Hupti ang Panglantaw sa Bibliya Bahin sa Pag-atiman sa Panglawas
Hupti ang Panglantaw sa Bibliya Bahin sa Pag-atiman sa Panglawas
“Higugmaon mo si Jehova nga imong Diyos . . . sa tibuok mong kaisipan ug sa tibuok mong kusog.”—MAR. 12:30.
1. Unsay katuyoan sa Diyos alang sa katawhan?
DILI katuyoan ni Jehova nga Diyos nga ang tawo masakit ug mamatay. Iyang gibutang si Adan ug Eva sa tanaman sa Eden, o sa paraiso sa kalipay, “aron sa pagtikad niini ug sa pag-atiman niini,” dili lamang sulod sa 70 o 80 ka tuig, kondili hangtod sa kahangtoran. (Gen. 2:8, 15; Sal. 90:10) Kon nagmatinumanon pa sila kang Jehova ug nagpasundayag sa ilang gugma pinaagi sa pagpasakop sa iyang pagkasoberano, dili gayod unta sila masakit, maluya, ug mamatay.
2, 3. (a) Giunsa paghulagway ang pagkatigulang diha sa basahon sa Ecclesiastes? (b) Kinsay responsable sa Adanikong kamatayon, ug sa unsang paagi wagtangon ang mga epekto niini?
2 Ang Ecclesiastes kapitulo 12 tatawng naghubit sa “malisod nga mga adlaw” nga masinati sa dili hingpit nga mga tawo dihang matigulang na sila. (Basaha ang Ecclesiastes 12:1-7.) Ang buhok nga ubanon gitandi ngadto sa mga bulak sa “kahoyng almendras.” Ang mga bitiis gipakasama sa “mga lalaking kusgan” nga mangapiko ug mangurog na. Ang mga babaye nga nanambo sa bentana apan wala nay makita tungod sa kangitngit maoy haom nga ilustrasyon sa pagkahalap. Kay nangapangag na, “ang mga babayeng naggaling manghunong sa pagtrabaho tungod kay sila diyutay na.”
3 Ang nangurog nga bitiis, halap nga mata, ug napangag nga ngipon dili gayod maoy katuyoan sa Diyos alang sa tawo. Dugang pa, ang kamatayon nga napanunod kang Adan maoy usa sa “mga buhat sa Yawa” nga wagtangon sa Anak sa Diyos pinaagi sa iyang Mesiyanikong Gingharian. Si apostol Juan misulat: “Tungod niini nga katuyoan nga gipadayag ang Anak sa Diyos, nga mao, aron sa pagbungkag sa mga buhat sa Yawa.”—1 Juan 3:8.
Normal Lamang nga Mabalaka sa Panglawas
4. Nganong normal lamang nga ang mga alagad ni Jehova mabalaka sa ilang panglawas, apan unsang kamatuoran ang ilang naamgohan?
4 Sa pagkakaron, ang mga alagad ni Jehova masakit ug matigulang nga maoy kasagarang maagoman sa makasasalang mga tawo. Normal lamang nga mabalaka sa atong panglawas. Makaayo pa gani kini. Dili ba gusto natong alagaran si Jehova ‘sa tibuok natong kusog’? (Mar. 12:30) Apan, bisan tuod maningkamot kita sa pagpabiling himsog, angay nga magmakataronganon kita ug dawaton ang kamatuoran nga dili gayod nato kalikayan nga masakit o matigulang.
5. Unsay atong makat-onan sa paagi nga gisagubang sa matinumanong mga alagad sa Diyos ang ilang balatian?
5 Daghang matinumanong mga alagad ni Jehova ang nagmasakiton usab. Usa kanila si Epafrodito. (Filip. 2:25-27) Ang maunongong kauban ni apostol Pablo nga si Timoteo sagad nga sakitan ug tiyan, busa misugyot si Pablo nga moinom siya ug “diyutayng bino.” (1 Tim. 5:23) Si Pablo mismo may “tunok sa unod,” tingali usa ka balatian sa mata o lain pang sakit nga wala pay tambal niadtong panahona. (2 Cor. 12:7; Gal. 4:15; 6:11) Mahitungod sa iyang “tunok sa unod,” si Pablo nangaliyupo kang Jehova nga kuhaon kini. (Basaha ang 2 Corinto 12:8-10.) Wala ayoha sa Diyos sa milagrosong paagi ang “tunok sa unod” ni Pablo. Hinunoa, gipalig-on siya sa Diyos aron iya kanang maantos. Busa ang gahom ni Jehova napadayag diha sa kaluyahon ni Pablo. Aduna ba kitay makat-onan niini?
