Mga Pangunang Punto Gikan sa mga Sulat ni Santiago ug Pedro
Ang Pulong ni Jehova Buhi
Mga Pangunang Punto Gikan sa mga Sulat ni Santiago ug Pedro
HALOS 30 ka tuig human sa Pentekostes 33 K.P., ang tinun-an nga si Santiago—nga igsoon ni Jesus sa inahan—misulat ngadto sa “napulog-duha ka tribo” sa espirituwal nga Israel. (Sant. 1:1) Ang iyang tumong mao ang pag-awhag kanila nga magmalig-on sa pagtuo ug magmalahutayon atubangan sa mga pagsulay. Iya usab silang gitambagan nga tul-iron ang dili maayong mga kahimtang nga mitungha diha sa mga kongregasyon.
Sa wala pa lutosa sa Romanong Emperador nga si Nero ang mga Kristohanon niadtong 64 K.P., gisulat ni apostol Pedro ang iyang unang sulat ngadto sa mga Kristohanon, nga nagdasig kanila sa pagbarog nga malig-on sa pagtuo. Sa iyang ikaduhang sulat, nga iyang gihimo wala madugay human makompleto ang iyang unang sulat, gidasig ni Pedro ang iyang mga isigkamagtutuo sa paghatag ug pagtagad sa pulong sa Diyos ug gipasidan-an sila bahin sa nagsingabot nga adlaw ni Jehova. Sa pagkatinuod, kita makabenepisyo gayod kon atong hatagag pagtagad ang mga mensahe sa mga sulat ni Santiago ug Pedro.—Heb. 4:12.
ANG DIYOS NAGAHATAG UG KAALAM NIADTONG ‘NAGAPANGAYO DIHA SA PAGTUO’
“Malipayon ang tawo nga nagpadayon sa pag-antos sa pagsulay,” misulat si Santiago, “tungod kay sa pagkahimong inuyonan iyang madawat ang purongpurong sa kinabuhi.” Alang niadtong nagapadayon sa “pagpangayo diha sa pagtuo,” si Jehova nagahatag kanilag kaalam nga gikinahanglan sa paglahutay sa mga pagsulay.—Sant. 1:5-8, 12.
Ang pagtuo ug kaalam gikinahanglan usab niadtong “mahimong mga magtutudlo” sa kongregasyon. Human sa iyang paghubit sa dila ingong “usa ka gamayng sangkap” nga makahimo sa ‘paghugaw sa tibuok lawas,’ si Santiago nagpasidaan batok sa mga kiling sa kalibotan nga makadaot sa atong relasyon sa Diyos. Siya naghisgot usab kon unsay angayng buhaton ni bisan kinsa nga masakiton sa espirituwal aron siya maulian.—Sant. 3:1, 5, 6; 5:14, 15.
Tubag sa mga Pangutana Bahin sa Kasulatan:
2:13—Sa unsang paagi ang “kaluoy magmadaogon batok sa paghukom”? Sa dihang hukman na kita sa Diyos, iyang hinumdoman ang kaluoy nga atong gipakita sa uban ug pasayloon kita pinasukad sa halad lukat sa iyang Anak. (Roma 14:12) Dili ba angay kining magtukmod kanato nga magmaluluy-on usab?
4:5—Unsang tekstoha ang gikutlo dinhi ni Santiago? Wala magkutlo si Santiago ug espesipikong teksto. Apan, kining maong inspiradong mga pulong posibleng gipasukad sa diwa sa Genesis 6:5; 8:21; Proverbio 21:10; ug Galacia 5:17.
5:20—Kansang kalag ang maluwas gikan sa kamatayon niyang “makapabalik sa makasasala gikan sa sayop niyang dalan”? Ang usa ka Kristohanon nga makapausab sa usa ka mamumuhat ug daotan magaluwas sa kalag nianang mahinulsolong tawo gikan sa espirituwal nga kamatayon ug lagmit gikan sa walay kataposang kalaglagan. Siya nga makatabang sa makasasala niining paagiha ‘magtabon usab sa mga sala’ nianang tawhana.
