Bann pwen enteresan dan let Zak ek Pyer
Parol Zeova i vivan
Bann pwen enteresan dan let Zak ek Pyer
PRESKI 30 an, apre lapannkot lannen 33 N.L., disip Zak ki ti demi frer Zezi ti ekrir en let pour “sa douz tribi” Izrael spirityel. (Zak 1:1) Son bi ti pour ankouraz zot pour reste ferm dan lafwa e devlop landirans kan zot pe fer fas avek persekisyon. I ti osi donn bann konsey pour rektifye bann problenm ki ti’n devlope dan bann kongregasyon.
Lannen 64 N.L., zis avan ki Lanperer Romen, Nero, ti lans en kanpanny pour persekit bann Kretyen, zapot Pyer ti ekrir son premye let pour bann Kretyen, pour ankouraz zot pour reste ferm dan lafwa. Dan son dezyenm let ki ti swiv zis apre, Pyer ti ankouraz son bann frer ek ser Kretyen pour port latansyon lo Parol Bondye e averti zot konsernan gran zour Zeova ki pe vini. Sirman, nou kapab tir bokou byenfe kan nou port latansyon lo sa bann parol dan let Zak ek Pyer.—Ebr. 4:12.
BONDYE I DONN LASAZES BANN KI “DEMANN AVEK LAFWA”
Zak ti ekrir: “Byennere, sa dimoun ki reste ferm dan leprev, parski apre son leprev i pou resevwar kouronn lavi eternel.” Zeova i donn lasazes ki neseser pour andire dan leprev avek bann ki kontinyen “demann avek lafwa.”—Zak 1:5-8, 12.
Bann ki ‘ansennyen’ dan kongregasyon i osi bezwen annan lafwa ek lasazes. Apre ki i ti’n fer resorti ki lalang i “en pti parti lekor” ki kapab ‘sali lekor antye,’ Zak ti averti zot kont bann tandans sa lemonn ki kapab afekte nou relasyon avek Bondye. I ti osi fer resorti bann letap ki en dimoun ki malad spirityelman i devret pran pour kapab reganny son lasante spirityel.—Zak 3:1, 5, 6; 5:14, 15.
Larepons pour bann kestyon lo Labib:
2:13—Dan ki fason ‘mizerikord i ganny laviktwar lo zizman’? Kan nou pou bezwen rann kont pour sa ki nou’n fer devan Bondye, i pou pran an konsiderasyon lafason ki nou demontre mizerikord anver lezot e pardonn nou lo baz sakrifis son Garson. (Rom. 14:12) Pa sa i en bon rezon pour fer ki mizerikord i vin en kalite ki dominan dan nou lavi?
4:5—Ki sa verse ki Zak ti pe site la? Zak pa ti pe sit okenn verse spesifik. Me parkont, i tre probab ki sa bann parol enspire i baze lo sa panse zeneral ki ganny fer resorti dan bann tel verse parey Zenez 6:5; 8:21; Proverb 21:10; ek Galat 5:17.
5:20—“Sa ki re-anmenn en peser dan bon semen e fer li abandonn son lerer” pou sov lavi lekel? En Kretyen ki fer en peser abandonn son lerer, i sov lavi sa peser dan lanmor spirityel e petet osi dan destriksyon kan i repantir. Dan sa fason, sa dimoun ki ed sa peser, pou osi fer ki “en kantite pese” sa peser pou ganny pardonnen.
Leson pour nou:
1:14, 15. Pese i ganny komet apre ki en move dezir i devlope. Alor, nou pa devret kontinyen mazin lo en move dezir. O kontrer, nou bezwen kontinyen “mazin” lo bann keksoz ki batir nou spirityelman e ranpli nou lespri ek leker avek zot.—Fili. 4:8.
2:8, 9. Si nou “azir dan en fason diferan selon ran dimoun,” sa i tou lekontrer avek “sa lalwa R[wa]yal” lo lanmour. Alor, en vre Kretyen pa devret fer lapliferans.
2:14-26. Nou ganny “sove, par lafwa” e non pa akoz “rezilta travay” Lalwa Moiz oubyen aksyon ki bann Kretyen i fer. Lafwa i devret enplik plis ki zis dir ki nou krwar dan Bondye. (Efe. 2:8, 9; Zan 3:16) I devret pous nou pour azir an armoni avek lavolonte Bondye.
