Aru i te Tuatua Tapu no te Akono Anga i te Oraanga Kopapa

“E anoano atu koe i toou Atua ia Iehova . . . ma to manako katoa, e ma to ririnui katoa.”​—MARE. 12:30.

1. Eaa to te Atua akakoroanga mua no te tangata?

KARE to te Atua ko Iehova akakoroanga mua no te tangata i kapiti mai ana i te maki e te mate. Kua tukuia a Adamu raua ko Eva ki roto i te kainga i Edene me kore i te parataito mataora, “ei tatanu, e ei tiaki,” i te reira, kare ra e no tetai 70 me kore 80 ua au mataiti, mari ra e mutu kore ua atu. (Gene. 2:8, 15; Sala. 90:10) Naringa taua tokorua ra i vai akarongo mou ua kia Iehova e i akaari i to raua inangaro nona na te kauraro anga ki tona turanga ngateitei, e kore ana raua e kite i te tu makimaki, te tu apikepike, e te mate.

2, 3. (a) I akapeea te ruaineanga i te akatutuia mai anga i roto i te puka o Koheleta? (e) Koai te tumu o te mate tei iri mai mei ia Adamu, e ka akapeea me akakoreia te kino ta te reira i akatupu?

² Te akataka meitaki ua maira a Koheleta pene 12 i “te au rā kino” e piri maira ki te ruaineanga o te tangata apa ua. (E tatau ia Koheleta 12:1-7.) Te akaaiteia ra te rouru teatea ki te puera o te rakau “sekadi ra.” Te nga vaevae te akaaiteia ra ki “te aronga maroiroi” e piko ra e te tauriuri ra. E akatutuanga tau tikai no te mata aveave te au vaine tei aere ki te maramarama kia marama te mata inara e poiri ua rai. I te mea e kua pururu tetai au nio, i “kore ei oki te au tavini e taviri ra, no te mea kua iti” ua ratou.

³ Te nga vaevae ruketekete, te mata akapopoiri, te tuai kare e nio, mea papu roa e kare ko te reira to te Atua akakoroanga mua no te tangata. Tetai katoa, ko te mate tei iri mai mei ia Adamu, ko tetai ia o “te angaanga a te diabolo” ta te Tamaiti a te Atua ka akakore atu na roto i tona Patireia Mesia. Kua tata te apotetoro ko Ioane e: “No reira i akakiteia mai ei te Tamaiti a te Atua ra, kia akakore aia i te angaanga a te diabolo ra.”​—1 Ioa. 3:8.

Ka Inangaroia rai kia Akapou i Tetai Taime

4. Eaa ra i tau ei no te au tavini o Iehova kia inangaro i te akapou i tetai taime ki runga i to ratou oraanga kopapa, inara eaa ta ratou e matakite ra?

⁴ I teia taime nei, te aro atu nei tetai au tavini o Iehova i te tu makimaki e te ruaineanga tei riro ei mea noa ua ki te tangata ara nei. Ka inangaroia rai kia akapou i tetai taime ki runga i to tatou oraanga kopapa e e mea puapinga katoa te reira. Kare ainei tatou e inangaro kia tavini ia Iehova ‘ma to tatou ririnui katoa’? (Mare. 12:30) Inara, ia tatou e umuumu ra kia vai maroiroi ua, kia akamanako meitaki rai tatou e kia ariki e e iti ua rai ta tatou ka rauka i te rave, i te akamarie mai i te turanga o te ruaineanga me kore i te kopae i te au maki ravarai.

5. Eaa ta tatou ka mou mai mei te au tavini akarongo mou o te Atua tei rokoia ana e te maki?

⁵ E manganui ua atu te au tavini akarongo mou o Iehova i aro atu ana i te au manamanata o te oraanga kopapa. Ko Epaperodito tetai o teia aronga nei. (Phili. 2:25-27) Ko Timoteo te oa tiratiratu o te apotetoro ko Paulo tetai tei rokoia putuputuia ana e te maki kopu, ta Paulo i akamaroiroi atu kia inu i tetai “manga wina iti.” (1 Timo. 5:23) Kua tu katoaia ana a Paulo uaorai e ‘tetai tara i roto i tona kopapa,’ penei e maki mata  me kore e maki ke mai kare e vairakau e rauka i taua taime ra. (2 Kori. 12:7; Gala. 4:15; 6:11) No runga i te ‘tara i roto i tona kopapa,’ kua pure akatenga a Paulo kia Iehova. (E tatau ia 2 Korinetia 12:8-10.) Kare te Atua i akaora temeio ua mai ana ia Paulo no te ‘tara i roto i tona kopapa.’ Mari ra, kua akamaroiroi mai te Atua iaia kia akakoromaki i te reira. Kua akaariia maira te mana o Iehova i roto i to Paulo tu paruparu. E apiianga ainei tetai i roto i teia no tatou?

