Sortu sma yu wani de?

NA EDEMAN fu skowtu fu wan foto na ini den Filippijnen ben aksi wan pionier: „Fa yu ben man yepi a man disi fu kenki den fasi fu en?” A skowtu disi sori go na a ipi papira di ben de na tapu en tafra, èn a taki: „Yu sabi taki ala den papira disi abi fu du nanga afersi fu sma di tyari a man disi go na skowtu? A man disi tyari wan lo problema kon na ini a foto disi, ma now yu meki a tapu nanga den ogri di a ben e du.” A skowtu disi ben e taki fu wan drunguman di ben lobi fu meki trobi. Fa a du kon taki a tyari bigi kenki kon na ini en libi? Na a boskopu fu Gado Wortu, Bijbel ben yepi en.

Furu sma gi yesi na a rai di na apostel Paulus ben gi fu ’kenki a fasi fa den ben de fosi, noso a fasi fa den ben gwenti tyari densrefi, èn fu tron nyun sma di de soleki fa Gado wani’ (Ef. 4:22-24). Fu man tron wan Kresten, dan a de fanowdu taki wi e tron nyun sma. Fu man doro a marki dati, dan wi musu tyari kenki kon, awansi den bigi noso pikin.

Ma te wi e tyari kenki kon fu man doro den markitiki fu teki dopu, dan dati na soso a bigin. Te wi e teki dopu, dan wi kan agersi wisrefi nanga wan pisi udu di wan sma koti fu meki wan moi sani. Yu kan si kaba san a sma o meki, ma a sma no kaba ete. A musu du wan tu finifini wroko ete na a udu, so taki a e kon tron wan moi sani. Te wi e teki dopu, dan wi abi den prenspari fasi di wan futuboi fu Gado musu abi. Ma wi musu tyari moro kenki kon. Wi musu tan du dati so taki wi e tron wan sma di abi moi fasi.

Srefi Paulus ben si taki a ben musu kenki den fasi fu en. A ben taki: „Te mi wani du bun, dan ogri de na ini mi” (Rom. 7:21). A no de fu taki dati Paulus ben sabi sortu sma a ben de, èn sortu sma a ben wani tron. Fa a de nanga wi? Wi musu aksi wisrefi tu: ’San de na ini mi? Sortu sma mi de? Èn sortu sma mi wani tron?’

’San de na ini mi?’

Te wi e seti wan owru oso kon bun baka, dan wi no musu ferfi a dorosei fu na oso nomo aladi wan tu postu na inisei pori. Te wi no e kenki den pori postu fu na oso, dan dati kan tyari  problema kon bakaten. Na so a de tu taki te wi e du nomo neleki wi na reti-atisma, dan dati no nofo. Wi musu ondrosuku wisrefi bun fu kon sabi sortu swakifasi wi abi, so taki wi kan tyari kenki kon. Te wi no e du dati, dan den fasi disi sa kon na loktu baka. Dati meki a de prenspari taki wi e ondrosuku wisrefi bun (2 Kor. 13:5). Wi musu kon sabi san na den swakifasi fu wi, èn wi musu kenki den. Yehovah e yepi wi fu du dati.

Paulus ben skrifi: „A wortu fu Gado de na libi, a abi krakti, èn a srapu moro iniwan feti-owru di e koti na tu sei; a e koti go so dipi taki a e prati sili nanga yeye srefi, èn a e prati bonyo nanga a bonyo-fatu fu makandra; a man si krin san na ati e denki èn san a abi na prakseri” (Hebr. 4:12). A boskopu na ini Gado Wortu, Bijbel, kan abi bun furu krakti na wi tapu. Na wan agersi fasi, a e boro go dipi na ini wi, te na a inisei pisi fu den bonyo fu wi. A e tyari kon na krin san na den denki nanga den firi fu wi, so taki wi e kon sabi sortu sma wi de trutru na ini wi ati. Gado Wortu trutru e yepi wi fu kon sabi san na den swakifasi fu wi!

Te wi e seti wan owru oso kon bun baka, dan kande wi sa du moro leki fu kenki soso den sani di no bun moro. Te wi sabi fa a du kon taki den sani disi kon pori, dan wi kan sorgu taki a sani dati no e pasa moro. Na so a de tu taki wi no musu kon sabi nomo san na den swakifasi fu wi, ma wi musu kon sabi tu fa a du kon taki wi kon abi den swakifasi disi. Dati sa yepi wi fu basi den. Furu sani de di kan abi krakti na wi tapu. A posisi di wi abi na ini a libimakandra na wan fu den sani dati. Kande wi abi spesrutu fasi fu di wi gudu noso pôti. Tra sani di kan abi krakti na wi tapu, na a presi pe wi e tan, a kulturu fu wi, wi papa nanga mama, den mati fu wi, noso a bribi fu wi. Srefi den telefisi programa di wi e luku, den kino, noso tra sani di e gi wi prisiri, kan abi krakti na wi tapu. Te wi e kon sabi sortu sani abi wan takru krakti na wi tapu, dan wi sa sabi moro bun fa fu wai pasi gi den sani dati.

Baka te wi ondrosuku wisrefi, dan kande wi sa taki: „Mi no man yepi, na so mi de kaba.” A no bun fu denki so. Luku san Paulus ben taki fu den sma na ini a gemeente na ini Korente. Fosi, den sma disi ben de huruman, man di ben e didon nanga man, drunguman, èn so moro fara. Paulus ben taigi den: „Sonwan fu unu ben de den sortu sma dati. Ma . . . nanga a yeye fu wi Gado, unu wasi kon krin” (1 Kor. 6:9-11). Yehovah en santa yeye kan yepi wi tu fu tyari kenki kon te dati de fanowdu.