3:13-17. “Lasazes ki sorti dan lesyel” i sirman pli siperyer ki lasazes ‘lemonn, ki pa spirityel e ki sorti kot Dyab.’ Nou devret ‘kontinyen rod lasazes Bondye konmsi nou pe rod en trezor kasyet.’—Prov. 2:1-5.
3:18 (NW), [Vwar not anba lo paz]. Lagrenn sa bon nouvel i bezwen “ganny senmen dan lape par sa bann [ki pe fer lape].” I enportan ki nou vin bann dimoun ki kontan fer lape me pa bann dimoun ki arogan, brit oubyen kankan.
“RESTE FERM DAN LAFWA”
Pyer ti rapel son bann frer ek ser Kretyen konsernan zot “lesperans vivan,” en leritaz dan lesyel. Pyer ti dir zot ki zot “en ras ki’n ganny swazir, en group pret rwayal, en nasyon sen.” Apre ki i ti’n donn bann konsey spesifik konsernan soumisyon, i ti ankouraz zot tou pour annan “menm panse ek menm santiman; kontan kanmarad konman frer, annan konpasyon pour kanmarad e viv avek limilite.”—1 Pyer 1:3, 4; 2:9; 3:8.
Vi ki “lafen [sa sistenm Zwif ti] pros,” Pyer ti konsey son bann frer pour “viv en fason rezonnab avek en lespri vizilan pour [zot] kapab priye.” I ti dir zot: “Reste vizilan e vey byen. . . . Reste ferm dan lafwa e reziste [Satan].”—1 Pyer 4:7; 5:8, 9.
Larepons pour bann kestyon lo Labib:
3:20-22—Ki mannyer batenm i kapab sov nou? Batenm i en rekomandasyon pour bann ki anvi ganny sove. Parkont, zis batenm tousel pa kapab sov nou. An realite, se “rezireksyon Zezi-Kri” ki fer li posib pour nou ganny sove. En kandida batenm i bezwen annan lafwa ki i posib pour ganny sove selman parski Zezi in ofer son lavi konman en sakrifis, i’n ganny resisite e i pe “asize dan kote drwat Bondye.” Tou lotorite, lo bann vivan ek bann mor in ganny donnen avek li. Batenm ki baze lo en tel lafwa i koresponn avek sa laranzman kot ‘wit dimoun ti ganny sove atraver delo.’
4:6—Lekel sa “bann ki’n mor” avek ki “Levanzil ti ganny anonse”? Sa i sa bann ki’n ‘mor akoz zot fot ek zot pese’ oubyen ki ti mor spirityelman avan ki zot ti tann sa bon nouvel. (Efe. 2:1) Parkont, apre ki zot in met lafwa dan sa bon nouvel zot “viv,” parski aprezan zot annan en relasyon avek Zeova.
Leson pour nou:
1:7. Pour arive konn vre valer nou lafwa, nou lafwa i bezwen ganny teste. En tel lafwa for i sirman ‘prezerv lavi.’ (Ebr. 10:39) Nou pa devret esey evite ki nou lafwa i ganny teste.
1:10-12. Bann lanz i byen kontan pour konpran e konn sa laverite profon sorti kot Bondye ki bann profet dan lepase in ekrir konsernan bann Kretyen swazir. Me, sa bann keksoz ti vin pli kler selman kan Zeova ti konmans servi kongregasyon. (Efe. 3:10) Eski nou osi pa nou devret swiv legzanp bann lanz e fer zefor pour konpran “bann keksoz profon Bondye”?—1 Kor. 2:10, NW.
2:21. Par imit Zezi Kri, sa enn ki’n kit en legzanp pour nou, nou devret pare pour soufer menm ziska lanmor pour siport souvrennte Zeova.
5:6, 7. Kan nou desarz nou sousi oubyen lenkyetid lo Zeova, i pou ed nou kontinyen gard vre ladorasyon dan premye plas dan nou lavi olye ki nou trakas tro bokou lo sa ki sa zour swivan pou anmennen.—Mat. 6:33, 34.
‘ZOUR ZEOVA POU ARIVE’
Pyer ti ekrir: “Profesi pa’n ganny prezante par lavolonte imen me se Sent-Espri ki’n pous zonm pour anons mesaz Bondye.” Si nou port latansyon lo bann profesi, sa i kapab protez nou kont bann“fo ansennyan” ek lezot dimoun ki koronpi.—2 Pyer 1:21; 2:1-3.
