Londelenu Chahosha Nsona haKukiña Mujimba

“Keñaku Yehova Nzambi yeyi . . . namaaneyi ejima, nañovu jeyi jejima.” —MAKU 12:30.

1. Nkeñelu yaNzambi kumuchidi wamuntu yadiña yankahi?

 NKEÑELU yaYehova Nzambi hiyadiña yakwila nawu muchidi wamuntu yakateña nikufwaku. Adama niEvu ayishili mwitempa daEdeni, hela muparadisa yayiwahi, ayilejeli ‘kudidima, nikudihemba chachiwahi’ bayi neyi hadi yaaka 70 hela 80 hohuku ilaña haya nyaka. (Kutachika 2:8, 15; Masamu 90:10) Neyi awa eyala namumbanda atwalekeluhu kwikala ashinshika kudi Yehova nikumwekesha kukeña kwawu kuhitila mukwovwahila wanta windi, chiña hiyakatileña hela kufwaku.

2, 3. (a) Indi wushinakaji awulumbulula ñahi mumukanda waMukwakutañisha? (b) Hinyi wakojejaña kufwa kwaleteli Adama, nawa yuma yaleñelaña kufwa akayimanisha ñahi?

² Mukanda waMukwakutaŋisha kapetulu 12 walumbulula chikupu “mafuku atama” enzaña nawushinakaji kudi antu abula kuwanina. (Tañenu Mukwakutaŋisha 12:1-7.) Invu ayifwanisha kunkenu ‘yamutondu wamumondi.’ Nyendu anayifwanishi ‘kudi amayala adiña nañovu’ hiyakubandama nakwenda nakutadañila. Ambanda ayaña nakutalila hanjanina nakukeña chejeji nakuwanahu hohu kwamwidima hichakutalilahu chachiwahi chamesu anapuuti. Chineli mazewu amakwawu anazokoki, “akwakutwa hiyakukeha.”

³ Nyendu yazeya, mesu anapuuti, niwushishinya wakadi mazewu, hidiyi yuma yafukwililiyi Nzambi muchidi wamuntuku. Hela chochu, kufwa kutwaswanini kufuma kudi Adama ‘hinyidimu yaDiyabolu’ yakamanishayi Mwana kaNzambi kuhitila muWanta windi wawuMesiya. Kapostolu Yowanu wasonekeli nindi: “Dichi chamumwekesheleluwu Mwana kaNzambi, kulonda akisañani nyidimu ya[D]iyabolu.”—1 Yowanu 3:8.

Kwakamena Mujimba kwaKuwahi

4. Muloñadi ambuña aYehova chakamenañawu mujimba munjila yatelela, nawa chumanyi chelukawu?

⁴ Makonu, ambuña aYehova amakwawu atalañanaña nakukala kwayikatu niwushinakaji, yuma yavula kumona muchidi wamuntu wabula kuwanina. Kwakamena mujimba wetu munjila yatelela neyi tutalañana nakukala kwamuchidiwu kwakuwahi nawa kwakwashaña. Komana hitwakeñaña kumukalakela Yehova ‘nañovu jetu jejimaku’? (Maku 12:30) Hela chochu, hampinji yitunakufwila kukiña mujimba, twatela kwiluka chikupu netu kudi hohu yuma yantesha yitwatela kwila hakukañesha wushinakaji hela kutondolwela yikatu yejima.

