Tok Blong Jeova i Wan Samting We i Laef

Ol Bigfala Poen Long Ol Leta Blong Jemes Mo Pita

KLOSAP 30 yia afta long Pentekos 33 K.T., disaepol Jemes, haf brata blong Jisas, i raetem wan leta i go long “ol twelef laen” blong ol man Isrel long saed blong spirit. (Jem. 1:1) Stamba tingting blong hem, hemia blong leftemap tingting blong olgeta blong holemstrong long bilif, mo blong stanap strong longtaem long trabol we oli fesem. Hem i givim advaes tu long saed blong ol nogud fasin we oli stap kamaot long kongregesen.

Long yia 64, jes bifo we Hedgavman Nero blong Rom i agensem ol Kristin, aposol Pita i raetem faswan leta blong hem, blong leftemap tingting blong ol Kristin ya blong oli stanap strong long bilif. Long namba tu leta we Pita i raetem i go long ol Kristin brata blong hem, hem i pulum olgeta blong oli mas lesin long tok blong God, mo hem i givim woning long saed blong dei blong Jeova we i stap kam. Yes i tru, yumi save haremgud sipos yumi lesin long ol tok we oli kamaot long ol leta blong Jemes mo Pita.—Hib. 4:12.

GOD I GIVIM WAES LONG OLGETA WE OLI PREA WETEM “BILIF”

(Jem. 1:1–5:20)

Jemes i raetem se: “Taem ol samting oli kam blong traem bilif blong man, be hem i stap stanap strong, hem i save harem gud, from we taem hem i winim ol samting ya we oli kam blong traem hem, God bambae i flasem hem olsem we oli flasem man we i win long faet.” Olgeta we oli ‘prea, oli mas bilif tru,’ nao Jeova i save givim waes we oli nidim blong stanap strong long ol traem we oli kasem.—Jem. 1:5-8, 12.

Olgeta we oli kam “tija” insaed long kongregesen, oli nidim bilif mo waes. Afta we Jemes i talem se ‘tang blong yumi i wan smol samting nomo’ we i save “spolem laef blong yumi,” hem i givim woning long yumi blong agensem ol fasin blong wol we oli save spolem fasin fren blong yumi wetem God. Mo tu, hem i soem rod long eniman we i sik long saed blong spirit, blong i save kamgud.—Jem. 3:1, 5, 6; 5:14, 15.

Ansa Blong Sam Kwestin Long Saed Blong Baebol:

2:13—?From wanem “man we i gat sore, hem i no save fraet se God bambae i jajem hem?” Taem yumi talemaot olgeta fasin blong yumi long fes blong God, hem i tingbaot fasin sore we yumi soem long narafala, mo i yusum ransom sakrefaes blong Jisas blong fogivim yumi. (Rom 14:12) ?Yu no ting se, hemia gudfala risen from wanem yumi mas mekem fasin sore i kam bigfala samting long laef blong yumi?

4:5—?Tok we Jemes i talem long vas ya i stap wea bakegen long Baebol? Jemes i no karem ol tok ya stret long wan vas blong Baebol. Be maet ol tok ya we God i pulum hem blong raetemdaon oli stap long bigfala tingting blong ol vas olsem Jenesis 6:5; 8:21; Ol Proveb 21:10; mo Galesia 5:17.

Ol Lesen Blong Yumi:

1:14, 15. Taem man i wantem tumas ol samting nogud, hem i save mekem sin. Taswe yumi no mas putum tingting blong yumi long ol nogud samting. Be yumi mas gohed blong ‘putum tingting blong yumi i stap strong’ long ol samting we oli bildimap bilif blong yumi, mo oli mas fulumap hat mo tingting blong yumi.—Fil. 4:8, NW.

2: 8, 9. Man we i ‘stap ona long ol rijman mo i stap luk ol puaman olsem rabis nomo,’ i agensem ‘wan loa blong God we i stamba blong ol narafala loa.’ From samting ya, ol Kristin oli no mekem i gud long wan man i bitim wan narafala man.

2:14-26. God i ‘sevem yumi, from we yumi bilif long Kraes, i no from ol samting we yumi mekem’ folem loa blong Moses mo ol Kristin wok blong yumi. I no naf blong talem nomo se yumi bilif long God, bilif blong yumi i mas go moa. (Efes. 2:8, 9; Jon 3:16) Bilif ya i mas pusum yumi blong mekem wanem we God i wantem.

3:13-17. “Waes we i kamaot long heven” i hae moa long “waes we i kamaot long wol ya, we i blong man nomo, mo we i kamaot long Setan.” Yumi mas ‘traehad blong kasem waes blong God olsem we yumi stap traehad blong faenem silva, no wan narafala  samting olsem, we man i bin berem.’—Prov. 2:1-5.

3:18. “Ol man blong mekem pis oli wok long kwaet fasin” blong planem sid blong gud nius blong Kingdom. Taswe i impoten we yumi no tinghae long yumi wan, yumi no talem ol tok we i mekem man i kros mo yumi no mekem ol raf fasin we i nogud olgeta, be yumi mas man blong mekem pis.