Kopae i te Manako Maata Roa i te Akono Anga i te Oraanga Kopapa

6, 7. No teaa ra tatou ka kopae ei i te akapou maata roa i te taime ki runga i to tatou oraanga kopapa?

⁶ Mei taau rai i kite, e ariki ana te Au Kite o Iehova i te tauturu no te rapakau, e tetai atu au tu rapakauanga maki tukeke. E kitea putuputuia ana te au atikara no runga i te au mea o te oraanga kopapa i roto i ta tatou tianara E Ara! Noatu e kare tatou e turuturu ana i tetai ua atu rapakauanga, e ariki ana ra tatou i te tauturu e te taokotaianga a te aronga tei tereniia i te akono i te aronga maki. E tika, kua kite tatou e kare i rauka ake te oraanga kopapa apa kore i teianei. No reira, te kite ra tatou e e tu pakari tikai kia kopae i te akapou maata ua i te taime me kore i te varenga ua i te akono i te oraanga kopapa. Kia tuke ra to tatou tu mei to te aronga ‘manakonakoanga kore,’ tei manako e ko teia ua rai to ratou oraanga, e te ka taangaanga i tetai ua atu ravenga rapakau i te titau anga kia ora to ratou maki. (Ephe. 2:2, 12) Te akakoro nei tatou kia kore e ngere i to Iehova marekaanga, i te tauta anga kia akaora i to tatou oraanga i teianei, no te mea kua papu ia tatou e me vai akarongo mou ua tatou ki te Atua, ka rauka ia tatou “te ora mutu kore,” i roto i tona akatereanga ou o te au mea nei tei taputouia mai.​—1 Timo. 6:12, 19; 2 Pete. 3:13.

⁷ Ka kopae tatou i te akapou maata roa i te taime ki runga i to tatou oraanga kopapa no tetai tumu ke mai. Me maata roa to tatou manako no runga i to tatou oraanga kopapa ka manako ua i reira tatou, ia tatou uaorai. Kua akamatakite mai a Paulo i teia kino i tona raurau anga i to Philipi e ‘auraka te tangata e akono i to ratou anake uaorai au mea, e akono katoa ra i to etai ke ra au mea.’ (Phili. 2:4) E mea meitaki kia tau ua te akono anga ia tatou uaorai, inara ka riro te inangaro tikai e akaari ra tatou no to tatou au taeake e no te aronga e apai atura tatou i “te evangelia o te basileia” ei paruru ia tatou kia kore e varenga ua ki to tatou oraanga kopapa.​—Mata. 24:14.

8. Eaa ta te akapou maata ua anga i te taime ki runga i to tatou oraanga kopapa ka arataki atu ia tatou kia rave?

⁸ Ko te kino e vai ra koia oki me akariro te Kerititiano i te au mea o te oraanga kopapa ei mea puapinga maata atu i te au anoano o te Patireia. Ka riro katoa te akapou maata ua i te taime ki te akono anga i te oraanga kopapa, ei arataki atu ia tatou kia maro atu i to tatou uaorai au manako ki runga i etai ke, no runga i te puapinga o tetai tu kai, tetai ravenga rapakau, me kore i tetai kai ke atu. No runga i teia, ka akamanako ana i tetai kaveinga tei akakiteia mai i roto i te au tuatua a Paulo e: “Kia [“akapapu kotou i te au mea puapinga maata rava atu,” NW]; kia riro kotou ei aronga tuatua-mou, e te apa kore, e tae ua atu ki te rā o te Mesia ra.”​—Phili. 1:10.

Eaa te Mea Puapinga Maata Roa Atu?

