Peqqissuseq nappaatinillu katsorsaaneq Biibilimut naapertuuttumik isumaqarfigiuakkit

„[Jehova] Guutit asassavat . . . isumakkut iluunngarlutit nukitillu tamakkerlugit.“ — MARKUSI 12:30.

1. Guutip inunnut aallaqqaammulli siunertaa suua?

JEHOVAP GUUTIP aallaqqaammulli siunertarinngilaa inuit napparsimallutillu toqusarnissaat. Adami Evalu Naatsiivimmut Edenimut, imaluunniit nuannaarnerup paratiisianut, pisinneqarput taanna „naggorissaqqullugu paareqqullugulu“, ukiuni 70-iniinnaanngitsoq imaluunniit 80-iniinnaanngitsoq, naassaanngitsumilli. (1 Mosesi 2:8, 15; Tussiaat 90:10) Inuit siulliit marluk Jehovamut aalajaattuarsimasuugunik taassuminngalu asanninneq kajumississutigalugu taassuma kisimi oqartussaalluni naalakkersuineranut naalatsigitissimasuugunik nappaatit, sanngiillineq toqulu misiginngisaannarsimassagaluarpaat.

2, 3. (a) Utoqqalineq Oqaluussisartup oqaasiini qanoq oqaluttuarineqarpa? (b) Kina toqumut Adamimit kingornussaasumut akisussaava, tamatumalu sunniutai qanoq peerneqassappat?

² Oqaluussisartup oqaasiini kapitali 12-imi „ullut ajortut“, inuit naammalluinnanngitsut misigisartagaat utoqqalinermik pissuteqartut, takorlooruminartumik allaatigineqarput. (Atuaruk Oqaluussisartup oqaasii 12:1-7.) Nutsat qaqortut assersuunneqarput ’orpimmut qaqqortarialimmut’ naasortanittumut. Nissut angutinut ’nukittuunut’ maanna peqingalersimallutillu orloqqajaallutik ingerlasunut assersuunneqarput. Arnat qaamanerusumiikkumallutik igalaat saavannukaraluarlutik taarsiortut isinut isigiarsulersimasunut assersuutaalluarput. Kigutit ilaat katagarsimapput, taamaattumillu allassimavoq ’arnat karrinik aserorterisut taamaatissasut ikileqigamik’.

³ Nissut sajuttut, isigiarsulerneq kiguteqannginnerlu Guutip inuiannut aallaqqaammulli siunertaanut ilaanngilluinnarput. Aamma toqu Adamimit kingornussaasoq ’Diaavulup suliaasa’ ilagaat, taannalu Guutip ernerata naalagaaffini Missiarsikkoortoq iluaqutigalugu suujunnaarsissavaa. Apustili Johannesi ima allappoq: „Manna pillugu Guutip ernera saqqummersinneqarpoq: Diaavulup suliai suujunnaarsissagamigit.“ — 1 Johannesi 3:8.

Peqqissutsimik pingaartitsineq pissusissamisoorpoq

4. Sooq Jehovap Nalunaajaasuisa peqqissusertik ingasaassinngitsumik pingaartippaat, sunali aamma nalunngilaat?

⁴ Ullutsinni Jehovap kiffai inuttut naammalluinnanngitsutut allatulli peqqissutsimut utoqqalinermullu tunngasunik ajornartorsiuteqartarput. Taamaattumik peqqissutsitsinnik ingasaassinngitsumik pingaartitsinerput peqqissutsitsinnullu iluaqutaasumik iliuuseqartarnerput pissusissamisoorlunilu iluaqutaasarpoq. ’Nukivummi tamakkerlugit’ Jehova kiffartorfigerusupparput, ilaa? (Markusi 12:30) Naammaginakannersumilli peqqissuseqartuarniarsaritilluta piviusorsiortariaqarpugut utoqqaliartornerlu kinguarsarniarlugu imaluunniit nappaateqanngilluinnarniarluta iliuuserisinnaasatta annikitsuararsuunerat akuerisariaqarlugu.

