyo wanu.’ (Tus. 16:3) Amuzinzibale kuyeeya magwalo aamu Bbaibbele alimwi atwaambo tuyumya lusyomo ntomukonzya kubelesya mumibandi yanu abaabo bayanda lugwasyo lwakumuuya. Amutelaike cikozyanyo cibotu camwaapostolo Paulo. (Amubale Ba-Roma 1:11, 12.) Paulo wakayandisisya kubabona Banakristo bamu Roma kutegwa abaabile cimwi cipo cakumuuya kuti bayumizyigwe. Alimwi wakali kulangila kuti bakakulwaizyanye. Sena tatweelede kuba abube oobu ciindi notuyanda kugwasya mbelele yakazanduka kubutanga bwa Leza?
13. Ino mmakani nzi ngomunga mwabandika amuntu uutacisungweede?
13 Ciindi nomwiiya, inga mwabuzya kuti: “Ino kasimpe mwakakaiya buti?” Amumukulwaizye kwaamba ziindi zikkomanisya nzyaakali kujana mumulimo wa Jehova, zyakuluula zikulwaizya zyakacitika kumiswaangano yambungano, mumulimo wakukambauka akumiswaangano yacooko. Amwaambe ikuti naa kuli ziindi zikkomanisya nzyomwakajisi anguwe mumulimo wa Jehova. Amwaambe mbomukkomene akaambo kakuba acilongwe cibotu a Jehova. (Jak. 4:8) Amutondezye kuti mulamulumba Leza akaambo kanzila mbwatupa nzyotuyandika tobantu bakwe—ikwaambisya kwiinda mukutuumbulizya alimwi akutupa bulangizi mumapenzi ngotujisi.—Rom. 15:4; 2 Kor. 1:3, 4.
14, 15. Ino nzilongezyo nzi nzibakajanide ibatacisungweede zyalo nzyobakonzya kuyeekezyegwa?
14 Kulangilwa kuti inga cagwasya kuyeezya muntu uutacisungweede kujatikizya zilongezyo nzyaakajisi akaambo kakuyanzana kapati ambungano. Mucikonzyanyo, kwakali cilongezyo cakuba aluzyibo lunji lwa Jwi lya Leza alimwi amakanze aakwe. (Tus. 4:18) Naakali ‘kweendela munzila yamuuya,’ cakali cuuba-uba kuzunda masunko aakucita cibi. (Gal. 5:22-26) Aboobo, manjezeezya aakwe aasalala akali kumugwasya kupaila kuli Jehova alimwi akuba ‘aluumuno lwa Leza lwiinda miyeeyo yoonse yabantu alimwi iluyaminina myoyo yesu amiyeeyo yesu.’ (Flp. 4:6, 7) Kamutwiibaluka twaambo ootu lyoonse, amutondezye kuti mulabikkila maano, alimwi cakutasowa ciindi amumukulwaizye mukwesu naa mucizyi Munakristo kuti apilukile kubutanga.—Amubale Ba-Filipi 2:4.
15 Amweezeezye kuti muli baalu ibali mulweendo lwabweembezi. Inga mwabakulwaizya banabukwetene batacisungweede kuzinzibala kuyeeya ciindi cakusaanguna nobakaiya kasimpe kamu Jwi lya Leza. Elo kaka kasimpe kakali kukkomanisya, kukatalusya alimwi akunununa kumuuya! (Joh. 8:32) Elo bakalumbaace kumakani ngobakali kwiiya kujatikizya Jehova, luyando ndwajisi alimwi amakanze aakwe aataliboteli! (Amweezyanisye a Luka 24:32.) Amubayeezye cilongwe cini-cini a Jehova alimwi acoolwe citaliboteli icakupaila ncobajisi Banakristo balyaabide. Amubakulwaizye cakusinizya aabo ibatacisungweede kutegwa alimwi batalike kukkomanina “Makani Mabotu aabulemu bwa-Leza uuli acoolwe,” Jehova.—1 Tim. 1:11.