5. Chumanyi chitwatela kudizila kudi ambuña aNzambi ashinshika munjila yomikililumu nayikatu?

⁵ Ambuña aYehova amavulu ashinshika ayandili nayikatu. Epafwaditu himuntu wayandili nayikatu hakachi kawambuña Nzambi. (Afwilipi  2:25-27) Ibwambu dakapostolu Pawulu washinshika Timotewu, kakavulu wakatileña mwivumu, dihafumini Pawulu kumuleja nindi yanweña “tuvinyu twanti.” (1 Timotewu 5:23) Pawulu niyena wadiña ‘namwiña mumujimba,’ hadaha mesu adiña nakumuyandisha hela yikatu yikwawu yakumujimba yabulili yitumbu yakuyuuka nachu hayina mpinji. (2 Akorinda 12:7; Aŋalija 4:15; 6:11) Kutalisha ‘hamwiña wadiña mumujimba,’ Pawulu wamulembeleleña Yehova chikupu. (Tañenu 2 Akorinda 12:8-10.) Dichi Nzambi hamufumishili Pawulu ‘mwiña mumujimba’ muchihayamishaku. Ilaña, Nzambi wamukolesheli kulonda kumika namwiña weniwu. Dichi ñovu yaYehova yamukwashili Pawulu mukuzeyazeya kwindi. Chakadi nikujina, tunateli kudizilaku yuma yayivulu kuniyi nsañu.

Bayi Muswejaña Kwakamena Hakukiña Mujimbaku

6, 7. Muloñadi wutwatela kutondolwela kusweja kwakamena hakukiña mujimba?

⁶ Neyi chimweluka, aYinsahu jaYehova etejaña kuuka kwakuchipatela kwamboka-mboka. Mumagazini yetu yaAwake kakavulu mwekalaña yibaaba yahoshaña hamwakuhembela mujimba. Hela chakwila twakaanaña kuuka kukwawu, twahamekaña andotolu okaña nikwakamena ayeji. Hela chochu, tweluka netu hitunateli kwikala nanyijimba yawanina hayinu mpinjuku. Dichi, twatondolwelaña kusweja kwakama hakuuka mujimba hela kwakamaña mpinji yejima. Yililu yetu yatela kwambukaku nawantu ‘abula hakuchiñejela,’ atoñojokaña nawu wumi wamakonu diwumi wekalaku hohu nawa azatishaña njila yidi yejima yakukilamu kulonda kuuka yikatu yawu. (Aefwesesa 2:2, 12) Hitwakeñaña kujimbesha wuselewa waYehova kulonda kuhandisha wumi wetu wakatatakaku, muloña tweluka chikupu netu neyi tutwalekahu kwikala ashinshika kudi Nzambi, ‘twakakwata kuwumi, wowu wumi walala chikupu,’ wumi wahaya nyaka mwituña dindi dadiha dakanayi.—1 Timotewu 6:12, 19; 2 Petulu 3:13.

⁷ Kudi chuma chikwawu chatuleñelaña kutondolwela kusweja kwakamena kukiña mujimba. Kusweja kwakamena hakukiña mujimba kunateli kutuleñela kudikeña. Pawulu wasoñamishili haniwu wubanji hampinji yalejeliyi Afwilipi nindi “bayi muntu atoñojokaña nsañu yindi hohuku, chiña nsañu jawakwawu nawa.” (Afwilipi 2:4) Chachiwahi kudakamena munjila yatelela, ilaña kukeña kutwamwekeshaña kudi amana kwetu nikudi antu yitwashimwinaña ‘nsañu yayiwahi yawanta,’ kwatuleñela kubula kuswejesha kwakamena mujimba wetu.—Matewu 24:14.

8. Indi kusweja kwakamena hakukiña mujimba wetu kunateli kutuleñela kwiladi?

⁸ Kusweja kwakamena mujimba kunateli kuleñela mukwaKristu kudiwula mudimu windi waWanta. Kusweja kutoñojoka hakukiña mujimba kunateli cheñi kutuleñela kukajikija amakwawu yitoñojoka yetu kutalisha hayakudya yayiwahi yashiyashana, kuuka, hela yakudya yikwawu. Muniyi njila, tiyenu lunshimbi lwashimwiniyi Pawulu munawa mazu: “Kulonda mushinshiki yuma yabadika kuwaha; kulonda mwikali alala, akadi nyiloña ndo nikwifuku daKristu.”—Afwilipi 1:10.

Chumanyi Chabadika Kulema?