Likayi ang Sobrang Kabalaka sa Panglawas
6, 7. Nganong dili kita angayng mabalaka pag-ayo sa atong panglawas?
6 Sa imo nang nasayran, ang mga Saksi ni Jehova magpadoktor ug modawat ug lainlaing matang sa pagtambal. Ang atong magasing Pagmata! subsob maghisgot ug mga artikulo bahin sa panglawas. Ug bisan tuod dili kita morekomendar ug usa ka matang sa pagtambal, mapasalamaton kita sa tabang ug kooperasyon sa propesyonal nga mga tig-atiman sa panglawas. Siyempre, nahibalo kita nga dili pa mabatonan karon ang hingpit nga panglawas. Busa, maalamon gayod nga dili kita sobrang mabalaka sa atong panglawas o magsige na lag hunahuna bahin niana. Kinahanglang lahi ang atong tinamdan niadtong “walay paglaom,” kinsa naghunahuna nga mao na lamang kini ang kinabuhi busa mopailalom na lang sa bisan unsang matang sa terapiya aron maayo ang ilang sakit. (Efe. 2:2, 12) Determinado kita nga dili mobuhat ug bisan unsa nga supak sa kabubut-on ni Jehova aron lang maluwas ang atong presenteng kinabuhi, kay kombinsido kita nga kon kita magmaunongon sa Diyos, kita “makapangupot pag-ayo sa tinuod nga kinabuhi,” ang walay-kataposang kinabuhi diha sa iyang gisaad nga bag-ong sistema sa mga butang.—1 Tim. 6:12, 19; 2 Ped. 3:13.
7 Aduna pay laing rason kon nganong dili kita angayng mabalaka pag-ayo sa atong panglawas. Kon masobrahan ang atong kabalaka niini basin mahimo kitang mahunahunaon lamang sa kaugalingon. Si Pablo nagpasidaan bahin niini sa dihang iyang giawhag ang mga taga-Filipos “nga magatan-aw, dili lamang sa personal nga interes sa mga butang labot sa [ilang] kaugalingon, kondili sa personal nga interes usab sa uban.” (Filip. 2:4) Angay lamang nga atimanon nato ang atong kaugalingon, apan ang tiunay nga interes nga atong ipakita sa atong mga igsoon ug sa mga tawo nga atong sangyawan ‘niining maayong balita sa gingharian’ makatabang kanato nga malikayan ang pagsigeg hunahuna sa atong panglawas.—Mat. 24:14.
8. Unsay lagmit nga mahitabo kon kita sobra ka mabalak-on sa atong panglawas?
8 Anaa ang kapeligrohan nga unahon sa usa ka Kristohanon ang pag-atiman sa iyang panglawas inay ang intereses sa Gingharian. Kon kita sobra ka mabalak-on sa atong panglawas lagmit nga atong ipugos ang atong opinyon sa uban mahitungod sa pagkahinungdanon sa usa ka matang sa pagkaon, terapiya, o food supplement. Bahin niini, tagda ang prinsipyo nga gipahayag ni Pablo: ‘Tinoa ang mas hinungdanong mga butang, aron kamo mahimong walay-ikasaway ug dili makapandol sa uban hangtod sa adlaw ni Kristo.’—Filip. 1:10.
Unsay Mas Hinungdanon?