Mga Leksiyon Alang Kanato:
1:14, 15. Ang sala magsugod pinaagi sa daotang mga tinguha. Busa, dili gayod kita angayng maghambin ug daotang mga tinguha. Hinunoa, angay kitang “magpadayon sa pagpalandong” sa mga butang nga makapalig-on ug pun-on ang atong hunahuna ug kasingkasing nianang mga butanga.—Filip. 4:8.
2:8, 9. Ang “pagpakitag paboritismo” supak gayod sa “harianong balaod” sa gugma. Busa, ang matuod nga mga Kristohanon dili angayng magpakitag paboritismo.
2:14-26. Kita “giluwas pinaagi sa pagtuo,” “dili tungod sa mga buhat” sa Balaod ni Moises o sa Kristohanong mga buhat. Ang pagtuo nagkinahanglan ug labaw pa kay sa pag-ingon lamang nga kita mituo sa Diyos. (Efe. 2:8, 9; Juan 3:16) Kini angayng mopalihok kanato sa pagbuhat sa kabubut-on sa Diyos.
3:13-17. “Ang kaalam nga gikan sa itaas” mas labaw gayod kay sa kaalam nga “yutan-on, mananapon, demonyohanon!” Kita kinahanglang ‘magpadayon sa pagpangita niini ingon sa tinagong mga bahandi.’—Prov. 2:1-5.
3:18. Ang binhi sa maayong balita sa Gingharian angayng ‘ipugas ubos sa malinawong mga kahimtang niadtong mga nagapakigdait.’ Kita kinahanglang makigdaiton ug dili mapasigarbohon, makiawayon, o magubtanon.
‘BAROG NGA MALIG-ON SA PAGTUO’
Gipahinumdoman ni Pedro ang iyang mga isigkamagtutuo sa ilang “buhi nga paglaom” sa usa ka langitnong panulondon. “Kamo maoy ‘usa ka piniling rasa, usa ka harianong pagkasaserdote, usa ka balaang nasod,’” si Pedro nag-ingon. Human siya mohatag ug espesipikong tambag bahin sa pagpasakop, si Pedro nag-awhag sa tanan sa pagbaton ug “samang panghunahuna, nga magpakitag pagbati alang sa isigkaingon, nga magbaton ug inigsoong pagbati, magmabination uban ang kalumo, magmapainubsanon sa hunahuna.”—1 Ped. 1:3, 4; 2:9; 3:8.
Sanglit “ang kataposan sa [Hudiyohanong sistema sa mga] butang haduol na,” gitambagan ni Pedro ang mga Kristohanon nga magbaton ug “maayong panghunahuna, ug magmabinantayon labot sa mga pag-ampo.” Siya miingon kanila: “Hupti ninyo ang maayong panghunahuna, magmabinantayon. . . . Barog kamo batok [kang Satanas], malig-on sa pagtuo.”—1 Ped. 4:7; 5:8, 9.
Tubag sa mga Pangutana Bahin sa Kasulatan:
3:20-22—Sa unsang paagi makaluwas kanato ang bawtismo? Ang bawtismo maoy usa ka kinahanglanon alang niadtong buot maluwas. Apan, dili ang bawtismo mismo ang makaluwas kanato, kay ang kaluwasan mabatonan lamang “pinaagi sa pagkabanhaw ni Jesu-Kristo.” Ang kandidato sa bawtismo kinahanglang motuo nga ang kaluwasan nahimong posible tungod kay si Jesus namatay ingong halad lukat, nabanhaw, ug “anaa sa tuong kamot sa Diyos,” nga may awtoridad sa mga buhi ug mga patay. Ang bawtismo nga gipasukad sa maong pagtuo maoy katumbas sa ‘pagluwas sa walo ka kalag latas sa tubig.’