Amuzumanane Kutondezya Kuti Mulabayanda
16. Amupe cikozyanyo citondezya kuti ikusoleka kugwasya batacisungweede kulazwidilila.
16 Sena mizeezo yapegwa atala aawa ibeleka ncobeni? Inzya. Mucikozyanyo, muntu umwi iwakaba sikumwaya wa Bwami naakajisi myaka yakuzyalwa iili 12, busungu bwakwe bwakamana naakakkwanya myaka yakuzyalwa iili 15. Nokuba boobo, wakazyi kuba musungu alimwi. Aboobo, lino uli mumulimo waciindi coonse kwamyaka yiinda ku 30. Ikaambo kapati kakapa kuti abe musungu alimwi nkakuti wakagwasyilizyigwa amwaalu Munakristo. Elo kaka wakalumba kulugwasyo oolu!
17, 18. Ino mbube nzi ibunga bwamugwasya nomugwasya muntu umwi wakazandukide mubutanga bwa Leza?
17 Luyando ndolukulwaizya Banakristo kuti kabagwasya baabo ibatacisungweede kuti bapiluke kumbungano. Naakali kwaambila batobeli bakwe, Jesu wakati: “Ndamupa mulao mupya wakuti, amuyandane umwi amweenzinyina, mbuli mbwendali kumuyanda, anywebo muyandane mbubonya. Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Joh. 13:34, 35) Masimpe, luyando ncecizyibyo ca Banakristo bakasimpe. Sena luyando oolu talweelede kutondezyegwa ku Banakristo babbapatizyidwe ibaboneka mbuli kuti tabacisungweede? Luleelede kutondezyegwa. Pele ikutegwa tumugwasye bweelede muntu kuyandika kutondezya bube bwa Leza bwiindene-indene.
18 Ino mbube nzi mbumweelede kutondezya ikutegwa mumugwasye muntu wakazanduka mubutanga bwa Leza? Kunze kwaluyando, mulakonzya kuyandika kutondezya buuya, luzyalo, kubomba alimwi abusicamba. Alimwi mulakonzya kuyandika kuba muntu uulekelela, kweelana azyintu mbozibede ciindi eeco. Paulo wakalemba kuti: “Amulisamike moyo waluzyalo, buuya, lulifwiinsyo, lubombo, abusicamba. Amukazikilane myoyo yanu akulekelelana, na umwi ulijisi kaambo kumweenzinyina. Mbuli Mwami mbwaakamulekelela milandu yanu, anywebo amucite mbubonya obo. Nkabela kwiinda zyoonse amube aluyandano, ikuti luyandano ncecaanzyo cabuumi bulondokede.”—Kol. 3:12-14.
19. Nkaambo nzi ncociyandika kapati kusolekesya ikugwasya bantu bali mbuli mbelele kutegwa bapilukile kubutanga bwa Banakristo?
19 Cibalo citobela iciyiigwa mumagazini eeyi ciyakulanga-langa twaambo ibamwi tubapa kuzanduka mubutanga bwa Leza. Alimwi ciyakutondezya mbuli baabo bapiluka mbobakonzya kutambulwa. Nomwiiya cibalo eeci alimwi akuyeeya ceeci, amusyome kuti ikusoleka nkomucita kamujisi bulangizi bwakugwasya bantu bali mbuli mbelele kutegwa bapiluke kubutanga bwa Banakristo, kulayandika kapati. Mubweende oobu bwazyintu, bantu banji buumi bwabo boonse buyeeme akujana buvwubi, pele muntu omwe ulayandika kapati kwiinda mali aali munyika eeyi. Jesu wakaakankaizya makani aaya mucikozyanyo cakwe cambelele yakasweeka. (Mt. 18:12-14) Ciindi nomusolekesya alimwi akubindaana ikugwasya bantu mbayandisya Jehova ibali mbuli mbelele bakazanduka ibeelede kupilukila, muleelede kukayeeya kaambo aaka.
Ino Inga Mwaingula Buti?
• Ino mmukuli nzi beembezi Banakristo ngobajisi kubantu aabo ibali mbuli mbelele ibakazanduka kubutanga?
• Ino mbuti mbotukonzya kubagwasya batacisungweede mumbungano?
• Ino mbube nzi bukonzya kumugwasya kutegwa mubagwasye kabotu aabo bakazanduka kubutanga?
[Mibuzyo yaciiyo]
[Cifwanikiso icili apeeji 10]
Beembezi Banakristo caluyando balabagwasya aabo ibakazanduka kubutanga bwa Leza