Luku a tori fu wan man di nen Marcos. * A man disi e libi na ini den Filippijnen. Disi na san Marcos ben taki fu a fasi fa a ben kweki. „Mi papa nanga mi mama ben lobi krutu nanga makandra. Na dati meki mi opo misrefi teige den di mi ben abi 19 yari.” Marcos kon abi wan takru nen fu di a ben e dòbel, a ben e fufuru, èn a ben e hori gon gi sma. En nanga wan tu fu den mati fu en ben seti sani srefi fu teki wan opolani abra nanga tranga, ma a sani dati no go doro. Baka di Marcos trow, dan a no tapu nanga den takru gwenti fu en. Te fu kaba, a dòbel-libi fu en meki taki a lasi ala sani di a ben abi. Syatu baka dati, Marcos bigin teki prati na a bijbelstudie di en wefi ben e kisi fu den Kotoigi fu Yehovah. Na a bigin, Marcos ben feni taki a no warti fu tron wan Kotoigi. Ma fu di a ben e du den sani di a ben e leri, èn fu di a ben e go na den konmakandra, meki a ben man drai baka gi a libi di a ben abi fosi.  Now a de wan dopu Kresten di e yepi sma doronomo fu kon sabi fa den tu kan tyari kenki kon na ini a libi fu den.

Sortu sma yu wani de?

Sortu kenki wi musu tyari kon kande fu man kon abi moro moi fasi leki Kresten? Paulus e gi Kresten a rai disi: „Un musu poti ala den sani disi na wan sei trutru, namku atibron, ogridu, nanga kosikosi, èn un no musu taki dotitaki moro. No lei gi makandra. Kenki a fasi fa unu ben de fosi, èn tapu nanga den sani di unu ben e du.” Na apostel e taki moro fara: „Kon tron nyun sma di e kisi nyun fasi nanga yepi fu soifri sabi, so taki unu e kon gersi a Sma di ben meki unu kisi den fasi disi.”—Kol. 3:8-10.

Sobun, a moro prenspari sani di wi wani du, na fu kenki den fasi fu wi, so taki wi e tron nyun sma. Sortu fasi wi musu kweki fu man tron nyun sma? Paulus e taki: „Un musu abi trutru sari-ati, bun-ati, sakafasi, safri-ati, nanga langa pasensi, èn den fasi disi musu de leki wan krosi na un skin. Tan frudrage makandra èn gi makandra pardon nanga un heri ati te wan sma feni taki wan trawan du en wan ogri. Soleki fa Yehovah e gi unu pardon nanga en heri ati, na so unu musu du tu. Ma boiti den sani disi, un musu abi lobi, èn a musu de leki wan krosi na un skin, bika lobi na wan volmaakti banti di e meki sma kon de wán” (Kol. 3:12-14). Te wi e du ala san wi man fu kon abi den fasi disi, dan dati sa meki taki ’Yehovah nanga tra sma sa kon lobi wi moro’ (1 Sam. 2:26). Di Yesus ben de na grontapu, dan a sori den fasi fu Gado moro leki iniwan sma. Te wi e studeri na eksempre fu Yesus, èn te wi e du san wi leri fu en, dan dati sa yepi wi moro bun fu „waka baka na eksempre fu Gado”, neleki fa Krestes ben du dati.—Ef. 5:1, 2.

Wan tra fasi fa wi kan kon sabi sortu kenki wi musu tyari kon, na te wi e luku sortu fasi den sma na ini Bijbel ben abi. Wi musu luku sortu moi fasi nanga sortu swakifasi den sma disi ben abi. Fu eksempre, prakseri Yosef, a manpikin fu a famiri-edeman Yakob. Aladi sma no ben e handri na wan reti fasi nanga Yosef, toku a ben tan abi wan bun denki fu sani, èn a ben tan abi moi fasi (Gen. 45:1-15). Ma Absalom, a manpikin fu Kownu David, ben e du neleki a ben e broko en ede trutru nanga a pipel. Boiti dati, sma ben e prèise en fu di a ben moi. Ma fu taki en leti, a ben de wan toriman èn wan kiriman (2 Sam. 13:28, 29; 14:25; 15:1-12). Te wi e du neleki wi na bun sma èn te wi moi, dan dati no wani taki ete dati wi abi moi fasi.

Wi kan abi bun bakapisi

Fu man tron moro bun sma di moi na ini Gado ai, dan wi musu luku sortu sma wi de na ini wi ati (1 Petr. 3:3, 4). Te wi wani kenki den fasi fu wi, dan wi musu kon sabi san na den swakifasi fu wi, èn fa a du kon taki wi kon abi den fasi dati. Boiti dati, wi musu kweki den fasi di wan Kresten musu abi. Wi sa abi bun bakapisi te wi e meki muiti fu kenki den fasi fu wi?

Iya, Yehovah kan yepi wi fu tyari den kenki dati kon. Neleki a psalm skrifiman wi kan begi Gado: „Gi mi wan soifri ati, o Gado, èn meki mi kisi wan nyun denki so taki mi no e degedege” (Ps. 51:10). Wi kan aksi Gado fu meki a yeye fu en wroko na ini wi, so taki wi sa du moro muiti fu libi na wan fasi di a feni bun. Iya, wi kan kon tron moro moi sma na ini Yehovah ai!

[Futuwortu]

[Prenki na tapu bladzijde 4]

Te wan bigi winti broko wan oso, dan a ben o nofo fu ferfi soso a dorosei fu na oso disi?

[Prenki na tapu bladzijde 5]

Yu kon abi den fasi fu Krestes?