5. Guutimut kiffaasut aalajaatsut peqqiilliuutiminnik akiugaqartariaqarsimasut sumik ilinniarfigisinnaavavut?

⁵ Jehovamut kiffaasut aalajaatsut ilarpassui  peqqiilliuuteqarnerminnik akiugaqartariaqarsimapput. Taakkua ilagaat Epafroditusi. (Filipimiut 2:25-27) Aamma Timotheusi, apustilip Paulusip suleqataa ilumoorfiginnittoq, nasserikulasimavoq, taamaammallu Paulusip viinnisulaartaqquaa. (1 Timotheusi 5:23) Paulusip nammineq ’kapinartoq timiminut kapputtoq’, immaqa isikkut nappaat imaluunniit timikkut nappaat alla taamanikkut katsorsarneqarsinnaanngitsoq, naammagalugu atortariaqarsimavaa. (2 Korinthimiut 12:7; Galatiamiut 4:15; 6:11) Paulusip Jehova ilungersorluni qinnuigaa ’kapinartoq timiminut kapputtoq’ peeqqullugu. (Atuaruk 2 Korinthimiut 12:8-10.) Guutip ’kapinartoq’ Paulusip ’timaanut kapputtoq’ tupinnartuliornikkut piinngilaa, naammagaluguli atornissaanut nakussatsippaa. Taamaalilluni Jehovap pissaanera Paulusip sanngiissusiatigut erserpoq. Tamanna ilinniarfigilluarsinnaavarput.

Peqqissutsit pingaartippallaarniaqinagu

6, 7. Sooq peqqissuserput pingaartippallaarnaveersaartariaqarparput?

⁶ Naluneqanngitsutut Jehovap Nalunaajaasui nappaatinik katsorsaariaatsinut assigiinngitsunut akuersisarput. Atuagassiami Vågn op!-imi peqqissuseq nappaatillu pillugit allaaserisaqarajuppoq. Katsorsaariaatsinillu aalajangersimasunik innersuussuteqartanngikkaluarluta nakorsat katsorsaasartullu allat ikiuisarnerat suleqatiginnittarnerallu qujamasuutigaarput. Soorunami nalunngilluinnarparput suli peqqilluinnalertoqarsinnaanngitsoq. Taamaattumik silatusaassaagut peqqissuserput kisiinnaviat eqqarsaatiginaveersaarutsigu. ’Neriuutissaqanngitsutut’ maannakkullu inuunermik taannatuaasorinnittutut, taamaattumillu peqqiilliuutiminnik ajorunnaarsitsiniarlutik qanorluunniit iliorusuttutut, isiginnittaaseqartussaanngilagut. (Efesosimiut 2:2, 12) Maanna inuunitsinnik annaassiniarnerput pissutigalugu Jehovamit akuerisaajunnaannginnissarput aalajangiusimavarput, qularutiginngilarpummi Guutimut aalajaattuarutta ’tigulluartitaassallutigu’ (NV) „inuunivik“ — pissutsit aaqqissuussaanissaanni nutaami taassuma neriorsuutigisaani naassaanngitsumik inuuneq. — 1 Timotheusi 6:12, 19; 2 Petrusi 3:13.

⁷ Peqqissutsitsinnik pingaartitsivallaannginnissatsinnut aamma allamik pissutissaqarpoq. Peqqissutsitsinnik ingasattumik pingaartitsigutta imminuinnaq eqqarsaatigilersinnaavugut. Paulusip navianartoq tamanna mianersoqqussutigaa Filippimiut kajumissaaramigit ’tamarmik immikkut nammineq iluaqutissartik pinnagu inoqatimissaaq iluaqutissaannik isumaginneqqullugit’. (Filippimiut 2:4) Naleqquttumik imminut isumaginerput pissusissamisoorpoq, qatanngutitsinnilli inunnillu ’Naalagaaffimmik iivangkiiliumik’ oqaluussiffigisatsinnik ilumoorluta soqutiginninnerput nammineq timikkut peqqissutsitsinnik ingasattumik pingaartitsinaveersaarutigissavarput. — Matthæusi 24:14.

8. Peqqissutsimik ingasattumik pingaartitsineq pissutigalugu susinnaavugut?

⁸ Kristumiup peqqissutsiminik isumakuluutiginninnini Guutip naalagaaffiata soqutigisaanik tunulliussissutigilersinnaavaa. Peqqissutsitsinnik ingasattumik pingaartitsinerput pissutigalugu nerisassat aalajangersimasut, katsorsaariaatsit nerisassanulluunniit ilapittuutit arlaat pillugit isummavut allanut pinngitsaaliissutiginialersinnaavavut. Tamatumunnga tunngatillugu eqqarsaatigiuk najoqqutassaq tunngaviusoq Paulusip ima oqaatigisaa: „Suna pingaartittariaqartoq [sorliit pingaaruteqarnerunersut, NV] paasisinnaasaqqullusiuk, minguitsooqqullusi assuarnaatsooqqullusilu Kristusip ullussaani.“ — Filippimiut 1:10.

Pingaaruteqarnerusut suuppat?