4:6—Kinsa ang “mga patay” nga kanila “ang maayong balita gipahayag”? Sila mao ang kanhing mga ‘patay diha sa ilang kalapasan ug mga sala,’ o mga patay sa espirituwal, sa wala pa sila makadungog sa maayong balita. (Efe. 2:1) Apan human magpasundayag ug pagtuo sa maayong balita, sila ‘nabuhi’ sa espirituwal nga paagi.
Mga Leksiyon Alang Kanato:
1:7. Aron molig-on ang atong pagtuo, kini kinahanglang mapamatud-an o masulayan. Sa pagkatinuod, ang maong lig-on nga pagtuo ‘nagatipig nga buhi sa kalag.’ (Heb. 10:39) Kinahanglang dili kita mosibog tungod sa mga pagsulay sa atong pagtuo.
1:10-12. Ang mga manulonda nangandoy sa pagsud-ong ug pagsabot sa lawom nga mga kamatuoran nga gisulat sa mga manalagna sa Diyos sa kakaraanan maylabot sa kongregasyon sa dinihogang mga Kristohanon. Apan, kining mga butanga nadayag lamang sa dihang si Jehova misugod sa pagpakiglabot sa kongregasyon. (Efe. 3:10) Dili ba angay natong sundon ang panig-ingnan sa mga manulonda ug maningkamot sa pagsusi sa “lawom nga mga butang sa Diyos”?—1 Cor. 2:10.
2:21. Aron atong masundog ang atong Ehemplo, si Jesu-Kristo, kinahanglang andam kitang moantos bisan hangtod sa kamatayon aron mabayaw ang pagkasoberano ni Jehova.
5:6, 7. Kon atong itugyan kang Jehova ang atong kabalaka, siya motabang kanato sa paghupot sa matuod nga pagsimba ingong pangunang butang sa atong kinabuhi imbes mabalaka pag-ayo sa umaabot.—Mat. 6:33, 34.
“ANG ADLAW NI JEHOVA MOABOT”
“Walay panagna bisan kanus-a nga midangat pinaagi sa kabubut-on sa tawo,” misulat si Pedro, “hinunoa ang mga tawo nagsulti gikan sa Diyos samtang sila giagak sa balaang espiritu.” Ang pagpatalinghog sa tagna manalipod kanato batok sa ‘mini nga mga magtutudlo’ ug sa uban pa nga dili maayog impluwensiya.—2 Ped. 1:21; 2:1-3.
“Sa kataposang mga adlaw adunay mangabot nga mga mabiaybiayon uban sa ilang mga pagbiaybiay,” nagpasidaan si Pedro. Apan “ang adlaw ni Jehova moabot ingon sa usa ka kawatan.” Gitapos ni Pedro ang iyang sulat pinaagi sa usa ka maayong tambag alang niadtong ‘nagapaabot ug nagabutang kanunay sa hunahuna nianang maong adlaw.’—2 Ped. 3:3, 10-12.
Tubag sa mga Pangutana Bahin sa Kasulatan:
1:19—Kinsa ang “bituon sa adlaw,” o kabugason, kanus-a siya mosubang, ug sa unsang paagi kita nahibalo niini? Ang “bituon sa adlaw” mao si Jesu-Kristo human siya nahimong Hari sa Gingharian sa Diyos. (Pin. 22:16) Niadtong 1914, si Jesus misubang, ingnon ta, ingong Mesiyanikong Hari, nga nagpaila sa pagbanagbanag sa laing adlaw. Ang transpigurasyon, o pagkausab sa dagway ni Jesus, nagpakita sa iyang umaabot nga himaya ug gahom diha sa Gingharian, nga nagpasiugda sa pagkakasaligan sa mga tagna sa Diyos. Ang paghatag ug pagtagad niana maglamdag sa atong kasingkasing, sa ingon atong makita nga misubang na ang bituon sa adlaw o Kabugason.
