Annan menm pwennvi avek Labib lo nou lasante
Annan menm pwennvi avek Labib lo nou lasante
“Kontan Senyer Bondye avek . . . tou ou lespri e avek tou ou lafors.”—MARK 12:30.
1. Ki plan orizinal Bondye ti annan pour bann imen?
PLAN orizinal ki Zeova ti annan pour bann imen pa ti enplik maladi ek lanmor. Adan ek Ev ti ganny mete dan zarden Edenn oubyen “zarden plezir,” “pour kiltiv li e okip li” pour leternite e non pa zis pour 70 oubyen 80-z-an. (Zen. 2:8, 15, not dan NW; Ps. 90:10) Si sa premye koup imen ti’n reste fidel avek Zeova e demontre zot lanmour pour li par soumet avek son souvrennte, zot pa ti pou’n zanmen soufer avek maladi ek lanmor.
2, 3. (a) Ki mannyer liv Eklezyast i dekrir lavyeyes? (b) Lekel ki responsab pour lanmor ki nou’n erite avek Adan e ki mannyer son lefe pou ganny retire?
2 Eklezyast sapit 12 i donn nou en lide kler konsernan sa bann “zour difisil” ki vin avek lavyeyes lefet ki nou enparfe. (Lir Eklezyast 12:1-7.) Seve blan i ganny konpare avek fler “pye almonn.” Lipye i ganny konpare avek bann “zonm ki annan en kantite lafors” me ki aprezan in kourbe e pe mars trenn trennen. Bann madanm ki al o bor lafnet pour rod lalimyer e ki zis retrouv zot dan fernwanr i en bon konparezon pour dekrir lizye ki ptitapti pe vin sonm. Lefet ki serten ledan i manke, alor “bann madanm in aret travay lo moulen akoz napa bokou zot.”
3 Sirman, i pa ti dan plan orizinal Bondye pour imen ganny lazanm tranble, lizye sonm ek zansiv ki napa ledan. Deplis, lanmor ki nou’n erite avek Adan i enn parmi bann “travay dyab” ki Garson Bondye pou retire atraver son Rwayonm kot i pou dirize konman lerwa. Zapot Zan ti ekrir: “La rezon akoz Garson Bondye in aparet, se zisteman pour detri bann travay dyab.”—1 Zan 3:8.
I normal pour annan en serten konsern
4. Akoz bann serviter Zeova i konsernen avek zot lasante dan en fason rezonnab e ki zot okouran?
4 Denozour serten serviter Zeova i ganny bann problenm lasante, zot vin vye e sa i akoz nou tou nou enparfe. Anba bann tel sirkonstans i toutafe normal pour nou annan en serten konsern e i menm kapab benefisye nou menm. Pa nou vreman anvi servi Zeova ‘avek tou nou lafors’? (Mark 12:30) Anmezir ki nou rod fason pour reste an bonn sante dan en fason rezonnab nou osi okouran ki nou pa pou kapab fer bokou pour ralanti lavites ki nou vyeir ouswa evit tou maladi.
5. Ki leson nou kapab aprann par lafason bann serviter fidel Bondye ti siport zot soufrans?
5 Bokou serviter fidel Zeova in bezwen fer fas avek zot problenm lasante. Epafrodit ti enn parmi. (Fili. 2:25-27) Timote ki ti en konpanyon fidel zapot Pol ti souvan pe soufer avek en problenm lestoman e sa ti fer ki Pol ti demann li pour bwar “en pti pe diven.” (1 Tim. 5:23) Pol li menm ti bezwen siport en “pikan dan [son] laser,” ki ti petet en problenm lizye ouswa en lot problenm fizik ki dan son letan ti napa gerizon. (2 Kor. 12:7, NW; Gal. 4:15; 6:11) Pol ti sipliy Zeova en kantite dan lapriyer konsernan sa “pikan dan [son] laser.” (Lir 2 Korentyen 12:8-10.) Bondye pa ti fer mirak pour retir sa “pikan dan . . . laser” Pol. O kontrer Bondye ti donn li lafors pour siport sa pikan. Pouvwar Zeova ti ganny demontre dan febles Pol. Eski sa legzanp i kapab vin en leson pour nou?
Pa les ou lasante tro preokip ou
6, 7. Akoz nou devret evite tro preokip nou avek nou lasante?