9. Chumanyi chalema chikupu chitwatela kushaku kashinshi nawa muloñadi?

⁹ Neyi tushaña kashinshi kuyuma yalema chikupu, tukudikitaña chikupu mumudimu wakukwasha antu kwikala nawubwambu wawuwahi naNzambi. Mudimu weniwu twawukalakalaña kuhitila mukushimwina nikudizisha Izu daNzambi. Iwu mudimu wawuwahi watukwashaña nawa wakwashaña niantu yitwadizishaña. (Yishimu 17:22; 1 Timotewu 4:15, 16) Magazini yaKaposhi Kakutalila niAwake! kakavulu asonekañamu yibaaba yahoshaña hadi amana kwetu niahela akuspiritu akata yikatu yamaneni. Yibaaba yeniyi mpinji yikwawu yalumbululaña chomikañawu amana kwetu wenawa nakukala hela chadiwulañawu kukala kwawu kulonda kukwasha amakwawu kwiluka Yehova niyikaninu yindi yayiwhi. *

10. Muloñadi kutonda njila yakutuukilamu chikwekalila kwalema?

 ¹⁰ MukwaKristu wejima wakula dehi, neyi nakati watela ‘kusenda chiteli chindi’ hakutonda njila yakumuukilamu. (Aŋalija 6:5) Ilaña twatela kwiluka netu njila yitukutonda yakutuukilamu yatela kumuzañalesha Yehova hela kumuneñesha. Neyi chochitwalemesha nshimbi jamuBayibolu jatuleñelaña ‘kuleka . . . mashi,’ dichi kulemesha Izu daNzambi kwatela kutuleñela kutondolwela kuuka kunateli kutuleñela kufumpa nshimbi jamuBayibolu hela kuluwañesha wubwambu wetu naYehova. (Yililu 15:20) Njila jikwawu jakuukilamu jabombelamu kupesha. Yehova wayikaanini aIsarela akwakusekesha adiña nakupesha nikuzatisha [“ñovu jachihayamisha NW”]. Yehova wahosheli nindi: “Bayi muleta cheñi nawa nyilambu yakuhemeshaku; insensi nayimoni dehi hichishimashima hohu, nikakweji kakaha, nisabata, nikutambika yipompelu, yadi. Hikuluwa tuhu, hela kukumañana kwakudihudika.” (Isaya 1:13) Chakadi nikujina, neyi tunakati bayi twila chuma chinateli kukañesha kulomba kwetu nikuluwañesha wubwambu wetu naNzambuku.—Mukeña 3:44.

“Kuwundisha muMesu” Kwekala Kwalema

11, 12. Muloñadi wutwatelela ‘kuwundishila mumesu’ neyi tunakutonda njila yakutuukilamu?

¹¹ Neyi tunakati, hitwatela kukuhwelela netu Yehova wukutuuka muchihayamishaku, ilaña twatela kulomba maana hakutonda mwakutuukila. Hakutonda mwakutuukila, twatela kulombolewa nanshimbi jamuNsona niyitoñojoka yayiwahi. Neyi yikatu yisweja, chachiwahi kwihujola andotolu amavulu, kwesekeja namazu ekala haYishimu 15:22, ahosha nawu: “Habula mpuña yuma yiwafuukwili kwila hiyamwekanañaku; ilaña havula akwakushakama hampuña yakolaña.” Kapostolu Pawulu wakonkomweneni akwawu akakwitiya nindi “tushakami nyaka yinu nakuwundisha mumesu, nikuloña, nikwakama Nzambi.”—Titusa 2:12.