9. Unsa ang usa sa mas hinungdanong mga butang nga dili gayod nato pasagdan, ug ngano?
9 Aron atong matino ang mas hinungdanong mga butang, angay nga aktibo kitang makigbahin sa pagtabang sa uban nga makabaton ug maayong relasyon sa Diyos. Mahimo kini pinaagi sa pagsangyaw ug pagtudlo kanila bahin sa Pulong sa Diyos. Kining makapalipayng buluhaton makahatag ug kaayohan kanato ug sa atong gitudloan. (Prov. 17:22; 1 Tim. 4:15, 16) Matag karon ug unya ang mga magasing Bantayanang Torre ug Pagmata! maglakip ug mga artikulo nga naghisgot bahin sa atong mga igsoon sa pagtuo. Usahay kini nga mga asoy nagpatin-aw kon giunsa nila pagsagubang ang ilang mga balatian o nalimot pa gani niana sa makadiyot sa dihang sila nagtabang sa uban nga makaila kang Jehova ug mahibalo sa iyang maanindot nga mga saad. a
10. Nganong hinungdanon ang atong pagpilig paagi sa pagtambal?
10 Sa dihang masakit ang usa ka hamtong nga Kristohanon, kinahanglang ‘pas-anon niya ang iyang kaugalingong luwan’ sa pagpilig paagi sa pagtambal. (Gal. 6:5) Apan angay natong hinumdoman nga hinungdanon kang Jehova ang atong pagpilig paagi sa pagtambal. Maingon nga ang pagtamod sa mga prinsipyo sa Bibliya mopalihok kanato sa ‘pag-ayad sa dugo,’ ang atong tiunay nga pagpabili sa Pulong sa Diyos angayng magtukmod kanato sa paglikay sa mga paagi sa pagtambal nga makadaot sa atong relasyon kang Jehova. (Buh. 15:20) Ang pipila ka paagi sa pagdayagnos ug pagtambal adunay kaamgiran sa espiritistikong mga buhat. Wala mahimuot si Jehova sa apostatang mga Israelinhon, kinsa migamit ug “mahikanhong gahom,” o espiritistikong mga buhat. Siya miingon: “Hunong na kamo sa pagdala ug walay-bili nga mga halad-nga-lugas. Ang insenso—butang kini nga dulumtanan kanako. Ang bag-ong bulan ug ang igpapahulay, ang pagtawag ug usa ka panagkatigom—dili ko maantos ang paggamit ug mahikanhong gahom uban sa solemneng panagkatigom.” (Isa. 1:13) Sa dihang kita masakit, dili gayod kita angayng mobuhat ug bisan unsa nga makababag sa atong mga pag-ampo ug makadaot sa atong relasyon sa Diyos.—Lam. 3:44.
Hinungdanon ang “Maayong Panghunahuna”
11, 12. Sa unsang paagi magamit ang “maayong panghunahuna” sa dihang mopili kitag paagi sa pagtambal?
11 Sa dihang kita masakit, dili kita makadahom nga ayohon kita ni Jehova sa milagrosong paagi, apan makapangayo kita kaniyag kaalam sa atong pagpilig paagi sa pagtambal. Angay nga magiyahan kita sa mga prinsipyo sa Bibliya ug sa maayong panabot. Kon grabe ang atong sakit, maayong mokonsulta ug lainlaing espesyalista kon mahimo, ug kini nahiuyon sa giingon sa Proverbio 15:22: “Mapakyas ang mga plano kon walay kompidensiyal nga panagsultihanay, apan diha sa panon sa mga magtatambag adunay kalamposan.” Giawhag ni apostol Pablo ang iyang mga isigkamagtutuo nga ‘magkinabuhi uban ang maayong panghunahuna ug pagkamatarong ug diyosnong pagkamahinalaron taliwala niini nga sistema sa mga butang.’—Tito 2:12.
12 Daghan karon ang susamag kasinatian sa masakitong babaye sa adlaw ni Jesus. Sa Marcos 5:25, 26, atong mabasa: “Dihay usa ka babaye nga gitalinug-an sulod na sa napulog-duha ka tuig, ug gipaantos siyag daghang kasakit sa daghang mananambal ug nagasto na ang tanan niyang kahinguhaan ug wala mamaayo apan migrabe pa hinuon.” Si Jesus naluoy ug iyang giayo ang babaye. (Mar. 5:27-34) Sa tinguha nga maayo ang ilang sakit, ang pipila ka Kristohanon nahaylo sa pagpili ug mga paagi sa pagdayagnos o pagtambal nga supak sa mga prinsipyo sa putli nga pagsimba.
