Oi be Edena Bamona Tauna ai Oi Ura Oi Lao?

PHILIPPINES ena taoni ta ena pulisi biaguna be painia taihu ta ia nanadaia, “Edena dala ai unai tau oi durua ena kara ia haidaua totona?” Pulisi biaguna be ena teibolo latanai idia noho pepa ia poinia bona ia gwau: “Inai pepa ibounai be unai tau ena rekodi, ia be guna kota dekenai ia lao loulou. Ia be inai taoni dekenai hekwakwanai momo ia havaraia, to hari oi ese ena kara oi haidaua.” Pulisi biaguna ese ia herevalaia tauna be guna ia inuinu kekero, ia dagedage bona hekwakwanai momo ia havaraia loulou. To dahaka ese unai tauna ena kara ia haidaua? Unai be Dirava ena Hereva, Baibel.

Taunimanima momo be aposetolo Paulo ena sisiba idia badinaia dainai, idia ese ‘edia mauri gunana be dabua gunana bamona idia kokia. Mauri matamata idia atoa, dabua matamata idia atoa bamona. Inai mauri matamata dainai, edia toana be Dirava ena toana bamona, ia ese ia karaia gauna.’ (Efe. 4:​22-​24) Herevana iseda kara​​—⁠badadia o maragidia​​—⁠ita senisia be namo, to Keristani tauna ai ita lao totona, mauri matamata ita atoa be gau badana.

Bema iseda kara ita senisia bona ita goada ita lao ela bona ita hegeregere bapatiso ita abia totona, anina be ita be Keristani dalana ita badinaia matamaia unai. Bapatiso totona ita hegaegae neganai, ita be hegeregere tau ta ese au ta amo manu ta ena laulau ia karaia bamona, to ia do haorea lasi. Reana manu ena laulau ia hedinarai vadaeni, to au karaia tauna ese au dekenai gau ma haida ia hanamoa be namo​—⁠unai amo manu ena toana do ia hairai momokani. Ita bapatiso gwauraia neganai, ita be Dirava ena hesiai tauna ena kara badadia haida ita diba vadaeni. To, kara namodia ma haida ita diba be namo. Anina be iseda kara gunadia ita haidaua noho be namo.

Paulo danu ia diba iena kara ia haidaua be namo. Ia gwau: “Lau ura be kara namona lau karaia, to kara dika sibona lau karaia diba.” (Roma 7:​21) Momokani, Paulo ia diba ia be edena bamona tauna, bona edena bamona tauna ai ia ura ia lao be ia diba danu. Ita be edena bamona? Ita sibona ita nanadaia: ‘Lauegu kara be edena bamona? Lau be edena bamona tauna? Lau be edena bamona tauna ai lau ura lau lao?’

Lauegu Kara be Edena Bamona?

Ruma gunana ta ita hanamoa neganai, namo lasi ena murimuri kahana sibona ita penia bema  ena lalonai idia noho au haida be idia dika. Bema ruma ai idia hadikaia gaudia ita senisia lasi, gabeai ruma ibounai be do ia dika momokani. Unai hegeregerena, namo lasi kara maoromaoro ena toana sibona ita hahedinaraia. To, eda kara ita tahua namonamo bona ita itaia edena kara ita haidaua be namo. Bema lasi, gabeai iseda kara gunadia do idia hedinarai lou. Unai dainai, namona be iseda kara ita tahua namonamo. (2 Kor. 13:⁠5) Oibe, bema ita davaria ita karaia karadia haida be maoro lasi, vadaeni ita hamaoromaoroa be namo. Bona unai bamona ita karaia totona, Iehova be ita dekenai heduru gaudia momo ia henia.