9. Eaa tetai o te au apinga puapinga maata roa atu auraka tatou kia kopae, e no teaa ra?

⁹ Me te akapapu ra tatou i te au mea puapinga maata roa atu, ka piri atu tatou ki te tauturu anga i etai ke i roto i te angaanga rapakauanga pae vaerua. E akatupuia ana te reira na roto i te tutu aere anga e te apii anga atu i te Tuatua a te Atua. Ka riro teia angaanga mataora ei puapinga no tatou e no te aronga ta tatou ka apii atu. (Mase. 17:22; 1 Timo. 4:15, 16) Tetai au taime e kapiti mai ana Te Punanga Tiaki e te makatini E Ara! i te au atikara no runga i to tatou au taeake e te au tuaine pae vaerua e au maki kino to ratou. I tetai au taime e akamarama mai ana teia au papaanga e e akapeea ana taua aronga ra i te akakoromaki anga i to ratou au manamanata e i te akangaropoina poto ua i te reira na te tauturu anga i etai ke kia kite ia Iehova e tana au taputou umere tikai. *

10. No teaa ra i riro ei ta tatou au rapakauanga ka iki ei mea puapinga?

¹⁰ Me aro atu i tetai manamanata o te oraanga  kopapa, na te Kerititiano tataki tai rai “e rave i tana uaorai apainga” i te iki anga i tetai rapakauanga. (Gala. 6:5, NW) Inara kia akamaara rai tatou e ko ta tatou rapakauanga ka iki e mea puapinga tikai te reira kia Iehova. Mei te akangateiteianga rai no te au kaveinga Pipiria e akakeu ana ia tatou “auraka e kai . . . te toto,” kia riro rai to tatou akangateiteianga oonu no te Tuatua a te Atua ei akamaroiroi ia tatou kia kopae i te au rapakauanga te ka takino ia tatou i te pae vaerua me kore te ka akakino i to tatou pirianga kia Iehova. (Anga. 15:20) Tetai au ravenga e taangaangaia ana kia kiteaia e eaa te maki e te vairakau ka anoanoia, aiteite rai ki te au angaanga purepure. Kare a Iehova e mareka ana i te ngati Iseraela apoteiti tei taangaanga i te “mana purepure.” Kua akakite aia e: “Auraka e apai akaou mai i te au atinga kai puapinga kore; te rakau kakara ra, e mea viivii ïa naku; te au marama ou, e te au sabati, te uruoaanga tapu i tutu aereia, e te au rā i akatapuia, ma te [“mana purepure,” NW], kare e tika iaku kia akakoromaki.” (Isa. 1:13) Papu e kare te tuatau maki i te taime no te rave i tetai mea te ka riro ei arai i ta tatou au pure e te takino i to tatou pirianga ki te Atua.​—Aue 3:44.

Ka Anoanoia te “Manako Tau”

11, 12. Akapeea ra te tu “manako tau” i te o mai anga ki roto i ta tatou ikianga no te akono anga i te oraanga kopapa?

¹¹ Me maki tatou, kare e rauka ia tatou kia tapapa atu ia Iehova kia akaora temeio ua mai ia tatou, ka rauka ra ia tatou kia pure no te tu pakari i te iki anga i tetai rapakauanga. E mea tau kia riro ta tatou ikianga na te au kaveinga Tuatua Tapu e te manako marama tikai e arataki. Mei te mea e e maki kino tikai, e mea meitaki kia aravei atu i tetai au taote kite karape ke mai me ka rauka, kia tau ki te manako e akakite maira a Maseli 15:22, e: “Kare e uruoaanga tuatua ra, kare tei akakoroia e tupu: kia maata ra te aronga kimi tuatua kua mou ïa.” Kua raurau te apotetoro ko Paulo i te au taeake irinaki “kia noo ma te manako tau e te tuatua tika e te akono i te Atua ra i roto i teianei akatereanga o te au mea nei.”​—Tito 2:12, NW.

¹² E maata ua atu te aronga e kite ana ia ratou uaorai i roto i tetai turanga tei aite rai ki to tetai vaine maki i te tuatau o Iesu. I roto ia Mareko 5:25, 26, ka tatau tatou e: “E tetai vaine, raungauru ma rua akera ona mataiti, i te mate ua anga i te atekeria. I rapakauia na oki aia e te aronga rapakau ra e manganui, kua pou rava tona apinga, kare rava i ora, te maata ua ra tona maki.” Kua akaora a Iesu i taua vaine ra e kua akono iaia ma te ngakau aroa ua. (Mare. 5:27-34) No te taitaia o te ngakau, kua timataia tetai au Kerititiano kia iki i te au ravenga kia kiteaia e eaa te maki me kore te vairakau e patoi ra i te au kaveinga o te akamorianga ma.