13, 14. (a) Sa unsang paagi mahimong gamiton ni Satanas sa pagbungkag sa atong integridad ang atong pagpilig paagi sa pagtambal? (b) Nganong angay natong likayan ang bisan unsa nga nalangkit sa okulto?
13 Si Satanas mogamit ug bisan unsa aron motalikod kita sa matuod nga pagsimba. Maingon nga siya mogamit ug seksuwal nga imoralidad ug materyalismo aron makasala ang pipila, siya naningkamot sa pagbungkag sa integridad sa uban pinaagi sa kuwestiyonableng mga paagi sa pagtambal nga nalangkit sa mga buhat sa okulto ug espiritismo. Kita moampo kang Jehova nga unta iya kitang luwason gikan “sa usa nga daotan” ug gikan “sa tanang matang sa pagkamalapason.” Busa dili kita magpailalom kang Satanas pinaagi sa pagladlad sa atong kaugalingon sa bisan unsa nga nalangkit sa espiritismo ug okulto.—Mat. 6:13; Tito 2:14.
14 Gidid-an ni Jehova ang mga Israelinhon sa pagpanag-an ug paghimog salamangka. (Deut. 18:10-12) Giapil ni Pablo ang “espiritismo” sa “mga buhat sa unod.” (Gal. 5:19, 20) Dugang pa, kadtong “nanagbuhat sa espiritismo” walay luna sa bag-ong sistema sa mga butang ni Jehova. (Pin. 21:8) Nan, dulumtanan gayod kaniya ang bisan unsa nga nalangkit sa espiritismo.
“Ipaila ang Inyong Pagkamakataronganon”
15, 16. Nganong gikinahanglan nato ang kaalam sa pagpilig paagi sa pag-atiman sa panglawas, ug unsang maalamong tambag ang gihatag sa unang-siglo nga nagamandong lawas?
15 Busa, kon nagduda kita nga ang usa ka paagi sa pagdayagnos o pagtambal nalangkit sa espiritismo, maayong likayan kana. Siyempre, wala magpasabot nga kon wala kaayo nato masabti ang usa ka paagi sa pagtambal, kana nalangkit na sa espiritismo. Ang paghupot sa panglantaw sa Bibliya bahin sa pag-atiman sa panglawas nagkinahanglag kaalam nga gipasukad sa Pulong sa Diyos ug maayong panghukom. Sa Proverbio kapitulo 3, atong mabasa kining tambaga: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan. . . . Ampingi ang praktikal nga kaalam ug ang katakos sa panghunahuna, ug sila mahimong kinabuhi alang sa imong kalag.”—Prov. 3:5, 6, 21, 22.
16 Bisan tuod maningkamot kita sa pagpabiling himsog kutob sa maarangan, angay kitang mag-amping nga dili mawad-an sa pag-uyon sa Diyos samtang naningkamot kita sa pagsagubang sa atong sakit o sa kalisdanan sa pagkatigulang. Sa pag-atiman sa panglawas, maingon man sa ubang mga butang, angay natong ‘ipaila ang atong pagkamakataronganon sa tanang tawo’ pinaagi sa pagsunod sa mga prinsipyo sa Bibliya. (Filip. 4:5) Diha sa usa ka hinungdanon kaayong sulat, ang nagamandong lawas sa unang siglo nagsugo sa mga Kristohanon sa pag-ayad sa idolatriya, sa dugo, ug sa pakighilawas. Ang maong sulat naglakip niini nga pasalig: “Kon kamo magpahilayo gayod niining mga butanga, mabulahan kamo.” (Buh. 15:28, 29) Sa unsang paagi?
