‘Tinguhaa ang mga Butang nga Mopatunghag Pakigdait’

ANG karsada nga bag-ong gisemento daw lig-on tan-awon ug dili madaot. Apan, paglabay sa panahon, mahimong maglikiliki kini ug mapunog libaong. Kinahanglan kining ayohon aron walay maaksidente ug padayong magamit.

Sa samang paagi, usahay makabingkil nato ang atong mga igsoon o madaot pa gani ang atong relasyon kanila. Bisan si apostol Pablo miadmitir nga managlahi ang panghunahuna sa mga Kristohanon sa Roma. Busa iya silang gitambagan: “Atong tinguhaon ang mga butang nga mopatunghag pakigdait ug ang mga butang nga makapalig-on sa usag usa.” (Roma 14:13, 19) Nganong hinungdanon nga “tinguhaon ang mga butang nga mopatunghag pakigdait”? Sa unsang paagi kita makabatog kaisog sa pagduol sa atong igsoon aron motunhay ang pakigdait?

Nganong Tinguhaon ang Pakigdait?

Kon dili bulitan o tabonan ug semento ang gagmayng mga liki sa karsada, kini modako ug mahimong peligroso. Sa samang paagi, peligroso usab kon dili dayon sulbaron ang ginagmayng kabingkilan. Si apostol Juan misulat: “Kon adunay magpahayag: ‘Gihigugma ko ang Diyos,’ apan nagdumot sa iyang igsoon, siya bakakon. Kay siya nga wala mahigugma sa iyang igsoon, nga iyang nakita, dili makahimo sa paghigugma sa Diyos, nga wala niya makita.” (1 Juan 4:20) Kon dili masulbad ang kabingkilan, sa ngadtongadto dumtan sa usa ka Kristohanon ang iyang igsoon.

Gipakita ni Jesu-Kristo nga ang atong pagsimba kang Jehova dili dalawaton kon kita dili makigdait sa uban. Gitudloan niya ang iyang mga tinun-an: “Nan, kon ikaw nagadala sa imong gasa ngadto sa halaran ug didto mahinumdom ka nga ang imong igsoon may butang nga batok kanimo, biyai ang imong gasa didto atubangan sa halaran, ug lakaw; pakigdait una sa imong igsoon, ug unya, sa makabalik ka na, ihalad ang imong gasa.” (Mat. 5:23, 24) Oo, ang pangunang hinungdan sa atong pagpakigdait mao ang pagpahimuot kang Jehova nga Diyos. a

Ang usa ka kahimtang sa kongregasyon sa Filipos nagpasiugdag laing hinungdan kon nganong kita makigdait. Dihay problema nga mitungha tali sa duha ka Kristohanong babaye, si Euodia ug Sintique, nga nakatugaw gayod sa  kalinaw sa tibuok kongregasyon. (Filip. 4:2, 3) Ang ginagmayng kabingkilan nga dili dayon masulbad dali kaayong mahibaloan sa uban. Ang atong tinguha nga magpabilin ang gugma ug panaghiusa sa kongregasyon mopalihok kanato nga makigdait sa atong isigkamagtutuo.

“Malipayon ang mga makigdaiton,” nag-ingon si Jesus. (Mat. 5:9) Ang pagtinguha sa pakigdait makahatag ug kalipay ug katagbawan. Dugang pa, kini makaayo sa panglawas, kay “ang kalmado nga kasingkasing mao ang kinabuhi sa unod.” (Prov. 14:30) Sa laing bahin, lagmit masakit kita kon kita maghambin ug kayugot.

Bisan tuod kadaghanan sa mga Kristohanon mouyon nga kinahanglang magmakigdaiton, naghunahuna ka tingali kon unsaon pagsulbad ang ginagmayng kabingkilan. Atong susihon ang Kasulatanhong mga prinsipyo nga makatabang kanato.