13, 14. (a) Akapeea a Satani i te taangaanga anga i ta tatou ikianga no te au rapakauanga o te oraanga kopapa kia takino i to tatou tu tiratiratu? (e) No teaa ra tatou ka akaatea takiri mai ei mei tetai ua atu apinga e aiteite katoa atura rai ki te angaanga manamana?

¹³ Ka taangaanga a Satani i tetai ua atu ravenga kia akatarurike ia tatou mei te akamorianga mou. Mei tana rai e taangaanga ana i te peu ainga tau kore e te noinoi apinga nui i te akaturori i tetai aronga, e tauta ana rai aia i te takino i te tu tiratiratu o etai ke na roto i te au rapakauanga e piri atura ki te au angaanga manamana e  te purepure. E pure ana tatou kia Iehova kia akaora mai ia tatou mei “tei kino ra” e mei “te au tu tau kore katoatoa.” No reira auraka rava tatou kia kauraro atu kia Satani na te o atu anga ki roto i te au angaanga purepure e te au angaanga manamana.​—Mata. 6:13; Tito 2:14, NW.

¹⁴ Kua ture a Iehova i te ngati Iseraela auraka e rave i te angaanga tauraatua e te manamana. (Deu. 18:10-12) Kua kapiti mai a Paulo i “te purepure” ki roto i “te au angaanga a te kopapa.” (Gala. 5:19, 20) Tetai, ko te aronga e rave ra i te angaanga “purepure” kare ratou e tae ki roto i to Iehova akatereanga ou o te au mea nei. (Apo. 21:8) Te taka meitaki ua ra i reira e, ko tetai ua atu apinga e piri atura ki te angaanga purepure, e mea viivii rava te reira kia Iehova.

“Kia Kitea oki to Kotou Tu Tau”

15, 16. Eaa te tumu ka anoano ei tatou i te tu pakari i roto i ta tatou ikianga no te akono anga i te oraanga kopapa, e eaa te akoanga pakari ta te pupu akaaere o te anere mataiti mua i oronga mai?

¹⁵ No runga i tei tuatuaia akenei, me te ekoko ra tatou no runga i tetai au ravenga kia kiteaia e eaa te maki me kore te vairakau, e mea meitaki kia patoi atu tatou i te reira. E tika, e no te mea ua nei e kare e rauka ia tatou i te akamarama e akapeea te rave anga i tetai ravenga rapakauanga, kare te aiteanga o te reira e te o maira te angaanga purepure. I te aru anga i te manako o te Tuatua Tapu no runga i te akono anga i te oraanga kopapa, ka anoanoia kia rauka ia tatou te pakari tei akatumuia ki runga i te Tuatua a te Atua e kia akamanako meitaki katoa tatou. I roto ia Maseli pene 3, ka kite tatou i teia akoanga e: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa . . . e tāpu koe i te pakari meitaki e te akono; Ko te ora ïa no toou ra vaerua.”​—Mase. 3:5, 6, 21, 22.

¹⁶ Ia tatou e aruaru ra kia vai maroiroi ua, kia matakite ra tatou auraka kia ngere i to te Atua marekaanga, ia tatou e tauta ra i te kimi i tetai rapakauanga no to tatou maki me kore no te ruaineanga. I te akono anga i te oraanga kopapa, e i tetai atu au mea ke, ka anoanoia ‘kia kitea to tatou tu tau e te au tangata ravarai’ na te noo anga kia tau to tatou oraanga ki te au kaveinga Pipiria. (Phili. 4:5, NW) I roto i tetai reta puapinga maata tikai, kua ikuiku atu te pupu akaaere o te anere mataiti mua i te au Kerititiano kia patoi atu i te akamori itoro, te toto, e te akaturi koia oki te moeaana. Te kapiti maira taua reta ra i te akapapuanga e: “Kia akaruke kotou i te reira, e meitaki ïa kotou.” (Anga. 15:28, 29) Na teea mataara?