9. Pingaaruteqarnerusut sumiginnarnaveersaartariaqakkatta ilaat suua, aamma sooq?

⁹ Pingaaruteqarnerusut suunerat qulakkeerutsigu anersaakkut katsorsaaqataassaagut, tassa Guutip oqaasia pillugu oqaluussillutalu ilinniartitsissaagut. Suliaq tamanna nuannaarnartoq uagutsinnut ilinniartitatsinnullu iluaqutaavoq. (Ussatit 17:22; 1 Timotheusi 4:15, 16) Napasuliaq Alapernaarsuiffik-mi aamma Iteritsi!-mi anersaakkut qatanngutitta perulunnartumik nappaateqartut ilaat pillugit siornatigut ilaannikkut allaaserisaqartarpoq. Taakkunani ilaannikkut oqaluttuarineqartarpoq taakku ajornartorsiutitik qanoq ilillutik naammagalugit atorsimaneraat imaluunniit Jehova taassumalu neriorsuutai nuanningaartut pillugit allanik ilinniartitsinermik ulapputiginninnikkut ajornartorsiutitik qanoq ilillutik allaat eqqarsaatigiunnaarallartarsimaneraat. *

10. Sooq katsorsaariaatsinik sorlernik toqqaanerput pingaaruteqarpa?

 ¹⁰ Peqqiilliuuteqaraangatta katsorsaariaatsinik toqqaanermut tunngatillugu tamatta immikkut ’nammagassarput nammineq nammattariaqarparput’. (Galatiamiut 6:5) Eqqaamasariaqarparpulli katsorsaariaatsimik sorlermik toqqaanerput Jehovamut pingaaruteqarmat. Soorlu najoqqutassianik Biibilimeersunik ataqqinninnerput pissutigalugu ’aammik nerineq ajortugut’, imaluunniit pinaveersaartartugut, taamatuttaaq Guutip oqaasia ataqqigatsigu katsorsaariaatsit anersaakkut ajoqutigisinnaasavut Jehovamulluunniit attaveqarnitsinnut ajortumik sunniuteqarsinnaasut pinaveersaartariaqarpavut. (Apustilit Suliaat 15:20) Nappaatinik suussusersiortaatsit katsorsaariaatsillu ilaat pissusissamisuunngitsunut anersaarsiornermullu eqqaanartupilussuusinnaapput. Guutip Israelikkut tunussisimasut ’pissaanernik ajortunik torlorfiginnittut’ akuersaanngilai. Ima oqarfigai: „Naatitanit pilliutissanik suussuseqanngitsunik aggiusseqqinnaveeritsi, tipigissaatilliineq maajugaara. Qaammanniffissiorfiit, sabbatisiorfiit nalliuttorsioqatigiiffiillu — nalliuttorsiornerimmi ajorsuserlu [pissaanernillu ajortunik torlorfiginninnerit, NV] naammagiinnarneq saperpakka.“ (Esaja 1:13) Tassa qinnutinut akornutaasinnaasunik Guutimullu attaveqarnitsinnik annaasaqaataasinnaasumik iliuuseqassanngilagut, pingaartumik napparsimatilluta. — Upputit 3:44.

’Isumakkut peqqissuunissaq’ pisariaqarpoq

11, 12. Katsorsaariaatsimik toqqaassagaangatta ’isumakkut peqqissuunissaq’ sooq pingaaruteqarpa?

¹¹ Napparsimagutta naatsorsuutigissanngilarput Jehovap tupinnartuliornikkut uagutsinnik peqqissisitsinissaa, katsorsaariaatsimilli eqqortumik toqqaanissamut ilisimassuseq qinnutigisinnaavarput. Toqqaaniarnitsinni najoqqutassianit Biibilimeersunit silaqassutsimillu siulersortittariaqarpugut. Perulunnartumik nappaateqaraanni periarfissaqaraannilu immikkut ilisimasalinnik arlalinnik siunersiuineq silatusaarnerusinnaavoq Ussatit 15:22-mi allassimasoq una naapertorlugu: „Isumalioqatigiittoqanngikkaangat pilersaarutit asuliinnartarput, amerlasuunilli siunnersuisoqarsimagaangat iluatsittarput.“ Apustilip Paulusip uppeqatini kajumissaarpai ’silatusaaqqullugit [isumakkut peqqissooqqullugit, NV] peqqusersuitsooqqullugillu Guutimillu mianerinnittooqqullugit’. — Titusi 2:12.