¹² Antu amavulu amonaña kukala kudi neyi kwamumbanda wadiña wakata mumafuku aYesu. HaMaku 5:25, 26, twatañañahu nawu: “Mumbanda wumu wapwekelaña mashi nyaka ikumi nayiyedi, henohu wamona dehi kukala nayuma yayivulu yanamoniyi kudi ayimbuku amavulu, namanishi dehi yuma yindi yejima to-o, kuditiyaku nihanti nehi, yosweja nikusweja.” Yesu wamukili iwu mumbanda nawa wamutiyilili wushona. (Maku 5:27-34) Hamuloña wakukañanya mwakwilila, akwaKristu amakwawu esekaña kuzatisha njila jakuukilamu jafumpaña nshimbi jakudifukula kwalala.

13, 14. (a) Indi Satana nateli kuzatisha ñahi kufuukula kwetu hanjila jakutuukilamu kulonda kukisañana kashinshi ketu? (b) Muloñadi wutwatela kutondolwela chuma chidi chejima chakundama kukupanda?

¹³ Satana wazatishaña njila yidi yejima kulonda kutufumisha kukudifukula kwalala. Neyi chochazatishañayi yililu yawuvumbi nimaheta kulonda kudimbwisha amakwawu, wakeñaña kumanisha kashinshi kawantu amakwawu kuhitila mukuzatisha njila yatama yakuukilamu yidi neyi kuhoña nikupesha. Twalombaña kudi Yehova netu yatukuuli “kukutama” “[ni]kukuluwa  kwejima.” Bayi tumovwahilaña Satana kuhitila mukwiteja yuma yidi yejima yakundama kukupesha nikukuhoñaku.—Matewu 6:13; Titusa 2:14.

¹⁴ Yehova wayilekesheli aIsarela kuhoña nikusansa nyiseñu. (Kuhituluka 18:10-12) Pawulu wateneni nindi “kupanda” kwekala hakachi “[ka]nyidimu yachisemwa chaheseki.” (Aŋalija 5:19, 20) Kubombelahu, “akwakuhoña nakupanda” hiyakaswana mwituña dadiha daYehovaku. (Chimwekeshu 21:8) Chakadi nikujina, chuma chidi chejima chakundama kukupanda hichishimashima kumesu aYehova.

“Mwekeshenu Kwovwaha Kwenu”

15, 16. (a) Muloñadi chichakeñekelaña kwikala namaana hakukeña njila yakutuukilamu? (b) Kufumbanyi kwakuwahi kwaheni izaza dalombolaña damuyaaka nkulakaji yatachi?

¹⁵ Kwesekeja nayuma yinashimunuwu hewulu, neyi tumona netu njila jikwawu jakuukilamu jabombelamu kupesha, twatela kujikaana. Hela chochu, chineli hitunateli kulumbulula halwetu chazatikaña njila jikwawu jakuukilamuku, hichinayi mukwila nawu iyi njila yakuukilamu yabombelamu kupandaku. Hakulondela kufumba kwamuNsona kutalisha hakukiña mujimba chakeñekaña kwikala namaana ashindamena Hezu daNzambi nikashinshi. Mukanda waYishimu kapetulu 3, atusoñamisha nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi. . . . Hembaku maana alala nikutoñojoka kwakashinshi, . . . yakakuhandishi.”—Yishimu 3:5, 6, 21, 22.

¹⁶ Hampinji yitunakufwila kwikala akola kumujimba, twatela kwikala ababala kulonda kubula kujimbesha wuselewa wetu naNzambi hampinji yitunakukeña njila yakutuukilamu neyi tunakati hela neyi hitukushinakaja. Hakukiña mujimba nimuyuma yikwawu, twatela ‘kumwekesha kwovwaha kwetu kudi antu ejima’ kuhitila mukulondela nshimbi jamuBayibolu. (Afwilipi 4:5) Mumukanda walema wasonekeli izaza dalombolaña damuyaaka nkulakaji yatachi, dalejeli akwaKristu kuleka kupesha, nimashi, niwuvumbi. Muniwu mukanda mwadiña kukonkomwena kwakwila nawu: “Neyi mukudihemba kuyumiyi chikuwaha.” (Yililu 15:28, 29) Munjilanyi?