2:4—Unsa ang “Tartaro,” ug kanus-a gitambog didto ang rebelyosong mga manulonda? Ang Tartaro maoy usa ka samag-prisohan nga kahimtang diin ang espiritung mga linalang lamang—dili mga tawo—ang itambog didto. Ang anaa niining kahimtang sa naglugitom nga espirituwal nga kangitngit dili makakita sa kahayag sa Diyos ni makasabot sa iyang katuyoan. Ang gitambog sa Tartaro wala nay paglaom. Ang Diyos nagtambog niining masinupakong mga manulonda sa adlaw ni Noe, ug sila magpabilin nianang gipaubos nga kahimtang hangtod nga sila laglagon.
3:17—Unsay gipasabot ni Pedro sa pamulong nga ‘nasayran nang daan’? Ang gitumong ni Pedro mao ang kahibalo bahin sa umaabot nga mga panghitabo, nga gipadayag sa Diyos kaniya ug sa ubang mga magsusulat sa Bibliya. Sanglit limitado lamang kining maong kahibalo, ang mga Kristohanon sa unang siglo wala mahibalo sa tanang detalye sa umaabot nga mga panghitabo. Igo lamang silang nahibalo kon unsay mahimong mahitabo.
Mga Leksiyon Alang Kanato:
1:2, 5-7. Kon atong ugmaron ang mga hiyas sama sa pagtuo, pagkamalahutayon, ug diyosnong debosyon kita mouswag sa “tukmang kahibalo sa Diyos ug kang Jesus,” ug kini makapugong kanato sa pagkahimong “dili aktibo o dili-mabungahon” maylabot niana nga kahibalo.—2 Ped. 1:8.
1:12-15. Aron magpabiling ‘lig-on diha sa kamatuoran,’ gikinahanglan nato kanunay ang mga pahinumdom, sama nianang atong makuha diha sa mga tigom sa kongregasyon, personal nga pagtuon, ug pagbasa sa Bibliya.
2:2. Angay kitang mag-amping nga ang atong panggawi dili makapasipala kang Jehova ug sa iyang organisasyon.—Roma 2:24.
2:4-9. Kon atong hunahunaon ang iyang gibuhat sa nangagi, kita makaseguro nga “si Jehova mahibalo kon unsaon pagluwas sa katawhan nga may diyosnong pagkamahinalaron gikan sa pagsulay, apan nagtagana sa dili-matarong nga katawhan alang sa adlaw sa paghukom aron pagalaglagon.”
2:10-13. Bisan pag ang “mga mahimayaon,” o mga ansiyano, masayop usahay, dili kita angayng mosultig pasipala batok kanila.—Heb. 13:7, 17.
3:2-4, 12. Ang pagpatalinghog pag-ayo sa “mga pulong nga gisulti kanhi sa balaang mga manalagna ug sa sugo sa Ginoo ug Manluluwas” motabang kanato nga mahuptan kanunay sa hunahuna ang pagkaduol sa adlaw ni Jehova.
3:11-14. Ingong mga tawong “nagapaabot ug nagabutang kanunay sa hunahuna sa presensiya sa adlaw ni Jehova,” kita kinahanglang (1) ‘mohimo ug balaang mga buhat sa panggawi,’ nga magmahinlo sa pisikal, mental, moral, ug espirituwal nga paagi; (2) magpasundayag ug mga buhat nga magbanaag sa “diyosnong pagkamahinalaron,” sama sa pagsangyaw sa Gingharian ug paghimog tinun-an; (3) maghupot sa atong panggawi ug personalidad nga “walay buling,” nga wala mahugawi sa kalibotan; (4) “walay lama,” nga magbuhat sa tanang butang uban ang maayong motibo; ug (5) “anaa sa pakigdait”—uban sa Diyos, sa atong mga igsoon, ug isigkatawo.