Paulo ia gwau: “Dirava ena hereva be ia mauri noho, bona ia be mai ena siahu. Ia be mai ena matana momokani. Iena matana ese kaia mai ena kahana ruaosi ena matana ia hereaia momokani. Ia ese tau ta ia gwadaia neganai, unai tau ena lalona momokani dekenai ia vareai. Ia vareai ela bona lalona bona lauma ruaosi ia hapararaia. Bona ia ese iseda lalona bona iseda kudouna ena ura ibounai ia tahua diba.” (Heb. 4:​12) Baibel ese iseda mauri ia haidaua diba. Iena hereva be iseda lalona dekenai ia vareai​—⁠laulau dalanai, ia be eda turia edia lalona kahana dekenai ia vareai danu. Ia be iseda lalohadai bona ura ia tahua diba, kara, bona iseda lalona momokani ai ia noho kara korikorina ia hahedinaraia diba, herevana ita sibona be edena bamona ita laloa eiava ma haida edia matanai ita be edena bamona karadia ita karaia. Oibe, Dirava ena Hereva ese ita ia durua iseda kara ita lalopararalaia bona haidaua totona!

Ruma gunana ta ita hanamoa neganai, au dikadia ita senisia sibona be hegeregere lasi. To au idia dika ena badina ita diba be namo, badina unai ese ita do ia durua gau haida ita karaia, unai dika ia vara lou lasi totona. Unai hegeregerena, bema ita diba ita karaia karana ta be ia maoro lasi, namona be ita tahua dahaka dainai unai bamona ita karaia, unai ese ita do ia durua iseda kara ita haidaua totona. Gau momo ese iseda kara idia hanamoa bona hadikaia diba. Unai gau haida be iseda dagi, moni, noho dalana, kastom, iseda tama sina, turadia, bona tomadiho. Bona danu TV bona moale karadia ma haida ese iseda kara idia hanamoa bona hadikaia diba. Iseda kara ia hadikaia gauna ita diba neganai, ita be dala do ita tahua iseda kara ia hadikaia gauna ita koua o hanaia totona.

Sibona eda kara ita tahua neganai, reana nega momo ita gwau, ‘Lauegu kara be unai bamona.’ To, unai be lalohadai kererena. Korinto kongrigeisen dekenai idia noho taudia haida be guna matabodaga karadia idia karaia, tatau be tatau ma haida danu idia mahuta hebou, idia inuinu kekero, bona kara dikadia ma haida idia karaia. Paulo be idia ia herevalaia neganai, ia gwau: “Umui haida be guna unai bamona umui karaia. To Dirava ese umui emui kara dika ia huria goeva vadaeni, . . . Dirava ena Lauma dainai.” (1 Kor. 6:​9-​11) Iehova be ena lauma helaga amo heduru ia henia dainai, ita danu be eda kara ita haidaua diba.

Philippines ai ia noho tauna ladana, Marcos * ita laloa. Ia be ena mauri dalana ia herevalaia bona ia gwau: “Egu tama sina be idia heai momo. Unai dainai, egu mauri lagani be 19 neganai, lau be kara dikadia momo lau karaia.” Marcos be kasi momo bona henaohenao momo tauna ai ia lao. Nega ta ai, ia be palani ia karaia ia bona ma haida be peleini ta idia henaoa totona, to unai palani ia guguru lasi. Ena be Marcos ia headava, to kara dikadia ia do karaia noho. Ia be ena kasi momo karana dainai ena gau ibounai ia haboioa. Daudau lasi murinai, Marcos bona ena adavana be Iehova ena Witnes taudia ida Baibel idia stadilaia. Matamanai, Marcos ia laloa ia be hegeregere lasi Witnes tauna ta ai ia lao totona. To, Baibel stadi amo ia dibaia gaudia ia badinaia bona hebou  lao henia karana ese ia durua ena kara gunadia ia rakatania totona. Hari ia be Keristani tadikaka ta bona hanaihanai ma haida ia hadibaia edia mauri idia haidaua totona.

Oi be Edena Bamona Tauna?