6 Parey ou konnen, Temwen Zeova i aksepte led medikal e plizyer kalite tretman. Dan nou magazin ki apel Awake! i souvan annan bann lartik ki koz lo problenm lasante. Menm si nou pa promot okenn tretman an partikilye, nou apresye led ek korperasyon ki nou gannyen avek bann profesyonnel dan domenn medikal. Kantmenm sa, nou okouran ki i enposib pour lemoman pour nou ganny en lasante parfe. Alors, nou konnen ki i pli saz pour nou evite les nou problenm lasante trakas nou ouswa les li preokip nou toultan. Nou latitid i devret diferan avek sa bann ki “san okenn lespwar,” bann ki krwar ki zot annan zis sa lavi pour viv e ki pou servi nenport tretman zis pour zot esey ganny en gerizon pour zot maladi. (Efe. 2:2, 12) Me nou, nou determinen pour pa perdi laprouvasyon Zeova zis akoz nou ti ava anvi sov nou lavi la konmela, parski nou konvenki ki si nou reste fidel avek Bondye, nou pou “ganny vre lavi” setadir lavi eternel dan sa nouvo sistenm ki I’n promet nou.—1 Tim. 6:12, 19; 2 Pyer 3:13.
7 I annan en lot rezon akoz nou pa les nou problenm lasante tro preokip nou. Si nou tro preokip nou avek nou problenm lasante, sa i kapab fer nou devlop sa latitid pour mazin zis nou prop lekor. Pol ti averti bann Filipyen kont sa kalite danze kan i ti dir zot ki zot “pa devre pran ka zis avek zot prop lentere, me osi avek lentere lezot.” (Fili. 2:4) I toutafe normal ki nou pran swen avek nou lekor dan en bon fason oubyen dan en fason rezonnab. Me sa lentere senser ki nou demontre dan nou bann frer ek ser Kretyen e dan bann dimoun ki nou pres “sa Bonn Nouvel Rwayonm” avek, pou anpese ki nou tro preokip nou avek nou lasante.—Mat. 24:14.
8. Ki kapab arive si nou tro preokip nou avek nou lasante fizik?
8 I touzour annan sa danze ki en Kretyen i kapab les son problenm lasante fer li met dekote lentere Rwayonm. Si nou telman obsede avek nou lasante, sa i kapab fer nou esey enpoz nou pwennvi personnel lo lezot konsernan en ladyet, tretman ouswa pilil parey vitanmin ek lezot ankor. An rapor avek sa, egzamin sa prensip ki Pol ti eksprimen kan i ti dir: “Verifye sa ki pli enportan, pour ki zot vin san defo e zot pa fer lezot tonbe ziska zour Kris.”—Fili. 1:10, NW.
Kwa ki pli enportan?
9. Nonm enn parmi bann keksoz pli enportan ki nou pa merit neglize e akoz?
9 Si nou vreman verifye sa ki pli enportan, nou pou partisip aktivman dan sa travay pour anmenn gerizon spirityel. Sa i ganny fer kan nou prese e ansenny Parol Bondye. Sa travay ki anmenn lazwa i benefisye nou menm e bann ki nou ansennyen. (Prov. 17:22; 1 Tim. 4:15, 16) Dan Latour Veyer ek Awake! i souvan annan bann lartik lo nou bann frer ek ser spirityel ki annan bann maladi grav. Sa de magazin i souvan montre ki sa bann dimoun i fer pour esey oubliy sa problenm pour en pe letan par ed lezot pour konn Zeova ek son promes merveye. *
10. Akoz tretman ki nou swazir i enportan?
10 Kan i pe fer fas avek en problenm lasante, sak Kretyen adilt i responsab pour kalite tretman ki i swazir e dan sa ka i bezwen pran son prop responsabilite. (Gal. 6:5) Me nou pa devret oubliye ki sa tretman ki nou swazir i enportan pour Zeova. Zis parey respe pour prensip Labib i motiv nou pour “pa manz . . . disan,” respe profon pour Parol Bondye i pous nou pour evite servi okenn tretman ki pou fer nou vyol bann prensip Labib ouswa afekte nou relasyon avek Zeova. (Akt 15:20) Prosedir pour serten tretman oubyen tes medikal i kapab preski parey bann pratik demonyak. Zeova ti rezet bann Izraelit ki ti’n vin bann aposta akoz zot ti rod led atraver “pouvwar mazik” ouswa bann pratik demonyak. I ti dir: “Aret anmenn ankor bann lofrann lagrenn ki napa valer. Lansan—i en keksoz degoutan pour mwan. Nouvellin, saba, laranzman bann lasanble—mon pa kapab siporte ki zot servi pouvwar mazik ansanm avek lasanble solannel.” (Iza. 1:13) Ler nou malad i pa lemoman pour nou fer okenn keksoz ki kapab vin en baryer pour nou lapriyer ouswa gat nou relasyon avek Bondye.—Lam. 3:44.