¹² Inuppassuit arnap napparsimasup Jiisusip nalaani inuusup atugaqarsimaneratut atugaqarsimapput. Markusi 5:25, 26-mi ima allassimavoq: „Tamaaniipporli arnaq ukiuni aqqaneq-marlunni aaqartuarsimasoq amerlasuunillu nakorsarneqarluni anniartarsimaqisoq pigisanilu tamaasa atorsimallugit pitsaanerulernanili, allaammi ajorneruliinnarsimalluni.“ Jiisusip taanna ajorunnaarsippaa misiginneqatiginningaartumillu pillugu. (Markusi 5:27-34) Kristumiut ilaat allamik ilioriusissaarutivillutik nappaammik suussusersiortaatsimik katsorsaariaatsimilluunniit pallorfiginninnermut minguitsumut tunngatillugu najoqqutassianut akerliusumik toqqaasimapput.

13, 14. (a) Saatanip pallorfiginninnermit ilumoortumit qimagutsinniarluta katsorsaariaatsimik toqqaaniarnerput qanoq atornerlussinnaavaa? (b) Sooq anersaalerinermut tunngassuteqalaaginnartut suulluunniit qanillissanngilavut?

¹³ Saatanip suut tamaasa sakkugalugit pallorfiginninnermit ilumoortumit allamut saasarniarsarissavaatigut. Soorlu naakkiutsitsiniarluni  kinguaassiuutitigut inuunerlunneq pigisaleritunerlu atortarai, taamatuttaaq assuarnaakkunnaarsitsiniarsarisarpoq katsorsaariaatsit nalorninartut angakkuersaarnermik anersaarsiornermillu atuiffiusartut atorlugit. Jehova qinnuigisarparput „ajortumit“ „inatsisaatsuliornernillu sunilluunniit tamanit“ annaateqqulluta. Taamaattumik anersaarsiornermut tunngassuteqartunik imminut navianartorsiortilluta Saatani ikiussanngilarput. — Matthæusi 6:13; Titusi 2:14.

¹⁴ Jehovap siulittuisarneq angakkuarniartarnerlu Israelikkunnut inerteqqutigai. (5 Mosesi 18:10-12) Aamma Paulusip „anersaalerineq“ (NV) ’uinngup suliaanut’ ilanngullugu eqqaavaa. (Galatiamiut 5:19, 20) Aammattaaq „anersaalerisut“ (NV) Jehovap pissutsinik aaqqissuussaanut nutaamut isernavianngillat. (Saqqummersitat 21:8) Erseqqippoq anersaarsiornermut tunngassuteqalaaginnartut suulluunniit Jehovap maajugigai.

„Ingasaassinianngitsuunersi“ ilisimaneqalerli

15, 16. (a) Katsorsaariaatsimik eqqortumik toqqaajumalluni sooq ilisimassuseqartariaqarpa? (b) Ukiuni hundredelinni siullerni siulersuisoqatigiit pitsaasumik sumik siunnersuuteqarpat?

¹⁵ Sammeriikkavut eqqarsaatigalugit, nappaammik suussusersiortaaseq katsorsaariaaserluunniit nalorninartoqartilaaginnaraluarutsigu silatusaassaagut itigartikkutsigu. Katsorsaariaatsip aalajangersimasup qanoq sunniuteqartarnera paasisinnaanagulu nassuiarsinnaanngikkutsigu, soorunami imaanngilaq taanna anersaarsiornermut tunngassuteqartoq. Peqqissuseq nappaatillu Biibilimut naapertuuttumik isumaqarfigiuarumallugit ilisimassuseq Guutimeersoq naliliilluarsinnaanerlu pisariaqartippavut. Ussatit kapitali 3-mi ima siunnersorneqarpugut: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai. . . . Silatussuseq isumatussuserlu isinnit nigortinniaqinagit. Taakku ilinnut inuussutaassapput.“ — Ussatit 3:5, 6, 21, 22.

¹⁶ Sapinngisarput tamaat peqqissuujuarniartilluta nappaat utoqqalinerulluunniit kingunerisai iluaquserniaraangatsigit Guutimit akuerisaajunnaarumanata mianersortariaqarpugut. Nappaatinut peqqissutsimullu allanullumi tunngasut eqqarsaatigalugit najoqqutassianut Biibilimiittunut naapertuuttumik inuunitsigut ’qanilaarsuserput [ingasaassinianngitsuunerput, NV] ilisimaneqalersittariaqarparput’. (Filippimiut 4:5) Ukiuni hundredelinni siullerni Siulersuisoqatigiit allakkami pingaaruteqartorujussuarmi kristumiunik peqqusipput guutipilussiornermik, aammik kinguaassiuutitigullu inuunerlunnermik nigorsimanneqqullugit. Allakkami imaattumik neriorsuuteqarpoq: „Tamakku ingalassimaniarussigit eqqortuliussaasi.“ (Apustilit Suliaat 15:28, 29) Qanoq ilillutik ’eqqortuliussappat’?