Pyer ti averti: “Dan dernyen zour pour annan bann moker ki pou vin sikann zot” me “zour Senyer pou ariv konman en voler.” Pyer ti termin son let avek en bon konsey pour bann ki pe ‘esper sa zour e gard sa zour dan zot lespri.’—2 Pyer 3:3, 10-12.
Larepons pour bann kestyon lo Labib:
1:19—Lekel sa “zetwal granmaten,” kan i leve e ki mannyer nou arive konnen ki sa in arive? “Zetwal granmaten” i Zezi Kri apre ki i ti vin Lerwa dan Rwayonm Bondye. (Rev. 22:16) An 1914, Zezi ti leve konman Lerwa devan tou kreasyon, sa ti pe anons konmansman en nouvo zour. Transfigirasyon Zezi ti donn en avangou laglwar ki i ti pou gannyen dan son Rwayonm e sa i fer ki sa profesi i diny konfyans. Kan nou port latansyon lo sa profesi, nou pou ganny en pli bon konprenezon oubyen leklersisman ki fer nou konnen ki sa “zetwal granmaten” in leve.
2:4—Ki si sa “labim fernwanr” oubyen Tartar e kan ki sa bann lanz ki’n rebel ti ganny zete ladan? Dan langaz orizinal sa mo ki’n ganny tradwir “labim fernwanr” oubyen Tartar i en kondisyon, parey en prizon kot zis bann kreatir spirityel i ganny anprizonnen. I en leta kot zot dan en fernwanr spirityel konsernan plan merveye Bondye. Sa bann ki dan Tartar napa okenn lespwar pour lavenir. Bondye ti anvoy bann lanz dezobeisan dan Tartar dan letan Noe e zot pou reste dan sa kondisyon abese ziska ler zot ganny detrir.
3:17 (NW)—Ki Pyer ti oule dir par “konnesans davans”? Pyer ti pe refer avek konnesans lo bann levennman ki pou arive dan lavenir, ki ti ganny donnen davans par lenspirasyon avek li ek lezot ekriven Labib. Vi ki sa konnesans pa ti detaye, sa ti fer ki bann premye Kretyen pa ti konn tou detay konsernan bann levennman dan lavenir. Zot ti zis konn an zeneral kwa ki zot ti devret ekspekte.
Leson pour nou:
1:2, 5-7. An plis ki ed nou ogmant nou “konnesans [lo] Bondye ek Zezi nou Senyer,” kan nou fer en kantite zefor pour devlop bann tel kalite parey lafwa, landirans ek latasman avek Bondye, sa i kapab fer nou “aktif e prodiktif” an rapor avek sa konnesans.—2 Pyer 1:8.
1:12-15. Pour ki nou reste “byen etabli dan laverite,” nou bezwen kontinyelman ganny bann rapel, tel parey bann ki nou gannyen atraver nou bann renyon, letid endividyel ek lektir Labib.
2:2. Nou devret fer atansyon ki nou kondwit pa anmenn repros lo non Zeova ek son lorganizasyon.—Rom. 2:24.
2:4-9. Kan nou mazin sa ki Zeova ti fer dan lepase, nou kapab asire ki “[Zeova] i konnen ki mannyer i pou delivre bann dimoun ki atase avek li dan difikilte, e pou gard bann ki move pour pinisyon pour zour zizman.”
2:10-13. (NW) Vi ki bann ki “gloriye” setadir bann ansyen, i enparfe e parfwa zot fer fot, nou pa devret koz an mal lo zot.—Ebr. 13:7, 17.
3:2-4, 12. Kan nou port latansyon lo “bann parol ki bann sen profet in anonse depi lontan ek bann konmannman ki nou Senyer e Sover in donnen” sa pou ed nou gard antet ki zour Zeova i pros.
3:11-14. Konman bann ki pe “esper sa zour” nou bezwen (1) “anmenn en lavi sen,” gard nou fizikman, mantalman e moralman pir; (2) fer travay ki demontre “respe [oubyen “latasman,” NW] pour Bondye, tel parey bann ki relye avek sa travay predikasyon e fer disip; (3) gard nou kondwit ek personnalite “pir,” san tas dan sa lemonn; (4) nou devret “san repros,” e fer tou keksoz avek en bon motif e (5) reste “dan lape” setadir dan lape avek Bondye e avek nou bann frer ek ser Kretyen ek lezot dimoun.