‘STANAP STRONG LONG BILIF’

(1 Pita 1:1–5:14)

Pita i pulum ol Kristin brata blong hem blong oli no fogetem hop blong olgeta, hemia “niufala laef” ya we bambae oli kasem long heven. Pita i talem long olgeta se: “Be yufala, God i jusumaot yufala blong yufala i laen blong hem. Yufala i pris blong King. Yufala i man blong wan kantri nomo, we yufala i tabu man blong God.” Afta we hem i givim sam advaes long saed blong fasin obei, hem i talem long olgeta se oli mas ‘gat wan tingting nomo. Oli mas gat sore long olgeta. Oli mas lavlavem olgeta olsem wan brata nomo, mo oli mas mekem i gud long olgeta, we tingting blong olgeta i stap daon.’—1 Pita 1:3, 4; 2:9; 3:8.

Pita i givim advaes long ol brata se: “Yumi kam klosap finis long taem we [fasin blong laef blong ol man Jiu] bambae i lus. From samting ya, yufala i mas wekap we tingting blong yufala i klia gud, mo yufala i mas blokem ol samting we yufala nomo i wantem, nao yufala i save prea.” Hem i talem long olgeta se: “Yufala i mas lukaot gud. Yufala i mas rere. . . . Yufala i mas stanap strong long bilif blong yufala, blong blokem [Setan].”—1 Pita 4:7; 5:8, 9.

Ansa Blong Sam Kwestin Long Saed Blong Baebol:

3:20-22 (NW)—?Olsem wanem baptaes i sevem yumi? Olgeta we oli wantem we God i sevem olgeta, oli mas baptaes. Be baptaes nomo i no save sevem yumi. God i mekem rod blong sevem yumi taem hem i mekem “Jisas Kraes i laef bakegen.” Man we i baptaes i mas bilif we hem i save sef from wan samting nomo, hemia from we Jisas i ded mo i laef bakegen, i go antap long heven, nao hem i “stap long raet saed blong God,” i stap rul antap long ol man we oli laef mo olgeta we oli ded. Baptaes we i stanap long bilif olsem, hemia nao samting we bambae i sevem yumi, olsem ‘eit man ya we oli stap sef taem bigfala wota i draonem wol ya.’

4:6 (NW)—“Gud nius i goaot” long “olgeta we oli ded.” ?Hu olgeta ya? Hemia ol man ya we oli no harem gud nius yet, ale oli ded long saed blong spirit from we oli ‘no bin obei long God nao oli mekem sin.’ (Efes. 2:1) Be afta, taem oli bilif long gud nius, i olsem we oli stat blong “laef” from we oli frengud wetem Jeova.

Ol Lesen Blong Yumi:

1:7. Sipos yumi wantem gat strong bilif, bilif blong yumi i mas kasem traem, blong pruvum se i tru. Strong bilif olsem i rili save “sevem yumi.” (Hib. 10:39) Taswe yumi no save tanraon blong gobak taem yumi kasem traem long bilif blong yumi.

1:10-12. Ol enjel oli wantem faenemaot mo kasem save olgeta dip save blong God we oli haed, we ol profet blong hem bifo oli raetem long saed blong kongregesen blong ol tabu Kristin. Be Jeova i stap soemaot klia ol samting ya tru long kongregesen ya nomo. (Efes 3:10, NW) ?Yu no ting se, yumi save folem eksampol blong ol enjel ya blong lukaot ‘ol tingting blong God we man i no save faenemaot, be spirit ya i save faenemaot olgeta’?—1 Kor. 2:10.

2:21. Blong folem eksampol blong Jisas, yumi mas rere blong safa bigwan blong leftemap hae rul blong God, nating we yumi mas ded from.

5:6, 7. Taem yumi putum ol trabol blong yumi long Jeova, bambae hem i halpem yumi blong putum wosip blong hem long fasples long laef blong yumi, bitim we yumi tingting tumas long wanem we i save hapen tumora.—Mat. 6:33, 34.

‘DEI BLONG JEOVA BAMBAE I KAM’

(2 Pita 1:1–3:18)

Pita i raetem se: ‘I no gat tok blong profet we i kamaot long tingting blong man nomo. Taem tok blong profet i kamaot, ol profet oli talem, be tabu spirit i stap givim tok long olgeta, nao oli talemaot tok we i kamaot long God.’ Sipos yumi lesin long ol profet tok ya, bambae yumi no lesin long ol tija “we tijing blong olgeta i no stret,” mo bambae yumi no foldaon long trap blong ol man nogud.—2 Pita 1:21; 2:1-3.