Kutoñojokaña Hawumi Wawanina Hakukiña Mujimba Munjila Yatelela

17. Kulondela nshimbi jamuBayibolu kwatuheteshaña ñahi kumujimba?

¹⁷ Wejima wetu twatela kudihula netu: ‘Komana neluka nkisu jinahetelamu hamuloña wakulondela chikupu nshimbi jamuBayibolu jahosha hamashi niwuvumbi?’ Toñojokenu cheñi hankisu jitunahetelumu hamuloña wakuzata nañovu kulonda ‘kuditookesha kutama kwamujimba nikwaspiritu.’ (2 Akorinda 7:1) Kuhitila mukulondela nshimbi jamuBayibolu kutalisha hawunyoji, twatondolwelaña yikatu yayivulu yakumujimba. Twekalaña akadi majilu kumujimba muloña twakanaña kunwa makanya niyitumbu yashetana yatamishaña nyijimba yetu nikukisañana wubwambu wetu naNzambi. Toñojokenu cheñi hakuwaha kwekala mukubula kusweja kudya nikunwa. (Tañenu Yishimu 23:20; Titusa 2:2, 3.) Hela chakwila yuma yidi neyi kunooka nikukolesha mujimba kunateli kutuleñela kwikala akola, twahetelañamu chikupu  kuspiritu nikumujimba muloña twalondelaña wunlomboli wamuNsona.

18. (a) Chumanyi chitwatela kushaku kashinshi chikupu? (b) Wuprofwetwinyi wakashikijewa kutalisha hayikatu wutwatela kutalila?

¹⁸ Chuma chasweja kubadika, twatela kwikala akola kuspiritu nikukolesha wubwambu wetu naTata yetu wamwiwulu, Nsulu ‘yawumi wakatataka nikwawumi wakenza’ mwituña dindi dadiha dakanayi. (1 Timotewu 4:8; Masamu 36:9) Mwituña dadiha, mwakekala kuuka kwakuspiritu nikwakumujimba kuhitila mukwanakena nshidi kushindamena hamulambu wefutu danyiloña daYesu. Mwana kamukoku waNzambi, Yesu Kristu, wakatulombola “kutuseloki twameji awumi,” nawa Nzambi wakatukombola madilu ejima kumesu etu. (Chimwekeshu 7:14-17; 22:1, 2) Nawa, twakamona kushikijewa kwanawa mazu awuprofwetu akwila nawu: “Mwenimbu hakahosha nindi, Ami nakataku.”—Isaya 33:24.

19. Hampinji yitunakufwila kuhemba mujimba chiwahi, chumanyi chitwatela kwiluka?

¹⁹ Tuneluki chikupu netu kupuluka kudi mukamwihi, nawa tunakutalila chikupu mpinji yakamanisha Yehova yikatu nikufwa. Chayinu mpinji tuneluki netu Tata yetu wukweti kukeña wukutukwasha kumika kuyikatu muloña ‘yena watuhembaña.’ (1 Petulu 5:7) Dichi, twatela kuhemba nyijimba yetu kuhitila mukulondela nshimbi jatiyakana jekala Mwizu daNzambi donenawu!

[Tumazu twaheshina]

Kuhitulukamu

• Hinyi wakojejaña yikatu, nawa hinyi wakatufumisha muwunduñu washindi?

• Hela chakwila chekala chachiwahi kutoñojokaña hakukiña mujimba, chumanyi chitwatela kutondolwela?

• Muloñadi kutonda njila yakutuukilamu chikwatela kumuneñesha hela kumuzañalesha Yehova?

• Kutalisha hakukiña mujimba, tunateli kuhetelamu ñahi mukulondela nshimbi jamuBayibolu?

[Malwihu aKuzatisha haKudiza]

[Mwevulu wudi hefu 24]

Antu hiyayileñeli nawu akateña nikushinakajaku

[Mwevulu wudi hefu 26]

Hela chakwila akataña, antu jaYehova awanaña muzañalu mumudimu wakushimwina