Dahaka ita senisia be namo, unai amo Keristani karadia ita habadaia diba? Paulo ese Keristani taudia ia sisiba henia: “Inai gaudia umui negea momokani: Badu, dagedage, laloa dika. Hereva dika bona hereva mirodia do umui gwauraia lasi. Umui ta ta dekenai do umui koikoi lasi. Badina be emui mauri gunana mai ena dika be dabua gunana bamona umui kokia vadaeni, bona mauri matamata umui kwatua vadaeni. Inai mauri matamata be Dirava ese ia havaraia. Bona ia ese nega ibounai diba matamata ia henia noho, ia lao bona Dirava ena toana momokani do umui abia.”​​—⁠Kol. 3:​8-​10.

Iseda tahua gauna badana be inai: Ita hekwarahi eda mauri gunana ita rakatania bona mauri matamata ita atoa. Mauri matamata ita atoa totona, edena bamona karadia ita hahedinaraia be namo? Paulo ia gwau: “Inai bamona karadia, dabua bamona do umui atoa: Bogahisihisi, durua, manau, manada bona haheauka. Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu. To unai kara ibounai ia hereaia kara be lalokau. Do umui lalokau henia, vadaeni do umui noho hebou namo herea, mai laloa tamona danu.” (Kol. 3:​12-​14) Ita hekwarahi unai bamona kara namodia ita hahedinaraia neganai, Iehova bona taunimanima ese ita do idia ura henia. (1 Sam. 2:​26) Iesu be tanobada ai ia noho neganai, ia be Dirava ena kara namodia ia hahedinaraia goevagoeva. Unai dainai, bema Iesu ena haheitalai ita stadilaia o ita tohotohoa, vadaeni ita be Keriso hegeregerena ‘Dirava ena kara bamona do ita karaia.’​​—⁠Efe. 5:​1, 2.

Bema ita ura diba iseda kara ita senisia be namo eiava lasi, ita do ia durua gauna ta be inai: Baibel ese ia sivarailaia taudia edia kara ita stadilaia, bona ita tahua edia kara be namo o dika. Hegeregere, mani Iakobo ena natuna, Iosepa ita laloa. Ena be Iosepa ena kakana ese ia idia kara namo henia lasi, to Iosepa be lalohadai maorona ia dogoatao bona ia badu henidia lasi. (Gen. 45:​1-​15) To, King Davida ena natuna, Abesaloma be koikoi dalanai ia hahedinaraia ia be taunimanima edia namo ia laloa bada, bona iena vairana ena toana ena hairai dainai, taunimanima ese ena ladana idia hanamoa. To, Abesaloma be koikoi tauna, ladana hadikaia tauna, bona ala-ala tauna. (2 Sam. 13:​28, 29; 14:25; 15:​1-​12) Oibe, herevana ta be koikoi dalanai kara namodia ia hahedinaraia bona iena vairana ena toana be mai ena hairai, to ita gwau lasi unai be tau namona.

Iseda Kara Ita Hanamoa Diba

Eda kara ita senisia bona Dirava ena matanai ita hairai totona, gau namodia amo iseda kudouna ita hahairaia be namo. (1 Pet. 3:​3, 4) Iseda kara ita senisia totona, gau badana be ita karaia karana bona ena badina ita lalopararalaia sibona lasi, to Dirava ena kara namodia ita hahedinaraia danu. Ita diba bema ita hekwarahi, vadaeni iseda kara do ita hanamoa noho diba, ani?

Oibe, Iehova ena heduru amo iseda kara ita senisia diba. Salamo torea tauna ena guriguri bamona, do ita gwau: “Dirava e, lauegu kudouna lalonai laloa goevagoeva do oi havaraia, bona lauma matamatana bona maoromaorona, be egu lalona dekenai do oi atoa.” (Sal. 51:10) Dirava ita noia diba ena lauma helaga be iseda lalona bona kudouna dekenai ia gaukara, unai ese ita ia durua Iena ura karadia do ita karaia totona. Momokani, Iehova ena matanai ita be hairai taudia ai ita lao diba!

[Footnote]

[Picture on page 4]

Lai bona medu ese ia hadikaia ruma ena murimuri kahana sibona ita penia be hegeregere, a?

[Picture on page 5]

Oiemu kara be Keriso ena kara bamona, a?