Akono Anga e Tau ma te Akamanako i te Oraanga Kopapa Apa Kore

17. I akapeea tatou i puapingaia ai i te pae kopapa no tei aru tatou i te au kaveinga Pipiria?

¹⁷ E mea tau kia ui tatou tataki tai uaorai e, ‘Te marama ra ainei au i te au puapinga tei rauka iaku uaorai no te akono tamou anga i te au kaveinga Pipiria no runga i te toto e te moeaana?’ E akamanako katoa, i te au puapinga tei rauka ia tatou no ta tatou au tautaanga kia ‘tamā ia tatou uaorai i te au viivii katoa o te kopapa e te vaerua.’ (2 Kori. 7:1) Na te aru anga i te au turanga o te Pipiria no runga i te tama anga ia tatou uaorai, e maata ua atu te au maki o te kopapa ka kopaeia. Te puapingaia nei tatou no te mea te kopae nei tatou i te kai avaava e te apinga akakona tureia e taviivii nei i to tatou kopapa e te takino i to tatou pirianga ki te Atua. Ka akamanako katoa ana i te au puapinga o te oraanga kopapa e rauka maira no te tau ua o te kaikai anga e te inu anga. (E tatau ia Maseli 23:20; Tito 2:2, 3.) Noatu e na te au mea mei te akangaroianga e te akamatutu i  te kopapa e tauturu maira i to tatou turanga meitaki, ko te tumu tikai ra i puapingaia ai tatou i te pae kopapa e te pae vaerua no te mea kua ariki tatou i te aratakianga a te Tuatua Tapu.

18. Eaa tikai te mea puapinga maata kia tatou, e ki te akatupuanga o teea totou no runga i te oraanga kopapa, ta tatou ka tapapa atu?

¹⁸ Ei runga rava atu, e akono meitaki tatou i to tatou oraanga pae vaerua e kia akamatutu i to tatou pirianga akaperepere ki to tatou Metua i te rangi, te Tumu o to tatou “oraanga no teianei e no a muri atu” i roto i tona ao ou i taputouia mai. (1 Timo. 4:8, NW; Sala. 36:9) I roto i te ao ou o te Atua, ka rauka te rapakauanga ki katoa i te pae vaerua e te pae kopapa na roto i te akakore anga ara tei akatumuia ki runga i te atinga oko a Iesu. Ka arataki te Punua Mamoe a te Atua, ko Iesu Karaiti ia tatou ki te “au pupui anga o te vai ora,” e ka orei te Atua i te roimata katoa mei to tatou au mata ravarai. (Apo. 7:14-17; 22:1, 2) I reira katoa tatou e kite ei i te akatupuanga o teia totou umere e: “Kare oki to reira e karanga e, Kua maki au.”​—Isa. 33:24.

19. Ia tatou e akono ra ma te tau ua i to tatou oraanga kopapa, eaa te akapapuia maira kia tatou?

¹⁹ Papu tikai ia tatou e te vaitata rava mai nei to tatou akaora, e te tapapa rekareka atu nei tatou i te ra e takore ei a Iehova i te tumu o te maki e te mate. I teianei ra, kua papu ia tatou e ka tauturu mai to tatou Metua aroa ia tatou kia akakoromaki i te apainga teiaa o to tatou au maki no te mea “te manako ua maira aia ia tatou.” (1 Pete. 5:7, NW) No reira, kia akono tatou i to tatou oraanga kopapa inara, kia aru ua rai te reira i te aratakianga taka meitaki i roto i te Tuatua akauruia a te Atua!

[Au Tataanga Rikiriki i Raro]

Na te Akamanako Akaou Anga

• Koai te tumu o te maki, e koai te ka akaora mai ia tatou mei te au kino o te ara?

• Noatu e e mea matau na tatou kia akamanako atu no runga i to tatou oraanga kopapa, eaa tikai ra ta tatou ka kopae?

• No teaa ra te rapakauanga ta tatou ka iki i riro ei ei mea puapinga kia Iehova?

• No runga i to tatou oraanga kopapa, ka akapeea tatou i te puapinga anga mei te aru anga i te au kaveinga Pipiria?

[Au Uianga Apii]

[Tutu i te kapi 23]

Kare te tangata i angaia mai kia kite i te maki e te ruaineanga

[Tutu i te kapi 25]

Noatu te au manamanata o te pae oraanga kopapa, te kite nei te iti tangata o Iehova i te rekareka i roto i te angaanga orometua