I enportan pour nou “rezonnab”
11, 12. Akoz i enportan pour “rezonnab” kan nou pe swazir en tretman medikal?
11 Kan nou malad, nou pa kapab ekspekte ki Zeova pou geri nou par mirak, me nou kapab priye pour ganny lasazes pour swazir en tretman. Nou devret les nou ganny gide par bann prensip Labib ek nou bon sans ler nou pe deside ki tretman nou pou swazir. Dan en ka ki serye, i kapab pli saz pour rod lopinyon plis ki en dokter si i posib. Sa i anliny avek sa pwen ki ganny eksprimen dan Proverb 15:22 ki dir: “Bann plan pa pou reisi kan napa konversasyon konfidansyel, me letan i annan en kantite konseye keksoz i marse.” Zapot Pol ti ankouraz son bann frer ek ser Kretyen pour “viv en lavi rezonnab, zis e fidel avek Bondye lo sa later.”—Tit 2:12.
12 Bokou dimoun i vwar zot dan menm sityasyon avek sa madanm dan letan Zezi. Dan Mark 5:25, 26, nou lir: “Ti annan en madanm ki ti ganny lemorazi depi douz an. I ti’n soufer bokou e ti’n depans tou sa ki i ti posede avek bokou dokter san okenn amelyorasyon; okontrer son leta ti’n vin pli pir.” Me Zezi ti geri sa madanm e demontre konpasyon anver li. (Mark 5:27-34) Kan zot vreman dezespere, serten Kretyen in ganny tante pour swazir bann tretman ouswa fer bann tes medikal ki vyol bann prensip sa vre ladorasyon.
13, 14. (a) Ki mannyer Satan i kapab servi kalite tretman ki nou swazir pour kas nou fidelite avek Bondye? (b) Akoz nou devret evit okenn keksoz ki relye avek bann pratik demonyak?
13 Satan pou servi nenport ki mwayen pour fer nou abandonn sa vre ladorasyon. Zis parey i servi limoralite seksyel ek materyalizm pour fer serten tonbe, i esey kas fidelite lezot atraver bann tretman ki aktyelman kapab enplik servi pouvwar misterye ouswa bann pratik demonyak. Normalman nou priye pour ki Zeova i “anpes nou tonm dan le mal” e ki i ‘delivre nou dan tou sa ki mal.’ Alor, si nou rezet bann keksoz ki kapab relye avek pratik demonyak ek bann fenomenn misterye, nou pou evite ki Satan i annan pouvwar lo nou.—Mat. 6:13; Tit 2:14.
14 Zeova ti defann bann Izraelit pour pratik mazik e devinen. (Det. 18:10-12) Pol ti mansyonn “siperstisyon [oubyen “bann pratik demonyak,” NW] parmi bann “aktivite natir imen.” (Gal. 5:19, 20) Deplis, “bann ki pratik bann keksoz demonyak” pa pou erit sa nouvo lemonn ki Zeova in promet. (Rev. 21:8, NW) Alor, i kler ki nenport kwa ki annan okenn tras pratik demonyak i en keksoz degoutan dan lizye Zeova.
“Montre zot rezonnab anver tou dimoun”
15, 16. Akoz nou bezwen saz kan nou pe swazir en tretman e ki lenstriksyon saz konsey direkter dan premye syek ti donnen?
15 Anliny avek sa ki nou’n deza mansyonnen, si nou annan serten dout lo okenn tretman ouswa tes medikal, nou pou saz si nou pa aksepte. Si zis nou pa kapab eksplik en tretman ouswa prosedir medikal, byensir sa pa vedir ki sa prosedir li menm i enplik serten kalite pratik demonyak. Pour kapab gard en bon pwennvi baze lo Labib konsernan swen medikal, nou devret annan lasazes ki baze lo Parol Bondye ek disernman. Dan Proverb sapit 3 nou trouv sa lavertisman: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon, e li i pou fer drwat ou bann santye. . . . Protez lasazes pratik ek abilite pour reflesir, e zot a vin lavi pour ou.”—Prov. 3:5, 6, 21, 22.