Makasaranganong Pag-atiman sa Lawas Samtang Nagpaabot sa Hingpit nga Panglawas
17. Sa unsang paagi kita nakabatog kaayohan sa pisikal tungod sa atong pagsunod sa mga prinsipyo sa Bibliya?
17 Angay natong suknaon ang atong kaugalingon, ‘Ako bang nakita nga ako nabulahan tungod sa akong pagsunod sa mga prinsipyo sa Bibliya maylabot sa dugo ug pakighilawas?’ Hunahunaa usab ang mga kaayohan nga atong napahimuslan tungod sa atong pagpaningkamot nga ‘hinloan ang atong kaugalingon sa tanang kahugawan sa unod ug espiritu.’ (2 Cor. 7:1) Pinaagi sa pagsunod sa mga sukdanan sa Bibliya mahitungod sa personal nga kahinlo, atong malikayan ang daghang sakit. Kita nabulahan tungod kay kita dili manabako ug dili mogamit sa gidili nga mga droga nga makadaot sa atong lawas ug sa atong relasyon sa Diyos. Tagda usab ang mga kaayohan sa atong panglawas gumikan sa pagkahimong makasaranganon sa pagkaon ug pag-inom. (Basaha ang Proverbio 23:20; Tito 2:2, 3.) Bisan tuod ang pagpahulay ug ehersisyo makaayo sa atong lawas, kita ilabinang nabulahan sa pisikal ug espirituwal tungod kay atong gisunod ang Kasulatanhong giya.
18. Unsay angay natong hatagag pangunang pagtagad, ug unsang tagna bahin sa panglawas ang atong ginapaabot nga matuman?
18 Labaw sa tanan, kinahanglang atimanon nato ang atong espirituwalidad ug palig-onon ang atong bililhong relasyon sa atong langitnong Amahan, ang tuboran sa atong “kinabuhi karon ug sa umaabot” didto sa iyang gisaad nga bag-ong kalibotan. (1 Tim. 4:8; Sal. 36:9) Sa bag-ong kalibotan sa Diyos, mahitabo ang bug-os nga pagkaayo sa espirituwal ug pisikal pinaagi sa pagpasaylo sa mga sala pinasukad sa halad lukat ni Jesus. Ang Kordero sa Diyos, si Jesu-Kristo, magagiya kanato ngadto sa “mga tuboran sa mga tubig sa kinabuhi,” ug ang Diyos magapahid sa tanang luha sa atong mga mata. (Pin. 7:14-17; 22:1, 2) Unya, atong matagamtam usab ang katumanan niining makalilipayng tagna: “Walay pumoluyo nga moingon: ‘Ako masakiton.’”—Isa. 33:24.
19. Samtang makasaranganong nag-atiman sa atong panglawas, sa unsa kita makasalig?
19 Kombinsido kita nga haduol na ang atong kaluwasan, ug mahinamon kitang nagpaabot sa adlaw nga wagtangon na ni Jehova ang sakit ug kamatayon. Sa kasamtangan, gipasaligan kita nga ang atong mahigugmaong Amahan motabang kanato sa pagpas-an sa atong mga balatian tungod kay ‘siya may kahingawa kanato.’ (1 Ped. 5:7) Busa, atong atimanon ang atong panglawas apan sundon kanunay ang tataw nga mga lagda diha sa inspiradong Pulong sa Diyos!
[Footnote]
a Ang listahan sa pipila nianang mga artikuloha makita diha sa kahon sa panid 17 sa Ang Bantayanang Torre sa Septiyembre 1, 2003.
Agig Pagsubli
• Kinsay responsable sa sakit, ug kinsay makapalingkawas kanato sa mga epekto sa sala?
• Bisag normal nga mabalaka kita sa atong panglawas, unsay angay natong likayan?
• Nganong hinungdanon kang Jehova ang atong pagpilig paagi sa pagtambal?
• Maylabot sa atong panglawas, sa unsang paagi kita makabatog kaayohan sa pagsunod sa mga prinsipyo sa Bibliya?
[Mga Pangutana sa Pagtuon]
[Hulagway sa panid 23]
Ang tawo wala lalanga aron masakit ug matigulang
[Hulagway sa panid 25]
Bisan pa sa mga balatian, ang katawhan ni Jehova nagmalipayon diha sa ministeryo