Naleqquttumik imminut isumagineq peqqilluinnarnissamik neriuutissartalik

17. Najoqqutassianik Biibilimiittunik maleruaanerput timikkut qanoq iluaqutigisimavarput?

¹⁷ Pitsaassaaq tamatta immikkut imminut ima aperigutta: ’Aak kinguaassiuutitigullu inuunerlunneq pillugit najoqqutassianik Biibilimiittunik maleruaaqqissaarninnik qanorpiaq iluaqutiginnitsiginera paasilluarpara?’ Aamma eqqarsaatigiuk ’timimi anersaamilu mingummik tamarmik piiaanerput’ qanoq iluaqutigitigigipput. (2 Korinthimiut 7:1) Najoqqutassianik Biibilimiittunik inuttut eqqiluisaarnermut tunngasunik maleruaanitsigut nappaaterpassuit pinngitsoortarpavut. Tupamik aanngajaarniutinillu imminut mingutsittannginnerput timikkut anersaakkullu iluaqutigaarput. Aamma eqqarsaatigikkit ingasaassinngitsumik nerillunilu imertarnerup peqqissutsikkut iluaqutissartai.  (Atuaruk Ussatit 23:20; Titusi 2:2, 3.) Qasuersaarneq timersornerlu peqqissutsitsinnut iluaqutaasinnaagaluartut, siunnersuutinik Biibilimiittunik malinninnerput pingaartumik timikkut anersaakkullu iluaqutigisimavarput.

18. (a) Suna uagutsinnut pingaarnerpaasariaqarpa? (b) Ajorunnaarsinneqarnissamik siulittuutip suup misiginissaa qilanaarisinnaavarput?

¹⁸ Pingaarnerpaamik anersaakkut peqqissuserput isumagisariaqarparput Ataatatsinnullu qilammiusumut, ’inuunerup matuma piumaartussallu’ puilaffiannut, attaveqarnerput erlinnartoq nakussatsittariaqarlutigu. (1 Timotheusi 4:8; Tussiaat 36:10) Guutip silarsuassaani nutaami anersaakkut timikkullu peqqissilluinnassaagut Jiisusip Kristusip utertitsissutitut pilliutaa tunngavigalugu ajortitsinnik isumakkeerfigineqarnitsigut. Guutip savaaraata, Jiisusip Kristusip, „puilasunut inuussutaasunut“ siulersorumaarpaatigut, Guutillu qullivut tamaasa allarterumaarpai. (Saqqummersitat 7:14-17; 22:1, 2) Taamanikkussamut aamma siulittuutip nuanningaartup matuma eqquunnera misigiumaarparput: „Innuttaasoq kinaluunniit oqassanngilaq: ’Napparsimavunga!’“ — Esaja 33:24.

19. Peqqissutsitsinnik naleqquttumik isumaginniitigaluta suna qularutiginngilluinnarsinnaavarput?

¹⁹ Qularutiginngilluinnarparput aniguisitaanissatta qanillinera, ullorlu Jehovap napparsimaleriartortarnermik toqujartortarnermillu killup tungaanut saatsitsiffissaa pissangalluta qilanaaraarput. Tamannali pinngikkallartillugu qularutiginngilarput Ataatatta qilammiusup anniaatit naalliuutillu naammagalugit atornissaannut ikiussagaatigut, taassumami ’isumassorpaatigut’. (1 Petrusi 5:7) Taamaattumik peqqissuserput paarilluartigu, tamatigulli najoqqutassianut paasiuminartunut Guutip oqaasiani isumassarsiarititaasumiittunut naapertuuttumik!

[Quppernerup ataani ilanngussaq]

Uteqqiineq

• Nappaatinut tamanut kina akisussaava, ajortillu sunniutaanit kia annaatissavaatigut?

• Peqqissutsimik pingaartitsineq pissusissamisoorpoq, sunali pinaveersaartariaqarparput?

• Sooq katsorsaariaatsimik sorlermik toqqaanerput Jehovap soqutigaa?

• Peqqissutsimut nappaatinullu tunngatillugu najoqqutassianik Biibilimiittunik maleruaaneq qanoq iluaqutigisinnaavarput?

[Atuaqqissaarnermi apeqqutit]

[Qupp. 23-mi assiliartaq]

Inuit napparsimasussanngorlugit utoqqalinerlu pissutigalugu sanngiillisartussanngorlugit pinngortitaanngillat

[Qupp. 25-mi assiliartaq]

Jehovap innuttaasa peqqiilliortaraluarlutik taassumunnga kiffartornertik nuannaarutigaat