Ang Kalmadong Pagpakig-estorya Makapasig-uli sa Kalinaw

Ang ginagmayng liki sa karsada kasagarang bulitan o tabonan ug semento aron dili modako. Matabonan o mapasaylo ba usab nato ang ginagmayng sayop sa atong mga igsoon? Lagmit epektibo kini sa pagsulbad sa ginagmayng kabingkilan, kay si apostol Pedro misulat nga ang “gugma magatabon sa daghang sala.”—1 Ped. 4:8.

Apan, ang problema usahay seryoso kaayo nga dili mahimong tabonan o kalimtan na lang. Tagda ang nahitabo sa mga Israelinhon human nila mapanag-iya ang Yutang Saad. Sa wala pa motabok sa Suba sa Jordan, “ang mga anak ni Ruben ug ang mga anak ni Gad ug ang katunga sa tribo ni Manases” nagtukod ug “usa ka halaran nga bantaaw kaayo.” Ang ubang mga tribo nagtuo nga ang maong halaran gigamit sa pagsimbag diyosdiyos mao nga dili nila mahimong pasagdan kini. Busa nangandam sila sa pagpakiggubat.—Jos. 22:9-12.

Lagmit gibati sa ubang mga Israelinhon nga may igo na silang pamatuod sa daotang buhat, ug kon sila kalit nga moatake diyutay rang kinabuhi ang makalas sa ilang kasundalohan. Apan inay magdalidali sa pag-atake, ang mga tribo sa kasadpan sa Jordan nagsugo ug mga tawo aron hisgotan ang problema uban sa ilang mga igsoon. Sila nangutana: “Unsa ba kining buhat sa pagkadili-matinumanon nga inyong gibuhat batok sa Diyos sa Israel sa pagtalikod karong adlawa sa pagsunod kang Jehova?” Ang tinuod, ang mga tribo nga nagtukod sa halaran wala makasala. Apan unsay ilang sanong sa maong akusasyon? Nakiglalis ba sila o nakigbungol sa mga nag-akusar kanila? Ang giakusar nga mga tribo mitubag sa malumong paagi, ug ilang gipatin-aw nga gibuhat nila kadto tungod sa ilang tinguha nga alagaron si Jehova. Ang ilang malumong tubag nakapreserbar sa ilang relasyon sa Diyos ug nakaluwas ug mga kinabuhi. Ang kalmadong pagpakig-estorya nakasulbad sa problema ug nagpasig-uli sa kalinaw.—Jos. 22:13-34.

Sa wala pa mohimog seryosong lakang, ang  ubang mga Israelinhon maalamong nakighisgot sa ilang problema uban sa mga tribo ni Ruben ug ni Gad ug sa katunga sa tribo ni Manases. Ang Pulong sa Diyos nag-ingon: “Ayaw pagdalidali sa imong espiritu sa pagkasuko, kay ang pagkasuko nagapuyo sa sabakan sa mga hungog.” (Eccl. 7:9) Ang Kasulatanhong paagi sa pagsulbad sa seryosong kabingkilan maoy pinaagig kalmado ug prangkang pagpakig-estorya. Panalanginan ba kita sa Diyos kon maghambin kitag kayugot ug dili makig-estorya sa tawo nga nakapasilo kanato?

Sa laing bahin, komosta kon dunay isigkamagtutuo nga mosukmat o kaha sayop nga moakusar kanato? “Ang tubag, kon malumo, makapahilayo sa kaaligutgot,” nag-ingon ang Bibliya. (Prov. 15:1) Ang giakusar nga mga Israelinhon nagpatin-aw sa ilang bahin sa malumong paagi, mao nga nasulbad ang problema. Busa bisan kinsa kanato ang unang moduol aron hisgotan ang problema, maayo nga pangutan-on nato ang atong kaugalingon, ‘Unsang mga pulonga, tono sa tingog, ug panggawi ang makapatunhay sa pakigdait?’