16 Alor, anmezir ki nou fer nou mye posib pour reste an bonn sante, nou devret fer byen atansyon ki nou pa perdi laprouvasyon Bondye anmezir ki nou esey rod tretman pour en maladi ouswa akoz lavyeyes. Ki swa an rapor avek swen medikal ouswa dan lezot domenn, nou devret montre ki nou “bon [oubyen “rezonnab,” NW] anver tou dimoun” par viv annakor avek bann prensip Labib. (Fili. 4:5) Dan en let vreman enportan, konsey direkter dan premye syek ti enstrir bann Kretyen pour rezet idolatri ek limoralite e pour pa manz disan. Sa let ti enplik sa lasirans: “I ava byen si zot evit tousala,” akoz zot pou prospere. (Akt 15:28, 29) Dan ki fason?
Swen rezonnab avek en lasante parfe dan lavenir
17. Lefet ki nou obeir bann prensip Labib, ki mannyer nou’n benefisye fizikman?
17 I byen pour nou tou demann nou lekor, ‘Eski mon apresye sa kantite byenfe ki mon gannyen akoz mon obeir bann prensip Labib konsernan disan ek limoralite seksyel?’ Mazin osi sa bann byenfe ki nou gannyen akoz sa zefor ki nou fer pour “pirifye nou avek tou sa ki sali lekor ek lespri.” (2 Kor. 7:1) Si nou obeir bann standar Labib konsernan lizyenn personnel, nou pou evit bokou problenm lasante. Nou ganny bokou byenfe lefet ki nou pa servi taba ouswa okenn drog ki kapab sali nou lekor e gat nou relasyon avek Bondye. Egzamin osi bann byenfe ki nou gannyen kan nou manze e bwar avek kontrol. (Lir Proverb 23:20; Tit 2:2, 3.) Menm si bann fakter parey repo ek legzersis i kapab ede pour fer nou annan en lasante ki zeneralman oke, nou’n sirtou benefisye akoz nou’n aksepte gidans sorti dan Labib.
18. Kwa ki devret pli enportan pour nou e ki profesi an rapor avek lasante nou pe esper son lakonplisman avek enpasyans?
18 Pli enportan ankor, nou devret pran swen avek nou lasante spirityel e ranforsi nou relasyon presye ki nou annan avek nou Papa ki dan lesyel, sa Enn ki sours “lavi dan letan prezan, [e] dan lavenir” dan nouvo lemonn. (1 Tim. 4:8; Ps. 36:9) Dan nouvo lemonn Bondye, gerizon spirityel e fizik pou konplet e i pou posib gras a sakrifis Zezi ki permet nou ganny pardonnen nou pese. Lanyo Bondye, Zezi Kri pou gid nou ver “sours delo ki donn lavi” e Bondye pou eswiy tou larm dan nou lizye. (Rev. 7:14-17; 22:1, 2) Apre sa, nou pou osi eksperyans lakonplisman sa profesi eksitan ki dir: “Okenn zabitan pa pou dir: ‘Mon malad.’”—Iza. 33:24.
19. Anmezir ki nou pran byen swen avek nou lasante dan en fason rezonnab, lo kwa nou kapab asire?
19 Nou konvenki ki nou delivrans i pros e nou pe esper sa zour avek enpasyans kan Zeova pou retir maladi ek lanmor. Antretan, nou asire ki nou Papa ki dan lesyel pou ed nou siport nou fardo ki anmenn bokou soufrans ek douler parski i ‘pran swen avek nou.’ (1 Pyer 5:7) Alors, annou pran swen avek nou lasante, me touzour fer li annakor avek sa gidans kler ki ganny trouve dan Parol enspire Bondye.
[Not anba lo paz 25]
^ par. 9 En lalis sa bann kalite lartik i ganny trouve dan bwat lo paz 31 dan Latour Veyer le 1 Septanm 2003.
Revizyon
• Lekel ki responsab pour maladi e lekel ki pou elimin lefe ki pese i anmennen?
• Menm si i normal pour konsernen avek nou lasante, ki nou devret evite?
• Akoz tretman medikal ki nou swazir i enportan pour Zeova?
• An rapor avek nou lasante, ki mannyer nou kapab benefisye si nou obeir bann prensip Labib?
[Kestyon]
[Portre lo paz 24]
Imen pa ti ganny kree pour eksperyans maladi ek lavyeyes
[Portre lo paz 26]
Malgre problenm lasante, pep Zeova i trouv lazwa dan minister