Pita i givim woning se: “Long taem blong Lasdei, bambae sam man oli save kamtru, we fasin blong olgeta blong wantem ol samting nogud, hem i bos blong olgeta. Olgeta ya bambae oli laf long yufala.” Nating se oli tok olsem, ‘dei blong Jeova bambae i kam olsem we man blong stil i kam.’ Pita i finisim leta blong hem wetem sam gudfala advaes we i go long olgeta we oli “stap wet long Dei ya blong God blong i kamtru.”—2 Pita 3:3, 10-12.

 Ansa Blong Sam Kwestin Long Saed Blong Baebol:

1:19—“?Moningsta” ya i hu, mo hem i kamtru wetaem, mo olsem wanem yumi save we hem i kamtru? Jisas Kraes nao i “moningsta” ya, afta we hem i kam king long Kingdom blong God. (Rev. 22:16) Long 1914, Jisas i stat rul olsem Mesaea King antap long olgeta samting we God i wokem, i olsem we wan niufala dei i stat. Taem ya we bodi blong Jisas i jenis, i soemaot haenem mo bigfala paoa we Jisas bambae i kasem taem hem i kam King blong Kingdom. Samting ya i makemgud se ol profet tok oli sua blong kamtru. Taem yumi lesin long ol tok ya we i mekem laet blong Jisas i saenaot i kam kasem tingting blong yumi, long taem ya nao yumi kasem save we Moningsta ya i kamtru finis.

2:4 (NW)—?Wanem ya “Tataros,” mo wetaem God i sakem ol enjel ya we oli agensem hem i go long Tataros? Taem ol spirit man oli go long Tataros i olsem we oli go kalabus, be ol man oli no go long Tataros. Hem i min se tingting blong ol spirit man ya i stap long tudak long saed blong plan blong God. Ol rabis enjel we oli stap long Tataros oli no save kasem laef long fiuja. Long taem blong Noa, God i sakem ol enjel we oli no obei long hem oli go long Tataros, mo bambae oli stap kalabus olsem gogo oli lus.

3:17—?I minim wanem taem Pita i talem se: “Yufala i kasem finis ol tok blong wekemap yufala, taem trabol ya i no kamtru yet”? Pita i tokbaot ol save we oli kasem finis long saed blong ol samting we bambae oli kamaot long fiuja, hemia ol tok ya we tabu spirit i talem long hem mo long ol narafala man we oli raetem Baebol. From we ol save ya i no fulwan, ol faswan Kristin oli no kasem save long evri smosmol samting we oli save kamaot long fiuja. Oli kasem save long sam bigfala samting nomo we oli mas kamaot.

Ol Lesen Blong Yumi:

1:2, 5-7 (NW). Taem yumi traehad blong gat ol fasin olsem bilif, stanap strong longtaem mo fasgud long God, samting ya i save halpem yumi blong kasem ol “stret save blong God mo Jisas.” Mo tu ol fasin ya bambae oli mekem se taem yumi kasem stret save ya, ‘yumi no save stap nating nomo,’ be bambae yumi “karem frut” long laef blong yumi.—2 Pita 1:8.

1:12-15. Blong “stanap strong long ol trutok,” yumi nidim blong harem olgeta bakegen mo bakegen. Yumi mekem samting ya taem yumi go long ol miting blong kongregesen, stadi yumi wan mo ridim Baebol oltaem.

2:2. Yumi mas lukaot se fasin blong yumi i no sakem doti long nem blong Jeova mo ogenaesesen blong hem.—Rom 2:24.

2:4-9. Taem yumi tingbaot ol samting we Jeova i mekem finis, yumi sua se hem “i save sevem ol man we oli bilif long hem, i save tekemaot olgeta long ol samting we i stap traem olgeta. Be ol man we oli no stret, hem i save holem olgeta oli stap long kalabus, gogo bambae bigfala Dei ya blong jajem man i kamtru.”

2:10-13 (NW). Nating se ol “haeman” ya, hemia ol Kristin elda, oli gat sam slak fasin mo oli mestem samtaem, yumi no mas tok nogud long saed blong olgeta.—Hib. 13:7, 17.

3:2-4, 12. Taem yumi lesin gud long “ol tok we ol tabu profet oli talem bifo, mo tok blong Masta mo Sevia blong yumi,” samting ya bambae i halpem yumi blong tingbaot se dei blong Jeova i klosap tumas.

3:11-14. Olsem olgeta ya we oli “stap wet long Dei ya blong God blong i kamtru,” yumi mas (1) “tabu” long ol fasin blong yumi, yumi holem ol klin fasin long saed blong bodi, tingting mo wosip; (2) yumi mas mekem ol wok ‘we God i wantem,‘ olsem talemaot gud nius mo mekem disaepol; (3) ol fasin blong yumi mo laef blong yumi i mas “klin gud,” i no mas gat wan doti blong wol i spolem; (4) i no mas “gat wan samting i rong” long yumi, i min se tingting we i klin i mas pusum yumi blong mekem samting; mo (5) yumi mas “gat pis”—pis wetem God, wetem ol Kristin brata sista, mo wetem ol narafala man.