Gamita ang Dila sa Maalamong Paagi

Si Jehova nakasabot nga kinahanglan natong ipahayag kon unsay atong gibati. Apan, kon dili nato mahusay ang ginagmayng kabingkilan, basin ato kining itabi sa uban. Dali ra kitang makasultig sakit kon kita maghambin ug kayugot. Bahin sa dili maayong paggamit sa dila, ang Proverbio 11:11 nag-ingon: “Tungod sa baba sa mga daotan [ang lungsod] malumpag.” Sa samang paagi, ang walay-pagpugong nga sinultihan bahin sa isigkamagtutuo makatugaw sa kalinaw sa samag-lungsod nga kongregasyon.

Ang pagtinguha sa pakigdait wala magkahulogan nga dili na kita makahisgot bahin sa atong mga igsoon. Gitambagan ni apostol Pablo ang mga isigkamagtutuo: “Kinahanglang walay mangil-ad nga mga sulti nga mogula gikan sa inyong baba, kondili kanang bisan unsang sulti nga maayo nga makapalig-on sumala sa gikinahanglan, aron makahatag kinig kaayohan sa mga magapatalinghog. . . . Magmaluloton sa usag usa, magmalumo,  . . nga magpasaylo sa usag usa.” (Efe.4:29-32) Kon duolon kag igsoon nga nasilo sa imong gipanulti o gawi, dili ba mas sayon ang pagpangayog pasaylo ug pagpakigdait kaniya kon siya wala manaway kanimo sa nangagi? Sa samang paagi, kon nailhan kitang dili hinawayon sa atong mga isigkamagtutuo, mas daling makighusay sa dihang motungha ang kabingkilan.—Luc. 6:31.

Alagara ang Diyos “Abaga sa Abaga”

Tungod kay kita makasasala ug tawhanon, ang atong tendensiya mao ang paglikay niadtong nakapasilo kanato. Apan dili gayod kana maalamon. (Prov. 18:1) Ingong nahiusang katawhan nga nagsangpit sa ngalan ni Jehova, kita determinadong ‘moalagad kaniya abaga sa abaga.’—Sof. 3:9.

Ang dili maayong sinultihan o panggawi sa uban dili angayng makapaluya kanato sa pag-alagad sa Diyos. Pipila ka adlaw sa wala pa mamatay si Jesus ingong kapuli nga halad sa mga halad sa templo, ug human gayod sa iyang paghukom sa mga eskriba, iyang namatikdan ang kabos nga babayeng balo nga naghulog “sa tanan niyang panginabuhian” sa panudlanag bahandi sa templo. Gipugngan ba siya ni Jesus? Wala, hinuon gidayeg ni Jesus ang iyang maunongong pagsuportar sa kongregasyon ni Jehova niadtong panahona. (Luc. 21:1-4) Ang daotang binuhatan sa uban wala magpahigawas kaniya sa iyang katungdanan nga suportahan ang pagsimba ni Jehova.

Unsay atong sanong kon bation nato nga sayop o dili makataronganon ang gihimo sa usa ka igsoon kanato? Tugotan ba nato kini nga makaapektar sa atong bug-os-kalag nga pag-alagad kang Jehova? O magmaisogon ba kita aron husayon dayon ang bisan unsang ginagmayng kabingkilan aron motunhay ang pakigdait sa kongregasyon sa Diyos?

Ang Bibliya nagtambag kanato, “Kon mahimo kutob sa inyong maarangan, makigdinaitay sa tanang tawo.” (Roma 12:18) Hinaot nga magmadeterminado kita sa pagsunod sa maong tambag aron magpabilin kitang lig-on diha sa dalan sa kinabuhi.

[Footnote]

[Hulagway sa panid 17]

Kinahanglang tinguhaon ni Euodia ug Sintique ang pakigdait

[Hulagway sa panid 18]

Unsang mga pulonga, tono sa tingog, ug panggawi ang makapatunhay sa pakigdait?